ಯೋಹಾನ 5
5
ಪಾಣಿನ ಕೋಳಮ್‍ಕನ ಅಛ್ಛು಼ ಕರ‍್ಯೊತೆ
1ಅನ ಬಾದ್‌ಮ, ಯೇಸು ಯೆಹೂದ್ಯರ್‌ನ ಪೂಜಾ಼ ಥೂತೆ ಇನಖ್ಹಾಜೆ, ಯೇಸು ಯೆರೂಸಲೇಮ್‌ನ ಗಯೊ. 2ಯೆರೂಸಲೇಮ್ಮ ಮೇಂಢಾನು ಬಾಕಲ್ನಖನ್ನೆ ಏಕ್‌ ಕೋಳಮ್‌ ಥು, ಇಬ್ರಿಯ ವಾತೇಮ ಇನ “ಬೇತ್ಸಥಾ” ಕರಿ ನಾಮ್, ಹಿಜ್ಜಾ಼ ಪಾಚ಼್ ಛ಼ತ್ ಥು 3ಯೋ ಛ಼ತ್‌ಕನ ರೋಗ್‌ರಾಯೊ ರ‍್ಹವಾಳು ಘಣು ಅದ್ಮಿ ಪಡ್ಯುರ‍್ಹೇತೂಥು. ಇವ್ಣಾಮ ಕಾಣು, ಲಂಗ್ಡು, ಅಜು಼ ಲಕ್‍ವೊ ಮಾರ‍್ಯುಹುಯು ಥೂ.ಇವ್ಣೆ ಪಾಣಿ ಕದೆ ಹಲ್‍ಶೇಸ್‍ಕರಿ ಟಿವಯ್ ರ‍್ಹೇತುಥು. 4ಶನಕತೊ ಹರೇಕ್ ಬಾರ್ ಥೋಡು ವಖ್ಹತ್‌ನ ಬಾದ್‌ಮ ಪ್ರಭುನೊ ದೂತ ಉತ್ರಿ ಐನ್ ಕೋಳಮ್‍ನ ಪಾಣಿನ ಹಲಾವ್‍ತೊಥೊ ರೋಗ್‌ವಾಳು ಕೆಹೂಬಿ ಅದ್ಮಿ ಪಾಣಿ ಹಲಾದಿನ್ ಪಹಿಲೆ ಜಾ಼ತುಥೂಕಿ ಯೊ ಅಛ್ಛು಼ ಹುಯಿಜಾ಼ತುಥು. 5ಆಟ್‌ಉಪ್ಪರ್‌ ಡೋಡಿಖ್ಹ್‌ ವರಖ್ಹ್‌ಥೊ ರೋಗ್‌ಮ ಪಡ್ಯೊಥೋತೆ ಏಕ್‌ ಅದ್ಮಿ ಹಿಜ್ಜಾ಼ಥೊ. 6ಯೋ ಹಿಜ್ಜಾ಼ ಪಡ್ಯೋತೆ ಯೇಸುನೆ ದೇಖ್ಯೊ, ಯೋ ಘಣ ವರಖ್ಹ್‌ಥು ರೋಗ್‌ಮ ಥೋತೆ ಯೇಸುನ ಮಾಲುಮ್ ಥೂ. ಇನಖ್ಹಾಜೆ ಯೇಸುನೆ ಇನ, “ತುನ ಅಛ್ಛು಼ ಹೋಣು ಕರಿ ದಿಲ್‌ ಛಾ಼ ಕಿಶು?” ಕರಿ ಪುಛಾ಼ಯೊ.
7ಯೋ ರೋಗಿನೆ, “ಗುರು, ಪಾಣಿ ಹಲಾನಿ ವಖ್ಹತ್‌ಮ ಕೋಳಮ್ಮ ಮನ ಉತ್ರಾವವಾಳು ಕೋಣ್‌ಬಿ ಕೊಯ್ನಿ; ಮೇ ಉತರ‍್ನು ಕರಿ ಜಾ಼ವಾನ ಪಹಿಲೆಸ್, ಮಾರೇಥಿಬಿ ಅಗಾಡಿ ಬಿಜು಼ ಉತ್ರಿಜಾ಼ಸ್‌” ಕರಿ ಬೋಲ್ಯೊ.
8ಯೇಸು ಇನ, “ಉಪ್ಪರ್ ಉಟ್, ತಾರಿ ಬಿಛಾ಼ವ್ಣಿನ ಪಳ್ಳಿನ್, ಚಾ಼ಲ್” ಕರಿ ಬೋಲ್ಯೊ. 9ತದ್‌ನು-ತದೇಸ್‌ ಯೋ ಅದ್ಮಿನ ಅಛ್ಛು಼ ಹುಯಿಗಯು; ಇನೆ ಇನಿ ಬಿಛಾ಼ವ್ಣಿನ ಪಳ್ಳಿನ್ ಚಾ಼ಲ್ಯೊ.
ತದೆ ಸಬ್ಬತ್ ದನ್ ಹುಯಿರುಥು.#5:9 ಯೆಹೂದ್ಯರ್ನು ಕ್ಯಾಲೆಂಡರ್‌ಮ ಸಬ್ಬತ್ ದನ್ ಛಾ಼, ಇನ ಅರಾಮ್‌ನೊ ದನ್ ಕರೀಬಿ ಬೋಲಾಸ್. 10ಇನಖ್ಹಾಜೆ ಯೆಹೂದ್ಯರ್‌ನ ಅದಿಕಾರಿ ಯೋ ಅಛ್ಛು಼ ಹುಯೂತೆ ಅದ್ಮಿನ, “ಆಜ಼್ ಸಬ್ಬತ್ ದನ್, ಹುಯಿರುತೆ ಇನಾಖ್ಹಾಜೆ ಬಿಛಾ಼ವ್ಣಿನ ಪಾಡಾನು ಹಮಾರಿ ಖಾನುಲ್‌ನು ವಿರೋದ್ ಹುಯಿರ‍್ಹುಸ್‍” ಕರಿ ಬೋಲ್ಯೊ. #5:10 ನೆಹೆಮಿಯ 13:19; ಯೆರೆಮೀಯ 17:21
11ತದೆ ಇನೆ, “ಮನ ಅಛ್ಛು಼ ಕರ‍್ಯೊತೆ ಇನೇಸ್‌, ‘ತಾರಿ ಬಿಛಾ಼ವ್ಣಿನ ಪಳ್ಳಿನ್, ಚಾ಼ಲ್’ ಕರಿ ಬೋಲ್ಯೊ” ಕರಿ ಜ಼ವಾಬ್ ದಿದೊ.
12ಇವ್ಣೆ ಇನ, “ತಾರಿ ಬಿಛಾ಼ವ್ಣಿನ ಪಳ್ಳಿನ್, ಚಾ಼ಲ್ ಕರಿ ತುನ ಬೋಲ್ಯುತೆ ಯೋ ಅದ್ಮಿ ಕೋಣ್?” ಕರಿ ಪುಛಾ಼ಯು.
13ಕತೋಬಿ ಯೋ ಅಛ್ಛು಼ ಹುಯೂತೆ ಅದ್ಮಿನ ಯೇಸು ಕೋಣ್ ಕರಿ ಮಾಲುಮ್ ಕೋ ಥೂನಿ. ಯೋ ಝ಼ಗೋಪರ್‌ ಅದ್ಮಿನಿ ಭೀಡ್ ಥೀತೆ ಇನಖ್ಹಾಜೆ ಯೇಸು ಹಿಜ್ಜಾ಼ಥೊ ಪಿಷ್‌ಲಿ ಚ಼ಲೆಗಯೊ.
14ಅನ ಬಾದ್‌ಮ ಯೇಸು ಯೋ ಅದ್ಮಿನ ಮಂದಿರ್‌ಮ ದೇಖಿನ್‌, “ದೇಕ್, ಹಮ್ಕೆ ತುನ ಅಛ್ಛು಼ ಹುಯಿರ‍್ಹುಸ್‍ ಇನಖ್ಹಾಜೆ ಪಾಪ್ ಕರಾನು ಮ್ಹೆಂದೆ,ಶನಕತೊ ಅನೇಥಿ ತುನ ಖೆವೂಬಿ ಜಾ಼ಖ್ಹತ್ ಮುಶಿಬತ್ ನಕೊ ಆವಾದೆ.ಕರಿ ಬೋಲ್ಯೊ.
15ತದೆ ಯೋ ಅದ್ಮಿ ಹಿಜ್ಜಾ಼ಥು ಜೈ಼ನ್‌, ಇನ ಅಛ್ಛು಼ ಕರ‍್ಯೊತೆ ಯೇಸುನೇಸ್‌ ಕರಿ ಯೆಹೂದ್ಯರ್‌ನ ಅದಿಕಾರಿನ ಬೋಲ್ಯು. 16ಇನಾಖ್ಹಾಜೆ ಯೆಹೂದ್ಯವಾಳು ಯೇಸು ಸಬ್ಬತ್ ದನ್ಮ ಕಾಮ್ ಕರ‍್ಯೊತೆ ಇನಖ್ಹಾಜೆ, ಇನ ಖ್ಹತಾಯು. 17ಕತೋಬಿ ಯೇಸುನೆ ಇವ್ಣುನ, “ಮಾರೊ ಬಾ ಹಂಕೆತೋಡಿ ಕಾಮ್ ಕರುಕರಸ್,ಮೇಬಿ ಕಾಮ್ ಕರುಸ್” ಕರಿ ಬೋಲ್ಯೊ.
18ಅತ್ರೇಸ್ ಕಾಹೆತೆ ಯೊ ಖಲಿ ಸಬ್ಬತ್ ದನ್ನ ನಿಯಮ್ನ ಕೋ ತೋಡ್ಯೊನಿ, ಕತೋಬಿ ಯೊ ದೇವ್ ಇನೊ ಶೊಂತ್ ಬಾಕರಿ ಬೋಲ್ಯೊ ಅಜು಼ ಆಮ್ನಿಘೊಣಿ ಇನುಯೋಸ್ ದೇವ್ನು ಸಮಾನ್ ಕರಿಲಿದೋಥೊ. ಆ ವಾತೇನ ಬೋಲ್ಯೋತೆ ಇನೇಥಿ, ಯೆಹೂದ್ಯರ್ನು ಅದಿಕಾರಿ ಇನ ಮಾರ‍್ನುಸ್ ಮಾರ‍್ನು ಕರಿ ಖ್ಹಯಾಲ್‌ಥಿ ನಿರ್ಧಾರ್ ಕರ‍್ಯು.
ಛಿಯ್ಯಾನಿ ಅದಿಕಾರ್‌ನಿ ಬಾರೇಮ
19ತದೆ ಯೇಸುನೆ ಇವ್ಣುನ, “ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಬಾ ಕರಾಸ್ತೆ ಇನ ದೇಖಿನ್‌ ಛಿಯ್ಯೊ ಕರಾಸ್ ಪಣ್ಕಿ, ಇನೇಥಿ ಯೋಸ್‌ ಶಾತ್ಬಿ ಕರಾನ ಕೋ ಹುವಾನಿ. ಬಾ ಕರಾಸ್ತೆ ಇಮ್ಮಸ್ ಛಿಯ್ಯೋಬಿ ಕರಾಸ್. 20ಶನಕತೊ, ಬಾ ಇನ ಛಿಯ್ಯಾನ ಪ್ಯಾರ್ ಕರಾಸ್ ಅಜು಼ ಯೋ ಕರಾಸ್ತೆ ಖ್ಹಾರಾನ ಇನ ಒತಾಳಸ್. ಅತ್ರೇಸ್ ಕಾಹೆತೆ ಅನೇಥಿಬಿ ಮೋಟು ಕಾಮ್‌ಖ್ಹಾರು ಇನ ವತಾಳ್‌ಶೆ; ಇನ ದೇಖಿನ್‌ ತುಮೆ ಆಶ್ಚರ್ಯ ಕರ್ಶು. 21ಬಾ ಕಿಮ್ ಮರ‍್ಯಹುಯಾನ ಉಠಾಡಿನ್ ಜಾನ್‌ ದೇಸ್ಕಿ, ಇಮ್ಮಸ್ ಛಿಯ್ಯೋಬಿ ಇನ ಹೋಣುತೆ ಇವ್ಣುನ ಜಾನ್‌ ದೇಸ್. 22ಅತ್ರೇಸ್ ಕಾಹೆತೆ, ಬಾ ಕಿನಾಬಿ ತೀರ್ಪ್ ಕರ್ಶೆ ಕೊಯ್ನಿ. ತೀರ್ಪ್ ಕರಾನಿ ಭರ್‌ಪೂರ್‌ ಅದಿಕಾರ್‌ನ ಛಿಯ್ಯಾನ ದೀರಾಖ್ಯೊಸ್. 23ಶನಕತೊ, ತಮಾಮ್‌ ಜ಼ಣು ಬಾನ ಮರ್ಯಾದಿ ವತಾಳಸ್ತೆ ಇಮ್ಮಸ್, ಛಿಯ್ಯಾನಾಬಿ ಮರ್ಯಾದಿ ವತಾಳ್ಣು ಕರಿ ಇನೆ ಅಮ್ ಕರ‍್ಯೊತೆ, ಕೋಣ್ ಛಿಯ್ಯಾನ ಮರ್ಯಾದಿ ದೇಯಿಕೊಯ್ನಿಕಿ ಇವ್ಣೆ ಇನ ಮೋಕ್‌ಲ್ಯೊತೆ ಬಾನಾಬಿ ಮರ್ಯಾದಿ ಕೋ ದೇಯ್ನಿ.
