Matíó 23
23
Yə́susu a ndɔ Bɛfalísia na Bamanyumbə́ndə́ ókósiə
(Mə́l 12.38-40; Lúk 20.45-47; 11.39-52)
1Yə́susu a ná ilúkunə yɛ́ bɛndɔ na báyɛ́á bɔkɔ́nɛna lɛ́na a sɛ́á: 2Abáka Bamanyumbə́ndə́ na Bɛfalísia bá bɛndɔ imbə́ndə́ úkúnəkiə ɔyɛ́á Mósisi a ná tínímə́kíə́. 3Nɔ́yɛ́, nɔ ná hɔ́ánána ɔ uwəbú ɔwɔkɛ́na na yatɛ́ yikimə ɔyɛ́á bá ndɔ bənú lɛna. Mba, nɔ lɛ ɔŋgɛ́na ɔ níə́búə́ nibítíkə. Ɔ taká, bá ndɔ laa yatɛ́ ɔyɛ́á bá sa ósó ɔkɛa. 4Bá ndɔ bɛndɔ malɔmɔ́ túə́niə ɔmá bəə́bu bɛ́múɛ́tɛ́ bá sa ósó ɔ maáta unyiŋəliniə ata na hɛnɔnɔ́. 5Bɛkɔa bikimə ɔbɛ́á bá ndɔ kɛa, bá ndɔ siə ɔwá bɛndɔ bá bəə́bu siəkínə. Bá ndɔ bɛkáŋa bɛ́ bɛsalɛ bɛ́ Mətilə má Huɛlɛ́ bítiŋə ɔ uwəbú mabɔ́ka, bá məbə́ŋú má bíə́búə́ bɛlɛŋa bɛ́ mabɛ́kálɛ́na təhəkiə. 6Bá hikəkiə ɔ utuənə ɔ bɛbɔ́ka bɛ́ tuúmə ɔ manɛ́áka na biɔkɔ́ bíbúsíə́ ɔ məə́bə má mabɛ́kálɛ́na, 7bá hikəkiə tɔ́na ɔwá bá bəə́bu hólókíə́ na hibə́təniə ɔ manáka, bá bəə́bu ɛ́lɛ́ákɛ́nɛ́ná bá sɛ́á: «Á Mulə́liə.» 8Mba uwənú, nɔ lɛ lumínə ɔwá bá bənú ɛ́lɛ́ákɛ́nɛ́ná bá sɛ́á: «Á Mulə́liə». Ɔ taká, nɔ lɛa na Mulə́liə ɔmɔtɛ́, bənú bəkimə nɔ lɛa bənísə́. 9Nɔ lɛ mɔndɔ ɛ́lɛ́nɛ́ná háha ɔ misí «á yəsúə́ Isə́» bɔkɔasɛ́á, nɔ báka na Isə́ ɛ́mɔtɛ́ ɔwá a lɛ́á ɔ nɔɔ́mɛná. 10Nɔ lɛ lumínə́ tɔ́na ɔwá bá bənú ɛ́lɛ́ákɛ́nɛ́ná: «Á Mɔmanɛna» bɔkɔasɛ́á, nɔ báka na Mɔmanɛna ɔmɔtɛ́ ɔwá a lɛ́á Mɛ́sia. 11Wɛ́ɛ́yɛ́ ɔwá a lɛ́á mɔŋɛ́ŋa ɔ uwənú ətíə́, a ná hɔ́ánána ɔbáá mɔnyɛna wa bɔsɔ́kɔ́ bəkimə. 12Wɛ́ɛ́yɛ́ ɔwá a ŋɔ bíbə́ləliə, Huɛlɛ́ a ŋɔ wɛɛ́ya lolosoliə, mba, wɛ́ɛ́yɛ́ ɔwá a ŋɔ bílólosoliə, Huɛlɛ́ a ŋɔ wɛɛ́ya bə́ləliə.
Yə́susu a ndɔ nɛbɛ́nyɔ́nyɔlɔ nɛ́ bamanyumbə́ndə́ na nɛ́ Bɛfalísia fə́mə́ləniə
(Mə́l 12.40; Lúk 11.39-52; 20.45-47)
13Ɛmɔ́kɛ́ na bənú, á bamanyumbə́ndə́ na Bɛfalísia. Nɔ báka babɛ́nyɔ́nyɔlɔ, nɔ ndɔ bɛndɔ ɛnɔ́mɛ yɛ́ Nɛmanɛna nɛ́ Huɛlɛ́ kuiyiə, bənú bɛ́muɛ́tɛ́ nɔ sɔ́ ŋɔ fínə, mba, bɛndɔ ɔbá bá ndɔ siə ufínə umə́, nɔ ndɔ bəə́bu kotiə. [14Ɛmɔ́kɛ́ na bənú á bamanyumbə́ndə́ na Bɛfalísia. Nɔ báka babɛ́nyɔ́nyɔlɔ, nɔ ndɔ bɛɛ́la bɛ́ bilíkə́ bɛ́ bəəndú ɔ́lɔ, nɔ mabɛ́kálɛ́na təhəkiə ɛlɔ́áyɛ́ bɛndɔ uwələ́mənəsiə. Ɛlɔ́áyɛ́ nɔ́yɛ́, yənúə́ ɛnya yɛ mikə́lə́kí yɛ́ ŋɔ báá na iŋgínə́ ɔ ɔyáyɛ́na yɛ́ bɔsɔ́kɔ́]. 15Ɛmɔ́kɛ́ na bənú á bamanyumbə́ndə́ na Bɛfalísia. Nɔ báka babɛ́nyɔ́nyɔlɔ, nɔ ndɔ húlə kɛnda ɔ nɔmɔ́ na ɔ misí mikimə ɛlɔ́áyɛ́ mɔndɔ ɔmɔtɛ́ ubísúínə ɔ uwənú ilúkunə yɛ́ bamanyumbə́ndə́, mba ikúílí ɔyɛ́á nɔ ná wɛɛ́ya bísúə́línə, á lumínínə, nɔ ndɔ híə́nəsiə ɛbɛ́ábɛ́á yɛ́ mɔndɔ ɔwá Huɛlɛ́ a ná hɔ́ánána ɔsɔ́kɔ́tɛa bikúílí bɛ́fandɛ́ ɔ uwənú ɔyáyɛ́na. 16Ɛmɔ́kɛ́ na bənú, á bamanyumbə́ndə́ na Bɛfalísia. Nɔ ndɔ bɛ́laa ɔwá bənú bakɛndana bɔsɔ́kɔ́ mbá nɔ́yɛ́ nɔ lɛ́á bəndímə́ndímə. Nɔ sɛ́á: Yɛ́ lɛ bá hɔ́ánánátɔ́ ɔwá mɔndɔ a bíkúmə́ ɔ niínyə nɛ́ Tɛ́mbɛlɛ. Mba yɛ́ lɛa hɔ́ánánátɔ ábá mɔndɔ a ná bíkúmə́ ɔ niínyə nɛ́ kóolo yɛ Tɛ́mbɛlɛ. 17Uwənú á bɛálála na bəndímə́ndímə! Ɔ taká, yatɛ́ yɛ́ lɛ́á yɛŋɛ́ŋa ɔ ɔyáyɛ́na, Koólo alɛ́ɛ́ Tɛ́mbɛlɛ, ɛ́yánɛ́ a ndɔ mɛɛ́ta nəŋəsiə əə́? 18Nɔ ndɔ laa tɔ́na nɔ sɛ́á: «Yɛ́ lɛ bá hɔ́ánánátɔ́ ábá mɔndɔ a ná bíkúmə́ ɔ niínyə nɛ́ niɔlɔ nɛ́ mahánɛna, mba, yɛ́ lɛa hɔ́ánánátɔ́ ábá mɔndɔ a ná bíkúmə́ ɔ niínyə nɛ́ nɛhánɛna nɛ́ tálátɔ́ ɔ niɔlɔ.» 19Á bəndímə́ndímə! Ɔ taká, Yatɛ́ yɛ́ lɛ́á yɛŋɛ́ŋa, nɛhánɛna alɛ́ɛ́ niɔlɔ nɛ́ mahánɛna, ɛ́yanɛ́ a ndɔ nɛ́táyɛ́ nɛhánɛna nəŋəsiə əə́? 