Lalang Hu Dios

Su ubay en sa panahun ha agsaulugen sa Pagkaen hu Supas ha Hurà duun Igpatulin daw Aldaw daan hu Paglabay sa mga labaw ha sinaligan hu paghalad daw sa mga manunudlù hu Kasuguan nan-ahà hu paagi ha mapatay dan si Jesus ta agkahaldek sidan hu mga etaw. Dayun si Judas ha tagngaranan daan ki Iscariote ha sabuwa duun ku sampulù daw daruwa ha mga tinun-an hi Jesus tinaguan hi Satanas. Aman duminuun hu mga labaw ha sinaligan hu paghalad daw hu mga kapitan hu bantay taena ha Timplu daw nakiglalang ku in-inuwen din paglimbung ki Jesus. Nangabayà-bayà gayed sidan daw migsasabut ha ag-ilahan dan si Judas hu salapì. Uminuyun daan si Judas dayun nan-ahà hu paagi ha makatugyan din si Jesus diyà ta kandan ha harì matun-an hu mga etaw.


Nakauma sa panahun ha agsaulugen sa Pagkaen hu Supas ha Hurà Duun Igpatulin ha iyan daan panahun hu paghalad hu nati ha karniru hu pagsaulug taena ha Aldaw hu Paglabay. Aman si Pedro daw si Juan sinugù hi Jesus hu kagi din, “Dumiyà kaw daw andama sa igpanihapun taw hu pagsaulug hu Aldaw hu Paglabay.”
Nanginginsà sidan ki Jesus, “Hindu sa agkabayaan nu ha elegan day hu pagpangandam taena?”
Tuminubag si Jesus, “Dumiyà kaw ta banuwa daw ku masal-aw nuy sa etaw ha tag-uwit hu bangà ha tinaguan hu wahig, lumupug kaw kandin duun hu balay ha agseledan din. Dayun ikagiyi sa tagibalay, ‘Sa Manunudlù agpanginginsà ku hindu duun tag-amul-amul hu pagpakigsalu hu mga tinun-an din ta tagsaulug.’ Ipaahà din dayun inyu sa maluag ha kuwartu diyà ta latun taena ha balay din ha inandaman en hu mga galamiten hu pagkaen na duun kaw taena pangandam.”
Duminiyà haena sa mga tinun-an daw natuman gayed sa alan ha inikagi hi Jesus. Aman nangandam sidan hu pagkaen taena ha pagsaulug.


Su mapengahan en haena mininuu si Jesus daw sa mga tinun-an din hu pagkaen. Dayun inikagiyan sidan hi Jesus, “Agkabayà a gayed pakigsalu inyu taini ha pagsaulug sa harì a pa mag-antus ta ikagiyen ku inyu ha daw ad en asem isab agkaen taini ku buhaten dà duun hu tagharian hu Dios.”
Tuminimù si Jesus hu tasa daw ampui dayun inikagiyan din sidan, “Bahina nuy haini ta ikagiyen ku inyu ha daw ad en asem isab ag-inum hu binu ku magharì en sa Dios.”
Tinimù din su supas daw ampui, dayun pinangebing din haena daw ipan-ila kandan ha tagyanaen, “Iyan en haini lawa ku ha ighalad para inyu. Kan-a nuy haini daw sigi nuy dà pagbuhaten hu paghenà-henà kanak.”
Su makapenga sidan kumaen in-ila din kandan su tasa daw ikagi, “Iyan en haini langesa ku ha igpamalas hu mga salà nuy ha iyan timaan hu bag-u ha kasabutan hu Dios daw hu kaet-etawan.
“Sa etaw ha maglimbung kanak dini en iman ta kanuy. Siak sa Batà hu Etaw matay a gayed sumalà hu katuyuan hu Dios ba kahid-u gayed hu etaw ha maglimbung kanak.”
Dayun migpainsaay sidan ku sin-u kandan sa maglimbung kandin.

