Ngiva, San Juan Atzingo - 2016 (NT) Non Drama

Ngiva, San Juan Atzingo - 2016 (NT) Drama

Ndá chrꞌéxi̱n sákjuí chꞌin Jesús ti tóhe nda̱ñao Galilea, la mé kja̱xin itꞌin Tiberias. La nchónhña chojni tinkáchréhe̱ sin kixin kꞌuíkon sin ti kjuaxroan ijié kjuasin chꞌan kjuínchekito̱he chꞌan chojni jína. Ndá chꞌin Jesús chrìin ijnko ijna̱, la kjuákꞌetja̱xi̱ko chꞌan ti sin kꞌuájiko chꞌan. A̱ndá í séhya tsꞌixin ti kia Pascua kuènté ti sin judío. Ndá chꞌin Jesús kꞌuíkon kixin nchónhña chojni chréhe̱ ti jehe chꞌan, ndá kjuanchankíhi chꞌan ti chꞌin Felipe:
―¿Nketí chrókꞌue̱nani nkehe sinie kaín ti sin tjejó ntihi?
Xi̱kaha ichro chꞌan kixin tjinkaon chꞌan tso̱nohe chꞌan nkehe tsjate̱he chꞌin Felipe, kixin chꞌin Jesús la ó nohe chꞌan nkehe sichꞌe chꞌan. Ndá kjuáte̱he chꞌin Felipe, ndáchro:
―Kjónté yaá ciento denario chróchóntani la chrókjuachahya chrókꞌuite ti nio̱tja̱ kixin chrókuákja sin to̱tꞌo̱.
A̱ndá ndáchro chꞌin Andrés, kícho chꞌin Simón Pedro:
―Ntihi itjen ijnko chájan chónta inꞌó nio̱tja̱ tsíkꞌónaxín noa cebada la ko yaá koche, kjánchó tíhi la tsjachahya sinie kaín ti sin tjejó ntihi.
A̱ndá ndáchro chꞌin Jesús:
―Ndáche kaín sin tsꞌejótja̱xi̱n sin.
Mé ntiha la nchónhña kayoa siín, la kꞌuejótja̱xi̱n sin, mé chjina inꞌó mil chojnindoa kꞌuejó. A̱ndá chꞌin Jesús kuákja chꞌan ti nio̱tja̱, la chjéhe chꞌan Díos kjuasáya ndá kꞌue̱to̱an chꞌan kixin tsoxika̱ye̱he, tsákja kaín ti sin tjejótja̱xi̱n. La xi̱kaha kja̱xin kꞌóxika̱ye̱he sin ti koche. Ndá kaín sin kjónie sin hasta kókje̱he sin. Ndá ti ó kjuixin kjónie sin la kꞌue̱tue̱hen chꞌin Jesús ti sin kꞌuájiko:
―Tjénájínra kaín to̱tꞌo̱ ti nkehe tsíxehe̱ kixin ninkehó tsꞌitjáñahña.
Ndá xi̱kaha kjuíchꞌe sin, kjuenájín sin ti nio̱tja̱ kꞌónaxín cebada tsíxèxín ti kjónie sin, la kaón teyó ntaxra. A̱ndá ti sin kjónie ti nio̱tja̱ la ti ó kꞌuíkon sin ti kjuaxroan ijié kjuasin chꞌin Jesús la ndáchro sin:
―Jehe chꞌan mé chaxín ti nkexro tjejóchóheni chrókui chjasintajni.
Kjánchó chꞌin Jesús la kónohe chꞌan kixin tjinkaon sin sáchrókjuiko sin chꞌan kixin chrókꞌóna chꞌan rey kuènté sin ntihi chjasintajni. La sákjui̱ chꞌan chritaón ti ijna̱ ínaá, la kjuákꞌe chꞌan ntiha, jehó chꞌan.


A̱ndá ti ó kóntó ndá ti sin kꞌuájiko chꞌin Jesús kꞌuinkajin sin, sákjuí sin chrínta nda̱ñao la kꞌui̱tꞌótjen sin ijnko ntabarco la kꞌuatsínka sin ti nda̱ñao, sátsji chjasin Capernaum. La ó kꞌuíxin tie la na̱xa̱ kjanhña chꞌin Jesús. Ndá kjuankíxin imá chjéhe xri̱nto̱, la kjuankíxin síkjaminkí ti ìnta̱. A̱ndá ti ó kjuacha sin sákjuí sin inꞌó o̱ injon kilómetro, la xrína̱hña kꞌuíkon sin kixin chꞌin Jesús tetji chritaón ti ìnta̱ la tinkákóchjinehe chꞌan ti ntabarco la jehe sin la imá chrákon sin. Kjánchó chꞌin Jesús ndáchro:
―Chrakonhñara kixin janhan ó kjuihá.
Ndá imá chéhe̱ sin kixin kꞌuíkon sin chꞌan la kjuanchia sin kixin tsi̱tꞌótjen chꞌan ti ntabarco, la tuénxín kjuíji sin ti chjasin sátsji sin.

A̱ndá ti ó kóña̱o la mé ti sin kuíto̱he tóhe nda̱ñao mé nohe sin kixin nkoko̱axón ntabarco kjuákꞌe ntiha, la ko nohe sin kixin chꞌin Jesús la kja̱xinhña sákjuí, kixin jehó ti sin kꞌuájiko chꞌan sákjuíko ti ntabarco. Ndá chrꞌéxi̱n ikui iso ntabarco kui̱xi̱n chjasin Tiberias, tinkákóchjinehe ti kjoniexín sin ti nio̱tja̱ ti ó kjuixin chjéhe chꞌin Jesús kjuasáya Díos. A̱ndá ti ó kónohe sin kixin kohya chꞌin Jesús la ko kja̱xin kohya ti sin kꞌuájiko chꞌan, ndá kꞌui̱tꞌótjen sin ti ntabarco la sákjuí sin ti chjasin Capernaum, sákjuikjeyá sin ti chꞌin Jesús.

A̱ndá ti ó kjuíji sin tóhe nda̱ñao ndá xéta sin ti chꞌin Jesús, kjuanchankíhi sin:
―Maestro, ¿nkesá kꞌuinka ntihi?
Ndá chꞌin Jesús ndáchro:
―Chaxín ndáxrja̱n kixin jahara tjéyára ti janhan kixin kjontera ti nio̱tja̱ la kókja̱hara, la jehya kixin chrókiénxinra ti kjuaxroan kjuásian. Chrókjui̱chꞌehyara ixra̱ kixin chrókꞌuite jehó ti nkehe sintera tjoka tsjeje̱. Náhí. Chrókjuéyára ti nkehe tjeje̱hya kixin chrókꞌuayèxinra ti kjuachón nkochríxín. Ti nkehe tjajon ti Xje̱en Díos kꞌóna chojni mé chrókjontera, kixin Itꞌé chꞌan mé tja̱ko̱xi̱n kixin ti Xje̱en chꞌan mé chónta kjuachaxin.
Ndá kjuanchankí sin:
―¿Nkexrín chrókjuíchꞌeni kixin chrókjuínchexiteyáni ti nkehe tjinkaon Díos?
Ndá kjuáte̱he chꞌin Jesús, ndáchro:
―Díos mé tjinkaon kixin chrókuitekáonra ti nkexro ichrꞌán chꞌan.
Ndá kjuanchankí sin ínaá:
―¿Nkehe chrókjuáko̱xian chrókꞌuíkoni ndá chrókuitekaoni ti jaha? ¿Xá nkehe ti ixra̱ ichꞌe jaha? *Ti sin kꞌuaxrjeníxini kꞌuejó ósé mé kjónie sin ti maná kꞌóna ti kꞌuejó sin nte̱je̱, éxi ndáchro ti xroon tsíkjin sin ósé: “Kjuajon chꞌan nio̱tja̱ kui̱xi̱n nka̱jní kjónie sin.”
A̱ndá kjuáte̱he chꞌin Jesús, ndáchro:
―Chaxín ndáxrja̱n kixin jehya Moisés kjuajon ti maná kꞌuínkaji̱nxi̱n nka̱jní. Náhí. Tꞌaná mé tjajon ti nio̱tja̱ chaxín jína ti̱xi̱n nkaya nka̱jní. Kixin ti nio̱tja̱ tjajon Díos, mé ti nkexro kꞌuínkaji̱nxi̱n nka̱jní la chjéhe kjuachón nkochríxín ti chojni chjasintajni.
Ndá jehe sin kjuanchia sin:
―Nkochríxín chje̱héni ti nio̱tja̱ a.
Ndá ndáchro chꞌin Jesús:
―Janhan mé ti nio̱tja̱ tjajon kjuachón. Ti nkexro tóchjinehe ti janhan, la í tsꞌenhña kjinta, la ko ti nkexro tsitekaon ti janhan, la í tsꞌenhña ìnta̱. Kjánchó éxi tjo̱nka̱ra ósé, kixin kjónté ó kꞌuíkonra ti janhan, la titekákonhñara. Kaín ti sin kjuajon Tꞌaná la tóchjinehe sin ti janhan. A̱ndá kaín ti sin tóchjinehe ti janhan la tꞌétua̱nhña sin kixin sátsji sin. Janhan kꞌuinkaxian nkaya nka̱jní la jehya ti ixra̱ tóxrìna chrókjui̱tꞌa. Náhí. Kꞌuinka kixin chrókjui̱tꞌa ti ixra̱ tóxríhi̱n ti nkexro ichrꞌán ti janhan. A̱ndá ti nkexro ichrꞌán ti janhan mé tjinkaon kixin si̱ntakꞌitjáñahña ti sin kjuajon chꞌan, la tjinkaon chꞌan kixin janhan si̱ntaxechuán kaín sin ti ña̱o tsjixixín. Mé xi̱kaha tjinkaon ti nkexro ichrꞌán ti janhan kixin kaín ti sin chóxin ti janhan, ti Xje̱en Díos, la ko tsitekaon sin, mé tsꞌáyéhe̱ sin ti kjuachón nkochríxín. A̱ndá janhan si̱ntaxechuán sin ti ña̱o tsjixixín.