20Mɔndɔ ɔwá a ndɔ bíkumə ɔ niínyə nɛ́ niɔlɔ nɛ́ mahánɛna, a ndɔ bíkumə ɔ niínyə nɛ́ bɛɛ́la bikimə ɔbɛ́á bɛ́ lɛ́á ɔmɔ́tɔ́yɛ́. 21Mɔndɔ ɔwá a ná bíkúmə́ ɔ niínyə nɛ́ Tɛ́mbɛlɛ, a ndɔ bíkúmə́ ɔ niínyə nɛ́ Huɛlɛ́ ɔwá a lɛ́á umə́. 22Mɔndɔ ɔwá a ná bíkúmə́ ɔ niínyə nɛ́ nɔɔ́mɛná, a ndɔ bíkumə ɔ niínyə nɛ́ hikómo hɛ́ Huɛlɛ́ ɔwá a lɛ́á tuənə́tɔ́ ɔ hiítə ɔmbáŋá. 23Ɛmɔ́kɛ́ na bənú, á bamanyumbə́ndə́ na Bɛfalísia. Nɔ báka babɛ́nyɔ́nyɔlɔ, nɔ ndɔ Huɛlɛ́ índiə ɛsalɛ ɛ́mɔtɛ́ ɔ mɛɛ́lɔ yɛ niómo nɛ́ bɛsalɛ bɛ́ bɛlɔŋɔ́tɛ́ bɛ́ məsəkətumbə́, bɛhányɔsɔ na tɔlɔa. Mba, nɔ fəliə ɔ bɛkɔa bɛ́ taká ɔ ɔyáyɛ́na uwinə́niə ɔbɛ́á umbə́ndə́ wɔ́ ndɔ siə: Taká, iwə́mɛɛ́lɔ na yɔkɛ́nana. Ɔ́ bɛkɔa bɛ́táyɛ́ nɔ́ ná hɔ́ánána ɔkɛa, ɛŋaná binə́binə́ ufəliə. 24Nɔ ndɔ bɛ́kɔ́lɔmɔna ɔwá nɔ ndɔ bɔsɔ́kɔ́ kɛndana, mba, nɔ lɛa yáyɛ́ná bəndímə́ndímə! Nɔ ndɔ məluku balɔna ɔkɛaka ɔwá nɔ lɛ tubóŋi mɛna. Mba, nɔ ndɔ samó mɛna mikimə. 25Ɛmɔ́kɛ́ na bənú, á bamanyumbə́ndə́ na Bɛfalísia, nɔ lɛ babɛ́nyɔ́nyɔlɔ bɔkɔasɛ́á, nɔ ndɔ əlimə yɛ bɛnyɛ́ná na bɛnɛ́ná nəŋəsiə mbá nɔ́yɛ́, ndɔ bɛɛ́ta úndúsiə na bɛɛ́la bɛ́ buíbi ɔbɛ́á bɛ́ ndɔ húlínə ɔ uwənú mɛlɛ́má. 26Mba ɔwáwɔ á Mɔfalísia, ɔ lɛa mundímə́ndímə! Naŋɔ́ nuúmə́ yɛ yáwɔ́á ɛnyɛ́ná nəŋəsiə mbá əlimə yɛ́ híáná naŋátɔ. 27Ɛmɔ́kɛ́ na bənú, á bamanyumbə́ndə́ na Bɛfalísia. Nɔ lɛa babɛ́nyɔ́nyɔlɔ, nɔ lɛa hɔ́ákátɔ́ ɔ minyə́ ɔyɛ́á bá ná tábɔ́náká muɛsɛ, mba, nuúmə́ yɛ́ lɛa úndúə́tɔ́ na biuhə́ bɛ́ bəwə́nú, na məndínə́ má məhə́ŋə məkimə. 28Uwənú tɔ́na, nɔ ndɔ sinənə bɛndɔ bátaká, mba, yə́núə́ mɛlɛ́má yɛ́ lɛa úndúə́tɔ́ na bɛfɛka bɛbɛ́á na mabɛ́nyɔ́nyɔlɔ. 29Ɛmɔ́kɛ́ na bənú, á bamanyumbə́ndə́ na Bɛfalísia, nɔ lɛa babɛ́nyɔ́nyɔlɔ, nɔ ndɔ bɔhɛ́nátɔtányɛ́ minyə́ mɛɛsɛ siminə, nɔ yɛ́ bɛndɔ bá bátaká tábɔ́naka, 30nɔ sɛ́á: «Ata tɔ báá ɔ ikúílí yɛ́ bíə́súə́ bisə́kínə́, há tɔ sa bɛ́lata na bəə́bu ɔ bɔhɛ́nátɔtányɛ́ ɔwɔ́nɔ.» 31Nɔ ndɔ bɛ́manya ɔwá nɔ lɛa ɛndɛkɛ yɛ bááyɛ́ ɔbá bá ná bɔhɛ́nátɔtányɛ́ ɔ́nɔkɔ. 32Nɔ́yɛ́, nɔ ndɔ hɔ́nala yatɛ́ ɔyɛ́á bíə́núə́ bisə́kínə́ bá ná botólíə́! 33Á hikúlə hɛ́ ɛmbɛ́nɛ, nɔ ndɔ fɛka ɔwá nɔ ŋɔ ənú ɛsɔ́kɔ́tɛa yɛ́ Huɛlɛ́ fɛ́ndɛa əə́? 34Ɛlɔ́áyɛ́ nɔ́yɛ́, ɛkasɛ mɛ bənú bɔhɛ́nátɔtányɛ́ lɔmɛna, bəmənyí na bamanyumbə́ndə́. Nɔ ŋɔ bɔ́mɔtɛ́ ɔ́nɔ́kɔ, nɔ́ bəə́bu ɔ́mɔ́kɛ́na ɔ ɔmbásá, nɔ́ bɔ́mɔtɛ́ súbə́kə́ na ɛŋɔ́ányɛ́ ɔ uwənú məə́bə má mabɛ́kálɛ́na, nɔ́ húlə́ bəə́bu ɔŋgɔkɔ tɔ́na ɔ bətínə́ bəkimə. 35Ɔkɛaka ɔwá, manɔ́ŋɔ́ məkimə má bátaká ɔmá má ná ólókókíə́ ɔ misí má kɔɛnɛ́na ɔ uwənú, ɔ botolokiə ɔmá Ábɛlɛ wataká ɔkafámáká ɔmá Sakalɛ́á, á mɔná wa Balakíə́ ɔwá nɔ ná ɔ́nɔ́kɔ́ ɔ ətíə́ yɛ ɛbɔ́ka yɛnaŋanaŋa na niɔlɔ nɛ́ mahánɛna. 36Ɔ taká, mɛ ndɔ bənú nɔ́yɛ́ lɛna ɔwá, Huɛlɛ́ a ŋɔ manɔ́ŋɔ́ má bááyɛ́ bɛndɔ bəkimə bataka ɔ yɛ́ɛ́yɛ́ ɛnyɔŋɔnɔ.
Malɛlá ɛlɔ́áyɛ́ Yəlúsalɛma
(Lúk 13.34-35)
37Á Yəlúsalɛma, á Yəlúsalɛma! Ɔwáwɔ ɔwá ɔ ndɔ bɔhɛ́nátɔtányɛ́ ɔ́nɔ, ɔ bááyɛ́ lúmə́kə na miɔkɔ ɔbá Huɛlɛ́ a ndɔ aŋɔ́á lɔ́mɛ́na, bikúílí bɛ́nɛ́á mɛ ná síə́kə ɔ báwɔ́á baná ɔ ɔtɔa ɛ́sɛ́á abáka miɔkɔ́ yɛ́ báyɛ́á baná tɔaka ɔ ɔwayɛ́ bibə́ku nuúmə́, mba, nɔ ka bɛ́sáŋɔna! 38Nɔ́ manyá ɔwá Huɛlɛ́ a ŋɔ yənúə́ miímə híə́nəsiə bɛhálálá. 39Ɔ taká, mɛ ndɔ bənú nɔ́yɛ́ lɛna ɔwá, ɔ botolokiə isíŋáka, nɔ sɔ́ ŋɔ mɛaŋɔ́á sinə tɔ́na ɔkafámáká ɔ ikúílí ɔyɛ́á nɔ ŋɔ laa nɔ sɛ́á: «Huɛlɛ́ á wɔ́ɔwɔ saná ɔwá a ndɔ húlínə ɔ niínyə nɛ́ Isə́lúkú.»
Επιλέχθηκαν προς το παρόν:
Matíó 23: tvu
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2019, CABTAL