Ntandiliko 11
11
Nnala wa Babeli
1Mmahiku anelo vanu vammalele va pachilambo vávele chihi na luga imo, na vátangola chihi uchimo. 2Bahi vanu pavatandilike kuhwena-hwena kuloja m'bali wa mashaliki#11:2 Munsitali auno ìnahululika kuva, vanu váhwena m'bali wa mashaliki au váhaloka m'bali wa mashaliki., nkuhwika nchilambo chikávele na machinga-machinga aneko ku Babiloni, nkuikalanga aneko. 3Bahi anevo vanu nkuhaulanila kuchidoni, “Hambi, tufyatule matofali koka tulayoche mmoto uchinga latandeke saana.” Bahi vanu anevo vátumidile matofali badala ya mayanga, na vátumidile lami kulundanyijija matofali anelo. 4Nkuhaulanila kavila kuchidoni, “ Hambi tuidenge imanga na nnala ulepîle namene, umbehwîka kumahunde uchinga tupate kumaikana na tunamwadilikane pachilambo chammalele.”
5Bahi Yahwe nkusulupuka kuhaloka kulihunde uchinga akailole aila imanga na anewo nnala uvachidenga vanu. 6Yahwe nkuhaula kuchidoni, “Ava vanu nni uvamo na vammalele nni vanu va luga imo, na anecho chivachitenda nni ntandiliko chihi wa àlalá lavambelatenda, bahi chinu chohecho chivambekudungila kuchitenda chichichitendeke. 7Bahi tusulupuke pachilambo tukaitimbange luga yavo uchinga vanapilikanane.” 8Bahi Yahwe nkuvamwadilihanyija kila pachinu, pachilambo chammalele, nkulekanga kuidenga aila imanga. 9Imanga aneyo nkuchemwa Babeli,#11:9 Babeli mana lake kutimbanyika. kwa kuva, aneko njo Yahwe kwanatimbenge luga ya chilambo chammalele, na kutandikila anepo pachinu, Yahwe nkuvamwadilihanyija vanu kila pachinu, pachilambo chammalele.
Kutandikila Shemu mpaka Ablamu
10Aino njo histoliya ya Shemu na vanu va nnukolo lwake. Paipitile myaka mivili bada ya livambwe, Shemu panavele na vyaka myamoja, nkummaleka Alifakisadi. 11Bada ya kummaleka Alifakisadi, Shemu nkuikala vyaka myatano, na mmyaka aneyo nkuvaveleka vana vanji, vachilume na vachimahe.
12Na Alifakisadi panavele na vyaka salasini na tano, nkummaleka Sela. 13Alifakisadi bada ya kummaleka Sela, nkuikala vyaka myanne na tatu, na mmyaka aneyo nkuvavaleka vana vanji vachilume na vachimahe.
14Na Sela panavele na vyaka salasini, nkummaleka Ebeli. 15Na bada ya kummaleka Ebeli, nkuikala vyaka myanne na tatu, na mmyaka aneyo nkuvaveleka vana vanji vachilume na vachimahe.
16Ebeli panavele na vyaka salasini na nne, nkummaleka Pelegi. 17Na bada ya kummaleka Pelegi, nkuikala vyaka myanne na salasini, na mmyaka aneyo nkuvaveleka vana vanji vachilume na vachimahe.
18Pelegi panavele na vyaka salasini, nkummaleka Leu. 19Na bada ya kummaleka Leu, nkuikala vyaka myambili na tisa, na mmyaka aneyo nkuvaveleka vana vanji, vachilume na vachimahe.
20Leu panavele na vyaka salasini na mbili, nkummaleka Selugi. 21Na bada ya kummaleka Selugi, nkuikala vyaka myambili na saba, na mmyaka aneyo nkuvaveleka vana vanji, vachilume na vachimahe.
22Selugi panavele na vyaka salasini, nkummaleka Naholi. 23Na bada ya kummaleka Naholi, nkuikala vyaka myambili, na mmyaka aneyo kuvaveleka vana vanji, vachilume na vachimahe.
24Naholi panavele na vyaka ishilini na tisa, nkummaleka Tela. 25Na bada ya kummaleka Tela, nkuikala vyaka myamoja kumi na tisa, na mmyaka aneyo nkuvaveleka vana vanji, vachilume na vachimahe.
26Tela pahwikihije vyaka sabini, nkutandilika kuvaveleka vana, yani Ablamu na Naholi na Halani.
27Na aino njo histoliya ya Tela na vanu va nnukolo lwake. Tela nkummaleka Ablamu na Naholi na Halani. Halani nkummaleka Lutu. 28Henga Halani ánihila muimanga ya Ulu ya Vakaludayo, muimanga yanavelekwejije, na uhiku anewo atatake ávele chihi momi. 29Bahi Ablamu na Naholi nkulomba. N'jawe Ablamu vánchema Salai, na n'jawe Naholi vánchema Milika. Milika na Isika vávele vana vachimahe vanga Halani. 30Na Salai ávele ntonga, nanga panavele na mwana.
31Tela nkuntwala mwanawe uvanchema Ablamu na Salai n'jawe Ablamu, chalumo na n'dukuluwe uvanchema Lutu, mwanawe Halani, vammalele nkuukananga ku Ulu ya Vakaludayo, nkulodya kuchilambo cha ku Kanaani. Henga pavakamwele ku Halani, nkuikalanga anepo. 32Tela áikele vyaka myambili na tano, nkuhila aneko ku Halani.
Επιλέχθηκαν προς το παρόν:
Ntandiliko 11: Chimakonde
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2020 Pioneer Bible Translators