Migsawalà su mga tinun-an hi Jesus ku sin-u kandan sa labaw. Ba inikagiyan sidan hi Jesus, “Natun-an nuy en ha sa mga harì hu kenà mga Judio iyan tagbayà hu mga sakup dan, daw sa mga agalen agkabayà ku dayeen ha iyan nakabulig hu mga sakup dan. Ba saena harì mahimu diyan ta inyu ta kinahanglan ha sa labaw inyu magpaubus daw sa agkabayà ha mabuhat ha agalen iyan sa mailing hu suluguen hu alan. Sin-u man sa labaw? Iyan ba sa bà dà agpinuu daw kaen daw ku iyan ba sa tagtangel? Iyan gayed sa agpinuu daw kaen. Ba siak iling a hu suluguen nuy. Iyan kaw gayed mga duma ku duun hu alan ha mga alantusen. Aman iling ha sinaligan a hu Dios ha Amay ku hu pagharì agsaligan ku daan inyu hu pagharì. Ku magharì a asem makigsalu kaw kanak daw paharian ku inyu sa sampulù daw daruwa ha kaliwatan hi Israel.”


Si Simon Pedro inikagiyan hi Jesus, “Magpaliliman ka, Simon. Tinugutan en hu Dios si Satanas ha sulayen kaw kandin ta daw maahà ku iling dà ba hu ukap sa pagtuu nuy. Ba inampuan ku ikaw, Pedro, ha sa pagsalig nu harì maawà. Ku maglig-en en sa pagtuu nu ipalig-en daan sa pagtuu hu mga duma nu.”
Dayun tuminubag si Pedro, “Ginuu, andam ad en hu pagduma ikaw diyà ta prisuhan daw bisan pa duun hu kamatayen.”
Ba tinubag hi Jesus, “Pedro, ikagiyen ku ikaw ha kanina ku harì pa managauk sa manuk katatulu kad en makaikagi ha harì a ikaw agkakilala.”

Ininsaan hi Jesus sa mga tinun-an din, “Su suguen ku inyu su anay kaw humipanaw ha harì kaw mag-uwit hu salapì, hu lutù daw hu mga ilisan nuy na miglised kaw ba?”
Tuminubag sidan, “Hurà.”
Inikagiyan sidan hi Jesus, “Iman ha panahun ku amin nuy salapì daw ilisan uwita nuy haena, daw ku hurà nuy ispada ibaligyà sa duma ha bisti nuy daw palit kaw hu ispada. Ta ikagiyen ku inyu ha matuman gayed sa insulat ha lalang hu Dios ha tagyanaen, ‘Ag-isipen haena ha masinupaken daan.’ Sa alan ha intagnà mahitenged kanak tagkatuman en.”
Uminikagi su mga tinun-an din, “Ginuu, taini en su daruwa ha ispada.”
Tuminubag daan si Jesus, “Hustu en hayan.”


Duminiyà si Jesus ta Buntud ta Ulibu ta iyan din haena naanadan daw luminupug kandin sa mga tinun-an din. Su makauma sidan diyà minikagi si Jesus, “Mag-ampù kaw ta daw harì kaw madaeg hu panulay.”
Dayun si Jesus migpadiyù-diyù ta kandan daw luhud ha mig-ampù, “Amay ku, ku mabayà ka harì a ikaw ipaagi duun taini ha mga alantusen. Ba iyan sa ikaw ha pagbayà matuman kenà iyan sa kanak.” Nakauma diyà ta kandin sa balinsuguen hu Dios ha napuun ta langit ha iyan migpabis-ay kandin. Miglugul gayed si Jesus aman ayuwà pa naniguru hu pag-ampù ha namanulù diyà ta bugtà sa ating din ha iling hu langesa.
Su makapenga mag-ampù linikuan din sa mga tinun-an ba naahà din ha tagtidugahà en sidan tumenged hu kalugul dan. Inikagiyan din sidan, “Imbà kaw tagtidugahà? Bangun kaw daw mag-ampù ta daw harì kaw madaeg hu panulay.”


