लूकाल 15
15
तप्सोत्ता गोर्रेता वेसुडि
1उंदि रोज कर वसुल कियानुर आनि पापि लोकुल्क येसुना पोल्लें केंजालय ओनगा जमा आतुर. 2जमा आतद हूळसि, परिसिल्कु आनि दर्मसास्त्रम कराहना गुरुल्क येसुन, “ई मनकल पापि लोकुल्कुन दग्गेर्क केय्सि उपसंतोर अल्हेने ओरतोनि कलियसि गाटोगुडा तिंतोर,” इंचि गुल्गसेक इत्तुर.
3ओर इनानद केंजसि येसु ओर्क उंदि वेसुडि वेहतोर. 4“मी लोप्पोटाल वरोनगा नूर गोर्रें मंतां इनकुंटु. अवुनाल उंदि गोर्रे तप्पिस होनानय्ते, कळमता टोंबै तोम्मिद गोर्रेन अग्गेन मंदा वाटसि, तप्सोत्ता आ उंदि गोर्रे दोर्कनदाका दान पहकालय होन्नोरा? 5पजा अद गोर्रे दोर्कतस्के, ओर वेल्लेन कूस आसि दान हट्टापोर्रो वाटकुंचि पीसि वांतोर. 6वासि, दंटातोर्कुन, लोता पक्कातोर्कुन केय्सि, ‘नावा तप्सोत्ता गोर्रे नाक दोर्कुता, नावातोनि कलियसि आनंदम कीम्ट,’ इंचि इंतोर. 7नना मीक वेहानद बतल इत्ते, बोर्क अय्ते मनसु मार्सकुनना अव्सरम हिल्ले, असोंटा टोंबै तोम्मिद मंदि नीतिमंतुल्कुना बारेमते आयना आनंदमकन्ना, वरोर पापि मनकल मनसु मार्सकुत्ते ओनाहाटीं स्वर्गमते बच्चोरो आनंदम आंता,” इंचि वेहतोर.
कोत्ताना वेसुडि
8“मर्रा उंदि वेसुडि वेहांतन केंजाट. उंदि मुरतटगा पदि एंडि कोत्तां मत्तां. आ पदि कोत्तानाल उंदि कोत्ता बगानो अरसि होत्ता. अस्के अद मुरतळ सिमलि निरिच्चि, लोनअंता हेय्सि आ कोत्ता दोर्कनदाका पहकंता. 9पजा अद कोत्ता दोर्कतस्के, दाना दंटातवुन, लोता दग्गेटवुन केय्सि, ‘नावद बगानो अरसोत्ता कोत्ता दोर्कुता, मिमेट नातोनि कलियसि आनंदम कीम्ट,’ इंचि इंता. 10नना मीक वेहांतन, इदुनलेसींगे वरोर पापि मनकल ओना पापमताल मनसु मार्सकुत्ते ओनाहाटीं स्वर्गमते पेन दाना दूतानतोनि आनंदम कींता,” इंचि इत्तोर.
लोताल पेय्सि होत्ता मर्रिना वेसुडि
11येसु इंकुंदि वेसुडि वेहातोर. “वरोर मनकंक इव्वुर मर्क मत्तुर. 12उंदि रोजु सिन्ना मर्रि ओना बाबोन, बाबा, संपत्तिताल बच्चोन नावा पालु मंता, अद नाकु पंचि हीम, इत्तोर. इत्तस्के ओना बाबो संपत्तितुन इव्वुर मर्कुंक पंचि हीतोर.”
13“कोन्नि रोजकुना पजा, सिन्ना मर्रि ओना पालुंक वाता संपत्तितुन बोत्तिगा पीकुंचि, बेकेनो लक्कु देसेम पेय्सि होत्तोर. अगा होंचि बोगम कबाह्कुने ओना संपत्तितुन नासडेम कीतोर. 14ओनगा मत्तव अंता मारतस्के आ देसेमते पेद्दा करवु अरता, ओनगा बतले हिलाकोंटा आता. 15अदुनहाटीं ओर आ देसेमता वरोर मनकनगा जीतम मत्तोर. आ मनकल ओना पोलाल्कुने पद्दिं मेहालय ओन लोहचीतोर.#15:15 यहुदि लोकुल्क पद्दिं मेहमळ इत्ते अंटोर्कन्ना सिन्नातनम इनकुंदुर. अल्हेने पद्दिन इटते, अवुना हव्विन तित्ते मुट्टुळ इनुंदुर. 16पजा ओर पद्दिं मेयाना मेतातुन तिंचि पीर निहकन बारे इंचि इनकुंदुर, गानि अद मेता इंका ओनकु बोरे हिय्या हिल्लुर.”
