Maariko 2
2
Yesu naanyi no obhotoro bho kwabhëra amasari
(Mataayo 9:1–8; Ruuka 5:17–26)
1Mbe, Yesu aghagharuka wiiki mo‑moghya o Kabherenawumu. Hano chaasiko insuuhu chehetiri, abhaato bhakooghu kubha nagharokiri aka. 2Abhaato bhaaru bhaghiikomana mo‑nyumba iyo, koru omweya o kohetera mo‑ghisëku okabhora. Yesu naare araraghaneri abhaato angʼana e Ryobha. 3Hano are araraghani, bhakaacha abhaato bhane, bhaghëghiri omooto uno akuure ribhaara mo‑machëëra. 4Bhataatoriri komusöhi hano Yesu are, gho kubha ꞉haare ne erikinda ikoro re bhaato. Bhaghatiira mo‑ghisara ke nyumba, bhakahöbhöra eghisara ahaghiro hano Yesu are, bhakamwikeri‑ho omubhabharu uyo anyi mo‑machëëra ino are arariire. 5Hano Yesu arooche angʼana ino abhaato bhayo bhaköriri, akamënya kubha mbaare no obhokumi. Akamobhoorera omubhabharu uyo akabhugha, “Omoona waane, amasari ghaacho ngaabhiiru.”
6 Abheeghi nyarebhebha meghiro mbaare bhiikeere hayo, bhakiihëëbha mo‑metema gheebho kubha, 7“Ngwake omooto uno akobhugha hangʼu? Nakwirëngʼaani ne Eryobha! Taanyi‑ho omooto uno aghotora kwabhëra amasari, nanyinga Eryobha eryene chiri!”
8Hayo hayo Yesu akamënya amiihëëbhö gha mo‑metema gheebho, akabhabhoorera kubha, “Ngwake mokwihëëbha hangʼu mo‑metema gheenyu? 9Mbe, n‑diihë rino reenyi ihoho?#2:9 Ihoho. Mööhi Maariko 10:25. Komobhoorera omooto uno akuure ribhaara kubha, ‘Nekwabhiire amasari ghaacho,’ ghasi komobhoorera kubha, ‘Imeerera, wimoki machëëra yaacho, ughëndë’? 10Mbe, nekwënda mumënyë kubha, eni Omoona o Mooto neenyi no obhotoro bho kwabhëra amasari mo‑se ino.” Niho Yesu akamobhoorera omooto uyo are akuure ribhaara akabhugha, 11“ˆNeghakobhoorera, imeerera, ghëgha machëëra yaacho, oghi awaacho!” 12Hayo hayo, omooto uyo akiimeerera akiimoki machëëra yaache, akahoroka anche, ino bhoose bhano ꞉bhaare hayo bharamumööhërëri. Abhaato bhayo bhoose bhakahagha na koreghongi Eryobha, bhakabhugha, “Totaamara korighi naabha angʼana kinya ino iköruru reero!”
Yesu niichiri kobhatoori abhaköri bha masari
(Mataayo 9:9–13; Ruuka 5:27–32)
13Yesu akahoroka, aghaye wiiki rubhareka ro nyancha e Ghariraaya. Abhaato bhaaru bhakamutambana, akabheeghi.
14Akamara aghatanura koru hayo, na mo‑nchëra akamorighi Raawi mwërëëti o Arubhaayo. Naare ikeere mo‑kebhuru keeche ghe ghutöbhëri erighööti. Yesu akamobhoorera akabhugha, “Nuntambane.” Raawi akiimeerera, akamutambana.
15Bhakamara Yesu na abhaanabheegha bhaache bhaaghaye kuraaghëra o‑Raawi. Abhatöbhi bha righööti na abhaköri bha masari#2:15 Abhaköri bha masari. Amabharisaayo mbaghaghöötiri chwee amëërëkërëri gha Musa. Koru bhakëëngëra amëërëkërëri na chaasughara echende. Bhano bhataare bharaghaghööta amëërëkërëri na chaasughara cheebho chino bhëëngiire, mbabhabherekiire abhaköri bha masari. bhaaru mbaare bharamutambana, bhaaru ghate yaabho bhaghiikara mo‑ndaaghëra haghirohamu na Yesu na abhaanabheegha bhaache. 16Mbe, abheeghi bha meghiro bhano ꞉bhaare Amabharisaayo hano bhamorooche Yesu araraaghëra haghirohamu na abhatöbhi bha righööti na abhaköri bha masari, bhakabhabhoori abhaanabheegha bhaache bharabhugha, “Kana nakuraaghëra haghirohamu na abhatöbhi bha righööti na abhaköri bha masari?”
17Hano Yesu oghwire hangʼu, akabhabhoorera akabhugha, “Abhaato abhahöru bhataakwënda omughabho, amare abhabhabharu nibho bhakwënda omughabho. Eni ntiichiri kobhabherekera bhano bhakwirighi kubha m-bhahëënë ambërë e Ryobha! Amare niichiri kobhabherekera bhano bhaanyi na amasari.”
Yesu n‑kinya omokwiri
(Mataayo 9:14–15; Ruuka 5:33–35)
18Eriibhagha nyarebhe, abhaanabheegha bha Yohana Omubhatisaachi haghirohamu na Amabharisaayo mbaare bhariiyima ebhiinyakurë.#2:18 Mbaare bhariiyima ebhiinyakurë. Abhayahuuti eriibhagha ꞉bhaare bhariiyima ebhiinyakurë, mbaare bharaköra hangʼu gho ghiri e korisëngëra Eryobha. Abhaato abhamu bhaaghaye o‑Yesu, bhakamobhoori bhakabhugha, “Kana abhaanabheegha bha Yohana na bha Mabharisaayo mbahiiyima ebhiinyakurë, amare abhaanabheegha bhaacho neke bhataakwiyima ebhiinyakurë?” 19Yesu aghagharokeri akabhugha, “Abhaato bhano bharaghiinu mwikwirëra mbaghotora kwiyima ebhiinyakurë, ino bhaanyi haghirohamu no omokwiri? Eriibhagha ryose rino bhaanyi haghirohamu, bhataaghotora kwiyima ebhiinyakurë! 20Amare, ndekuucha eriibhagha rino omokwiri akoruusibhu ghate yaabho. Mbe, kwo riibhagha riyo, mbakwiyima ebhiinyakurë.
Amangʼana amahë gha Yesu
(Mataayo 9:16–17; Ruuka 5:36–39)
21“Wiiki, ghusangerani ameeghi ghaane amahë na chaasughara cheenyu ngotuubhiine na kwimoki egheteneka ke ngibho ahë na ghoghetumerani mo‑ngibho ankungu. Egheteneka kiyo ekihë ngeghutandura angibho iyo, na ahaghiro hayo ꞉haare hatandokiri hakwëngëra ghutanduka. 22Wiiki, taanyi‑ho omooto uno aghotoora adivaayi ahë mo‑maghöchi gha mashëërö amakungu. Mbe, gho ghuköra hangʼu, adivaayi ahë erabhera neghwati amaghöchi ghayo, gho ghayo adivaayi neghwitëka na amaghöchi ngaghusarëka. Adivaayi ahë nekwëndëru ghotooru mo‑maghöchi amahë.”
Yesu niwe Omutëmi o rosiko ro Riikane
(Mataayo 12:1–8; Ruuka 6:1–5)
23Orosiko rumu ro Riikane, Yesu haghirohamu na abhaanabheegha bhaache mbaare bharaheta mo‑meghondo ghe changano. Abhaanabheegha bhaache bhaghaghënda bharatu ebhisaawa bhe changano na kobhebhunga na kurë chaahëkë cheeche. 24Niho Amabharisaayo bhakamobhoorera Yesu, “Mööhi, bhano mbaghuköra emeremo orosiko ro Riikane, na ghano ghataakwëndëru ghuköru orosiko ruyo!”
25Yesu akabhagharokeri akabhugha, “Kana, motaasömiri mo‑Mandëkö Amatööbhiyu bhuno omutëmi Tawuti ꞉aköriri, eriibhagha are na anchëra iwe na abhaghëndi? 26꞉Naasöhiri mo‑nyumba e Ryobha, hano Abhiyataari are Omuchaama Omokoro o Ryobha, akarë emighaate ghino gheruusiibhu ambërë e Ryobha.#2:26 Mööhi 1 Samweri 21:1–6. Kurëngʼaana ne emeghiro ghe Musa, abhachaama abheene nibho bhiishereriiru kurë emighaate ghiyo, amare Tawuti akarë, wiiki akabhaha na abhaghëndi bhaache, bhoose bhaakarë.”
27Niho Yesu akabhabhoorera akabhugha, “Abhaato bhatabhomburu kubha, bhaghöötë emeghiro ghe Riikane, amare orosiko ro Riikane ndotooruru ne Eryobha kubha, robhatoori abhaato. 28Wiiki, mumënyë kubha, eni Omoona o Mooto eni neeni Omutëmi o rosiko ro Riikane.”
Currently Selected:
Maariko 2: ntk
Highlight
Share
Copy
Want to have your highlights saved across all your devices? Sign up or sign in
© 2022 Wycliffe Bible Translators, Inc. All rights reserved