Mateu 18
18
Awataa puranga piriwaa
1Asui aintauri Jesus ipiri kuaita umbuewaita aintaumbeu ixupe:
—Awataa kua puranga piriwaa aintapiterupi kuaita iwaka ruixawa imiraita?
2Asui Jesus usenui ipiri yepe taina kuairawaa uxari upuamu aintapiterupi aintaumaa arama panye.
3Asui umbeu:
—Supiwa hambeu penye arama, tirame petrukari pemanduarisawa tirame pemanduari taina yawe tikuri pewike iwaka ruixawa imiraita irumu.
4Maa awa uyumukuaira umanduarisawa iyawe kua taina aete puranga piri aintasui panye kuaita iwaka ruixawa imiraita.
5Awa usuanti yepe taina iyawe kua serera rese usuanti yuiri kuri ixe.
Uxariwaita amuita umunya puxi
6Awa uxariwaa aintaumunya puxi kuaita ipuiwaita uxariwaita ipia serese purangate maa yapukuari iayura upe ita ipusewaa yamburi arama ae parana kiti tiipiwaa upe.
7Puxi kuri aintarese kuaita mundu puraita, nyãse aintauxari amuita uganani ainta aintaumunya arama puxi. Maa aintaurikute aintauganani xingare ainta, maa upurara kuri kua uxariwaa amuita aintaumunya aintapuxuwerasawa.
8Ape kuri yepe neipi u yepe neipu uputari rame remunya puxi remunuka ae remburi arama nesui ae, puranga piri rewike mundu nunkawaa upawa kiti ipiimawaa inde, ipuimawaa yuiri tiarama aintaumburi inde tata kiti nunkawaa uwewaa upe mukuĩ ruaxara neipi neipu yuiri.
9Yepe ruaxara neresa uxari rame remunya puxi repikuĩ remburi nesui ae puranga piri rewike mundu tiwa upawa kiti yepe ruaxara neresa irumu tiarama aintaumburi inde tata kiti mukuĩ neresa irumu.
Uvelya uyusupariwaa
10Pemaa pesui yawaite pemutenyuntu kuaita ipuiwaita, kuiri hambeu penye arama, kuaita anjuita usaruwaita ainta aintaumaa sepaya ruwa yawewarawate iwaka kiti.
11Maa uriana kua unaseriwaa umaa kua ara umukaturu arama kuaita uyusupariwaita.
12Maitaa pemanduari sese kua apigawa urikuwaa sem uvelya, uyusupari rame aintasuiwara yepe uvelya, maitaa tiuxari kuaita nuventa nuvi uvelya usu arama iwitera kiti usikari arama kua uyusupariwaa?
13Hambeu penye arama, sã uwasemu rame kua uyusupariwaa suuri umaa ixupe panye aintasui kuaita nuventa nuvi tiwaita uyusupari isui.
14Yawete yuiri pepaya iwaka kitiwara tiuputari yepe ukanyemu aintasuiwara kuaita ipuiwaita.
Yepe umunya rame puxi
15Umunya rame inde arama puxi kua nemu resu ipiri rembeu ixupe ipekadu uyumimisawa upe miraita sui, usendu rame inde arama remuyuiriana ae Deus supe arama.
16Maa tirame usendu inde arama rerasu neirumu ipiri mukuĩ u musapiri uruyariwaita aintausendu arama maye umbeu kua umunyawaa inde arama puxi.
17Tirame usendu ainta supe rembeu sesewara ainta supe kuaita ingreja puraita, tirame usendu ainta supe kuaita ingreja puraita perikute pemaantu ixupe kuaye pemaawaa yawe ainta supe kuaita tiwaita uruyari publikanuita puxuwerawaita yuiri.
18Supiwa hambeu penye:
—Muiri kuaita pepukuariwaita kua mundu upe upukuari yuiri kuri ainta iwaka kiti. Asui muiri kuaita peyurawawaita kua mundu upe uyurawa kuri yuiri ainta iwaka kiti.
19Asui hambeu yuiri penye:
—Sepaya iwaka kiti umunya kuri ainta supe kuaye aintauputariwaa yawe kuaita mukuĩwaita pesuiwara kua mundu upe yepewasu rame aintaumanduariwaa sese kua aintaupuranduwaa irumu.
20Mame aintauyumuatiri serera rese u mukuĩ u musapiri haiku kuri aintapiterupi.
Muiri viajitaa yayuperduari
21Asui Pedru umusuaki Jesus unyee ixupe:
—Inde seruixawa, muiri viajitaa kuri haperduari seirumu kua umunyawaa ixe arama puxi, seti viaji sera?
22Jesus umbeu ixupe:
—Tihaxari reperduari ate seti viaji neirumu ae, maa setenta viaji seti.
Upurakiwaa puxuwera
23Ape kua aintaruixawa kuaita iwaka ruixawa imiraita umunya iyawe kua tuixawa umaawaa imiraita kunta.
24Asui usenui ainta ipiri asui aintaururi ixupe yepe udeveriwaa dezi mili.
25Asui tiuriku dinyeru upagari arama kua ikunta, ape suixawa umundu aintauvenderi ae ximiriku irumu, tairaita irumu yuiri panye imaaita yuiri upagari arama ikunta.
26Asui kua upurakiwaa ixupe uyurinipia suixawa supe upurandu irumu:
—Inde seruixawa resarure hapagari arama kuri inde arama panye hadeveriwaa.
27Asui pirasua suixawa umaa ixupe, asui uyurawa ae umukanyemu isui panye udeveriwaa.
28Asui kua upurakiwaa usuana suixawa ruka sui, asui uwasemu yepe upurakiwaa irumu udeveri ixupe arama sem dinyeru mirita, asui upisika ikurukawa upe uyuwika ae umbeu ixupe:
—Repagari ixe arama kua redeveriwaa ixe.
29Asui kua sumuara udeveriwaa ixupe uyurinipia ixupe upurandu irumu sasisawa rupite unyee ixupe:
—Resarure hapagari kuri inde arama ae.
30Asui tiuputari usaru asui umburi ae kadeya kiti upagari arama kua udeveriwaa.
31Asui kuaita amuita upurakiwaita aintaumaa maye umunya puxi ixupe kua aintarumuara asui sasiyara aintapia turusu, asui aintausu aintaruixawa ipiri aintaumbeu arama sesewara panye.
32Asui aintaruixawa usenui ae, asui umbeu ixupe:
—Inde repurakiwaa puxuwerawa hamukanyemuana panye nesui kua redeveriwaa ixe repurandu resewara seirumu.
33Maitaa timaa puranga pirasua remaa nerumuara kuaye pirasuawaa yawe hamaa inde?
34Asui suixawa ipiaiwa umaa ixupe, asui uxari ainta supe ae kuaita unupawaita ate upagari panye kua udeveriwaa.
35Yawete yuiri kuri umunya penye arama kua sepaya iwaka kitiwara tirame peperduari peirumu peimuita pepia sui.
Επιλέχθηκαν προς το παρόν:
Mateu 18: BBp
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO