Ebhikorwa bhya Abhatumwa 3
3
Peetero kaawosha omurema kw-isiina rya Yeesu
1Orusuku rumwi, Peetero na Yowana ꞉bhaariga mbagenda mw-iyekaru nsa kenda mu-mwisi. Akabhaga kayo, niko abhaanu ꞉bhaagendaga okusaasaama Nyamuwanga. 2Ayeeyi na omuryango gwa riiyekaru gunu ogubhirikirwa ati Mujomu, ꞉aariga ariwo omuunu omurema. Omurema uyo ꞉aaremaaye okusooka okwibhurwa kwaye. Ku-nsiku omurema uyo ꞉aariga ˆnaabhaturwa na abhaanu mbamutuura ayeeyi na omuryango guyo, asabhiirishe giiyera ku-bhaanu bhanu ꞉bhaariga mbatura mbeengira mw-ibhanja rya riiyekaru.
3Bhunu omurema uyo ꞉aarorere Peetero na Yowana mbarebherera okwingira mw-ibhanja rya riiyekaru, ˆnaabhasabha bhamuyaane-ko giiyera. 4Kimwi Peetero na Yowana mbamumogorera ameeso. Peetero ˆnaamubhwira ati, “Nuukiringire eswe!” 5Kimwi omurema uyo woone ˆnaabharingira, enu ˆneesigaga okuyaanwa ekiinu okusooka ku-Peetero na Yowana.
6Nawe Peetero ˆnaamubhwira ati, “Nitari na yera, nitari na jaabhu, nawe kinu niri nakyo, nikyo enikuyaana. Enikubhwira ati kw-isiina rya Yeesu Kiriisitu owa Naajareeti, yambaara uribhate!” 7Kimwi Peetero ˆnaagwata omurema uyo okubhoko kwa ebhuryo ˆnaamuyambaasha. Ayoayo amawa gaaye aga amaguru nganyoora amanaga. 8ˆNaayambaara bhwangu, ˆnaamba okuribhata omwene. ˆNeengira mw-ibhanja rya riiyekaru amwi na Peetero na Yowana, enu ˆneejungajungaga ˆnaakumangya Nyamuwanga. 9Abhaanu bhoone kutyo mbamurora ˆnaaribhataga bhuyambaaye ˆnaakumangya Nyamuwanga. 10Mbamumenya ati niwe unu keekaraga ˆnaasabhiirisha ku-muryango Omujomu ogwa riiyekaru. Abhaanu bhoone kutyo mbaruguura muno okurora riingʼana rinu ꞉ryamunyoorere.
Peetero keeyigisha abhaanu mw-iyekaru
11Mu-kabhaga kayo, omuunu omurema uyo ꞉aawosiibhwe, ꞉aariga aremeeye ku-bhaaPeetero na Yowana. Abhaanu bhoone mbabhabhirimira mbabhasangira bharuguurirega muno. Anu Peetero na Yowana ꞉bhaariga bhari, ꞉aariga ˆnaabhirikirwa-wo ati, Egaragaanja rya Seremaani.
Peetero keeyigisha abhaanu iiguru ya Yeesu
12Bhunu Peetero ꞉aarorere abhaanu bhayo, ˆnaabhabhwira ati, “Emwe abhaanu bha Ijirayeeri, ndora omuruguurira ganu? Ndora omukimogorera ameeso? Omutoga ati omuunu unu aawosibhwa na bhuturo bhweswe? Itari kwa okubha ati eswe kiri bharengeresi ku-Nyamuwanga ati nikyo kyakora omuunu unu aaribhata. 13Nyamuwanga wa Bhurayimu, Isaaka, na Yakobho, uyo niwe Nyamuwanga wa bhaajaaji. Aagungya omujuuma waaye Yeesu, na Yeesu uyo niwe emwe ꞉mweegaanire mumusoosha bhamuramurire orufu! Bhunu Piraato ꞉aariga akenere eegurire Yeesu, ꞉mwaremere. 14Emwe murema Yeesu Omutaakatiifu na Omurengeresi ku-Nyamuwanga, musabha Piraato ati eegurire omwiti, eete Yeesu. 15Okumara gayo kimwi mwita omwene obhurame! Nawe Nyamuwanga ˆnaamusuura okusooka mu-bhafuuye, eswe ni eswe abharori bha okusuuka kwaye. 16Omuunu uyo omurora anu, mumumenyere kujomu. Kinu kyakora aawosibhwa, ni bhwikirisha bhwaye kw-isiina rya Yeesu. Riisiina riyo, na obhwikirisha nibhyo bhyakora aabha muworu rwa kutyo emwe mwone omumurora anu.
17“Woori bhayiiri bhaani, nimenyere ati amangʼana gayo goone kutyo, ꞉mwagakorere na abhakuru bheemwe, enu mutakumenya kinu omukora. 18Nawe, gayo ꞉gaabheeye kutyo insonga Nyamuwanga akuumishe amangʼana ganu ꞉aaragire okuturira ku-bharagi bhaaye bhoone kutyo ati, Kiriisitu waaye arinyansibhwa. 19Mmbe woori, munuge ebhikayo bhyemwe, muyindukire ku-Nyamuwanga, insonga Nyamuwanga abhasooshe-ko ebhikayo bhyemwe. Mukakora kutyo, Raatabhugenyi Nyamuwanga aribhamuunya kwa okubha aribha amwi na emwe ku-nsiku giyo, 20atume Kiriisitu unu ꞉mwatuuriiywe-wo okwambira kara, Kiriisitu uyo niwe Yeesu. 21Yeesu unu, ꞉yaariga iisire asigare mu-rwire okuyikira anu riibhaga rya okukora ebhiinu bhyone kutyo okubha bhiyaaya ririyika. Kutyo nikwo kutyo Nyamuwanga ꞉aaikire okuturira ku-minwa gya abharagi bhaaye abhataakatiifu bhoone kutyo, okwambira ku-bhwambiro bhwa ekyaro.
22“Kwa okubha ni kimari omuragi Musa#3:22 Musa. Ringira riingʼana rinu mu-Mangʼana Amakomeeye. ꞉aaikire ati, ‘Raatabhugenyi Nyamuwanga weemwe kaaja okubhareetera omuragi rwa anye okusooka agati wa Abhaijirayeeri bheejaanyu, mumuungwe ku-mangʼana goone kutyo ganu aribhabhwira. 23Omuunu woonewoone akarema okuungwa omuragi uyo, Nyamuwanga arimweseranya aasiga okubha owumwi wa abhaanu bhaaye.’#3:22-23 Ringira Ekiyiityo kya Ebhiraagiro 18:15, 18:18-19. 24Yee, abharagi bhoone kutyo, okwambira Samweri na abhandi bhanu Samweri ꞉aafuuye ˆnaabhasiga-ko, bhoone kutyo bhanu ꞉bhaaikire, ꞉bhaariga mbaraasha amangʼana ga ginsiku ginu. 25Ganu Nyamuwanga ꞉aaragire okuturira ku-bharagi, ꞉gaariga ngaaja kw-imwe. Emwe ni emwe omugwatirira iimuuma#3:25a Iimuuma. Ringira riingʼana rinu mu-Mangʼana Amakomeeye. inu ganu Nyamuwanga ꞉aariiye na bhaajaaji waanyu, rwa kutyo ꞉aabhwiriiye Bhurayimu#3:25b Bhurayimu. Ringira riingʼana rinu mu-Mangʼana Amakomeeye. ati, ‘Okuturira ku-rwibhuro rwawo ebhyaro bhyone kutyo bhiriyaanwa giinonkwe.’#3:25c Ringira Obhwambiro 22:18, 26:4. 26Bhunu Nyamuwanga ꞉aareetere omujuuma waaye Yeesu,#3:26 Bhunu Nyamuwanga ꞉aareetere omujuuma waaye Yeesu. Insonga eyindi eyitura okubha ati, Bhunu Nyamuwanga ꞉aasuurire omujuuma waaye Yeesu. ꞉aamutumire kw-imwe okwamba, insonga abhayaane emwe giinonkwe, abheekengye emwe wumwiwumwi okusooka ku-mabhiibhi geemwe.”
Currently Selected:
Ebhikorwa bhya Abhatumwa 3: kya
Highlight
Share
Copy

Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved