Gênesis 16
16
Sarai Hagar Piranapni
1Sarai, Abrão hnunro mwuhenewakleto seyni timwatkalo sato ttowrero egito-nero, thiwaka Hagar.
2Sarai wan-tshinru Abrão:
— Tsru Hixikatshriwa Hoyakalu himaletno nwuhenewaxyawakapa hiyáhoni pumumkanro ntowrero hikta wala wuhenewatanu hita kachrijru. Waneya Abrão yijnaktokanutlo wane ttshinyawaka Sarai.
3Dez mhale Canaã tshijne rawakanata Abrão, Sarai haniklo ttowrero egito-nero, teneklu thanuru Abrão hhanunro tixyawakapa.
4Waneya rumumkaplo Hagar, tmichiwatatka. Waneya timaxnawa tmichiwaxyawakatka Hagar tohchinikanu teyijyalo ttowutjero.
5Waneya Sarai wan-tshinru Abrão:
— Pixako ptshinanu xye salewaktshi pixkakno. Pixasko nutaklo ntowrero seyni xawakni timaxnawa tmichiwaxyawakatka hiyáhoni teyikno. Xawakni Tsru Hixikatshriwa Hoyakalu hetahchinikanyehitwu pixa, hita.
6Waneya Abrão wan-tshinro Sarai:
— Pixa towre hajerni ptowrero. Hanukta kihlehopyi wane pixkakanro. Waneya Sarai hapnokatlo ttowrero waneya tasukatka Sarai hoji sreta tma wiywakanpatka.
7Waneya rukchijinixkalo Tsru Hixikatshriwa Hoyakalu towreru tenhohne hajeru Hagar, satu hakopha popriwaka tshijne hajeru hakophastsi twakanata. Xye hakopha Sur poktshistsi yaphapotatshristsi rawa.
8Wane htshinro:
— Hagar, Sarai towrero, hanhe puchpajya? Hanhe pyanu?
Waneya tuhitlu:
— Nasuka ntowutjero hoji sreta nmawiywakanupa.
9Waneya wane htshinro Tsru Hixikatshriwa Hoyakalu towreru tenhohne hajeru:
— Psatkapanu ptowutjero nwaka, pkahwakpiratanro.
10Wane pnute htshina hinkakletlo Tsru Hixikatshriwa Hoyakalu towreru tenhohne hajeru: “Nkamhanru pixa klopichane hixolewniywakapa hix-potuko hi poyaho hitakyahokletanna wanna klu tshinanu hixpotpakona.
11Waneya pnuteko htshina hinkakletlo Tsru Hixikatshriwa Hoyakalu towreru tenhohne hajeru: “Pmichiwatatka, jeji pwuhenetanu, Ismael putakhiwakatanru klu tshinanu Tsru Hixikatshriwa Hoyakalu yijnakotlu psalewaklu.
12Piwhene poro kmatsyiru pixka rixanu. Ptowru yineru hyotnetanu, wale koxa yotnetko hiyrunu rahkanna himolene psolhohneruka riwekka pchinika.”
13Waneya thiwakatlu Tsru Hixikatshriwa Hoyakalu tyinumsatjeru. “Pixa Netjeryi ttshinru Hoyakalu” klu tshinanu wane tixahchinikanuta, “Xawakniklahe netlu Netjeru?”
14Wale tshinanu hakopha hiwakatka Beer-Laai-Roi. Waneru hakopha Cades tshinikowaka, Berede tshinikowaka hanikajite rawa.
Ismael Matuxinri Piranapni
15Waneya Hagar matuwheneta jejni Abrão whene. Abrão hiwakatlu xye hiwhene, Hagar hiwuhenewaxyalu, Ismael rutakhiwakatlu.
16Abrão oitenta e seis mhaletkalu Hagar wuhenetatkalu Ismael.
Επιλέχθηκαν προς το παρόν:
Gênesis 16: mpdBiblia
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil