Gênesis 13
13
Abrão Ló-yma Hitspalkajyawaka Piranapni
1Waneya Abrão yatka. Egito ruchpajya Nequebe tshinikowaka tshijne nwaka hyamta. Hhanunro koxa ptowru rimwalene hiyrun-koxa Ló waleymalu.
2Phurupotukni Abrão; rimwana wakane, prata, ouro koxa.
3Abrão Nequebe ruchpajyatka hyamta pa poktshikaka rutukamta haté rapoklu mitshikananu nikalumta pji hpanaxyawakako rapokatnaka wane potuko hpanawaxyatnaka Betel tshinikowaka hiyrunu Ai poktshi tshinikowaka hanikajiteya.
4Wane koxa mitshikananu altar hkamhiya Abrão; waneya wane potuko Abrão himalwutatkalu Hoyakalu.
5Ló himotsatlu Abrão wale koxa kapra hiprane híxona, wakane koxa híxona hiyrunu pantshi nikalumta kamhikolu hi heppika rimwa.
6Hiyáhoni campo swa hi hpoyahotna wanna ptowruneka wane rawyawakna klu tshinanu rimwalerna hixpotuko waneya hi hpoyahotna rimwakajyawakna.
7Waneya hyinuwaka hahkakakjeretna Abrão-pra hislahatshine, Ló-prane hislahatshineyma. Waneklu papko cananeu-nerune, hiyrunu ferezeu-nerune wane tshiji hwakanata.
8Waneya Abrão wan-tshinru Ló:
— Hi kihleru wale hikolukle wahkakajyawaka hita, pixa hiyrunu hitapra hislahatshine, pixapra hislahatshineyma klu tshinanu wmoletkaka.
9Hi he pixa stsikolu tshiji hitsrukakananu? Nanjityi putspalaxyawakapno; xawakni pnuretanu, pixa pasta sreta pyini, hita potuklu sreta nyanu seyni potuklu sreta pyini pixa waneya hita pasta sreta nyanu hita.
10Waneya Ló heknojtata retlu Jordão wennemta tshiji. Wale tshiji kihlehlu honha (wanekni mnukawa Tsru Hixikatshriwa Hoyakalu hma nikatkonuklunuwa mitshi Sodoma, Gomorra poktshikaka) Tsru Hixikatshriwa Hoyakalu hitaklecha pixka rixa, Egito tshijne pixka rixatka hatatjewa Zoar poktshi yapamtatshri pixka rixa.
11Waneya Ló nuretlu walenu rixyawakapa Jordão wenne kihlemta tshijiwaka hiyáhoni tkatshi hichpajyawaka sreta hyatka Ló hiyáhoni rutspalkajyana wanna.
12Abrão Canaã tshijne hwa seyni Ló nuretlu kihlemta tshijiwaka poktshinkaka hwiywaka hiyáhoni Sodoma poktshistsi rutakapjikananumta.
13Hetanu Sodoma hwatshine jejine hektutu kkamhaklerune Tsru Hixikatshriwa Hoyakalu hetanuya.
Tsru Hixikatshriwa Hoyakalu Hinkaklu Abrão Canaã Tshijne Renejyawakaplu Piranapni
14Ló hitspalaxinixkalu Abrão pnut-hohne Tsru Hixikatshriwa Hoyakalu wla tshinru Abrão:
— Xawakni peknojtatanu pyopkajyawaka pokoya.
15Klu tshinanu xye tshiji psoluko petleru nenekanyi pixa, pixa klopichane koxa, hikeklu hohne mnikawnakatupa.
16Nkamhanru piklopichane ksatuji pejnu rixyawakapna hiyáhoni satu yineru poyaho hitakyahokletkamkalu ksatuji waneya pixa piklopichane koxa poyaho hitakyahokletko.
17Ppalnanu pixa, xye tshiji psajrukanu rowuknu htsernu koxa klu tshinanu nenekanyi.
18Waneya Abrão yokmakapjitatka, tsru hahmunkaka yehi Mamre tshinkaluru, Hebron poktshistsi tshinikowaka hyatka. Waneya satu altar hkamha Tsru Hixikatshriwa Hoyakalu tshinanu.
Επιλέχθηκαν προς το παρόν:
Gênesis 13: mpdBiblia
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil