Mə́líkusu 4
4
Ɔŋana wɔ́ muminə məfumə́
(Mat 13.1-9; Lúk 8.4-8)
1Yə́susu a ná manyɔ́ tuənə ɔ bɛndɔ bɛkɔa bɛ́ Huɛlɛ́ uwukúniə ɔ ɛsɛ́lɛ́ yɛ́ nɔmɔ́ nɛ́ Kalɛ́lɛa. Bɛndɔ bəəŋí bá ná kɔtákána ɔ ɔwayɛ́ ɛmɛ́ŋɛ́, a ná fínə́ ɔ isóyí ɔyɛ́á yɛ́ ná báá ɔ nuíyi. Bɛndɔ bá ná tɛ́nɛ́máka ɔ ɛsɛ́lɛ́ yɛ́ nɔmɔ́.
2A ná bəə́bu bɛkɔa úkúnə́kíə́ biəŋí ɔ tɔ́mbákɛna na ɛŋana, a sɛ́á: 3«Nɔ́ ɔ́kɔ́kɛ́na! Mɔndɔ ɔmɔtɛ́ a ka ákána ɔ məfumə́ uminə. 4Ikúílí a ná báá ɔ uminə, mɔ́mɔtɛ́ má ná kɔ́ákɔ́na ɔ ɛnɔ́mɛ; tunoní tɔ́ ná maáta tɔbɔkɔ. 5Mɔ́mɔtɛ́ má ná kɔ́ákɔ́na ɔ miɔkɔ ɔmbáŋá, ɛ́sɛ́á umbunə́ wɔ́ sa bá muiŋí. 6Ikúílí hiɔtɔ́tɔ́ hɛ́ ná fámá, má ná kálásáká bɔkɔasɛ́á, mɛkaŋá yɛ́ sa bá ɔ́nɛ́nátɔ. 7Mɔ́mɔtɛ́ má ná kɔ́ákɔ́na ɔ ətíə́ yɛ bɛkɛlɛ́. Ikúílí má ná lɔ́áka, bɛkɛlɛ́ bɛ́ ná maáta fɔta, má lɛ haa. 8Mɔ́mɔtɛ́ má ná kɔ́ákɔ́na ɔ misí mɛɛsɛ; má ná lɔ́áká muɛsɛ, má ná tɔtámátámá hákɛ́na: Moómo álálɔ́, moómo álɛ́ndálɔ, ɛbɔ́ɛ́yɛa ɔ indínə́ ɛ́mɔtɛ́.» 9Yə́susu a sɛ́á: «Wɛ́ɛ́yɛ́ ɔwá a lɛ́á na məlúə́ má ɔ́wɔ́kɔ́nɔ, á ɔ́kɔ́kɛ́na.»
Ɛlɔ́áyɛ́ yatɛ́ abáka Yə́susu a hɔ́kɛna ɔ ɛŋana
(Mat 13.10-17; Lúk 8.8-10)
10Ɛnaka Yə́susu a hɛ́kɛ́á na ilúkunə yɛ́ bɛndɔ, bɔ́mɔtɛ́ bɛndɔ ɔbá bá ná wɛɛ́ya nɛŋɛ́lɛ́na, na niómo na báfandɛ́ nɛ́ báyɛ́á bɔkɔ́nɛna, bá ná wɛɛ́ya bɔkɔa batá bɔ́ ɔŋana ɔwá a ná bɛndɔ tɛna. 11A sɛ́á: «Huɛlɛ́ a ka bənú iŋgínə́ índiə yɛ bɛkɔa bɛ́ bítímə́tɔ́ ɔmanya bɛ́ nɛ́áyɛ́á Nɛmanɛna, mba, bɛndɔ bá niə́lətíə́ bá ndɔ bəə́bu bɛkɔa bikimə tɛ́na ɔ ɛŋana. 12Yɛ́ báka ɔwá;
“Bá hiamaka, bá lɛ sinə́nə,
bá məlúə́ básɛakɛa, bá lɛ ɔ́kɔ́nɔ́ ɔkɛaka ɔwá,
bá mɛlɛ́má kɔ́ŋɔ́ná mbá Huɛlɛ́ a bəə́bu mə́búə́ mabɛ́á niasɛ́na.”»
Binífúnínə́ bɛ́ ɔŋana
(Mat 13.18-23; Lúk 8.11-15)
13Yə́susu a ná bəə́bu batá a sɛ́á: «Ábá nɔ lɛ ndɔ binífúnínə́ manya bɛ́ ɔŋana wɔ́ muminə məfumə́, nəníə́ nɔ ŋɔ ka ɛŋana yikimə manyáka əə́? 14Muminə məfumə́ a báka ɛ́sɛ́á mɔndɔ ɔwá a ndɔ bɛndɔ Imbə́nú Yɛɛsɛ túmbə́ləniə. 15Məfumə́ ɔmá má ná kɔ́ákɔ́na ɔ ɛnɔ́mɛ, má báka ɛ́sɛ́á bɛndɔ ɔbá bá ná Imbə́nú Yɛɛsɛ yɛ Huɛlɛ́ ɔ́kɔ́kɛ́na; ikúílí ɔyɛ́á bá ná ɔ́kɔ́kɛ́na, Sátana a ndasá, a yɛɛ́ta húliə ɔ uwəbú mɛlɛ́má nuúmə́. 16Nɔ́yɛ́ tɔ́na, ɔmá má ná kɔakɔ́na ɔ miɔkɔ ɔmbáŋá, má báka ɛ́sɛ́á bɛndɔ ɔbá bá ná Imbə́nú Yɛɛsɛ yɛ Huɛlɛ́ ɔ́kɔ́kɛ́na, bá ná mɛɛ́ta káhá muɛsɛ na ubílə́nə. 17Bɔkɔa bɔ́mɔtɛ́, bá lɛ yɛɛ́ta niása ɔwá mɛkaŋá yɛ́ lɔ́áka. Bá ndɔ lumininə tɛ́tɛ́á yɛ ikúílí, ikúílí ɔyɛ́á məsə́kə má ná bəə́bu fámɛ́ná, ata yɛ́mɔtɛ́ indəkəsə ɛlɔ́áyɛ́ Ɛtambá yɛ́ Huɛlɛ́, bá yə́búə́ ilumininə bɛ́yákalɛla. 18Bənə́bənə́, ɔ́ bááyɛ́ ɔbá məfumə́ má ná kɔ́ákɔ́nɛ́na ɔ bɛsɛ́ndɛ́, bá báka bááyɛ́ ɔbá bá ndɔ Imbə́nú Yɛɛsɛ ɔ́kɔ yɛ Huɛlɛ́, 19mba, bisə́hísə́hí, nɛbɔ́ŋɔ nɛ́ misí na bilókílókí bɛ́ kɛaka ɔwá bá lɛ tɔtámátámá haa. 20Mɔ́mɔtɛ́, ɔmá má ná kɔ́ákɔ́na ɔ misí mɛɛsɛ, má báka ɛ́sɛ́á bɛndɔ ɔbá bá ndɔ Ɛtambá yɛ́ Huɛlɛ́ ɔ́kɔ, bá yɛɛ́ta lumininə, bá tɔtámátámá hákɛna: Indínə́ ɛ́mɔtɛ́ moómo álálɔ́, yɛ́mɔtɛ́ moómo álɛ́ndálɔ, ɔ yɛ́mɔtɛ́ tɔ́na ɛbɔ́ɛ́yɛa.»
Ɔŋana wɔ́ itiəkətiəkə
(Lúk 8.16-18)
21Əlimə yɛ nɔ́yɛ́ Yə́susu a sɛ́á: «Ɔ́kɔ! Abáka bá itiəkətiəkə húə́ ɔ ɛlɔŋgá nuúmə́ alɛ́ɛ́, bá ndɔ yɛɛ́ta háá ɔ matá má bɔaná əə́? Abáka bá yɛɛ́ta tála ɔ ɛtáka ɔmbáŋá. 22Yɛ́ báka ɔwá, bɛkɔa bikimə ɔbɛ́á bɛ́ lɛ́á bítímə́tɔ́, bɛndɔ bá ŋɔ bɛɛ́ta siəkinə; bikimə ɔbɛ́á bɛ́ lɛ́á ɔ hɛtɔkɔ bá ŋɔ bɛɛ́ta fə́mə́ləniə ɔ mianyɔ́. 23Ábá mɔndɔ a lɛa na məlúə́ má ɔ́wɔ́kɔ́nɔ, á ɔ́kɔ́kɛ́na!» 24Yə́susu a ná manyɔ́ ɔ uwəbú lɛna a sɛ́á: «Nɔ́ bɛkɔa bíkókósókíə́ ɔbɛ́á nɔ ndɔ ɔ́kɔ bɔkɔasɛ́á, ɔ ɛnya ɔyɛ́á nɔ ndɔ bənə́bənə́ kɛa, yɛɛ́ta á Huɛlɛ́ a ŋɔ bənú kɛaka hɔ́ánánátɔ. 25Ɔ taká, wɛ́ɛ́yɛ́ ɔwá a lɛ́á itíə́nə́tɔ́, a ŋɔ kusənə ɔ ɔyáyɛ́na. Mba, wɛ́ɛ́yɛ́ wa ɛŋaná bɔɔ́la, bá ŋɔ yayɛ́á tɛ́tɛ́á kátɔ́na ɔyɛ́á a lɛ́á itíə́nə́tɔ.»
Ɔŋana wɔ́ ɛlɔakalɔaka yɛ bɔɔ́la
26Yə́susu a ná manyɔ́ laa a sɛ́á: «Nɛmanɛna nɛ́ Huɛlɛ́ nɛ́ lɛa hɔ́ákátɔ́ ɔ məfumə́ ɔmá muminə a ná míə́kínə́ ɔ ɔwayɛ́ ɛtɔbɔtɔ́bɔ́. 27A bámɛnɛna ɔbánɔ́ ɔ hinó, ata ɛmbɛnyɛ́, bulúə́ na buɔsɛ́ tɛ́á, məfumə́ má lɔaka, má ɔ́mbɔkɔ, mɔ́táyɛ́ muminə a lɛ manyá nəníə́ nɔ́yɛ́ yɛ́ ndɔ bɛ́tɔ́mba. 28Misí bɛ́múɛ́tɛ́ yɛ́ ndɔ bɛɛ́la hə́siə; bɛ́ naŋɔ́ lɔaka, bɛ́ ɔ́mbɔ́kɔ mbá bɛ́ hákɛ́na. 29Ɔ ikúílí yɛ́ məhuə, muminə a botoliə ɔ mátáyɛ́ məndínə́ ɔsɔ́mba, bɔkɔasɛ́á bɛɛ́la bɛ́ ná ɔ́nɔ́kɛ́na.»
