Kulaje 1

Jeju pa tar dɔ Ndil-mə-nda tə̂

1Ngokɔnʼm Topil, mə makəturu tə̂ ləm kə̂ dɔngɔr, m-pa tar dɔ nɛ̂nje tə̂ tɔyn kə̂ Jeju unn kutu dda kə nɛ̂nje kə̂ n̂-tɔju kunn-kutu kula tə̂ kə̂ n̂-dda 2ndərəng ndɔ tə̂ kə̂ Lubba unnɛ̂ təl saa darâ. Kete bba karə Lubba təl saa darâ le, nunn ndu ddəw tə̂ lə Ndil-mə-nda narə njê-kaw-kulaje kə̂ n̂-mbərəde. 3Go yo tə̂ laa a, n̂-tɔju rɔɛ̂ narəde ngaâ n̂-dda nɛ̂nje dang dang ta tɔjude to nisi kəm baa. N̂-dda tokə baann ndɔ dɔsɔ ngaâ n̂-pa tar dɔ kɔn-mbay tə̂ lə Lubba narəde. 4Marə ndɔ nisi ta nɛ̂n-kusa tə̂ kə de a, nunn ndu narəde nan: «Ɔtuje mə bbe tə̂ kə̂ Jerujalɛm ang, ta ə-ngəbbəje nɛ̂n kə̂ Bɔ unn ndue ta karəse, nɛ̂n kə̂ m-pa tarɛ̂ marəse kete mban le. 5Jan dda dəwje batɛm maann, a sese, â kingaje batɛm Ndil-mə-nda mə ndɔje tə̂ nəənn.»

Tar təl lə Jeju darâ

6Njê-kaw-kulaje le mbɔnje naan rɔ Jeju tə̂ ngaâ dujeje nan: «Əbbə-dəwje, bbasinɛn nəənn njaa â təl kə kɔn-mbay karə ngann Ijarayɛlje wa?» 7Jeju ilade tə̂ nan: «To tar ləse ta gərə ndɔɛ̂ wase karɛ̂ ang. Mba Bɔy â ɔju ndɔɛ̂ kə karɛ̂ le ddəw singa tə̂ laa njaa. 8A, â kingaje singa-mɔngu ddəw tə̂ lə Ndil-mə-nda kə̂ a ddee dɔse tə̂. Ngaâ â təlje to njê-tar-najije ləm mə bbe tə̂ kə̂ Jerujalɛm, dɔ nangə Jude tə̂ tɔyn, dɔ nangə Samari tə̂, ndərəng kɔyn nangə tə̂ tɔyn.»

9Go tar tə̂ kə̂ Jeju pa le a, nin kəmde tə̂ naw kə darâ ngaâ mum dibbi dɔɛ̂ arə dooeje ang.

10Kar tə̂ kə̂ daw daaje lo kə darâ kə go Jeju tə̂ le bbay a, kəm naan tə̂ nəənn, dingawje joo ulaje kubbu kə̂ nda ngaâ arje mbɔr njê-kaw-kulaje tə̂ le. 11Dingawje le paje arəjede nan: «Dəwje kə̂ Galile, mba ddi bba arje nəənn aw aaje lo kə darâ wa? Jeju kə̂ Lubba unnɛ̂ horose tə̂ aw saa kə darâ le a təl ddee tokə kaw laa kə̂ ooje nəənn.»

Kuwa-dɔ-naan lə njê-kaw-kulaje

12Njê-kaw-kulaje le inje dɔ ddingiri tə̂ kə̂ daw bbar nan ddingiri olibəje le təlje Jerujalɛm. Ddingiri le to ngɔsi baa kə bbe le asə kilometere kâra. 13N̂-teeje Jerujalɛm a, daalje dawje mə kəy tə̂ kə̂ to dɔ marɛ̂ tə̂ taar kə̂ to lo mbɔn-naan ləde. Dəwje kə̂ eeje tə̂ənn to Piyɛr, Jan, Jakə de kə Andere, Pilipi de kə Toma, Bartelemi de kə Matiye, Jakə ngonn lə Alpe, Simɔn kə̂ daw bbarɛ̂ nan Jelotə kə Judə ngonn lə Jakə. 14Dede tɔyn njaa daw dooje ta naan daw dujuje Lubba kə ndɔ tɔyn. Marə dɛnɛ̂nje kə Mari kɔn Jejuje kə ngakɔn Jeju eeje horode tə̂ tɔ.

Dunn Matiyas turu Judas tə̂ to nje-kaw-kula

15Dɔ ndɔɛ̂je tə̂ənn, Piyɛr in taar horo njê-mə-kunnje tə̂ kə̂ kɔrde asə kɔr kâra kə dɔjoo ngaâ pa nan: 16«Ngakɔnʼmje, tar kə̂ Ndil-mə-nda unda ta Dabbiti tə̂ arə pa makəturu tə̂ lə Lubba le ddee to tar kə̂ tɔkɔrɔ ngaa. Tar le nan Judas a təl to nje-kunn nɔn dəwje kə̂ uwaje Jeju. 17Ləw, Judas le ee horoje jee njê-kaw-kulaje tə̂ njaa ngaâ dinya dəbbə kula kə̂ jaw dda nəənn jia tə̂ tɔ. 18N̂-ndoko ndɔɔ kə narɛ kə̂ dukɛ̂ nɛ̂n mba nɛ̂n-dda kə̂ gatə gatə ang kə̂ n̂-dda le ngaâ n̂-tee noso mə ndɔɔ tə̂ le kə gɔsɛ̂, məɛ̂ ribba ngaâ kula-sinyɛ̂ tee tɔyn ungu ddaka. 19Dəwje tɔyn kə̂ ddaje bbe Jerujalɛm ooje tarɛ̂ ngaâ undaje ri ndɔɔ le kə ndɔn-tar ləde nan ‹Akɛldama›, gəl ri le nan: ndɔɔ-məsə. 20N̂-dda tarɛ̂ makəturu Sɔmje tə̂ nan:

‹Maji karə kəy laa təl dɔ-ndubba ta dəw to tə̂ ang.›

N̂-dda makəturu tə̂ lə Lubba bbay nan:

‹Maji karə marə dəw taa ture kula tə̂ laa#1:20 Sɔm 69:26 ; 109:8.›

21«Marə dəwje kə̂ njaje kə je dɔ ndɔje tə̂ kə̂ Əbbəjeje Jeju aw ɔru nɛ̂n nɔnje eeje nəənn, 22unn kute dɔ ndɔ tə̂ kə̂ Jan ddɛɛ̂ nɛ̂n batɛm ndərəng ndɔ tə̂ kə̂ Lubba unnɛ̂ nɛ̂n horoje tə̂ təl saa darâ. Maji karə marə dəw kâra horo dəwje tə̂ nəənn le təl to nje-tar-naji kə je dɔ tar ndol tə̂ lə Jeju-Kristə kə̂ oy, a ndol le.»

23Yeenn ngaâ n̂-tɔjuje dəwje joo: Jojɛpə kə̂ marə ria to Barsabas kə̂ daw bbarɛ̂ bbay nan Justus, ne kə Matiyas. 24Goe tə̂ a n̂-dujuje Lubba nan: «Əi Əbbəjeje kə̂ ə-gərə nɛ̂n kə̂ to mə dəwje tə̂ tɔyn, horo dəwje tə̂ kə̂ joo nəənn ɔru dəw kə̂ məi ndiki 25karə n̂-dda kula lə njê-kaw-kulaje turu Judas tə̂ kə̂ tusu kula le inya a, aw lo tə̂ laa kə̂ asɛ̂ le.»

26N̂-dda əlɛmtɛɛn, a əlɛmtɛɛn le oso dɔ Matiyas tə̂ ngaâ kar tə̂ənn njaa dilɛ̂ horo njê-kaw-kulaje tə̂ kə̂ eeje dɔku gire kâra le.

Currently Selected:

Kulaje 1: KabbaDkS

Highlight

Copy