Johannes 13
13
1Anpetu en wośnapi ece kin itokam, anpetu qon wanna hiyohi, he en maka kin detanhan iyaye kta, Atkuku ektakiya hde kta, Jesus sdonkiya, tona maka akan tawa kin waśtewicadake cin hena owihanketa waśtewicakida.
2Wotapi ayaśtanpi hehantu; Judas Iskariot Simon cinhintku kin hee, Jesus wiyopeye kte cin, Wakanśica wanna hecen cante ozekiya.
3Hehan Jesus Atkuku taku owasin tawa kiye ciqon he sdonkiya un, Wakan tanka eciyatanhan hi, qa ake Wakantanka ekta hde kta.
4Hecen wotapi kin etanhan najin, qa śina ekihnaka; qa napipakinte wan icu, qa ipiyaka.
5Qa hehan mini wakśica en okaśtan, qa waonspewicakiye cin siha wicakiyujaja, qa napipakinte wan ipiyake ciqon heon siha kin wicakipakinta.
6Simon Inyan ehan ahi; unkan, Itancan, niye siha mayakidujaja kta he, eciya.
7Unkan Jesus ayupte c̣a, Taku ecamon kin de nakaha sdonyaye śni, tuka ihakamya sdonyaye kta, eciya.
8Icimana siha mayakidujaja kte śni, ake Inyan eciya. Hehan Jesus ayupte; Ciciyujaja śni kinhan takudan on miyecica kte śni, eya.
9Hehan Simon Inyan heciya; Itancan, siha ecedan śni, tuka minape, mapa koya.
10Unkan Jesus heciya; Tuwe wanna ihdujaja kin he takudan sanpa cin śni, siha ecedan yujajapi kta, eya wanna ocowasin ska; unkan niye niskapi, tuka iyuḣpapi śni.
11Tuwe wiyopeye kte cin he sdonya, heon etanhan, owasin niskapi śni ce, eya.
12Unkan siha wicakiyujaja yuśtan kin hehan śina ehdaku qa hdewin qa iyotanke c̣a, Taku tokaciconpi kin de sdonyayapi he, ewicakiya.
13Waonspekiya qa Itancan, emayakiyapi ece; he tanyan ehapi; he miye nakaeś.
14Heon etanhan miś miye Waonspekiya qa Itancan mayaduhapi kin, siha ciciyujajapi kinhan, niś eya otoiyohi siha yeciyujajapi kta iyececa.
15Waonspeoiciyapi kin he niś he iyecen ecanonpi kta e hecaciconpi.
16Ookiye unpi kin he Itancan kin iyakapa śni; qa tuwe u śipi kin he tuwe u śi hecinhan, he iś iye kapa śni, wowicake, wowicake eciyatanhan eciciyapi.
17Taku kin dena sdonyayapi hecinhan, ecen ecanonpi kinhan waśteya yaunpi kta.
18Taku epe cin de niye iyuḣpa heciciyapi śni; tona wicawakaḣnige cin hena sdonwicawakiya; tuka wowapi en kagapi qon yuecetu kta; Tuwe kici aguyapi wata ece kin he miye on siha yuwankan ehdaku ce.
19Taku kin dena ecetu śni itokam ociciyakapi; hecen tohan iyecetu kinhan, he miye e wicayadapi kta.
20Tuwe tokiya yewakiye cin tuwe iyowinkiye cinhan, he miye e iyowinmaye; qa tuwe iyowinmaye cinhan, he tuwe u maśi kin he iyowinkiya, wowicake, wowicake eciyatanhan eciciya pi.
21Jesus hena hecen eye c̣a hehan toksape kin ekta iyahdeic̣iya, hdaotanin qa heya; De dukanpi kin etanhan wanji wiyopemayayapi kta, wowicake, wowicake on eciciyapi ce.
22Hehan waonspewicakiye cin opakiciḣta yukanpi, wanji tukte e on heye cin sdonyapi śni.
23Unkan Jesus waonspewicakiye cin wanji nina waśte kidake ciqon, he eca maku kin en makan iwanka.
24Heon Simon Inyan he wikiyuta, qa wanji tukte he on heye cin he iwange śi.
25Hehan he Jesus maku kin en iwanke c̣a, Itancan, he tuwe he, eya.
26Jesus ayupte; Wanji tukte ḣpanyanpi onśpa waqu kinhan hee kta, eya. Hecen onśpa ḣpanye c̣a, Judas Iskariot eciyapi Simon cinhintku he qu.
27Unkan Judas ḣpanyanpi kin icu, hehan Satan mahen iyaya. Hecen Jesus heciya; Taku ecanon kte cin kohanna econ wo.
28Wahna wotapi kin ihdukśan yukanpi kin, taku on heye cin tuwedan okaḣnigapi śni.
29Judas mazaska opiye yuhe cin heon, Jesus wośnapi kta on taku cinpi kin he opeton śi; qa iś, waḣpanicapi kin taku wicaqu śi, apa kecinpi.
30Unkan ḣpanyanpi qon he icu qehan, hecehnana tankan iyaya; wanna hanyetu hehantu.
31He tankan iyaya, hehan Jesus hey a; Wanna Wicaśta Cinhintku kin yutanpi, qa nakun iye eciyatanhan Wakantanka iś yutanpi.
32Qa iye eciyatanhan Wakantanka yutanpi hecinhan, hehan Wakantanka iś iye kin on hdutan kta, nakun kohanna hdutan kta.
33Hokśiyoqopa ehake ptenyedan ocipapi kta. Amayakitapi kta, qa Juda oyate ewicawakiye ciqon; Tokiya mde cin ekta yaipi kta oyakihipi śni ce; he iyecen nakaha eciciyapi.
34Woahope teca wan cic̣upi, otoiyohi waśteyecidapi kta; waśtecicidapi kin he iyecen waśteyecidapi kta.
35Heon waonspeciciyapi yaunpi kin wicaśta owasin sdonyapi kta, otoiyohi waśteyecidapi kinhan.
36Itancan, tokiya de kta he, Simon Inyan eciya. Jesus ayupte; Tokiya mde cin ekta de kta eśta nakaha oyakihi kte śni, tuka ihakamya mihektam yau kta, eya.
37Unkan Inyan heciya; Itancan, tokeca nakaha cihakam waun kta owakihi śni he; niye on wiconi mduhe cin eḣpewaye kta, eya.
38Jesus ayupte; Miye on wiconi nitawa eḣpeyaye kta he. Wowicake, wowicake on heciciya; Anpaohotonna kin hoton śni itokam yamni akihde sdonmayaye śni, kehe kta ce, eya.
Currently Selected:
Johannes 13: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.