A̱ndá ti sin judío mé kjuankíxin kjonta sin ti chꞌin Jesús kixin tsíndáchro chꞌan kixin jehe chꞌan mé ti nio̱tja̱ kꞌuínkaji̱nxi̱n nkaya nka̱jní. La ndáchro sin:
―¿Á jehya tíhi ti Jesús, xje̱en chꞌin José ní? ¿Á jehya chóxini ti itꞌé la ko ti ìñé chꞌan ní? ¿Ndá nkekuènté ndáchro chꞌan kixin nka̱jní kꞌuínkaji̱nxi̱n chꞌan?
Ndá kjuáte̱he chꞌin Jesús, ndáchro:
―Ti̱to̱héra, tjóntahyara ti janhan. Kohya nkexro chrókóchjina ti itjén janhan ti chrókjuinki̱tsahya Tꞌaná. A̱ndá ti sin tso̱chjina la mé si̱ntaxechuán sin ti ña̱o tsjixixín. *Éxi chronka ti xroon itén Díos tsíkjin sin ósé: “Díos mé tsja̱ko̱he̱ kaín chojni.” A̱ndá kaín ti chojni tsíkihin nixja Tꞌaná la ko ti nkexro kꞌuitja ti nkehe kjuako chꞌan mé tóchjinehe sin ti janhan.
’Ninkexró kꞌuíkonhña Díos. Jehó ti nkexro kui̱xi̱n ti itjen chꞌan mé kꞌuíkon ti jehe chꞌan. Chaxín ti nkehe tjéxrja̱nka kixin ti nkexro tsitekaon ti janhan, mé tsochónta sin kjuachón nkochríxín. Janhan mé ti nio̱tja̱ tjajon kjuachón. Ti sin kꞌuaxrjeníxinra kꞌuejó ósé, kjónie sin ti maná ti kꞌuejó sin nte̱je̱, la kjónté ikꞌuén sin. A̱ndá tíhi mé ti nio̱tja̱ kꞌuínkaji̱nxi̱n nkaya nka̱jní, a̱ndá ti sin sinie ti nio̱tja̱ mé tsꞌenhña sin. Janhan mé ti nio̱tja̱ tjechón kꞌuínkaji̱nxi̱n nkaya nka̱jní. A̱ndá ti nkexro sinie ti nio̱tja̱ i, mé tsꞌejóchón sin nkochríxín. Ti nio̱tja̱ tsjánjua janhan mé nto̱na tíha, la tíha tsjánjua kixin tsochóntaxín kjuachón nkochríxín kaín ti chojni siín chjasintajni.
A̱ndá ti sin judío mé kjuankíxin kꞌuíxité sin, ikjo kícho sin, ndáchro sin:
―¿Nkexrín chrókjuajon chꞌan ti nto̱e chꞌan chrókjonieni? ―ichro sin.
Ndá kjuáte̱he chꞌin Jesús, ndáchro:
―Tso̱tjo̱nkara ijnko nkehe tjetoan kixin ti sintehyara nto̱e ti Xje̱en Díos kꞌóna chojni, la ko ti tsꞌihyara ijni̱é chꞌan, la tsochontahyara ti kjuachón. Ti nkexro sinie ti nto̱na la ko itsꞌi ti ijni̱ kuénta̱na la tsochónta sin kjuachón nkochríxín la ko janhan si̱ntaxechuán sin ti ña̱o tsjixixín. Kixin ti nto̱na mé ti nkehe chaxín inie chojni, la ko ti ijni̱ kuénta̱na mé ti nkehe chaxín itꞌi chojni. Ti sin inie ti nto̱na la ko itꞌi ti ijni̱ kuénta̱na mé nkoko̱a tjejóko sin ti janhan la ko janhan tjeki̱a̱n sin. Tꞌaná, ti nkexro ichrꞌán ti janhan, mé chónta ti kjuachón, a̱ndá janhan mé tjéchónxia̱n ti jehe chꞌan. A̱ndá ti sin sinie ti nto̱na mé tsꞌejóchónxin sin ti janhan. A̱ndá ti nio̱tja̱ níxja janhan mé ti nio̱tja̱ kꞌuínkaji̱nxi̱n nkaya nka̱jní, la yóe̱hya ti maná kjónie ti sin tsíkꞌaxrjeníxinra ósé, kixin jehe sin, kjónté kjónie sin ti nio̱tja̱ a, la ikꞌuén sin. A̱ndá ti nkexro sinie ti nio̱tja̱ kꞌuínkaji̱nxi̱n nkaya nka̱jní la tsꞌejóchón sin nkochríxín ―ichro chꞌin Jesús.
Kaín tíha mé kjua̱ko̱he̱ chꞌan ti sin tsíkónkotséxin ti nchia xrakue̱xin ti sin judío ti chjasin Capernaum.