17“अस्के ओनकु लोता मति वाता, नावा बाबानगा बच्चुरो जीतागाह्क मंतुर, ओर तित्ते मारवच्चोन गाटो अगा मंता, गानि नना बारे इगे कर्वुंक हासेके मंतन. 18नना ई देसेम होळसि, नावा बाबानगा मल्सि दांतन. होंचि, ‘बाबा, स्वर्गमता पेन आनि नीकु विरोदमते नना पापम कीतन. 19इंदके नना नीवा मर्रिन लायक हिल्लेन गानि निहगा नाकुन नीवा जीतागानलेसीं ईरकुन इंचि इंतन,’ इल्हा इंतन, इनकुत्तोर. 20पजा ओर अगटाल ओना बाबोनहेके पेय्सतोर. पजा ओर ओना बाबाना लोतुक वेल्लेन लक्कु मत्तोर अस्के ओना बाबाल ओन हूळतोर. मर्रिन हूळसि बाबोंक वेल्ले पापम अनपिस्ता. अदुनहाटीं ओर एदुर वितसि होंचि ओन चातिक अदमुकुंचि बुरतोर. 21अस्के मर्रि बाबोन, ‘बाबा, स्वर्गमता पेन आनि नीकु विरोदमते नना पापम कीतन. इंदके नना नीवा मर्रिन लायक हिल्लेन,’ इत्तोर.”
22गानि बाबाल ओन लोन तच्चि, जीतागाह्कुनतोनि, बिराना होंचि बेसता कपडिं तच्चि ईनकु केरहट, ईना वेलुंक उंदि मुद्दा दोस्सट, काल्कुंक हेरपुह्क केरहट.#15:22 बाबो मर्रिंकु, ओना अदिकारम आनि कदरतुन मर्रा हीतोर. इदुन हुप्सालय वेलुंक मुद्दा दोसतोर, काल्कुंक हेरपुह्क केराह्तोर. 23अल्हेने बेस बल्सता कुर्रातुन तच्चि कोय्यट, अदुन तिंचि मनम कूस आकोम. 24बारित्ते, नावा मर्रि नहागटाल वेल्लेन लक्कु होंचि हासोत्ताप मत्तोर, इंदके ओर मल्सि वातोर. तप्सोंचि मत्तोर गानि इंदके दोर्कतोर, इंचि इत्तोर. इल्हा ओर कूस आयालय दल्गुतुर.
पेद्दा मर्रि होंग आंतोर
25“पजा बतल आता इत्ते, ओना पेद्दा मर्रि नेदहेके होंचि मत्तोर. ओर नेदाल लोन वायानेंके लोता दग्गेरा एवतोर अस्के ओन्क पाटां पारानद, एगरानद अल्किर केंजावाता. 26केंजा वातस्के ओर वरोन जीतागान केय्सि, लोन बतल जर्गुसंता? इंचि पूसकीतोर. 27अस्के आ जीतागाड, ‘नीवा तम्मुर बेस मल्सि वातोर. अदुनहाटीं नीवा बाबाल, बेस बल्सता कुर्रातुन कोय्या वेहातोर,’ इंचि इत्तोर.”
28“इद पोल्ले केंजसि पेद्दा मर्रिंक इरगा होंग वाता. ओर लोप्पो होळियोन इंचि पलातेन मत्तोर. अस्के ओना बाबाल पलाते वासि, ओन समजांचलय दल्गतोर. 29गानि पेद्दा मर्रि बाबोन, इच्चुं वर्सानाल नना नीवा सेवा कीसेके वातन, नीवद बद्दे आदेसतुन नना नेम्हा हिल्लेन. गानि नावा दंटातोरतोनि कलियसि कूस आयालय, नाकु निमे बस्केन उंदि एटि पोरिनगुडा हिया हिल्लिन. 30गानि नीवा ई मर्रि, नीवा संपत्तितुन बोगम कबाह्कुने पूरा नासडेम कीतोर, ओनाहाटीं निमे बेस बल्सता कुर्रातुन कोय्या वेहतिन, इंचि इत्तोर.”
31“इत्तस्के ओना बाबाल, नावा पेडा, निमे बस्केळकु नावातोनि मनांतिन, नहगा बतल-बतल अय्ते मंता, अद अंता पूरा नीवादे आंदु. 32गानि ईर नीवा तम्मुर वेल्लेन लक्कु होंचि हासोत्ताप मत्तोर, इंदके पिस्सि मल्सि वातोर. तप्सोंचि मत्तोर गानि इंदके दोर्कतोर. अदुनहाटीं मनम कूस आयमळ गावाले इत्तोर.” इल्हा वेहचि येसु वेसुडि वेहमळ महतोर.
Επιλέχθηκαν προς το παρόν:
लूकाल 15: esg-Deva
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2022, Wycliffe Bible Translators, Inc. All rights reserved.