24“ಮೇ ತುಮೂನ ಖ್ಹಾಚ ಬೋಲುಸ್ಕಿ, ಮಾರಿ ವಾತೇನ ಖ್ಹಮ್ಜಿನ್, ಮನ ಮೋಕ್‌ಲ್ಯೊತೆ ಇನ ನಂಬವಾಳಾನ ಹಮೇಶಾನಿ ಜಿ಼ಂದ್‌ಗಿ ಮಳಿರ‍್ಹೀಸ್‌. ಇನ ತೀರ್ಪ್ ಕೋ ಉಶೇನಿ; ಯೋ ಮರಣ್ಣ ಉಲಾಂಗಿನ್, ಜಾನ್‌ಮ ಪೇಶಿರ‍್ಹೋಸ್‌. 25ಮೇ ತುಮೂನ ಖ್ಹಾಚ ಬೋಲುಸ್ಕಿ, ಮರಿಗಯೂತೆ ಅದ್ಮಿ ದೇವ್ನ ಛಿಯ್ಯಾನಿ ಅವಾಜ಼್ ಖ್ಹಮ್‍ಜಾ಼ನಿ ವಖ್ಹತ್ ಆವ್‌ಶೆ. ಯೋ ವಖ್ಹತ್ ಹಂಕೇಸ್‌ ಐರ‍್ಹೀಸ್, ಖ್ಹಮ್‌ಜಾ಼ವಾಳು ಜಿವ್‌ಶೆ. 26ಬಾನ ಜಾನ್‌ ದ್ಯವಾನಿ ಶಕತ್ ಛಾ಼ತೆ ಇಮ್ಮಸ್, ಛಿಯ್ಯಾನಾಬಿ ಜಾನ್‌ ದ್ಯವಾನಿ ಶಕತ್ನ ದೀರಾಖ್ಯೊಸ್.#5:26 ಕತೊ, ಬಾಮ ಜಾನ್‌ ಛಾ಼ತೆ ಇಮ್ಮಸ್, ಛಿಯ್ಯಾಮಾಬಿ ಜಾನ್‌ ಛಾ಼ ಕರಿ ಮತ್‌ಲಬ್. 27ಅಜು಼ ಛಿಯ್ಯೊ, ಅದ್ಮಿನೊ ಛಿಯ್ಯೊ ಹುಯಿರ‍್ಹೋತೆ ಇನಖ್ಹಾಜೆ ತೀರ್ಪ್ ಕರಾನಿ ಹಕ್‌ನ ಬಾನೆ ಇನ ದೀರಾಖ್ಯೊಸ್. 28ಅನಿ ಬಾರೇಮ ಆಶ್ಚರ್ಯ ನಕೊ ಕರೊ; ಏಕ್‌ ಹಗಾಮ್‌ ಆವ್‌ಶೆ, ತದೆ ಮಖ್ಹಾಣ್ಯಮ ಛಾ಼ತೆ ಅಖ್ಖು ಇನಿ ಅವಾಜ಼್‌ನ ಖ್ಹಮ್ಜಿನ್, 29ಅಜು಼ ಇವ್ಣೆ ಮಖ್ಹಾಣ್ಯಥು ಉಠೀನ್ ಆವ್‌ಶೆ, ಕೋಣ್ ಅಛ್ಛಾ಼ನ ಕರ‍್ಯುಕೀ ಇವ್ಣುನ ಹಮೇಶಾನ ಜಾನ್ನಖ್ಹಾಜೆ ಪಾಛು಼ಜಿವ್ತು ಹುಯಿನ್ ಆವ್‌ಶೆ. ಖರಾಬ್ ಕರವಾಳು ತೀರ್ಪ್‌ನಖ್ಹಾಜೆ ಪಾಛು಼ಜಿವಿನ್ ಉಟ್‌ಶೆ. #5:29 ದಾನಿಯೇಲ್ 12:2
ಯೇಸುನಿ ಬಾರೇಮ ಸಾಕ್ಷಿಖ್ಹಾರು
30“ಮಾರು ಮೇಸ್ ಶಾತ್ಬಿ ಕರಾನ ಕೋ ಹುವಾನಿ; ಬಾ ಬೋಲಾತೆ ಇನ ಖ್ಹಮ್ಜಿನ್, ಮೇ ನ್ಯಾವ್ ಫೇಡಾವುಸ್, ಅನಖ್ಹಾಜೆ ಮಾರು ತೀರ್ಪ್ ಖ್ಹಾಚು಼ ಹುಯಿರುಸ್,ಅಜು಼ ಮಾರಿಸ್ ಮರ್ಜಿ ಚಾ಼ಲಾದೆ ಕರಿ ಆಖ್ಹ್ ಕರ‍್ಯೊಕೊಂತೆ, ಮನ ಮೋಕ್‌ಲ್ಯೊತೆ ಇನಿ ಮರ್ಜಿಸ್‌ ಚಾ಼ಲ್ನು ಕರಿ ಮೇ ಆಖ್ಹ್ ಕರುಸ್.
31ಮಾರಿ ಬಾರೇಮ ಮೇಸ್ ಸಾಕ್ಷಿ ಬೋಲಿಲಿದೋತೊ ಮಾರಿ ಸಾಕ್ಷಿ ಖ್ಹಾಚಿಸ್ ಕಾಹೆ. 32ಕತೋಬಿ ಮಾರಿ ಬಾರೇಮ ಸಾಕ್ಷಿ ಬೋಲವಾಳೊ ಏಕ್‌ ಜ಼ಣೊ ಛಾ಼, ಯೋ ಮಾರಿ ಬಾರೇಮ ಬೋಲಾಸ್ತೆ ಸಾಕ್ಷಿ ಖ್ಹಾಚು಼ ಕರಿ ಮನ ಮಾಲುಮ್. 33ತುಮೆ ಯೋಹಾನಕನ ಸಂದೇಶ್ ಪುಛೈ಼ಲ್ಯಾವಾಳ ಅದ್ಮಿನ ಮೋಕ್‌ಲ್ಯ, ಇನೆ ತುಮೂನ ಖ್ಹಾಚಿನಿ ಬಾರೇಮ ಸಾಕ್ಷಿ ಬೋಲ್ಯೊ.#5:33 ಯೋಹಾನ 1:19-27; 34ಮಾರಿ ಬಾರೇಮ ಅದ್ಮಿನಿ ಸಾಕ್ಷಿ ಮನ ಜ಼ರೂರತ್ ಕೊಯ್ನಿ, ತೋಬಿ ತುಮೂನ ರಕ್ಷಣೆಮಳಾದೆ ಕರಿ ಆವಾತ್ನ ಬೋಲ್ಯೋತೆ. 35ಯೋಹಾನ ಬಳುಕರಸ್ತೆ ದೀವನಿಮತ್‌ ಥೊ,ಅಜು಼ ಯೊ ಉಜಾ಼ಳು ದಿದೊ. ಕತೋಬಿ ತುಮೆ ಇನ ಉಜಾ಼ಳಾಮ ಥೋಡ ದನ್ ಖ್ಹುಶಿ ಕರ‍್ಯಾ. 36ಮಾರಿ ಸಾಕ್ಷಿ ಯೋಹಾನ್‌ಥೀಬಿ ಮೋಟಿ ಸಾಕ್ಷಿ ಹುಯಿರಿಶ್. ಶನಕತೊ ಬಾ ಖೆವುಕಾಮ್ ಪೂರ ಕರಾನ ಮನ ದಿದೊತೆ ಯೋ ಕಾಮ್ನ ಕರುಕರೂಸ್.ಕರಿಬೋಲಾನ ಆ ಕಾಮಸ್ ಸಾಕ್ಷಿ. 37ಅತ್ರೇಸ್ ಕಾಹೆತೆ, ಮನ ಮೋಕ್‌ಲ್ಯೊತೆ ಬಾಸ್, ಮಾರಿ ಬಾರೇಮ ಸಾಕ್ಷಿ ಬೋಲಿರಾಖ್ಯೊಸ್. ಕತೋಬಿ ತುಮೆ ಇನಿ ಅವಾಜ಼್‌ನ ಕದೇಬಿ ಖ್ಹಮ್‌ಜಿರಾಖ್ಯಕೊಯ್ನಿ, ಇನಿ ರೂಪ್ ಕಿಮ್ ಛಾ಼ ಕರಿ ಕದೇಬಿ ಕೋ ದೇಖಿರಾಖ್ಯಾನಿ.#5:37 ಮತ್ತಾಯ 3:17; ಮಾರ್ಕ 1:11; ಲೂಕ 3:22 38ಅಜು಼ ಇನಿ ವಾಕ್ಯಾಬಿ ತುಮಾರಾಮ ಕೊಯ್ನಿ, ಶನಕತೊ ಬಾ ಮೋಕ್‌ಲ್ಯೊತೆ ಇನ ತುಮೆ ನಂಬಾಕೊಯ್ನಿ. 39ತುಮೆ ಕೆತ್ರುಕ್ಕಿ ಧರ್ಮಶಾಸ್ತ್ರನ ಪಢೋಸ್‌, ಯೋ ತುಮೂನ ಹಮೇಶಾನಿ ಜಿ಼ಂದ್‌ಗಿ ದಿಶೆ ಕರಿ ತುಮೆ ಸೋಚೋ಼ಸ್, ಕತೋಬಿ ಯೋ ಖ್ಹಾರು ದಪ್ತರ್ ಮಾರಿ ಬಾರೇಮಸ್ ಸಾಕ್ಷಿ ದ್ಯವಾನು ಹುಯಿರುಸ್. 40ತೋಬಿ ತುಮೆ ಮಾರಕನ ಐನ್ ಯೋ ಜಾನ್ನ ಲೀಲ್ಯಾವನ ತುಮೂನ ಮನ್‌ಕೊಯ್ನಿ.
41“ಮನ ಅದ್ಮಿನಿ ಖ್ಹರಾವ್ಣಿ ಹೋಣು ಕೊಯ್ನಿ. 42ಕತೋಬಿ ತುಮೆ ಕಿಮ್ನು ಅದ್ಮಿಖ್ಹಾರು ಕರಿ ಮನ ಮಾಲುಮ್, ಅಜು಼ ತುಮಾರ ದಿಲ್ಮ ದೇವ್‌ಪರ್‌ ಪ್ಯಾರ್ ಕೊಯ್ನಿ ಕರೀಬಿ ಮನ ಮಾಲುಮ್. 43ಮೇ ಮಾರ ಬಾನ ನಾಮ್‍ಥಿ; ಕತೋಬಿ ಮನ ತುಮೆ ಸ್ವೀಕಾರ್ ಕರಕೊಯ್ನಿ, ಕತೋಬಿ ಕೋಣ್‌ತೋಬಿ ಶೊಂತ್ ಅದಿಕಾರ್‌ಥಿ ಆಯೂತೆ ತುಮೆ ಇನ ಸ್ವೀಕಾರ್ ಕರಿಲೆವೊಸ್. 44ತುಮೆ ಏಕ್‌ಥಿ ಏಕ್‌ ಮಾನ್-ಮರ‍್ಯಾದಿನ ಆಖ್ಹ್ ಕರೋಸ್, ಕತೋಬಿ ಏಕ್‍ನೊ ಎಕ್ಕಸ್ ದೇವ್‍ಥಿ ಆವಸ್ತೆ ಖ್ಹರಾವ್ಣಿನ ತುಮೆ ಹೋಣು ಕರಿ ಆಖ್ಹ್ ಕೋ ಕರೋನಿ. ಅಮ್ ರ‍್ಹವಾಪರ್ ತುಮೆ ಮನ ಕಿಮ್ ನಂಬ್‌ಶು? 45ಮಾರ ಬಾನ ಖ್ಹಾಮ್ಣೆ ಭೀರಿನ್ ಮೇ, ತುಮುನ ಅಪರಾದಿ ಕರಿ ಭೀರಾಕಿಶ್ ಕರಿ ನಕೊ ಸೋಚೊ ತುಮೆ ಭರೋಖ್ಹೊ ಕರಿರಾಖ್ಯಾತೆ ಮೋಶೆಸ್‌ ತುಮಾರಪರ್ ಅಪರಾದ್ ಲಗಾಡ್‌ಶೆ. 46ತುಮೆ ಖ್ಹಾಚಮಾಬಿ ಮೋಶೆನಿ ವಾತೆನಪರ್ ವಿಶ್ವಾಸ್ ಕರಾನು ರ‍್ಹಿಯಿತೊ, ಮಾರಪರ್‌ಬಿ ಭರೋಖ್ಹೊ ಕರ‍್ಯಾಹೋತ್‌. ಶನಕತೊ ಇನೆ ಮಾರಿ ಬಾರೇಮ ಲೀಖಿರಾಖ್ಯೊಸ್. 47ಅಜೂ಼ಬಿ ಮೋಶೆನೆ ಲೀಖ್ಯೋತೆ ವಾತೇನಸ್‌ ತುಮೆ ವಿಶ್ವಾಸ್ ನಾ ಕರ‍್ಯಾತೊ, ಮೇ ಬೋಲುಸ್ತೆ ವಾತೆನ ಕಿಮ್ ನಂಬ್ ಶು?” ಕರಿ ಬೋಲ್ಯೊ.
Επιλέχθηκαν προς το παρόν:
ಯೋಹಾನ 5: NTWVe23
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The New Testament in Waghri Language © The Word for the World International and Waghri Translation Samiti, Karnataka, 2023.
ಯೋಹಾನ 5
5
ಪಾಣಿನ ಕೋಳಮ್‍ಕನ ಅಛ್ಛು಼ ಕರ‍್ಯೊತೆ
1ಅನ ಬಾದ್‌ಮ, ಯೇಸು ಯೆಹೂದ್ಯರ್‌ನ ಪೂಜಾ಼ ಥೂತೆ ಇನಖ್ಹಾಜೆ, ಯೇಸು ಯೆರೂಸಲೇಮ್‌ನ ಗಯೊ. 2ಯೆರೂಸಲೇಮ್ಮ ಮೇಂಢಾನು ಬಾಕಲ್ನಖನ್ನೆ ಏಕ್‌ ಕೋಳಮ್‌ ಥು, ಇಬ್ರಿಯ ವಾತೇಮ ಇನ “ಬೇತ್ಸಥಾ” ಕರಿ ನಾಮ್, ಹಿಜ್ಜಾ಼ ಪಾಚ಼್ ಛ಼ತ್ ಥು 3ಯೋ ಛ಼ತ್‌ಕನ ರೋಗ್‌ರಾಯೊ ರ‍್ಹವಾಳು ಘಣು ಅದ್ಮಿ ಪಡ್ಯುರ‍್ಹೇತೂಥು. ಇವ್ಣಾಮ ಕಾಣು, ಲಂಗ್ಡು, ಅಜು಼ ಲಕ್‍ವೊ ಮಾರ‍್ಯುಹುಯು ಥೂ.ಇವ್ಣೆ ಪಾಣಿ ಕದೆ ಹಲ್‍ಶೇಸ್‍ಕರಿ ಟಿವಯ್ ರ‍್ಹೇತುಥು. 4ಶನಕತೊ ಹರೇಕ್ ಬಾರ್ ಥೋಡು ವಖ್ಹತ್‌ನ ಬಾದ್‌ಮ ಪ್ರಭುನೊ ದೂತ ಉತ್ರಿ ಐನ್ ಕೋಳಮ್‍ನ ಪಾಣಿನ ಹಲಾವ್‍ತೊಥೊ ರೋಗ್‌ವಾಳು ಕೆಹೂಬಿ ಅದ್ಮಿ ಪಾಣಿ ಹಲಾದಿನ್ ಪಹಿಲೆ ಜಾ಼ತುಥೂಕಿ ಯೊ ಅಛ್ಛು಼ ಹುಯಿಜಾ಼ತುಥು. 5ಆಟ್‌ಉಪ್ಪರ್‌ ಡೋಡಿಖ್ಹ್‌ ವರಖ್ಹ್‌ಥೊ ರೋಗ್‌ಮ ಪಡ್ಯೊಥೋತೆ ಏಕ್‌ ಅದ್ಮಿ ಹಿಜ್ಜಾ಼ಥೊ. 6ಯೋ ಹಿಜ್ಜಾ಼ ಪಡ್ಯೋತೆ ಯೇಸುನೆ ದೇಖ್ಯೊ, ಯೋ ಘಣ ವರಖ್ಹ್‌ಥು ರೋಗ್‌ಮ ಥೋತೆ ಯೇಸುನ ಮಾಲುಮ್ ಥೂ. ಇನಖ್ಹಾಜೆ ಯೇಸುನೆ ಇನ, “ತುನ ಅಛ್ಛು಼ ಹೋಣು ಕರಿ ದಿಲ್‌ ಛಾ಼ ಕಿಶು?” ಕರಿ ಪುಛಾ಼ಯೊ.
7ಯೋ ರೋಗಿನೆ, “ಗುರು, ಪಾಣಿ ಹಲಾನಿ ವಖ್ಹತ್‌ಮ ಕೋಳಮ್ಮ ಮನ ಉತ್ರಾವವಾಳು ಕೋಣ್‌ಬಿ ಕೊಯ್ನಿ; ಮೇ ಉತರ‍್ನು ಕರಿ ಜಾ಼ವಾನ ಪಹಿಲೆಸ್, ಮಾರೇಥಿಬಿ ಅಗಾಡಿ ಬಿಜು಼ ಉತ್ರಿಜಾ಼ಸ್‌” ಕರಿ ಬೋಲ್ಯೊ.
8ಯೇಸು ಇನ, “ಉಪ್ಪರ್ ಉಟ್, ತಾರಿ ಬಿಛಾ಼ವ್ಣಿನ ಪಳ್ಳಿನ್, ಚಾ಼ಲ್” ಕರಿ ಬೋಲ್ಯೊ. 9ತದ್‌ನು-ತದೇಸ್‌ ಯೋ ಅದ್ಮಿನ ಅಛ್ಛು಼ ಹುಯಿಗಯು; ಇನೆ ಇನಿ ಬಿಛಾ಼ವ್ಣಿನ ಪಳ್ಳಿನ್ ಚಾ಼ಲ್ಯೊ.
ತದೆ ಸಬ್ಬತ್ ದನ್ ಹುಯಿರುಥು.#5:9 ಯೆಹೂದ್ಯರ್ನು ಕ್ಯಾಲೆಂಡರ್‌ಮ ಸಬ್ಬತ್ ದನ್ ಛಾ಼, ಇನ ಅರಾಮ್‌ನೊ ದನ್ ಕರೀಬಿ ಬೋಲಾಸ್. 10ಇನಖ್ಹಾಜೆ ಯೆಹೂದ್ಯರ್‌ನ ಅದಿಕಾರಿ ಯೋ ಅಛ್ಛು಼ ಹುಯೂತೆ ಅದ್ಮಿನ, “ಆಜ಼್ ಸಬ್ಬತ್ ದನ್, ಹುಯಿರುತೆ ಇನಾಖ್ಹಾಜೆ ಬಿಛಾ಼ವ್ಣಿನ ಪಾಡಾನು ಹಮಾರಿ ಖಾನುಲ್‌ನು ವಿರೋದ್ ಹುಯಿರ‍್ಹುಸ್‍” ಕರಿ ಬೋಲ್ಯೊ. #5:10 ನೆಹೆಮಿಯ 13:19; ಯೆರೆಮೀಯ 17:21
11ತದೆ ಇನೆ, “ಮನ ಅಛ್ಛು಼ ಕರ‍್ಯೊತೆ ಇನೇಸ್‌, ‘ತಾರಿ ಬಿಛಾ಼ವ್ಣಿನ ಪಳ್ಳಿನ್, ಚಾ಼ಲ್’ ಕರಿ ಬೋಲ್ಯೊ” ಕರಿ ಜ಼ವಾಬ್ ದಿದೊ.
12ಇವ್ಣೆ ಇನ, “ತಾರಿ ಬಿಛಾ಼ವ್ಣಿನ ಪಳ್ಳಿನ್, ಚಾ಼ಲ್ ಕರಿ ತುನ ಬೋಲ್ಯುತೆ ಯೋ ಅದ್ಮಿ ಕೋಣ್?” ಕರಿ ಪುಛಾ಼ಯು.
13ಕತೋಬಿ ಯೋ ಅಛ್ಛು಼ ಹುಯೂತೆ ಅದ್ಮಿನ ಯೇಸು ಕೋಣ್ ಕರಿ ಮಾಲುಮ್ ಕೋ ಥೂನಿ. ಯೋ ಝ಼ಗೋಪರ್‌ ಅದ್ಮಿನಿ ಭೀಡ್ ಥೀತೆ ಇನಖ್ಹಾಜೆ ಯೇಸು ಹಿಜ್ಜಾ಼ಥೊ ಪಿಷ್‌ಲಿ ಚ಼ಲೆಗಯೊ.
14ಅನ ಬಾದ್‌ಮ ಯೇಸು ಯೋ ಅದ್ಮಿನ ಮಂದಿರ್‌ಮ ದೇಖಿನ್‌, “ದೇಕ್, ಹಮ್ಕೆ ತುನ ಅಛ್ಛು಼ ಹುಯಿರ‍್ಹುಸ್‍ ಇನಖ್ಹಾಜೆ ಪಾಪ್ ಕರಾನು ಮ್ಹೆಂದೆ,ಶನಕತೊ ಅನೇಥಿ ತುನ ಖೆವೂಬಿ ಜಾ಼ಖ್ಹತ್ ಮುಶಿಬತ್ ನಕೊ ಆವಾದೆ.ಕರಿ ಬೋಲ್ಯೊ.
15ತದೆ ಯೋ ಅದ್ಮಿ ಹಿಜ್ಜಾ಼ಥು ಜೈ಼ನ್‌, ಇನ ಅಛ್ಛು಼ ಕರ‍್ಯೊತೆ ಯೇಸುನೇಸ್‌ ಕರಿ ಯೆಹೂದ್ಯರ್‌ನ ಅದಿಕಾರಿನ ಬೋಲ್ಯು. 16ಇನಾಖ್ಹಾಜೆ ಯೆಹೂದ್ಯವಾಳು ಯೇಸು ಸಬ್ಬತ್ ದನ್ಮ ಕಾಮ್ ಕರ‍್ಯೊತೆ ಇನಖ್ಹಾಜೆ, ಇನ ಖ್ಹತಾಯು. 17ಕತೋಬಿ ಯೇಸುನೆ ಇವ್ಣುನ, “ಮಾರೊ ಬಾ ಹಂಕೆತೋಡಿ ಕಾಮ್ ಕರುಕರಸ್,ಮೇಬಿ ಕಾಮ್ ಕರುಸ್” ಕರಿ ಬೋಲ್ಯೊ.
18ಅತ್ರೇಸ್ ಕಾಹೆತೆ ಯೊ ಖಲಿ ಸಬ್ಬತ್ ದನ್ನ ನಿಯಮ್ನ ಕೋ ತೋಡ್ಯೊನಿ, ಕತೋಬಿ ಯೊ ದೇವ್ ಇನೊ ಶೊಂತ್ ಬಾಕರಿ ಬೋಲ್ಯೊ ಅಜು಼ ಆಮ್ನಿಘೊಣಿ ಇನುಯೋಸ್ ದೇವ್ನು ಸಮಾನ್ ಕರಿಲಿದೋಥೊ. ಆ ವಾತೇನ ಬೋಲ್ಯೋತೆ ಇನೇಥಿ, ಯೆಹೂದ್ಯರ್ನು ಅದಿಕಾರಿ ಇನ ಮಾರ‍್ನುಸ್ ಮಾರ‍್ನು ಕರಿ ಖ್ಹಯಾಲ್‌ಥಿ ನಿರ್ಧಾರ್ ಕರ‍್ಯು.
ಛಿಯ್ಯಾನಿ ಅದಿಕಾರ್‌ನಿ ಬಾರೇಮ
19ತದೆ ಯೇಸುನೆ ಇವ್ಣುನ, “ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ಬಾ ಕರಾಸ್ತೆ ಇನ ದೇಖಿನ್‌ ಛಿಯ್ಯೊ ಕರಾಸ್ ಪಣ್ಕಿ, ಇನೇಥಿ ಯೋಸ್‌ ಶಾತ್ಬಿ ಕರಾನ ಕೋ ಹುವಾನಿ. ಬಾ ಕರಾಸ್ತೆ ಇಮ್ಮಸ್ ಛಿಯ್ಯೋಬಿ ಕರಾಸ್. 20ಶನಕತೊ, ಬಾ ಇನ ಛಿಯ್ಯಾನ ಪ್ಯಾರ್ ಕರಾಸ್ ಅಜು಼ ಯೋ ಕರಾಸ್ತೆ ಖ್ಹಾರಾನ ಇನ ಒತಾಳಸ್. ಅತ್ರೇಸ್ ಕಾಹೆತೆ ಅನೇಥಿಬಿ ಮೋಟು ಕಾಮ್‌ಖ್ಹಾರು ಇನ ವತಾಳ್‌ಶೆ; ಇನ ದೇಖಿನ್‌ ತುಮೆ ಆಶ್ಚರ್ಯ ಕರ್ಶು. 21ಬಾ ಕಿಮ್ ಮರ‍್ಯಹುಯಾನ ಉಠಾಡಿನ್ ಜಾನ್‌ ದೇಸ್ಕಿ, ಇಮ್ಮಸ್ ಛಿಯ್ಯೋಬಿ ಇನ ಹೋಣುತೆ ಇವ್ಣುನ ಜಾನ್‌ ದೇಸ್. 22ಅತ್ರೇಸ್ ಕಾಹೆತೆ, ಬಾ ಕಿನಾಬಿ ತೀರ್ಪ್ ಕರ್ಶೆ ಕೊಯ್ನಿ. ತೀರ್ಪ್ ಕರಾನಿ ಭರ್‌ಪೂರ್‌ ಅದಿಕಾರ್‌ನ ಛಿಯ್ಯಾನ ದೀರಾಖ್ಯೊಸ್. 23ಶನಕತೊ, ತಮಾಮ್‌ ಜ಼ಣು ಬಾನ ಮರ್ಯಾದಿ ವತಾಳಸ್ತೆ ಇಮ್ಮಸ್, ಛಿಯ್ಯಾನಾಬಿ ಮರ್ಯಾದಿ ವತಾಳ್ಣು ಕರಿ ಇನೆ ಅಮ್ ಕರ‍್ಯೊತೆ, ಕೋಣ್ ಛಿಯ್ಯಾನ ಮರ್ಯಾದಿ ದೇಯಿಕೊಯ್ನಿಕಿ ಇವ್ಣೆ ಇನ ಮೋಕ್‌ಲ್ಯೊತೆ ಬಾನಾಬಿ ಮರ್ಯಾದಿ ಕೋ ದೇಯ್ನಿ.
