Génesis 17
17
Seiꞌtacdyeꞌ jịꞌĉocdyes p̂eyacdyeꞌ
1Aty arajtac quiꞌtac arajtac jiyiꞌdyemꞌ yómodyeꞌ tyiti muꞌ Abram, chat qui Ayoꞌ jiꞌcaviti muꞌyaꞌ, jajiti:
—Yụ nash Jenꞌ mujuꞌchaꞌ ferdyeꞌtumtyiꞌ. Rụij buꞌyi raꞌ mi chäquitiꞌ ram räjĉan. 2Yụ raꞌ yụꞌtyeyeye p̂eyacdyeꞌ mi, yụ raꞌ jiꞌdaijbiye vóshiꞌ mi, anic raꞌ jiyi daiꞌ in —yi Ayoꞌ jajiti.
3Abram dyụtsyi muꞌyaꞌ täjjequeꞌ jac jáfiyaꞌ muꞌ. Jenꞌ na tacaꞌ yejĉoij p̂eyaqui jajiti Abram:
4—Ọij nash p̂eyacdyeꞌ yụ yụꞌtyeyeyes mi q̂uinꞌ yiꞌ: Yụ raꞌ jiꞌdaijbiye vóshiꞌ mi, anic raꞌ daiꞌ in paiꞌ raꞌ bäꞌyi in ferdyeꞌtum raꞌ in. 5Q̂uinꞌ yụ jéye aty qui raꞌ jam Abram tịj mi, yocsiꞌ qui raꞌ tịj soꞌmeye q̂uinꞌ, Abraham qui raꞌ tịj mi,#17:5 Hebreosĉan Abraham yiꞌ ca yiꞌ: "Daiꞌtyiꞌ vóshiꞌ". ĉaĉaij na yụ yụꞌtyeyeye dayi raꞌ vóshiꞌ mi. 6Yụ raꞌ jiꞌdaijbiye vóshiꞌ mi, pạrej raꞌ ayoꞌbuꞌyi in. 7Yụ raꞌ soꞌmeye yụꞌtacdyes p̂eyacdyeꞌ, mídyes raꞌ judyeyaꞌ raꞌ vóshidyes mi, jam raꞌ junꞌ mọtsiꞌ p̂eyacdyeꞌ, yụ raꞌ mítyiꞌ Jenꞌ judyeyaꞌ vóshiꞌtyiꞌ Jenꞌ chimeꞌ mi. 8Yóĉandyemꞌ bäꞌyi q̂uinꞌ um Canaánĉan, räjenꞌdye raꞌ soꞌmeye mi judyeyaꞌ vóshidyes mi, räjĉan raꞌ miꞌindyes, jam raꞌ junꞌ mọtsiꞌ ọij p̂eyacdyeꞌ yụ, ĉaĉaij na yụ raꞌ muꞌintyiꞌ Jenꞌ in.
9Chimeꞌdye Jenꞌ jajiti muꞌ Abraham:
—Chäquibutiꞌ ram ọij p̂eyacdyeꞌ yụ, meꞌdye raꞌ chimeꞌ vóshiꞌ mi chäquibun raꞌ in. 10Ọij p̂eyacdyeꞌ soꞌmeyes yụ paj qui mi mọꞌ chiqueꞌ judyeyaꞌ mítyiꞌ vóshiꞌ in, yiꞌ: räj raꞌ sonꞌ in räj raꞌ seiꞌtac in. 11Räj raꞌ miꞌin seiꞌtac raꞌ damꞌ aꞌsiꞌ shoꞌpaꞌ miꞌin,#17:11 Seiꞌtacdyeꞌ cạiꞌ junꞌ chuc meꞌjeꞌ damꞌcheꞌ dyuꞌ muꞌin, Jenꞌ meꞌ yụꞌtyeꞌ p̂eyacdyeꞌ. mọꞌ raꞌ jịꞌĉocdyes aty tiĉunꞌbutiĉaꞌ yụs yụꞌtacdyeꞌ soꞌmeyacsiꞌ yụ jiquej. 12Q̂uinꞌ chat naꞌi ạvaꞌ sonꞌ jụijyaꞌ miꞌin, seiꞌtac raꞌ aꞌsiꞌ shoꞌpaꞌ muꞌin. Aty q̂uenꞌĉan mạyedyeꞌ tyiti in chat qui raꞌ seiꞌtac aꞌ muꞌin. Meꞌdye raꞌ chimeꞌ räj seiꞌtac úñitysiꞌ aꞌsiꞌ shoꞌpaꞌ muꞌin sonꞌ in, meꞌ tsanꞌ yaꞌijtyiꞌ úñity miꞌin, ạvaꞌ muꞌin räj raꞌ seiꞌtac in. 13Cäts raꞌ seiꞌtac aꞌsiꞌ shoꞌpaꞌ muꞌin, mọꞌ raꞌ jịꞌĉocdyes aty jụjjibutiĉaꞌ yụs yụꞌtacdyeꞌ miꞌin, jam raꞌ junꞌ mọtsiꞌ ọij p̂eyacdyeꞌ miꞌindyes. 14Tyi chuc jam seiꞌtactyiꞌ aꞌ in, muꞌin raꞌ vaꞌcac in, jam raꞌ penꞌdyetucsi yụ́tyiꞌ muntyiꞌ in, ĉaĉaij na jam chäquibun yụꞌtacdyeꞌ yụ in —yi jajiti Jenꞌ.
Jenꞌ jajiti Abraham: "Isaac raꞌ naꞌi"
15Chimeꞌdye Jenꞌ jajiti Abraham:
—Chimeꞌdye p̂en mi aty raꞌ jam Sarai tịj mọꞌ,#17:15 Arameyosĉan Sarai yiꞌ ca yiꞌ: "Ayos ạvaꞌ muꞌ. yocsiꞌ qui raꞌ tịj yụꞌtyeyeij, Sara qui raꞌ tịj mọꞌ.#17:15 Hebreosĉan Sara yiꞌ ca yiꞌ: Ayos ạvaꞌ muꞌ". 16Yụ raꞌ ñịbeꞌjeꞌ Sara, ạvaꞌyi raꞌ mọꞌ, sonꞌ raꞌ ạvaꞌ mi. Daiꞌ raꞌ vóshiꞌ Saraty, fer bäꞌyi raꞌ in pạrej raꞌ ayoꞌbuꞌyi in —yi Jenꞌ jajiti.
17Abraham dyụtsyi muꞌyaꞌ täjjequeꞌ jac jáfiyaꞌ muꞌ, ĉojtyiꞌĉan qui namꞌ dyisi, yi: "¿Junaꞌdyemꞌ raꞌ ạvaꞌyeban yụ? Aty cien yómodyeꞌ atsvun yụ. ¿Junaꞌdyemꞌ raꞌ ạvaꞌyebanꞌ Sara? Aty arajtac quiꞌtac yómodyeꞌ mọꞌ", yi úĉan muꞌ Abraham. 18Chat qui yi Abraham jéte Jenꞌ:
—Faraj vuꞌ caꞌ ñịbeꞌjetem uts Ismael, faraj vuꞌ caꞌ yụꞌtyeyetem p̂eyacdyeꞌ mi —yi jéte Abraham.
19Vorjete Jenꞌ:
—Jam raꞌ muꞌ, mọꞌdye raꞌ p̂en mi Sara mọꞌdye raꞌ ạvaꞌyiꞌ, Isaac raꞌ yụꞌtyeyete tịjdyes mi.#17:19 Hebreosĉan Isaac yiꞌ ca yiꞌ "dyisdyeꞌ". Muꞌdyes raꞌ yụꞌtyeꞌ p̂eyacdyeꞌ yụ judyeyaꞌ vóshidyes raꞌ muꞌ, mijam raꞌ junꞌ mọtsiꞌ ọij yụꞌtacdyeꞌ yụ. 20Yụ raꞌ jụjjebiye cọdacdyeꞌ mi Ismaeldyes, muꞌ raꞌ chimeꞌ ñịbeꞌjete yụ, yụ raꞌ jiꞌdaijbite vóshiꞌ muꞌ. Pạrej raꞌ vóshiꞌ muꞌ ayoꞌbuꞌyi in, muꞌyaꞌ raꞌ yiriꞌtac päräꞌ jiyi muꞌin ayoꞌ in, fer buꞌyi raꞌ vóshiꞌ muꞌ. 21Muꞌ na raꞌ Isaac muꞌ raꞌ yụꞌtyeyac p̂eyacdyeꞌ yụ́siꞌ muꞌdyes raꞌ. Yocsiꞌ raꞌ yómodyeꞌ uts q̂uinꞌ ịvaj, naꞌi raꞌ muꞌ Isaac, p̂en raꞌ mi Sara ạvaꞌyiꞌ, anic ĉụiꞌtyiꞌ raꞌ ạvaꞌ mi —yi jajiti Jenꞌ.
22Aty meꞌsiꞌ p̂eyaqui Abrahamtum muꞌ Jenꞌ chat qui jayacchuti. 23Mọꞌdye mạyedyeꞌ muꞌ Abraham seiꞌbite aꞌsiꞌ shoꞌpaꞌ muꞌ Ismaelsiꞌ, chimeꞌdye räj seiꞌtac yoctyis aꞌ muꞌin, muꞌyaꞌdye naꞌity in judyeyaꞌ räj úñity muꞌ, muꞌĉan naꞌity in judyeyaꞌ yaꞌijtyiꞌ chimeꞌ in. Abraham räj jéyacsi jiꞌseiꞌtacsi muꞌin sonꞌ in yoj jajitidyemꞌ Jenꞌ u. 24Abraham aty arajtac quiꞌtac arajtac jiyiꞌdyemꞌ yómodyeꞌ tyiti, chat seiꞌtac muꞌ, 25muꞌ na Ismael ạvaꞌ muꞌ aty yiriꞌtac chibin jiyiꞌdyemꞌ yómodyeꞌ muꞌ. 26Mọꞌdye mạyedyeꞌ muꞌ Abraham, Ismael ạvaꞌ muꞌ, seiꞌtac aꞌ muꞌin, 27räjtumdye muꞌĉan bäꞌyity in, judyeyaꞌ úñity muꞌ, muꞌĉan naꞌity in judyeyaꞌ yocvety yaꞌijtyiꞌ chimeꞌ in.
Currently Selected:
Génesis 17: CAS
Highlight
Share
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'