A̱ndá ti ó kuíhin sin ti nkehe kjuako chꞌin Jesús, ndá itsjé ti sin chréhe̱ ti jehe chꞌan mé ndáchro sin:
―Imá ixra̱ ti nkehe tjako chꞌan. ¿Xá nkexro chrókuitekaon tíhi?
Ndá kónohe chꞌin Jesús kixin xi̱kaha itjo kícho sin kixin tienxínhña sin ti nkehe tsíchronka chꞌan, ndá kjuanchankí chꞌan:
―¿Á kja̱xinra tjinkákonhñara tsinhínra tíhi ní? ¿Ndá nkexrín chrókóhen ti chrókꞌuíkonra kixin ti Xje̱en Díos kꞌóna chojni mé sáchrókjui̱ ínaá chrókjuákꞌe ti kjuákꞌe senó? Ti Ncha̱kuén Díos mé tjajon ti kjuachón nkochríxín, a̱ndá ti cuerpo la ninkehó sínkíhya. A̱ndá ti nkehe tétjo̱nka̱ra mé kuènté Ncha̱kuén Díos la tíha mé tjejóchónxin chojni. Kjánchó isora la na̱xa̱ titekákonhñara.
Mé xi̱kaha ichro chꞌan kixin ndesi xránkíxixín la ó nohe chꞌan nkexro ti tsitekakuenhña ti jehe chꞌan la ko nkexro ti sinchekji ti jehe chꞌan. Ndá ndáchro chꞌan:
―Méxra̱ xi̱kaha kꞌuétjo̱nkara kixin ninkexró xitjahya tso̱chjina ti itjén janhan ti jehya Tꞌaná tsjajon kjuachaxin.
Ndá ti ó kuíhin sin xi̱kaha, la itsjé ti sin kꞌuéchréhe̱ ti chꞌin Jesús la kuíto̱he sin, í chrèhya sin chꞌan. Ndá kjuanchankíhi chꞌan ti teyó ti sin kꞌuájiko chꞌan, ndáchro chꞌan:
―¿Á kja̱xinra tjinkáonra sáchrókjuira ní?
*Ndá kjuáte̱he chꞌin Simón Pedro, ndáchro:
―Ìnchéni, ¿xá nkexro íjnko sáchrókjuichréhe̱ni?, kixin ti itan chro̱nka mé tsochóntaxíni ti kjuachón nkochríxín. Méxra̱ kuitekaoni la ko ó noheni kixin jaha mé ti Cristo, ti Xje̱en Díos tjechón.
Ndá kjuáte̱he chꞌin Jesús, ndáchro:
―Janhan kjuéyá ti jahara teyóra tjejora ntihi, kjánchó ijnko ti jahara mé nchexiteyéhéra ti jínahña.
Tíhi ndáchroxín chꞌan kixin chꞌin Judas Iscariote, xje̱en chꞌin Simón, mé ijnko ti teyóxin sin tsíkꞌeye̱he̱ chꞌan, mé sinchekji chꞌan ti chꞌin Jesús.

Listen to San Juan 6