24“ಮೇ ತುಮೂನ ಖ್ಹಾಚ ಬೋಲುಸ್ಕಿ, ಮಾರಿ ವಾತೇನ ಖ್ಹಮ್ಜಿನ್, ಮನ ಮೋಕ್‌ಲ್ಯೊತೆ ಇನ ನಂಬವಾಳಾನ ಹಮೇಶಾನಿ ಜಿ಼ಂದ್‌ಗಿ ಮಳಿರ‍್ಹೀಸ್‌. ಇನ ತೀರ್ಪ್ ಕೋ ಉಶೇನಿ; ಯೋ ಮರಣ್ಣ ಉಲಾಂಗಿನ್, ಜಾನ್‌ಮ ಪೇಶಿರ‍್ಹೋಸ್‌. 25ಮೇ ತುಮೂನ ಖ್ಹಾಚ ಬೋಲುಸ್ಕಿ, ಮರಿಗಯೂತೆ ಅದ್ಮಿ ದೇವ್ನ ಛಿಯ್ಯಾನಿ ಅವಾಜ಼್ ಖ್ಹಮ್‍ಜಾ಼ನಿ ವಖ್ಹತ್ ಆವ್‌ಶೆ. ಯೋ ವಖ್ಹತ್ ಹಂಕೇಸ್‌ ಐರ‍್ಹೀಸ್, ಖ್ಹಮ್‌ಜಾ಼ವಾಳು ಜಿವ್‌ಶೆ. 26ಬಾನ ಜಾನ್‌ ದ್ಯವಾನಿ ಶಕತ್ ಛಾ಼ತೆ ಇಮ್ಮಸ್, ಛಿಯ್ಯಾನಾಬಿ ಜಾನ್‌ ದ್ಯವಾನಿ ಶಕತ್ನ ದೀರಾಖ್ಯೊಸ್.#5:26 ಕತೊ, ಬಾಮ ಜಾನ್‌ ಛಾ಼ತೆ ಇಮ್ಮಸ್, ಛಿಯ್ಯಾಮಾಬಿ ಜಾನ್‌ ಛಾ಼ ಕರಿ ಮತ್‌ಲಬ್. 27ಅಜು಼ ಛಿಯ್ಯೊ, ಅದ್ಮಿನೊ ಛಿಯ್ಯೊ ಹುಯಿರ‍್ಹೋತೆ ಇನಖ್ಹಾಜೆ ತೀರ್ಪ್ ಕರಾನಿ ಹಕ್‌ನ ಬಾನೆ ಇನ ದೀರಾಖ್ಯೊಸ್. 28ಅನಿ ಬಾರೇಮ ಆಶ್ಚರ್ಯ ನಕೊ ಕರೊ; ಏಕ್‌ ಹಗಾಮ್‌ ಆವ್‌ಶೆ, ತದೆ ಮಖ್ಹಾಣ್ಯಮ ಛಾ಼ತೆ ಅಖ್ಖು ಇನಿ ಅವಾಜ಼್‌ನ ಖ್ಹಮ್ಜಿನ್, 29ಅಜು಼ ಇವ್ಣೆ ಮಖ್ಹಾಣ್ಯಥು ಉಠೀನ್ ಆವ್‌ಶೆ, ಕೋಣ್ ಅಛ್ಛಾ಼ನ ಕರ‍್ಯುಕೀ ಇವ್ಣುನ ಹಮೇಶಾನ ಜಾನ್ನಖ್ಹಾಜೆ ಪಾಛು಼ಜಿವ್ತು ಹುಯಿನ್ ಆವ್‌ಶೆ. ಖರಾಬ್ ಕರವಾಳು ತೀರ್ಪ್‌ನಖ್ಹಾಜೆ ಪಾಛು಼ಜಿವಿನ್ ಉಟ್‌ಶೆ. #5:29 ದಾನಿಯೇಲ್ 12:2
ಯೇಸುನಿ ಬಾರೇಮ ಸಾಕ್ಷಿಖ್ಹಾರು
30“ಮಾರು ಮೇಸ್ ಶಾತ್ಬಿ ಕರಾನ ಕೋ ಹುವಾನಿ; ಬಾ ಬೋಲಾತೆ ಇನ ಖ್ಹಮ್ಜಿನ್, ಮೇ ನ್ಯಾವ್ ಫೇಡಾವುಸ್, ಅನಖ್ಹಾಜೆ ಮಾರು ತೀರ್ಪ್ ಖ್ಹಾಚು಼ ಹುಯಿರುಸ್,ಅಜು಼ ಮಾರಿಸ್ ಮರ್ಜಿ ಚಾ಼ಲಾದೆ ಕರಿ ಆಖ್ಹ್ ಕರ‍್ಯೊಕೊಂತೆ, ಮನ ಮೋಕ್‌ಲ್ಯೊತೆ ಇನಿ ಮರ್ಜಿಸ್‌ ಚಾ಼ಲ್ನು ಕರಿ ಮೇ ಆಖ್ಹ್ ಕರುಸ್.
