Luc 21
21
Ndwéá kúhó mʉ́má wé á gbâ wɨ́
1Yésʉs ntɔ̂ʼ bɨ̂n mîh, beě mpʉ ókúm ó bʉ̂r, bé á gbɨgbâ mindwéá myɔ́ɔ́ ɨ́ mpɔra míndwéá yé á be ɨ́ mpáh Nzyɛ̌m yɨ́. 2Nó nyé á bee ntémé gúú ndyêbndyéb kúhó mʉ́má lɨ́ egbâ bípára bibá. 3Nó nyé á lɛ́ɛ ó: «Mě lɛ́ɛ́ bɨ́n lɨ́ otyeetye ó, ndyêbndyéb kúhó wɨ̂, wê bé ó sí buú gbâ mɔnɨ́, laa bʉ̂r bɨ́bɛ̂h. 4Ebě, bâʼ bɨ́bɛ̂h mpʉ bé dí e bisâ ɨ́ buo buo yɨ́, bê jaa gbá ó, njɨ sâ ntaa lɨ́ bisá byɔ́ɔ́ kʉ́ yɨ́. Nyɨɛ, damá jóʼo lɨ́ edyéb lé, nye bé yɨ́ɛ ó sí kʉ́ bánǎ gbâ sá yɨ́yɛ̂h nyé á gwa be ó, nye tíʼaa e tɨ̂ʼ yɨ́.»
Mpáh Nzyɛ̌m óbîʼ
5Jɔʼ yaá, bʉ́ʉ́ bʉ̂r, bé á be lɨ́ elwib ɨ́ lɔ̌b mpáh Nzyɛ̌m mpʉ wé á sumɔɔ e mbɨambɨa mekóʼ yɨ́. Wé á sumɔɔ ó e bisâ bʉ̂r, bé á dwidwe Nzyɛ̌m bí. Nó ó Yésʉs á lɛ́ɛ ó: 6«Bisá bɨ́n dí ebee bî, ɨ́ mimóhó mi dí enze mí, ekóʼ, lé ákǎ kalwo kʉ́ lʉ́ʉ́. Mɨ́mɛ̂h, mé ósîl élôʼlɔɔ sí.»
Mitúú e mindɛ̌l mí ésúʼlá
7Nó ó bé á dî e né ó: «Lɛ̂ʼla, bisyɛ́ɛla byaá, byé ósyɛ́ɛ ɨ́ yáǎ jɔʼ? Yé ngá lɛ̂ʼle bɨ́h jɔʼ byé ngá syɛ́ɛ yɨ́?»
8Nó ó Yésʉs á lɛ́ɛ ó: «Diʼee gá mekʉá ɨ́ binyâ. Bɨ̌n ámû jaá dímlɔɔ, ebě, bʉr ɨ́ buo buo, bé ónzɨnze e díé lâm, le elɨlɛ́ɛ ó: “Mɛm ó dí nye!” Bé óbáʼǎ lɛ́ɛ ntémé ó: “Jɔ̌ʼ jwɨ́ɨ́ yâm, yɨ́ pyâl!” Sâ gwár, mʉr adû gá bê. 9Bʉr, bé ólɛ́ɛ bɨ́n milɔ́ɔ ɨ́ lɔ̌b mɔ̂m e bintʉ̌ mû lɨ́ esyɛ́ɛlɨ bí. Milɔ́ɔ myaá sá atɨ̂l bɨ́n mekʉ̌ sí. Yé jala ó, bisâ byaá nyɛ́ɛ pyâl. Damá jóʼo nó, esúʼlá é kʉ́ e sí, lé ákóʼó kpâhwǎ pyâl.»
10Nó nyé á baʼa lɛ́ɛ e bé ó: «Yɨ̂ʼ kúl bʉ̂r, yé ólwímla e yʉ́ʉ́; nyâʼ njwɨ́ɨ lwímla e nyʉ́ʉ́. 11Sí, yé óbuú kubla bígúmo bígúmo. Nza, nye ónyaŋla ɨ́ sí yɨ́yɛ̂h. Bibébebébe bínumo, byé ópyâl ɨ́ byúú bígúmo. Bidǐm bi dí esâ ékɛ̂n bí le bidweʼle bí ábwaʼbwâʼ, byé ónyɨ̂n ɨ́ jʉ́o kʉ́. 12Nó ɨ́ jɔʼ bísâ byaá bíbyɛ̂h ngá be, byé dína apǎ pyâl yɨ́, bé ónyɛɛ́ mɛ̂r bɨ́n, le etíble bɨ́n, tô e bɨ̌n ɨ́ mempáh mínjɨʼla, lɨ́ etó pur bɨ́n le etíʼe bɨ́n milɔ̌b gʉ̂. Bé ótô e bɨ̌n ɨ́ mimbɛ̌r mímbʉʼ, le ɨ́ mempǒm me bʉ̂r onɨ́nɨ́ɨ́ ti e maá mé ójwɨ́ɨ, ɨ́ lɔ̌b wâm. 13Yé óbe bɨ́n ó, nzɨ̌ eboʼlǒ lɔ̌b wâm. 14Nó, boó tíʼe gá ɨ́ milémé mín ó: bɨ̌n ákóʼó syɛ̌l bá ɨ́ nkar bɨ́n ngá kar nyɨ́! 15Ebě, mɛm mʉr tɨ̂, me óboó dwe bɨ́n mekǎn le ocwóó, mbi dí ó, ontɨ̂m le obɨn bɨ́n, bé óbe, abe e nkul ekǎ yala, nkʉ̂ sóŋlo yɨ́. 16Osɔ́ŋ le onyɔ̌ŋ bɨ́n, bé óbɛ́ma bɨ́n. Bɨ́ɔɔ́ bɨ́n, obyɛ́l bɨ́n le osó bɨ́n, bé óbɛ́ma bɨ́n. Bé ójʉ̂ bʉ́ʉ́ bʉ̂r ɨ́ sɔ́má yɨ́n. 17Bʉr bɨ́bɛ̂h, bé óbene bɨ́n ɨ́ lɔ̌b wâm. 18Sâ gwár, abe e mpuo gwár ɨ́ lʉ́ wɨ́n ngá dîm. 19Tiʼɨɨ gá menyʉ́l mɨ́n ɨ́ nzɨ̌ bíhwó nyɨ́n!»
Túnó ɨ́ lɔ̌b ésúʼlá é Yerʉ́zalɛm
(Matthieu 24.15-21; Marc 13.14-19)
20Nó ó Yésʉs á lɛ́ɛ e bé ó: «Jɔʼ bɨ́n ngá bee bísɔ́má bísója lɨ́ elyɛrǎ Yerʉ́zalɛm ɨ́ nká yɨ́, gʉ́ŋáá gá ó, yé mû ó jɔ̌ʼ Yerʉ́zalɛm ngá lîʼ ɨ́ tíilʉ̌, akǎ be e bʉr yɨ́. 21Jɔʼ yaá, bʉr o ngá be ɨ́ sí Yʉ́da bá, bé ɨ́ jala le ekpɛ́ɛ, tô ɨ́ mecwɨ̂ʼ kʉ́. Baá o ngá bě Yerʉ́zalɛm bá, bé ɨ́ jala le ekpɛ́ɛ, tô ká ká lɨ́ ejaa. Baá ngá be ɨ́ mekwár bá, bé akǎ jala le ebáʼǎ nî ɨ́ nkana. 22Ebě, yé óbe ó melú mé tíʼá mílɔ̌b. Tɨ̂ʼ ó sá yɨ́yɛ̂h Mékaná mé Nzyɛ̌m dí elɛ́ɛ yɨ́ ngá dira yɨ́. 23Nkoó e bʉbá, bé óbe e mebum ndu e baá bé óbe lɨ́ edêhle bwân ɨ́ mimóhó myaá bá, ebě, bisá ngá gbâ bʉ̂r bʉ́á ɨ́ menyʉ̂l bí, byé ósyɛ́ɛ ɨ́ sí yɨ̂ʼ ɨ́ lɔ̌b nkpáǎ Nzyɛ̌m ngá lɛ̂ʼle bʉ̂r ó sí yɨ̂ʼ nyɨ́. 24Bâʼ bʉ̂r, bé ójʉ́ŋɔɔ le opasoŋ; bʉ́ʉ́, bé ótô lɨ́ okómó ɨ́ bikúl bíbyɛ̂h. Nó bʉr o bíkûl byaá, bé ónyǎl Yerʉ́zalɛm e mekʉ̌ mɔ́ɔ́, tó pyâl ɨ́ jɔʼ épʉ́la lɔ́ɔ́, lé óbe sí laa yɨ́.»
Nzéá mé Mwân mé Mʉr
25«Mesimá, mé ósyɛ́ɛ ɨ́ dʉ́o, le lɨ́ álomó le lɨ́ ocwícwén. Obóʼó ó mâŋ, wé ópɨ̂ʼla le eduo, ntaa sʉ́ŋa. Bʉr o bíkúl bí sí yɨ̂ʼ bɨ́bɛ̂h, bé ójóʼo bʉ́á, miléme ɨ́ mo ɨ́ nzamá. 26Ekɛ̂n, lé óbuú swɨɨ bʉ́rʉ̂m ɨ́ menyʉ̂l, bé ntɔ̂ʼ puro mpâl lɨ́ epahlě sá ngá syɛ́ɛ ɨ́ sí yɨ̂ʼ yɨ́, ebě, bisá bí nkûl bi dí ɨ́ jʉ́o kʉ́ bí, byé ókubla. 27Jɔʼ yaá ó bé ngá bee Mwân mé Mʉr lɨ́ enze ɨ́ dwiné tʉ́ŋlʉ̌, lwɨ́ŋlá e nkul ɨ́ buo buo ti e mentyɛnwa yɨ́. 28Jɔʼ bísyɛ́ɛla byaá, byé ótáare ésyɛ́ɛ yɨ́, sohaa gâ. Bɨ̌n e bɨ́r mîh kʉ́. Nzyɛ̌m óbe ó, nye mû kúno enzě táǎ góo, le edwih bɨ́n ɨ́ mpila ébébe.»
Kɨkɛna dí edumo e lɨ́ figyê yɨ́
29Nó ó Yésʉs á nze sâ bé kɨkɛna yɨ̂. Nye e né ó: «Jwɛ́ʼɛ́ɛ́ gá lɨ́ figyê ndu e byúú bílɨ́ ɨ́ buo buo. 30Jɔʼ bɨ́n béé bíká byɔ́ɔ́ lɨ́ edwánwo yɨ́, bɨ̌n bé lɨ́ egʉ́a o, nkóno, yé mû ó kúno epyâl. 31Bisyɛ́ɛla bî, byé ó jwɨʼ gwár. Jɔʼ bɨ́n óbee byé lɨ́ esyɛ́ɛ yɨ́, gʉ́ŋáá gá ó, Nzyɛ̌m mû ó kúno etyêl Mpóʼo nyé ɨ́ sɨŋ. 32Mě lɛ́ɛ́ bɨ́n lɨ́ otyeetye ó, mpeʼ bʉ̂r yɨ̂ʼ l'asíe, bisyɛ́ɛla bî, byé ópyâl, bíbyɛ̂h. 33Kʉ́ e sí, byé ólaa. Milɔ̌b myâm míɛ, myé ákóʼó síe.»
Diʼee gá ɨ́ mpʉ̂n
34«Gwá di gá le ocwóó. Milémé mín ámû jaá tyɛʼ ɨ́ mpwaʼ edɨ́ɨ́ ndu e mpur menyoʼ, nkʉ̂ ɨ́ mpuo bijwɨʼ bí twǐʼ sí yɨ̂. Móhó waá, wé ámû jaá pyâl bɨ́n metwɨrâ, mpʉ̌ syɛ̌m. 35Móhó waá, wé ópyâl bʉ̂r bɨ́bɛ̂h o dí ɨ́ sí yɨ̂ʼ bá. 36Diʼee gá ɨ́ mpʉ̂n. Jɨʼlaa gá ɨ́ jɔʼ yɨ́yɛ̂h, ó bɨ̌n nkʉ̂ kɨ̂ŋ bísyɛ́ɛla bí móhó waá bíbyɛ̂h. Jɨʼlaa gá ntémé ó bɨ̌n nkʉ̂ be e nkul etyɛ̂b ɨ́ mpǒm Mwân mé Mʉr.»
37Yésʉs á dwidwe bʉr milɛ́ʼlá ɨ́ mpáh Nzyɛ̌m ó, ɨ́ mimóhó. Nó ɨ́ bibíí bí kʉ̌ʼ bíɛ, nye á to jɨjâ ó, lɨ́ ecwɨ̂ʼ bé jɨ́jébé ó, “Ecwɨ́ʼ lé ólivier” lɨ́. 38Nó ó mínzɨnzɨ mi bʉ̂r mímyɛ̂h, myé á kûkuno, le etô mpáh Nzyɛ̌m, lɨ́ etó jôʼlo nyé yɨ́.
Currently Selected:
Luc 21: ozm
Highlight
Share
Copy
Want to have your highlights saved across all your devices? Sign up or sign in
Luc 21
21
Ndwéá kúhó mʉ́má wé á gbâ wɨ́
1Yésʉs ntɔ̂ʼ bɨ̂n mîh, beě mpʉ ókúm ó bʉ̂r, bé á gbɨgbâ mindwéá myɔ́ɔ́ ɨ́ mpɔra míndwéá yé á be ɨ́ mpáh Nzyɛ̌m yɨ́. 2Nó nyé á bee ntémé gúú ndyêbndyéb kúhó mʉ́má lɨ́ egbâ bípára bibá. 3Nó nyé á lɛ́ɛ ó: «Mě lɛ́ɛ́ bɨ́n lɨ́ otyeetye ó, ndyêbndyéb kúhó wɨ̂, wê bé ó sí buú gbâ mɔnɨ́, laa bʉ̂r bɨ́bɛ̂h. 4Ebě, bâʼ bɨ́bɛ̂h mpʉ bé dí e bisâ ɨ́ buo buo yɨ́, bê jaa gbá ó, njɨ sâ ntaa lɨ́ bisá byɔ́ɔ́ kʉ́ yɨ́. Nyɨɛ, damá jóʼo lɨ́ edyéb lé, nye bé yɨ́ɛ ó sí kʉ́ bánǎ gbâ sá yɨ́yɛ̂h nyé á gwa be ó, nye tíʼaa e tɨ̂ʼ yɨ́.»
Mpáh Nzyɛ̌m óbîʼ
5Jɔʼ yaá, bʉ́ʉ́ bʉ̂r, bé á be lɨ́ elwib ɨ́ lɔ̌b mpáh Nzyɛ̌m mpʉ wé á sumɔɔ e mbɨambɨa mekóʼ yɨ́. Wé á sumɔɔ ó e bisâ bʉ̂r, bé á dwidwe Nzyɛ̌m bí. Nó ó Yésʉs á lɛ́ɛ ó: 6«Bisá bɨ́n dí ebee bî, ɨ́ mimóhó mi dí enze mí, ekóʼ, lé ákǎ kalwo kʉ́ lʉ́ʉ́. Mɨ́mɛ̂h, mé ósîl élôʼlɔɔ sí.»
Mitúú e mindɛ̌l mí ésúʼlá
7Nó ó bé á dî e né ó: «Lɛ̂ʼla, bisyɛ́ɛla byaá, byé ósyɛ́ɛ ɨ́ yáǎ jɔʼ? Yé ngá lɛ̂ʼle bɨ́h jɔʼ byé ngá syɛ́ɛ yɨ́?»
8Nó ó Yésʉs á lɛ́ɛ ó: «Diʼee gá mekʉá ɨ́ binyâ. Bɨ̌n ámû jaá dímlɔɔ, ebě, bʉr ɨ́ buo buo, bé ónzɨnze e díé lâm, le elɨlɛ́ɛ ó: “Mɛm ó dí nye!” Bé óbáʼǎ lɛ́ɛ ntémé ó: “Jɔ̌ʼ jwɨ́ɨ́ yâm, yɨ́ pyâl!” Sâ gwár, mʉr adû gá bê. 9Bʉr, bé ólɛ́ɛ bɨ́n milɔ́ɔ ɨ́ lɔ̌b mɔ̂m e bintʉ̌ mû lɨ́ esyɛ́ɛlɨ bí. Milɔ́ɔ myaá sá atɨ̂l bɨ́n mekʉ̌ sí. Yé jala ó, bisâ byaá nyɛ́ɛ pyâl. Damá jóʼo nó, esúʼlá é kʉ́ e sí, lé ákóʼó kpâhwǎ pyâl.»
10Nó nyé á baʼa lɛ́ɛ e bé ó: «Yɨ̂ʼ kúl bʉ̂r, yé ólwímla e yʉ́ʉ́; nyâʼ njwɨ́ɨ lwímla e nyʉ́ʉ́. 11Sí, yé óbuú kubla bígúmo bígúmo. Nza, nye ónyaŋla ɨ́ sí yɨ́yɛ̂h. Bibébebébe bínumo, byé ópyâl ɨ́ byúú bígúmo. Bidǐm bi dí esâ ékɛ̂n bí le bidweʼle bí ábwaʼbwâʼ, byé ónyɨ̂n ɨ́ jʉ́o kʉ́. 12Nó ɨ́ jɔʼ bísâ byaá bíbyɛ̂h ngá be, byé dína apǎ pyâl yɨ́, bé ónyɛɛ́ mɛ̂r bɨ́n, le etíble bɨ́n, tô e bɨ̌n ɨ́ mempáh mínjɨʼla, lɨ́ etó pur bɨ́n le etíʼe bɨ́n milɔ̌b gʉ̂. Bé ótô e bɨ̌n ɨ́ mimbɛ̌r mímbʉʼ, le ɨ́ mempǒm me bʉ̂r onɨ́nɨ́ɨ́ ti e maá mé ójwɨ́ɨ, ɨ́ lɔ̌b wâm. 13Yé óbe bɨ́n ó, nzɨ̌ eboʼlǒ lɔ̌b wâm. 14Nó, boó tíʼe gá ɨ́ milémé mín ó: bɨ̌n ákóʼó syɛ̌l bá ɨ́ nkar bɨ́n ngá kar nyɨ́! 15Ebě, mɛm mʉr tɨ̂, me óboó dwe bɨ́n mekǎn le ocwóó, mbi dí ó, ontɨ̂m le obɨn bɨ́n, bé óbe, abe e nkul ekǎ yala, nkʉ̂ sóŋlo yɨ́. 16Osɔ́ŋ le onyɔ̌ŋ bɨ́n, bé óbɛ́ma bɨ́n. Bɨ́ɔɔ́ bɨ́n, obyɛ́l bɨ́n le osó bɨ́n, bé óbɛ́ma bɨ́n. Bé ójʉ̂ bʉ́ʉ́ bʉ̂r ɨ́ sɔ́má yɨ́n. 17Bʉr bɨ́bɛ̂h, bé óbene bɨ́n ɨ́ lɔ̌b wâm. 18Sâ gwár, abe e mpuo gwár ɨ́ lʉ́ wɨ́n ngá dîm. 19Tiʼɨɨ gá menyʉ́l mɨ́n ɨ́ nzɨ̌ bíhwó nyɨ́n!»
Túnó ɨ́ lɔ̌b ésúʼlá é Yerʉ́zalɛm
(Matthieu 24.15-21; Marc 13.14-19)
20Nó ó Yésʉs á lɛ́ɛ e bé ó: «Jɔʼ bɨ́n ngá bee bísɔ́má bísója lɨ́ elyɛrǎ Yerʉ́zalɛm ɨ́ nká yɨ́, gʉ́ŋáá gá ó, yé mû ó jɔ̌ʼ Yerʉ́zalɛm ngá lîʼ ɨ́ tíilʉ̌, akǎ be e bʉr yɨ́. 21Jɔʼ yaá, bʉr o ngá be ɨ́ sí Yʉ́da bá, bé ɨ́ jala le ekpɛ́ɛ, tô ɨ́ mecwɨ̂ʼ kʉ́. Baá o ngá bě Yerʉ́zalɛm bá, bé ɨ́ jala le ekpɛ́ɛ, tô ká ká lɨ́ ejaa. Baá ngá be ɨ́ mekwár bá, bé akǎ jala le ebáʼǎ nî ɨ́ nkana. 22Ebě, yé óbe ó melú mé tíʼá mílɔ̌b. Tɨ̂ʼ ó sá yɨ́yɛ̂h Mékaná mé Nzyɛ̌m dí elɛ́ɛ yɨ́ ngá dira yɨ́. 23Nkoó e bʉbá, bé óbe e mebum ndu e baá bé óbe lɨ́ edêhle bwân ɨ́ mimóhó myaá bá, ebě, bisá ngá gbâ bʉ̂r bʉ́á ɨ́ menyʉ̂l bí, byé ósyɛ́ɛ ɨ́ sí yɨ̂ʼ ɨ́ lɔ̌b nkpáǎ Nzyɛ̌m ngá lɛ̂ʼle bʉ̂r ó sí yɨ̂ʼ nyɨ́. 24Bâʼ bʉ̂r, bé ójʉ́ŋɔɔ le opasoŋ; bʉ́ʉ́, bé ótô lɨ́ okómó ɨ́ bikúl bíbyɛ̂h. Nó bʉr o bíkûl byaá, bé ónyǎl Yerʉ́zalɛm e mekʉ̌ mɔ́ɔ́, tó pyâl ɨ́ jɔʼ épʉ́la lɔ́ɔ́, lé óbe sí laa yɨ́.»
Nzéá mé Mwân mé Mʉr
25«Mesimá, mé ósyɛ́ɛ ɨ́ dʉ́o, le lɨ́ álomó le lɨ́ ocwícwén. Obóʼó ó mâŋ, wé ópɨ̂ʼla le eduo, ntaa sʉ́ŋa. Bʉr o bíkúl bí sí yɨ̂ʼ bɨ́bɛ̂h, bé ójóʼo bʉ́á, miléme ɨ́ mo ɨ́ nzamá. 26Ekɛ̂n, lé óbuú swɨɨ bʉ́rʉ̂m ɨ́ menyʉ̂l, bé ntɔ̂ʼ puro mpâl lɨ́ epahlě sá ngá syɛ́ɛ ɨ́ sí yɨ̂ʼ yɨ́, ebě, bisá bí nkûl bi dí ɨ́ jʉ́o kʉ́ bí, byé ókubla. 27Jɔʼ yaá ó bé ngá bee Mwân mé Mʉr lɨ́ enze ɨ́ dwiné tʉ́ŋlʉ̌, lwɨ́ŋlá e nkul ɨ́ buo buo ti e mentyɛnwa yɨ́. 28Jɔʼ bísyɛ́ɛla byaá, byé ótáare ésyɛ́ɛ yɨ́, sohaa gâ. Bɨ̌n e bɨ́r mîh kʉ́. Nzyɛ̌m óbe ó, nye mû kúno enzě táǎ góo, le edwih bɨ́n ɨ́ mpila ébébe.»
Kɨkɛna dí edumo e lɨ́ figyê yɨ́
29Nó ó Yésʉs á nze sâ bé kɨkɛna yɨ̂. Nye e né ó: «Jwɛ́ʼɛ́ɛ́ gá lɨ́ figyê ndu e byúú bílɨ́ ɨ́ buo buo. 30Jɔʼ bɨ́n béé bíká byɔ́ɔ́ lɨ́ edwánwo yɨ́, bɨ̌n bé lɨ́ egʉ́a o, nkóno, yé mû ó kúno epyâl. 31Bisyɛ́ɛla bî, byé ó jwɨʼ gwár. Jɔʼ bɨ́n óbee byé lɨ́ esyɛ́ɛ yɨ́, gʉ́ŋáá gá ó, Nzyɛ̌m mû ó kúno etyêl Mpóʼo nyé ɨ́ sɨŋ. 32Mě lɛ́ɛ́ bɨ́n lɨ́ otyeetye ó, mpeʼ bʉ̂r yɨ̂ʼ l'asíe, bisyɛ́ɛla bî, byé ópyâl, bíbyɛ̂h. 33Kʉ́ e sí, byé ólaa. Milɔ̌b myâm míɛ, myé ákóʼó síe.»
Diʼee gá ɨ́ mpʉ̂n
34«Gwá di gá le ocwóó. Milémé mín ámû jaá tyɛʼ ɨ́ mpwaʼ edɨ́ɨ́ ndu e mpur menyoʼ, nkʉ̂ ɨ́ mpuo bijwɨʼ bí twǐʼ sí yɨ̂. Móhó waá, wé ámû jaá pyâl bɨ́n metwɨrâ, mpʉ̌ syɛ̌m. 35Móhó waá, wé ópyâl bʉ̂r bɨ́bɛ̂h o dí ɨ́ sí yɨ̂ʼ bá. 36Diʼee gá ɨ́ mpʉ̂n. Jɨʼlaa gá ɨ́ jɔʼ yɨ́yɛ̂h, ó bɨ̌n nkʉ̂ kɨ̂ŋ bísyɛ́ɛla bí móhó waá bíbyɛ̂h. Jɨʼlaa gá ntémé ó bɨ̌n nkʉ̂ be e nkul etyɛ̂b ɨ́ mpǒm Mwân mé Mʉr.»
37Yésʉs á dwidwe bʉr milɛ́ʼlá ɨ́ mpáh Nzyɛ̌m ó, ɨ́ mimóhó. Nó ɨ́ bibíí bí kʉ̌ʼ bíɛ, nye á to jɨjâ ó, lɨ́ ecwɨ̂ʼ bé jɨ́jébé ó, “Ecwɨ́ʼ lé ólivier” lɨ́. 38Nó ó mínzɨnzɨ mi bʉ̂r mímyɛ̂h, myé á kûkuno, le etô mpáh Nzyɛ̌m, lɨ́ etó jôʼlo nyé yɨ́.
Currently Selected:
:
Highlight
Share
Copy
Want to have your highlights saved across all your devices? Sign up or sign in