Ɔŋana wɔ́ mɔsámá wɔ́ hɛlɔa
(Mat 13.31-32; Lúk 13.18-19)
30Yə́susu a ná manyɔ́ laa a sɛ́á: «Ɔ yatɛ́ tɔ óso ɔ Nɛmanɛna nɛ́ Huɛlɛ́ ukətiə əə́? Ataná, ɔ́ uwə́níə́ ɔŋana tɔ óso uwənú ɔtɛ́na əə́? 31Nɛ́ lɛa hɔ́ákátɔ́ ɔ mɔsámá úmotí wɔ́ hɛlɔa; ikúílí ɔyɛ́á bá nɔ́ muítə nɛma ɔ misí, wɔ́ lɛa hɛsámásámá hɛ́ nifumə́ ətíə́ yɛ́ məfumə́ má misí məkimə; 32Mba əlimə yɛ ɔnɛma, wɔ́ lɔ́á, wɔ́ kɔmaka, wɔ́ áyaka mɔŋɛ́ŋa yáyɛ́ná mɛnɛmakɛ yɛ́ bɛlɔŋɔ́tɛ́ bikimə, wɔ́ mɛlɛ́áfɛ mɛŋɛ́ŋa hákɛna ɔ nindínə́ ɔnɛ́á, tunoní tɔ́ ɔmbáŋá tɔ́ mə́búə́ maana falabaka umə́.» 33Ɔ tɔ́mbákɛna ɔ ɛŋana miəŋí ɛ́sɛ́á wúuwu, a ka bá a ndɔ bəə́bu Ɛtambá nɔŋɔnɛna ɔ nindínə́ ɔnɛ́á, bá ka báá hɔ́ánánátɔ́ ɔ yɛɛ́ta ɔwɔ́kɔ. 34A sa bá a ndɔ bəə́bu hɛ́na ɛŋaná ɔ tɔ́mbɛ́na ɔ ɔŋana, mba, sulusulu, ɔ ɔwayɛ́ bɔkɔ́nɛna a ná bá a ndɔ bɛkɔa bikimə nífúninə.
Yə́susu a nɔ́ umbúínyi nə́yiə
(Mat 8.23-27; Lúk 8.22-25)
35Ɔ bɛkɔlakɔ́lá bɛ́ bɔ́táyɛ́ buɔsɛ́, Yə́susu a ná báyɛ́á Basɔ́másɔma lɛ́na a sɛ́á: «Tɔ bíásɛ́na ɔ yííní tanɛ́ yɛ́ nɔmɔ́.» 36Bá ná bɛndɔ níása ɔkɛaka ɔwá bá úlúə́kə, bá ná Yə́susu ákánána ɔ isóyí ɔyɛ́á a ná bámɛ́nɛ́na. Bɛ́mɔtɛ́ bisóyí bɛ́ ka báá hoóyi na wɛɛ́ya. 37Nɔ́yɛ́, umbúínyi mɔŋɛ́ŋa wɔ́ ná botólíə́ ɔ uhúkə ɔ nindínə́ ɔnɛ́á iŋunu yɛ́ mənífə́ má nɔmɔ́ yɛ́ fíə́kinə ɔ isóyí nuúmə́, yɛ́ ka báá hoóyi na uwúnduə.
38Ɔ yɛ́táyɛ́ ikúílí, Yə́susu a ka báá ɔ hinó ɔ matá má isóyí, a nɔ́ mɔlɔ́á tála ɔ nɛátɛa ɔmbáŋá. Báyɛ́á Basɔ́másɔma bá ná wɛɛ́ya hunyíə́, bá sɛ́á: «Á Ába, yɛ́ lɛ ndɔ aŋɔ́á kɛa ata bɔkɔa nɔ́yɛ́ ɛ́sɛ́á tɔ nɔ́ ákána uwə́ə́ əə́?» 39Yə́susu a ná hɔnyɔ́á, a ná umbúínyi nə́yíə́, a ná nɔmɔ́ bámálɛ́na, a sɛ́á: «Náyá yə́ə́bu!» Umbúínyi wɔ́ ná nə́yə́níə́, ɛbɔ́ka yɛ́ ná nə́yə́níə́ yə́ə́bu. 40Yə́susu a sɛ́á: «Ɛlɔ́áyɛ́ yatɛ́ nɔ ndɔ kɔ́lɔ́ma əə́? Bɔkɔasɛ́á nɔ lɛ báá na nɛkɔmba əə́?» 41Ata nɔ́yɛ́, basɔ́másɔma bá ka báá na bɔkɔ́lɔ́ma bɔŋɛ́ŋa; bá laaka bəə́bú na bəə́bu bá sɛ́á: «Ɛ́yánɛ́ mɔndɔ wɔ́ɔwɔ ɔwá ata umbúínyi na nɔmɔ́ nɛ́ ndɔ wɛɛ́ya ɔ́kɛ́na əə́?»
Επιλέχθηκαν προς το παρόν:
Mə́líkusu 4: tvu
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2019, CABTAL