Su kamulu pa si Jesus tag-ikagi nakauma en sa mga etaw ha sa tag-una duun iyan si Judas sa sabuwa duun taena ha sampulù daw daruwa ha tinun-an hi Jesus. Inubayan din dayun si Jesus hu paghadek kandin, ba inikagiyan hi Jesus, “Judas, pinaagi ba diay hu paghadek sa paglimbung nu hu Batà hu Etaw?”
Su matun-an hu mga tinun-an din ku inu sa maula-ula uminikagi sidan, “Ginuu, sumukul kay ba kandan pinaagi taini ha ispada day?” Dayun sa sabuwa kandan tuminigbas hu suluguen ku tungkay labaw ha sinaligan hu paghalad aman nalapung sa kawanan ha talinga din.
Ba si Jesus minikagi, “Endai en hayan.” Dinampà din dayun sa talinga taena ha suluguen aman naulian.
Inikagiyan hi Jesus su mga labaw ha sinaligan hu paghalad daw su mga kapitan hu mga bantay taena ha Timplu daw su mga magulang, “Agalen a ba hu mga tulisan imbà kaw tag-uuwit hu mga ispada daw mga bunal hu pagdakep kanak? Aldaw-aldaw diyà a ta Timplu daw nanudlù ba hurà a inyu dakepa. Ba iyan en iman haini panahun ha maahà sa gahem hi Satanas.”


Dinakep dan si Jesus daw uwita duun hu balay ku tungkay labaw ha sinaligan hu paghalad. Si Pedro taglupug kandan ba madiyù dà. Su magtim-un sa mga etaw diyà ta taliwarà ta lama taena ha balay ta aghidadang sidan uminamul kandan si Pedro. Amin suluguen ha bahi ha nakaahà ki Pedro sa taghidadang. Pigtengtengan din dayun minikagi, “Taini sa duma tayà ha dinakep.”
Ba migbidù si Pedro hu kagi din, “Harì ku agkakilala ku sin-u hayana.”
Hurà kalugay naahà si Pedro hu lain ha etaw dayun minikagi, “Duma ka daan kandin.”
Ba si Pedro tuminubag, “Kenà a.”
Su maiwas sa nangkauras amin en paman lain ha etaw ha tagyanaen, “Duma gayed haini tayaa ta taga-Galilea man daan.”
Si Pedro tuminubag gihapun, “Harì ku agkatun-an ku inu sa tagsubayen nu.” Ba su kamulu pa tag-ikagi tuminagauk en sa manuk. Luminingì si Jesus daw ahà diyà ki Pedro. Dayun nahenhenaan hi Pedro sa inikagi hi Jesus kandin, “Ku harì pa kanina managauk sa manuk katatulu kad en makaikagi ha harì a ikaw agkakilala.” Aman guminuwà si Pedro daw mig-agalaay.


Saena ha mga etaw ha tagbantay ki Jesus migtameyes daw migbunal daan kandin. Binedbed dan sa mata din daw ikagiyi, “Tagnai ku sin-u kanay sa migsumbag ikaw.” Madakel pa gayed sa mga madaet ha pinan-ikagi dan ki Jesus ta daw magayhaan haena.


Su maselem en sa alan ha mga labaw ha agalen hu mga Judio ha iyan sa mga magulang, sa mga labaw ha sinaligan hu paghalad daw sa mga manunudlù hu Kasuguan mig-amul-amul dayun impaatubang diyà ta kandan si Jesus. Ininsaan dan haena, “Ikagiyi kay ku iyan kad ba su Misiyas.”
Tuminubag si Jesus, “Bisan ku ikagiyan ku inyu ba harì kaw gayed tumuu kanak daw ku manginginsà a diyan ta inyu harì kaw daan makatubag. Ba harì malugay siak sa Batà hu Etaw minuu a duun hu kawanan taena ha gamhanan ha Dios.”
Nanginginsà sidan, “Iyan kad en ba Batà hu Dios?”
Tuminubag si Jesus, “Iyan ad en su inikagi nuy.”
Dayun minikagi sidan, “Napaliman taw en sa inikagi din aman harì en kinahanglan ha amin pa manistigus.”

Listen to Lucas 22