31ಮಾರಿ ಬಾರೇಮ ಮೇಸ್ ಸಾಕ್ಷಿ ಬೋಲಿಲಿದೋತೊ ಮಾರಿ ಸಾಕ್ಷಿ ಖ್ಹಾಚಿಸ್ ಕಾಹೆ. 32ಕತೋಬಿ ಮಾರಿ ಬಾರೇಮ ಸಾಕ್ಷಿ ಬೋಲವಾಳೊ ಏಕ್‌ ಜ಼ಣೊ ಛಾ಼, ಯೋ ಮಾರಿ ಬಾರೇಮ ಬೋಲಾಸ್ತೆ ಸಾಕ್ಷಿ ಖ್ಹಾಚು಼ ಕರಿ ಮನ ಮಾಲುಮ್. 33ತುಮೆ ಯೋಹಾನಕನ ಸಂದೇಶ್ ಪುಛೈ಼ಲ್ಯಾವಾಳ ಅದ್ಮಿನ ಮೋಕ್‌ಲ್ಯ, ಇನೆ ತುಮೂನ ಖ್ಹಾಚಿನಿ ಬಾರೇಮ ಸಾಕ್ಷಿ ಬೋಲ್ಯೊ.#5:33 ಯೋಹಾನ 1:19-27; 34ಮಾರಿ ಬಾರೇಮ ಅದ್ಮಿನಿ ಸಾಕ್ಷಿ ಮನ ಜ಼ರೂರತ್ ಕೊಯ್ನಿ, ತೋಬಿ ತುಮೂನ ರಕ್ಷಣೆಮಳಾದೆ ಕರಿ ಆವಾತ್ನ ಬೋಲ್ಯೋತೆ. 35ಯೋಹಾನ ಬಳುಕರಸ್ತೆ ದೀವನಿಮತ್‌ ಥೊ,ಅಜು಼ ಯೊ ಉಜಾ಼ಳು ದಿದೊ. ಕತೋಬಿ ತುಮೆ ಇನ ಉಜಾ಼ಳಾಮ ಥೋಡ ದನ್ ಖ್ಹುಶಿ ಕರ‍್ಯಾ. 36ಮಾರಿ ಸಾಕ್ಷಿ ಯೋಹಾನ್‌ಥೀಬಿ ಮೋಟಿ ಸಾಕ್ಷಿ ಹುಯಿರಿಶ್. ಶನಕತೊ ಬಾ ಖೆವುಕಾಮ್ ಪೂರ ಕರಾನ ಮನ ದಿದೊತೆ ಯೋ ಕಾಮ್ನ ಕರುಕರೂಸ್.ಕರಿಬೋಲಾನ ಆ ಕಾಮಸ್ ಸಾಕ್ಷಿ. 37ಅತ್ರೇಸ್ ಕಾಹೆತೆ, ಮನ ಮೋಕ್‌ಲ್ಯೊತೆ ಬಾಸ್, ಮಾರಿ ಬಾರೇಮ ಸಾಕ್ಷಿ ಬೋಲಿರಾಖ್ಯೊಸ್. ಕತೋಬಿ ತುಮೆ ಇನಿ ಅವಾಜ಼್‌ನ ಕದೇಬಿ ಖ್ಹಮ್‌ಜಿರಾಖ್ಯಕೊಯ್ನಿ, ಇನಿ ರೂಪ್ ಕಿಮ್ ಛಾ಼ ಕರಿ ಕದೇಬಿ ಕೋ ದೇಖಿರಾಖ್ಯಾನಿ.#5:37 ಮತ್ತಾಯ 3:17; ಮಾರ್ಕ 1:11; ಲೂಕ 3:22 38ಅಜು಼ ಇನಿ ವಾಕ್ಯಾಬಿ ತುಮಾರಾಮ ಕೊಯ್ನಿ, ಶನಕತೊ ಬಾ ಮೋಕ್‌ಲ್ಯೊತೆ ಇನ ತುಮೆ ನಂಬಾಕೊಯ್ನಿ. 39ತುಮೆ ಕೆತ್ರುಕ್ಕಿ ಧರ್ಮಶಾಸ್ತ್ರನ ಪಢೋಸ್‌, ಯೋ ತುಮೂನ ಹಮೇಶಾನಿ ಜಿ಼ಂದ್‌ಗಿ ದಿಶೆ ಕರಿ ತುಮೆ ಸೋಚೋ಼ಸ್, ಕತೋಬಿ ಯೋ ಖ್ಹಾರು ದಪ್ತರ್ ಮಾರಿ ಬಾರೇಮಸ್ ಸಾಕ್ಷಿ ದ್ಯವಾನು ಹುಯಿರುಸ್. 40ತೋಬಿ ತುಮೆ ಮಾರಕನ ಐನ್ ಯೋ ಜಾನ್ನ ಲೀಲ್ಯಾವನ ತುಮೂನ ಮನ್‌ಕೊಯ್ನಿ.
41“ಮನ ಅದ್ಮಿನಿ ಖ್ಹರಾವ್ಣಿ ಹೋಣು ಕೊಯ್ನಿ. 42ಕತೋಬಿ ತುಮೆ ಕಿಮ್ನು ಅದ್ಮಿಖ್ಹಾರು ಕರಿ ಮನ ಮಾಲುಮ್, ಅಜು಼ ತುಮಾರ ದಿಲ್ಮ ದೇವ್‌ಪರ್‌ ಪ್ಯಾರ್ ಕೊಯ್ನಿ ಕರೀಬಿ ಮನ ಮಾಲುಮ್. 43ಮೇ ಮಾರ ಬಾನ ನಾಮ್‍ಥಿ; ಕತೋಬಿ ಮನ ತುಮೆ ಸ್ವೀಕಾರ್ ಕರಕೊಯ್ನಿ, ಕತೋಬಿ ಕೋಣ್‌ತೋಬಿ ಶೊಂತ್ ಅದಿಕಾರ್‌ಥಿ ಆಯೂತೆ ತುಮೆ ಇನ ಸ್ವೀಕಾರ್ ಕರಿಲೆವೊಸ್. 44ತುಮೆ ಏಕ್‌ಥಿ ಏಕ್‌ ಮಾನ್-ಮರ‍್ಯಾದಿನ ಆಖ್ಹ್ ಕರೋಸ್, ಕತೋಬಿ ಏಕ್‍ನೊ ಎಕ್ಕಸ್ ದೇವ್‍ಥಿ ಆವಸ್ತೆ ಖ್ಹರಾವ್ಣಿನ ತುಮೆ ಹೋಣು ಕರಿ ಆಖ್ಹ್ ಕೋ ಕರೋನಿ. ಅಮ್ ರ‍್ಹವಾಪರ್ ತುಮೆ ಮನ ಕಿಮ್ ನಂಬ್‌ಶು? 45ಮಾರ ಬಾನ ಖ್ಹಾಮ್ಣೆ ಭೀರಿನ್ ಮೇ, ತುಮುನ ಅಪರಾದಿ ಕರಿ ಭೀರಾಕಿಶ್ ಕರಿ ನಕೊ ಸೋಚೊ ತುಮೆ ಭರೋಖ್ಹೊ ಕರಿರಾಖ್ಯಾತೆ ಮೋಶೆಸ್‌ ತುಮಾರಪರ್ ಅಪರಾದ್ ಲಗಾಡ್‌ಶೆ. 46ತುಮೆ ಖ್ಹಾಚಮಾಬಿ ಮೋಶೆನಿ ವಾತೆನಪರ್ ವಿಶ್ವಾಸ್ ಕರಾನು ರ‍್ಹಿಯಿತೊ, ಮಾರಪರ್‌ಬಿ ಭರೋಖ್ಹೊ ಕರ‍್ಯಾಹೋತ್‌. ಶನಕತೊ ಇನೆ ಮಾರಿ ಬಾರೇಮ ಲೀಖಿರಾಖ್ಯೊಸ್. 47ಅಜೂ಼ಬಿ ಮೋಶೆನೆ ಲೀಖ್ಯೋತೆ ವಾತೇನಸ್‌ ತುಮೆ ವಿಶ್ವಾಸ್ ನಾ ಕರ‍್ಯಾತೊ, ಮೇ ಬೋಲುಸ್ತೆ ವಾತೆನ ಕಿಮ್ ನಂಬ್ ಶು?” ಕರಿ ಬೋಲ್ಯೊ.
Επιλέχθηκαν προς το παρόν:
:
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The New Testament in Waghri Language © The Word for the World International and Waghri Translation Samiti, Karnataka, 2023.