Genesis 42
42
Joseph-kenh awayikw-rnem apmer Egypt-warl alheyel amernek
1Jacob-el awek ntang weyt-angketyarr apmer Egypt-itwek, angkemel, “Ilek arringkerr apatemel aneyel? 2Atha awek Egypt-an ntang weyt-angketyarr. Arringkerr ingkerrenh alhenherr-arey Egypt ikwer-warl ntang weyt inerl-alpetyek, angayakwirrekerr.”
3Joseph-kenh awayikw 10-pel alhek apmer Egypt-warl. 4Jacob-el alerikw akelyan thweney-angenh. Anterrkwek apmer-itwek-antey. Ra aterirrek atwekerr apek renh. 5Jacob-kenh-rnem anyentirrenhek angayakw ingwer-rnem-angkwarr, Egypt-warl rernem alhek.
6Joseph ra Atyetyart anenh apmer-rnem arntarnt-arayntetyek, ntang weyt-rnem arlperrtyilemel anthayntetyek. Awayikw ikwerenh-rnem apetyek ikwer-warl, kwenirrey-alhemel ikwer-itwek.
7-8Rernem Joseph renh alhengk-arey-angenh, rant renh-rnem alhengk-arek, ra ingwer-arrpantey anenh. Ra renh-rnem iltek, “Nthenh-they arringkerr apetyek?”
“Anwingkerr apmer Canaan-they apetyek, ntang weyt inerl-alpetyek, amern-weny-kety,” rernem renh ilek.
9Joseph ra iylpangkek, rarl altyerr awank arek, “Arringkerr arlwarrernerl-ayntetyek, ahelengkw-rnem apek.”
10Rernem angkek, “Arrangkw anwingkerran arwarl apetyek, amern ntang weyt-angketyarr-warl, amern-weny-kety. 11Anwingkerr ingkerrenh artwamp anyent-kenh-antey. Anwingkerr arraty ileyel, irrtywerremel iley-angenh. Anwingkerr iylpareth inngarl, irrtywerremel iley-angenh.”
12Joseph-el renh-rnem ilek, “Arringkerr apmer renh arlwarrernerl-alpetyek, arringkerr irlkenty-akert apey-alpey-alenty, apmer nhenh-itwek atwetyek-anem.”
13Rernem Joseph renh ilek, “12-an anwingkerr anekan, artwamp anyent-kenh-antey. Akelyan artwamp anwekingkerrenh-itwek anerl-anem Canaan-itwek. Anyent ingweran ilwekarl.”
14Joseph-el renh-rnem itwengetilekan, “Arringkerr artwa ahelengkw-rnem apekan. 15Alerl atha arrenhingkerr iterl-arey-tangkwel, artwa ahelengkw-rneman. Atyetyart Pharaoh iteth aneyel-apeny, arringkerr apmer nhel anetyek, aytey arrekingkerrenh ra apetyeyek-awaty. 16Anyent apmer-warl alpey ayteyikw inerl-alpetyek atyeng-warl akngetyemel. Awayikw ingwer-rnemarl tyayl-itwek anenherr-arey.” 17Ra renh-rnem tyayl-ek ingkerrenh akwernek, rernem arlta irrpety tyaylel anek.
18Joseph-el renh-rnem ilek, “Ayeng Akngeyekant iterreyel. Alerl-apeny atha arrenhingkerr ipmem. Anyent ingweran tyayl-itwek anayntem. 19-20Arringkerr ilelhek, arringkerr artwa mwerr akwel. Arringkerr atyeng mwerr-angkwarr awelhenty, atha arrenhingkerr ipmek atwey-angenh. Arringkerr aytey arrekingkerrenh ikngwerl-alpa atyeng-warl akngetyemel, atha renh aretyek. Atha renh arenty, athap arrenhingkerr iterl-arem, arratyarl ileyel atyeng.”
21Ikwer-penhan rernem angkerrenh, “Akngeyel anwenhingkerr atwem, anwingkerrarl Joseph renh awank irrkewarl iwek-penh.”
22Reuben angkek, “Atha arrenhingkerr ilek, awey atwey-angenhek. Arringkerr atyeng awelhey-angenharl, Akngeyel anwenhingkerr atwemant-anem.” 23Rernem iterl-arenh Joseph-el-arl angka ikwer-rnem-kenh awey-angenh-arrpantey. Joseph angkenh angka Egypt-areny-kenhel, artwa ingwerelarl angka anayntilek ikwer-rnem. Rernem ikwer iterrenh iylpa arwengkek-arrpantey, angka ikwer-rnem-kenh awey-angenh.
24Joseph intwemelirrek, artnemel-anem. Ikwer-penhan ra angkek arrpemarl ikwer-rnem-warl. Ikwer-penhan ra warrkenh ikwerenh ilanthek, ra Simeon rwepel arertnetyek.
25Ikwer-penhan Joseph-el warrkenh ikwerenh thwenek, ayteyikw ikwerenh-warl alhetyek, yakweth-warl man angkep irrtyert akwernetyek ikwerenh, angkep antheynetyek ikwer, rarl amern payemelek. Ra ntang-rnem yakweth arrpanenh arrerneynek, ntang-rnem-then man-rnem-then. 26Rernem ntang tangkey-warl tywenek, alpek-anem rernem.
27Ingwel rernem ayntey-alpek ampepel. Artwa anyentel yakweth altywerilek, man-akert tangkey wantetyek, rap man amern-akert kwen. 28Ra ilek, “Angwenhel man angkep antheynek, yakweth-itwek aynteyel?” Rernem ater-anem irrek, “Nthakenh Akngeyel anwenhingkerr angwenhileyel?”
29Apmer Canaan-warl rernem alpek, rernem aynikw ikwer-rnem-kenh angka ilek-ilek iley-alpek ikwer-warl. 30“Egypt-areny Atyetyartel anwenhingkerr artwa ahelengkw-arrpantey arey-ayntek, apmer arlwarrernerl-anenty-arrpantey. 31Anwingkerr renh ilek, ‘Anwingkerr artwa mwerr-rneman ahelengkw-wenyarl. 3212-an anwingkerr anekan, artwamp anyent-kenh-antey. Akelyan artwamp anwekingkerrenh-itwek anerl-anem Canaan-itwek. Anyent ingweran ilwekarl.’
33Atyetyartel anwenhingkerr itwengetilekan, ‘Alerl atha arrenhingkerr iterl-arey-tangkwel, artwa ahelengkw-rneman. Atyetyart Pharaoh iteth aneyel-apeny, arringkerr apmer nhel anetyek, aytey arrekingkerrenh ra apetyeyek-awaty. 34Arringkerr aytey arrekingkerrenh-akert apey-alpetyek, atha arrenhingkerr iterl-aretyek, arringkerrarl artwa mwerr-rnem, ahelengkw-weny.’ ”
35Rernem yakweth-rnem altywerilek. Rernem arek man ingkerrenh ayntenty. Rernem aterirrek, aynikw aterirrek arrpemarl. 36Jacob-el alerikw-rnem ilek, “Arringkerr awey atyenh atyeng-they rakek. Joseph-an arrangkw, Simeon arrangkw arrpemarl. Arringkerr ilkelheyel Benjamin raketyek arrpemarl, alakenh irrwernek?”
37Reuben-el aynikw ikwerenh ilek, “Ayeng Benjamin-weny arrangkw apey-alpenty, ntwa aler atyenh-atherr ipmek atwem. Atha renh arntarnt-aretyek, akngey-alpem innga.”
38Jacob angkek, “Benjamin, alerey akely atyenhan atha nthakenh Egypt-warl thweney-angenh, alerey atyenh arrwekel ilwek-ketyarl. Alerey anyent-anem atyenh impen-antey, nthakenh tyarlewey-angenh ra alhetyek. Ayeng ikwer amperrngirrerl-anekerr, arringkerr renh akngentyan.”
Currently Selected:
Genesis 42: aly
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.