Juão 6
6
Jesus umusiya pão
1Asui arire Jesus uyasawa lagu ruaxara serawaa Galileya aintauserukawaa yuiri Tiberiade.
2Asui siya miraita aintausu sakakuera aintaumaa resewara umukaturu kuaita mãsiweraita.
3Asui Jesus uyupiri iwitera rese ape uwapika umbuewaita irumu.
4Nyãse kuayentuana judewita festa serawaa paskua.
5Asui Jesus usupiri sesa umaa kuaita siyawaita aintauri ipiri asui unyee Filipe supe:
—Mametaa yawasemu pão aintaumbau aramawaa?
6Yawe unyee nyãse uputari usaã umanduarisawa, nyãse ukuawate mayetaa umunya arama.
7Asui Filipe unyee ixupe:
—Duzentu dinyeru tiusika yapiripana arama pão aintaumbau arama yepe pedasu aintayaweyawe.
8Asui yepe umbuewaa Simão Pedru imu sera Andre umbeu Jesus supe:
9—Aikue yepe kurumi uriku sinku pão mukuĩ pirá miri, maitaa maa ainta, siyawaita miraita supe?
10Asui Jesus unyee:
—Pexari aintauwapika kuaita miraita, nyãse purangawaa kapĩ ape. Asui aintauwapika kuaji sinku mili pesua aintasiyasawa kuaita apigawaita.
11Asui Jesus upisika nyã pão asui umee rire grasa sese upartiri ainta supe kuaita uwapikawaita asui pirá yuiri maye aintauputari.
12Asui aintaapuana Jesus umbeu umbuewaita supe:
—Pemuatiri panye simirera tiarama yaiwa ainta.
13Asui aintaumunya maye umbeuwaa yawe asui aintaumuteresemu duzi sextu simirera aintaumbauwaa rire sinku pão.
14Asui kuaita miraita aintaumaa irumu kua milagri aintaumbeu:
—Supiwa aete kua utitikawaa uriwaa kua mundu kiti.
15Asui Jesus ukuawa irumu aintauputari aintauwafursari aintaruixawa arama ae asui usu aintasui iwitera kiti anyuira.
Uwata parana ara rupi
16Asui karuka rame umbeuwaita aintauwiye lagu rimbiwa kiti.
17Asui aintauwiye igara upe aintauyasawaa arama lagu ruaxara kiti Kafarnaum kiti. Asui pitunana umbaare Jesus usika aintapiri.
18Asui uri aintaruaxara iwitu furtiwaa asui gapenu ae.
19Asui aintauyapukui rire sinku u seis kilumetru aintaumaa Jesus uwata parana arupi uri aintapiri igara kiti, asui aintausikie turusu.
20Maa Jesus unyee ainta supe:
—Ixete kua, tepesikie.
21Asui suuri aintausuanti ae, asui aramete aintausikana maa kiti aintausuwaa igara upe.
Pão upakawaa kua Jesus
22Asui wirande kiti kuaita miraita upitawaita lagu ruaxara aintaumaa yepenyu igara uiku garapa kiti aintaukuawate tiJesus usu umbuewaita irumu nyãse umbuewaita aintausu aintapawate.
23Asui amu igara usika Tiberiade sui kuayentu isui aintaumbauwaa ape pão yaneruixawa umeewaa rire grasa.
24Asui kuaita miraita siyawaita aintaumaa irumu tiyamaa Jesus nẽ umbuewaita yuiri, aintauwiye igara upe aintausu arama Kafarnaum kiti.
25Asui aintauwasemu irumu ae lagu ruaxara kiti aintaunyee ixupe:
—Inde rembuewaa mairametaa resika kua kiti?
26Asui Jesus unyee ainta supe:
—Supiwa hambeu penye arama timaa pesikari ixe hamunya resewara milagri, anyunte pesikari ixe pembau resewara peapu kua pão.
27Tepepuraki sesewara kua pão ukanyemuwaa maa pepuraki sesewara kua tiwa kuri ukanyemu umeewaa penye arama kua usemuwaa umaa kua mundu maa yawe yanepaya Deus uxariwaa yawe.
28Asui aintaunyee ixupe arama:
—Maataa kuri yamunya, yamunya arama kua Deus muraki?
29Asui Jesus usuaxara ainta:
—Aete kua Deus muraki pexari arama pepia sese kua umunduwaa.
30Asui aintaunyee ixupe:
—Maataa milagri remunya yamaa yaxari arama yanepia nerese? Maataa kua remunyawaa?
31Yaneramunyaita aintauu pão serawaa mana kampu upe maye aintaumpinimawaa yawe kuxima, uxariana ainta supe arama pão iwaka suiwara.
32Asui Jesus unyee ainta supe:
—Supiwa hambeu penye arama umbaa Muize uxariwaa penye arama kua pão iwaka suiwara, maa sepaya uxariwaa penye arama kua pão supiwa iwaka suiwara.
33Nyãse Deus pão kua uwiyewaa iwaka sui uxariwaa sikuesawa mundu puraita supe arama.
34Asui aintaunyee ixupe:
—Yaneruixawa, rexari yande arama kua pão yawewarawate.
35Asui Jesus unyee ainta supe:
—Ixete kua pão upakawaa, awa uri sepiri nunka kuri upurara yumãsi, asui awa uxari ipia serese nunka kuri iisi.
36Maa hambeu penye arama:
—Pemaa pukusawa ixe tipexari pepia serese.
37Aintaruwi kuri sepiri panye kuaita sepaya umeewaita ixe arama, asui nẽ mairame kuri hamburi sesui ainta kuaita uriwaita sepiri.
38Nyãse tihawiye iwaka sui hamunya arama kuaye haputariwaa yawe, maa hamunya arama kuaye uputariwaa yawe kua umunduwaa ixe.
39Asui kua umunduwaa ixe tiuputari nẽ yepe haxari uyusupari aintasuiwara kuaita uxariwaita ixe arama maa uputari hasupiri ainta anyu aramawaa ara upe.
40Maa sepaya uputari muiri kuaita umaawaita taira uxariwaita yuiri aintapia sese aintauriku arama mundu nunkawaa upawa asui hasupiri kuri ainta anyu aramawaa ara upe.
Judewita aintaupurungita
41Asui kuaita judewita aintaupurungita Jesus rese nyãse umbeu:
—Ixete kua pão uwiyewaa iwaka sui.
42Asui aintaunyee:
—Maitaa tiserá Jesus kua Juze raira? Maitaa tiserá yakunyeseri ipaya imaya yuiri? Maitaa maa umbeu kuiri, hawiye iwaka sui?
43Asui Jesus unyee ainta supe:
—Tepepurungita penyepawate.
44Tiawa uri sepiri tirame urasu ixe arama ae kua sepaya umunduwaa ixe kua kiti, asuiwana kuri hasupiri ae anyu aramawaa ara upe.
45Kuaita utitikawaita aintaumpinima, Deus umbue kuri panye kuaita miraita, ape panye kuaita usenduwaita uyumbuewaita sepaya irumu aintauri kuri sepiri.
46Maa tiawa umaa sepaya Deus anyunte kua uriwaa Deus sui umaa ae.
47Supiwa hambeu penye arama:
—Awa kuri uxari ipia sese uriku kuri mundu nunkawaa upawa.
48Ixete kua pão upakawaa.
49Peramunyaita aintauu pão serawaa mana kampu upe, asui aintaumanu.
50Aete kua pão uriwaa iwaka sui aintauu arama kuri ae kuaita miraita tiarama kuri aintaumanu.
51Ixete kua pão upakawaa uwiyewaa iwaka sui, awa kuri uu kua pão upakate kuri ae yawewarawate, asui serukuera kua pão hameewaa ainta supe arama kuaita mundu puraita.
52Asui kuaita judewita aintauyupurungita aintapawa, aintaunyee:
—Maitaa upuderi uxari yau arama sukuera?
53Asui Jesus usuaxara ainta, unyee:
—Supiwa hambeu penye arama tirame peu sukuera kua usemuwaa umaa kua ara tirame peu suwi yuiri tikuri periku sikuesawa pepia upe.
54Awa uu serukuera uu yuiri seruwi uriku kuri mundu nunkawaa upawa asuiwana kuri hasupiri ae anyu aramawaa ara upe.
55Nyãse timbiu supiwa kua serukuera peu aramawaa supiwa yuiri kua seruwi.
56Awa uu serukuera uu seruwi yuiri uiku sepia upe asui haiku ipia upe yuiri.
57Kuaye sepaya upakawaa umunduwaa yawe ixe yawete yuiri hapakate ixe sesewara, yawete yuiri kua uuwaa seirumu upakate kuri ae.
58Aete kua pão uriwaa iwaka sui umbaa yepewasu ae irumu kua aintauuwaa kuaita peramunyaita asui aintaumanu, awa kuri uu kua pão upakate kuri ae yawewarawate.
59Aete kua Jesus umbeuwaa ainta supe umbue irumu ainta sinaguga upe Kafarnaum upe.
Umbuewaita aintauyumutawa
60Asui siya kuaita umbuewaita aintausendu irumu kua umbeuwaa aintaunyee:
—Iwasu inyenga, awataa upuderi usendu ae?
61Maa Jesus ukuawa ipia upe aintaupurungita inyenga resewara kuaita umbuewaita, unyee ainta supe arama:
—Maitaa peyumutawa sese kua hambeuwaa?
62Asui maitaa kuri penye pemaa rame kua usemuwaa umaa kua ara uyupiri rameana maa kiti uikuwaa primeru.
63Espiritu kua umbakawaa yande, timaa arama yanerukuera, kua senyenga hambeuwaa penye arama aete espiritu aete sikuesawa yuiri.
64Maa aikuete tiwaita uruyari pepiterupi. Maa Jesus ukuawate uyupiru rame kuaita uruyariwaita ukuawate yuiri awataa kua uentregari aramawaa ae.
65Asui unyee ainta supe:
—Sesewara hambeu penye arama tiawa uri sepiri tirame sepaya uxari uri.
Siya aintauxari ae
66Asui sesewara siya kuaita umbuewaita aintauxari ae, tiana aintausu putari sakakuera.
67Asui Jesus upurandu kuaita duziwaita, unyee ainta supe arama:
—Maitaa kuri penye pexari yuiri ixe?
68Asui Simão Pedru unyee ixupe:
—Seruixawa, awa ipiritaa maa yasu, inde rerikuwaa kua inyenga sese kua mundu nunkawaa upawa.
69Yaruyariana yakunyeseriana indete kua purangawaa Deus suiwara.
70Ape Jesus unyee ainta supe arama:
—Maitaa tiserá haparawaka penye duziwaita? Maa yepe pesuiwara Yurupari ae.
71Upurungita sese kua yepe aintasuiwara kuaita duziwaita uentregari aramawaa kuri ae sera Juda kua Simão Iskariute raira.
Επιλέχθηκαν προς το παρόν:
Juão 6: BBp
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO