Kejadian 3
3
Tuai nesaladi mali kuprei upu
1Uda, Ila Deiyo Ngebo Allah, er si Yahwehdi tali bura tara kuramu keca yala-yala weik ketekepra deipu dinin, balda pio mali kuna cap, mawa di inipra kuna cap, pio weik kuramu. Sun gam kuramu keca yala-yala yuknge yumada, yambula pua. Abal aner damai yaudi, aner tep mawa di mok upu pepu. “Allahdi, ‘Ne wa pepsa neitamaida, co du yala yuma men jenkamrume,’ tek sisi pepu do, gum do?” pepra, mawa di pepu. 2Upepupa, anerdi tamupra pepu. “Gume, awa neitamai teku coda, co du dakra jepteneme.
3Dinino, Allahdi tek sisi peipseuada, ‘Ne wa neitamai tenpu teku coda, er du dakra men jeptume. Tonda, aco talena peda, men kuptume. Angeda meme. Ukupmumnyopda, tek sisi depkamrerume,’ upepra deipseu,” Hawadi abal tep pepu. 4Upepupnen, abaldi aner tep tamupra mok upu pepu. “Gume, sun tek sisi men depkamrerume. 5Uda, Allah er kaele. Aco du dakra jepmem pangeda, sun kange tenenange cap, sun asuru cap dirin kuprepa, laipseryopda, Allah erda, ‘Malinge aca, telepnge aca’ tenen, betapra kael kepra kuretopu, sun peda kupkamrerume. Adeiyo tep, ‘Jena meme,’ pepseu,” abaldi Hawa tep pepu.
6Anerdi aco du dipetepudi, utenepu. ‘Uo, aco duda, urasin pio telepe. Tonda aco du jeptenyopda, pio telepe. Tonda, ange jepnyopda, ila kaele kemna deiyo keca deipnetue,’ tenepu. Ukupra tenepka tep, aco du dakra, yambulanun dopra jepudi, er cap kikiman kuramrei ngebo Adam tep, bokra karepupa, er peda aco du yambulanun jepu. 7Sun butene jeprei pangeda, adipapu sun kange doupreidi, asuru epdareidi, ‘Uo, nun buteneda, tali nong banangapu kunmaneme’ tenen, betapra tenepreidi, ali dakrei. Ali dakreia tep nengeda, pala co bo dakrapreidi, ‘Nun nong singipkunem’ tenen, sun opkal kenengna tep, co bo sisa wipreidi, singipdongoprei.
8Amendada, ipkamaua tep, bul kipbanmau taruda, Allah er si Yahwehdi, er ketekepu wa neitamai embanmaupane, Adam cap, er ner Hawa cap lelim gekepreidi, ‘Uo, Allahdi epkusere’ tenen, kware kupupa, awa neitamai co palpal inimberei. 9Inimberei dinin, Allah er si Yahwehdi Adam tep, “Kan dan cei kupmarem do?” pepra kongpepu. 10Kongpepupa, Adamdi tamupra pepu. “Gume, kan banmaumumpa, lelim gekepmanudi, ne nong bananga kunmanudi, kware kupmanera tep, inipmane,” pepu.
11Upepupnen, Allahdi, “Ware ngebodi, ‘Kan nong bananga kupmareme,’ pepmakerpa, kael kepmaumum do? Nedi, ‘Aco tenpupuda, co du dakra men jenkamrume,’ pepkesi co duda, konum dakra jepmarem do?” pepu. 12Upepupa, Adamdi, “Kandi karepnemumpa, amutu ne cap kikiman kunum nerda, erdi aco du dakra karepmanupa, yambulanun jepmanue,” pepu. 13Upepu pangeda, Allah er si Yahwehdi Hawa tep pepu. “Kanda ware keca deiyo tep, mali kupmaumum do?” pepra wenepupane, anerdi, “Gume, baldi upu mawa di pepmanupa, mangkau di teka tenepmanudi, aco du dakra jepmanue,” pepu.
14Ange tep nengeda, Allah er si Yahwehdi abal tep upepra wenepu. “Nimi peirameng keca cap, tali bura mutu embaramre keca cap, yala-yala weik dakunung dinin, kan tep ngeda wipkene. Kan puda, ila ikin keca dopra, kan nong deiki deipkene. Ukutaru di dipra, doryankamre taru neitamai yuma, gam kunkamrem taru yumada, kan mundu deikipu, tu deiki embamempa, kalkal peramre tu buteda, sipyal pumbon pio wengkamkere. 15Ukuramempane, nedi peipnepa, kan cap, aner cap, ‘Pio song,’ tenedankamrume. Erdi deiprepa, dadeipdanen bankameng nyapu cap, kandi deipmempa, dadeipdanen baramenganen, bankameng nyapu cap, doryankamre taru neitamai yuma, ‘Pio song,’ tenedankamenge. Nimi yumadi kan giso taikra ponkamkenge. Kandi nimi yan gum-gumai, si topra ponkamrume,” pepu.
16Upepu dingeda, Allahdi aner tep upepra wenepu. “Kan cap, yuk nerapu yuma cap tep, nyapu derin taruda, pu weikanun ton tapakra, sun nong deiki derinkamsene. Ukupnyopda, nerapudi nyapu derin taru yumada, weika di pu jeprepa, mali kange doua dounmarumnyane, nyapu derinkamrume. Kan cap, yuk nerapu yuma cap, sun neng yapu tep, ‘Nimi dopsetenge’ tenen, dipru pu jerepa, pio putaserepa, ange tenenapu kunkamrume. Nimida, sun nerapu tep, sun neng yapu deiki tarapu kungedi, talepsengepa, sunda amutarapu kunkamrume,” Allahdi Hawa tep upepra wenepu.
17Upepu dingeda, Adam tep aupu pepra wenepu. “Aco tenpu tep, ‘Aco du dakra jena meme,’ peipkesi dinino, kan nerdi pepmakeu upu gekepmaumumdi, aco du konum jepmaruma tep nengeda, aupu pepra wenepkene. Kandi mali kupmuma tep nengeda, nedi peipnepa, tuai mutu ban-ban yuma tep wipne. Ada ikine weik kunkamre. Kange mun kange doupra, ikin pel weik donkamrema deiki dipapu, tu neitamai di pankamre kecapu jenkamrume. 18Tuai mutu yuma di, takke keca tepmeng kweiyong-kweiyong cap, girikna cap, yala-yala weik pankamre. Wa peiamrumupa, bolokredi pankamre kecapu kipra jenkamrume.
19Ukutaru di dipra, dakuramempane, depmempa tu palipkamkeng dinin, gam kunkamrem taru yumada, pel weik ikin dipu doramempa, nong me pangmakera deiki dipapu, jen keca kipra jenkamrume. Uda, kan ketekepra deipkesi taruda, tali kalkal peamu tu, but di dopra ketekeipu keca tep, kanda tali kalkal peramre tu but utopu kuruma cadi, amenda depmempa, tu palipkengopda, kange di ton cap tamupra, tali tupu dankamrume,” Allahdi Adam tep pepra wenepu.
20Uda, Adamdi er ner si tep, Hawa si sipepra deipu. Hawa pepka deiyoda, ‘Anerdi deiprepa, dadeipdanen baramenganen, amenda kupkameng nesala yumada, sun gonga kemdina ner, er pua,’ tenepudi, er si tep Hawa pepu.#3:20 Hawa – Ibrani upu deikida, Hawa upu deiyoda, ‘Gam kuna,’ tenena tep aupu penunge. 21Ataruda, Allah er si Yahwehdi akwamu gam keca bol koptapra gongopropudi, abol di opkal wiprapudi, Adam cap, Hawa cap tep karepupa, sun kenekrei.
22Ataru dipu, Ila Deiyo Ngebo Allah, er si Yahwehdi upepu. “Nundi, ‘Malinge aca, telepnge aca,’ tenepra betapra kael kemnuptopu, Adam konum tenipmara cadi, nun yambulanun kupetopu konum kupre. Atep, tali kaukepmepyopda amendada, Gam Kuna Deiyo co du ton dakra jepyopda, pio gam kunkamre. Angeda men kuptua tep, ‘Ukuprur’ tenen, upu sekune,” Allah tenepudi pepu.
23Ange tep nengeda, Allah er si Yahwehdi, Adam cap, Hawa cap tep, ‘Amutu pio men kunkamreng’ tenen, Eden ban mutu wa neitamai di dopra, bura tara dokotepu. Ada, ‘Tuai di dopra ketekepsi ngebo cadi, tali tuai mutu neitamaipu pio pel donkamre’ tenen, Eden ban mutu bura dokotepu. 24Bura dokotepudi, im deiki kure keca, er sida Kerub dopra, Eden ban dinin, keteng yakan tara deipupa, angebodi uku bu jerepa dirin weik kuramretopu, dirin weik kwamu parang ya dopra, yu biringnapu kuramudi, kalengnapu kuramu. Ada, ‘Nimi tuai nesaladi, Gam Kuna Deiyo co du ban bisi yakanung’ tenen, kalengnapu kuramu.
Currently Selected:
Kejadian 3: KNTOT
Highlight
Share
Copy
Want to have your highlights saved across all your devices? Sign up or sign in
©2022 Wycliffe Bible Translators, Inc