Matíó 20
20
Ɔŋana wɔ́ bɔnyɛna lɛ́ndɛ́átɔ́ ɔ bikúílí bikúílí
1«Ɔ taká, Nɛmanɛna nɛ́ nɔɔ́mɛná nɛ́ lɛa hɔ́ákátɔ́ ɔ muití ɔmbɛ́la ɔwá a lɛ́á na ɛtɔbɔtɔ́bɔ́, a ná hútú fámá siísíə́ ɔ bɔnyɛna usiə ɛlɔ́áyɛ́ yáyɛ́á ɛtɔbɔtɔ́bɔ́. 2A ná ɔ́kɔ́nɔ́ na bəə́bu ɛlɔ́áyɛ́ mɔsábɔ́náná wɔ́ ɛcácɔ́ ɛ́mɔtɛ́ yɛ́ mɔnɛ́á ɔ buolí bɔ́ buɔsɛ́ bukimə. A ná bəə́bu lɔ́máká ɔ ɔwayɛ́ ɛtɔbɔtɔ́bɔ́. 3Ɔ ɛŋgɛ́ŋɛ́ ibo, a ná manyɔ́ híánaka ɔ bɔ́mɔtɛ́ bɔnyɛna usiə, a ná bɔ́mɔtɛ́ bɛndɔ yámá tɛ́nɛ́mákátɔ́ ɔ mɔndɔ́ŋɔ́ bá nɔ́ makátá bɔŋɔkɔ. 4A ná bəə́bu lɛná a sɛ́á: Nɔ́ ákáná tɔ́na ɔ buolí ɔ ɔwámɛ ɛtɔbɔtɔ́bɔ́ mbá mɛ bənú sábɔ́ná ɛ́sɛ́á yɛ́ ndɔ bísiə.» 5Bá ná ákáná ɔ buolí. Muití ɛtɔbɔtɔ́bɔ́ a ná ákáná tɔ́na ɔ bɔnyɛna ukəsíə́ ɔ kɔɔsɔ na ɔ ɛŋgɛ́ŋɛ́ ɛ́lálɔ́; a ná ɔ́kɔ́nɔ́ na bəə́bu ɛ́sɛ́á bə́búsíə́. 6Əlimə yɛ́ nɔ́yɛ́, hoóyi na ɛŋgɛ́ŋɛ́ ɛ́lánɔ yɛ́ bɛkɔlakɔ́lá, a ná híánáka ɔ bɔnyɛna bənə́bənə́ ɔ uhúlə́siə; a ná bɔ́mɔtɛ́ bɛndɔ ɛ́ná tɛ́nɛ́mákátɔ́ ɔ mɔndɔ́ŋɔ́. A ná bə́əbu batá a sɛ́á: «Ɛlɔ́áyɛ́ yatɛ́ nɔ ndɔ buɔsɛ́ bukimə túmbiə tɛ́nɛ́mákátɔ́ hɔ́yɛ́ ɛŋaná buolí əə́?» 7Bá sɛ́á: «Bɔkɔasɛ́á ata mɔndɔ a sá bəsú ɛ́ta ɔ buolí.» A ná bə́əbu bíhíə́níníə́ a sɛ́á: «Uwənú tɔ́ná nɔ ká nyɔ́ɔ́kɔ ɔ ɔwámɛ ɛtɔbɔtɔ́bɔ́.» 8Bɛkɔlakɔ́lá, muití ɛtɔbɔtɔ́bɔ́ a ná wayɛ́á mɔkɛndana maasɛ lɛ́na a sɛ́á: «Ɛ́lɛ́ákɛ́ná bɔnyɛna bəkimə, ɔ́ mɔɛ́ta tɛ́á sabɔna. Botólíníə́ ɔ báyɛ́ ɔbá bá ná tífə́níə́ ukutiminə ɔ buolí, mbá ɔ tifə́níə́ ɔbá bá ná taŋa.» 9Bɔnyɛna ɔbá bá ná líə́ ɔ ɛŋgɛ́ŋɛ́ ɛ́lánɔ yɛ́ bɛkɔlakɔ́lá bá ná ndáfáma, mɔndɔ tɛ́á a ná kusə́ ɛcácɔ́ ɛ́mɔtɛ́ yɛ́ mɔnɛ́á. 10Ɛnaka bɔnyɛna ɔbá bá ná líə́kə́ siísíə́ bá ákáná uwəbú mɔsábɔ́náná ɔwɛta, bá fɛkaka ɔwá wɔ́ ndɔ bákɔna yáyɛ́ná wɔ́ bɔsɔ́kɔ́, mba bá ná kusə́nə́ mɔndɔ tɛ́á ɛcácɔ́ ɛ́mɔtɛ́ yɛ́ mɔnɛ́á. 11Ɛnaka bá mɔsábɔ́náná ɛ́táka, bá ná botólíə́ á muití ɛtɔbɔtɔ́bɔ́ ɔ ubísə́kə́linə, 12bá sɛ́á: «Báaba bɔnyɛna bəkimə bá ná əbú nyɔ́ɔ́kɔ́ ɔbánɔ́ ɔŋgɛ́ŋɛ́ úmotí, mba, ɔ nɔ́ bəə́bu sábɔ́naka bɔkɔa bɔ́mɔtɛ́ ɛ́sɛ́á bəsú ɔbá tɔ ná bɔtɔmbɔ́ na hiɔtɔ́tɔ́ ísə́bíníə́ buɔsɛ́ bukimə.» 13Mba, a ná wɔmɔtɛ́ mɔnyɛna ɔ uwəbú ətíə́ bɛ́kámɔ́sɔ́na a sɛ́á: «Á ɔŋɔ́ámɛ! Mɛ sa aŋɔ́á mɔlɛ́má mɔbɛ́á kɛna, tátá tɔ ka ɔ́kɔ́nɔ na aŋɔ́á ɛlɔ́áyɛ́ mɔsábɔ́náná wɔ́ buolí bɔ́ buɔsɛ́ bukimə əə́? 14Ɛtá wə́wúə́ mɔsábɔ́náná nɔ́yɛ́, hɔalɛ́na ɔwámɛ busíə́. Ɛkasɛ mɛ wɔ́ɔwɔ mɔnyɛna sábɔ́ná hɔ́ánánátɔ́ ɛ́sɛ́á aŋɔ́á. 15Mɛ lɛ bá hɔ́ánánɛ́nátɔ́ ɔ ɔwámɛ nɛbɔ́ŋɔ ɔbɛ́kɛna ɛ́sɛ́á mɛ ndɔ hikiə əə́? Ataná, ɔ lɛa na ɛhɛ́tɛ́ bɔkɔasɛ́á mɛ lɛa ná mɔlɛ́má muɛsɛ əə́?» 16Nɔ́yɛ́, bə́limə bá ŋɔ híána bə́búsíə́; bə́búsíə́ bá híáná bə́limə.
Ɔ bikúílí bɛ́lálɔ́, Yə́susu a ndɔ yayɛ́á ɛmɔ́kɛ́ na nɛ́áyɛ́á nɛhɔŋɔa nɔŋɔna
(Mə́l 10.32-34; Lúk 18.31-34)
17Ikúílí ɔyɛ́á Yə́susu a ná báá ɔ bálaka ɔ Yəlúsalɛma, a ná nɛ́áyɛ́á niómo na báfandɛ́ nɛ́ bɔkɔ́nɛna bísúə́línə ɔ ɛmɛ́ŋɛ́, a ná bəə́bu lɛ́na a sɛ́á: 18«Isíŋáka, ɔ́ bəsú báaba ɔ Yəlúsalɛma, bá ŋɔ Mɔná wa mɔndɔ sɛmɛna ɔ bisə́lúkú bɛ́ bətitiəmahánɛna na bamanyumbə́ndə́. Bá ŋɔ wɛɛ́ya ɔ́nɔ́kɔ. 19Bá ŋɔ wɛɛ́ya sɛmɛna ɔ balɛmanyáhuɛlɛ́ ɔkɛaka ɔwá bá wɛɛ́ya kɛ́kɛ́lákɛ́na, bá ŋɔ wɛɛ́ya súbə́kə, bá ŋɔ wɛɛ́ya ɔ́mɔ́kɛna ɔ ɔmbásá. Mbá, əlimə yɛ mɔɔsɛ́ málálɔ́, a ŋɔ hɔŋɔa.»
Muəndú wa Sɛbɛtɛ́ a nɔ́ baná tuəniniə a Yə́susu ɛmɛ́ŋɛ́
(Mə́l 10.35-45; Lúk 22.25-27)
20Muəndú wa Sɛbɛtɛ́ a ná tɔ́mbálɛ́la na báyɛ́á baná báfandɛ́ á Yə́susu ɛmɛ́ŋɛ́; a na kiníə́ ɔkɛaka ɔwá a wɛɛ́ya bɔkɔa bata. 21Yə́susu a ná wɛɛ́ya batá a sɛ́á: «Yatɛ́ ɔ ndɔ siə əə́?» Muəndú a sɛ́á: «Bílíhə́níə́ mɛaŋɔ́á ɔwá bámɛ́á baná báaba báfandɛ́ bá ŋɔ tuənə ɔ ɔwáwɔ́ ɛmɛ́ŋɛ́; wɔ́ɔwɔ ɔwáwɔ mɔkátá ɔ bɛnɔ́mɛ, wə́ə́ní ɔ mɔkátá wɔ́ biəní ikúílí ɔyɛ́á ɔ ŋɔ báá ɔ ɔwáwɔ Nɛmanɛna.» 22Yə́susu a sɛ́á: «Nɔ lɛ ndɔ manya yatɛ́ ɔyɛ́á nɔ ndɔ bata. Nɔ óso ɔ mətəkəsənə uwisíbiniə ɔmá ɛkasɛ mɛ siəkínə əə́?» Bá sɛ́á: «Tɔ ŋɔ nɔ́yɛ́ óso.» 23Yə́susu a sɛ́á: «Óo! Yɛ́ báka taká ɔwá nɔ ŋɔ mámɛ́á mətəkəsənə ísə́biniə, mba, ɛlɔ́áyɛ́ utuənə ɔ ɔwámɛ ɛmɛ́ŋɛ́ ɔ ɛsalɛ yɛ́ mɔkátá ɔ bɛnɔ́mɛ mbá ata ɔ biəní, nɔ́yɛ́ yɛ́ lɛ ndɔ mɛaŋɔ́á sinə. Á yamɛ́á Isə́ bíbúə́ a ndɔ iŋgínə́ índiə ɔ bɛndɔ ɔbá a ná yɛɛ́ta tábɔ́nákɛ́na.» 24Ɛnaka niómo nɛ́ bɔkɔ́nɛna bá bɛ́ɛ́yɛ́ bɛtambá ɔ́kɔ́kɛ́na, bá ná bənísə́ líŋə́kínə. 25Yə́susu a ná bə́əbu tɔ́á bəkimə, a sɛ́á: «Nɔ ndɔ manya bənú bɛ́muɛ́tɛ́ ɔwá, bisə́lúkú bɛ́ mɔnɔŋɔ na balɛmanyáhuɛlɛ́ bá ndɔ bɔsɔ́kɔ́ manɛna na iŋgínə́ yikimə. 26Mba, yɛ́ sá hɔ́ánána ɔbáá nɔ́yɛ́ ɛlɔ́áyɛ́ ənú: Ɔ nifəŋə, mɔndɔ ɔwá a ndɔ siə ɔbáá mɔŋɛ́ŋa ɔ uwənú ətíə́, a ná hɔ́ánána ɔhíána mɔnyɛna wa bəkimə. 27Mɔndɔ mukimə tɔ́na ɔ uwənú ətíə́ ɔwá a ndɔ siə ɔbáá isə́lúkú, a ná hɔ́ánána ɔhíána yə́núə́ yɔɔlɛ́. 28Nɔ́yɛ́, Mɔná wa mɔndɔ, a ka ndasá, ɔ misí ɛlɔ́áyɛ́ bɛndɔ ɔnyɛna na bɔ́áyɛ́á buɔmɔ́ uwíndiə ɛlɔ́áyɛ́ ɔmbana wɔ́ bɛndɔ bəəŋí.»
Yə́susu a nɔ́ bəndímə́ndímə báfandɛ́ niŋəsiə
(Mə́l 10.46-52; Lúk 18.35-43)
29Ɛ́sɛ́á Yə́susu na báyɛ́á bɔkɔ́nɛna bá ná hɔ́álɛ́na ɔ bətínə́ yɛ Yəlíko, iloŋo yɛŋɛ́ŋa yɛ́ bɛndɔ yɛ́ ná wɛɛ́ya ɔŋgɔ́kɔ. 30Bəndímə́ndímə báfandɛ́ bá ka báá tuənə́tɔ́ ɔ ɛmɛ́ŋɛ́ yɛ ɛnɔ́mɛ, bá ná ɔ́kɔ́ ɔwá, Yə́susu a lɛa ɔ tɔ́mbáka. Bá ná botólíə́ ɔ ɔwayɛ́ ɔbaŋɛna, bá sɛ́á: «Á Isə́lúkú, á Mɔná wa Ndə́witi! Tɔ́kɔ́lɛ, wə́ə́ bəsú mahana!» 31Iloŋo yɛ́ bɛndɔ bá ná bə́əbu kɔ́áyɛ́ná bá sɛ́á bá nə́yə́níə́ yə́ə́bu; ata nɔ́yɛ́, bá ná ákánána ɔ busíə́ ɔ ɔwayɛ́ ɔbaŋɛna ɔ ɔyáyɛ́na, bá sɛ́á: «Á Isə́lúkú, á Mɔná wa Ndə́witi! Tɔ́kɔ́lɛ, wə́ə́ bəsú mahana!» 32Ɛnaka Yə́susu a tɛ́nɛ́má, a ná bəə́bu ɛ́lɛ́na, a sɛ́á: «Yatɛ́ nɔ ndɔ siə ɔwá mɛ kɛ́áka ɛlɔ́áyɛ́ ənú əə́?» 33Bá ná bíhíə́níníə́ bá sɛ́á: «Á Isə́lúkú, tɔ ndɔ əsú siə ɔwá mə́súə́ məə́sə má biubunə.» 34Ɛmɔ́kɛ́ yɛ́ ná Yə́susu itíə́, a ná bəə́bu itíə́lə ɔ məə́sə. Ɔ umisíúmə́ bá ná botólíə́ ɔ usinənə, bá ná wɛɛ́ya ɔŋgɔ́kɔ.
Επιλέχθηκαν προς το παρόν:
Matíó 20: tvu
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2019, CABTAL