Lukas 2
2
Tut ɗaꞌ nai Yesus
(Mat. 1:18-25)
1Kaisar Agustus#2.1 Kaisar Agustusnyiꞌna kapalage kahareha Roma. Ngara takkanai Kaisar nut hona Gaius Oktavius. kapalage kahareha Roma nahahuuge hareha halewai tulhaɗadi ngaraɗa ata ta hagala pan-tana. 2Nyiwe neɗana kawunga tulha ngara ɓana ɓaɓawe tana Siria, gubernur Kirenius. 3Tangngaɗa ɗakako kapik tulhaɗad ngaraɗa ta harona hadau walɗa ɗiha-ɗiha.
4Oro ɓatauɗage Yusup nakako walta kota Nazaret ta tana Galilea, aro ta kota Betlehem ta propinsi Yudea ta haronai Daud; orogei Yusup ɓawalna ta walla-wunai Daud. 5Yusup ɗatulha ʄalanage ngarana monoi Maria katangrana hatii. Naɗei Maria lakawa winnenani Yusup hakatɓe tut lai ole-umma tabolo wale habolaꞌmahodi. 6Ɓaɗa kole haɗik ta kota Betlehem ɗiknan rah ha ananai Maria. 7Naha anani wu lakawa kaɓaani ana ɓodna. Maɗa ubla-Yi mono ɗakugla-Ni ta karaɓa ranga; oroge aiɗa kolena umma hadau tudu.
Kaʄawa ranga mono malaikat
8Ta gaꞌ neɗona ɗaadi ata ʄawa ranga katangrana ʄawayi bebbeɗa ta maraɗa. 9Nahayaɗawe malaikat nahatingo wikna tabaraɗa mono magakaha waltai Mori nahamagakahayi mono wale anaꞌmanage madautaɗa. 10Tanyiɗuwe naɗa malaikat linage, “Ilam madautami! Oronage nauwa ngidguge lii ege ate tuɓami. Lii pa ege ate ɗangana tangngana ata. 11Nehe laɗo ta kotai Daud na ɗaꞌɓe Raja Kahatoulka-manemarai kaɗaꞌ ata hajajnai Alla, Nyiꞌnai Mori. 12Nne tadage: Mi enga ɗikmini wu lakawa bila ha ubla mono hakugla ta karaɓa ranga.”
13Nahayaɗawe malaikat mono amlid kataukalana butana ɗahaɗiyi Alla. Maliɗage,
14“Mahaɗi-maɗaika tabaranai Alla ta hadau kahadda madehta!
Mono ta pan-tana, mout moli makora ata kayanana ta atenai Mori Alla!”
15Kole raɗa malaikat ɓaɗa ijakadi mono haggaɗage ta sorga, raɗa ata ʄawa ranga liɗage ɓaɗa hawadda wikna, “Maidage ta kota Betlehem mono kada etawe kaɗaꞌ, pahaɗiknai Mori tabarada ledeni naɗa malaikat.”
16Yiɗɗa ɗageha kako, maɗa ɗikkidi Maria monoi Yusup, lohho naɗa lakawa bila hakugla ta karaɓa ranga.
17Kole ata ʄawa ranga ɓaɗa etayi naɗa lakawa bila, maɗa halarawe agawe hatakna naɗa malaikat tutna naɗa lakawa bila. 18Tangngaɗa ata ɗahangatara rangewe pahalaraɗa ata ʄawa ranga. 19Tanyiɗuwe Maria nataui tangngadi ta atena mono nahangaɗadi. 20Raɗa ata ʄawa ranga haggaɗage ta maraɗa hagapege haɗi-ɗaikayi Alla. Oro tangngage ha rangeɗa mono ha etaɗa natenawe katauna hatakna naɗa malaikat.
Yesus ɓahangaran
21Kole ɓa podopata laɗona naɗa lakawa bila, yiɗɗa ɗasunatui. Mono ɗahangara-Ni Yesus, ngara hayiina malaikat aina hatiihon inya-Na.
Yusup monoi Maria ɗangidiyi Yesus ta Ummanai Alla
22Ɗiknage rahgei Yusup monoi Maria ɓaɗa hakakowe nakakaldamma pata hamurraha wikna lawai abkaɓe ha ana ɗoukge Uk-parehai Musa. Ɗangidiyi naɗa Lakawa ta kota Yerusalem haraka-Ni tabaranai Mori.#2.22 Ɗaꞌwe ɓa torrowe lar ta Jurata Keluaran 13ː2 mono 12. 23Oroge ta Uk-parehanai Mori, tauɗaɗage lii hatulhanai Musa, “Tangngaɗa ana ɓodi lakawa kaɓaani ngidɗahoyi tabaranai Mori.” 24Ɗakab ate ʄalage yii maaraka waina wu ɓaina wu manena taguk waleka ɗuɗa ana taguk maupa kaɓodho, katauna pahadidaraɓe ta Uk-parehai Mori.
25Neɗana ta Yerusalem ɗaan wu ata kangaranai Simeon. Nyi ata katena mourhana mono kamanud-manono tabarai Mori waige kalak ate, mono naremage rahgei Alla ɓana hamanemarawe Israel. Wad Ɓiha-madnai Alla na oleni, 26mono Wad Ɓiha-madnai Alla natakɓenage tabarana, walena mateɗaꞌmaho aina etahoyi Raja Kahatoulka-manemara pakira-pajajɓenai Mori. 27Wad Ɓiha-madnai Alla nahamadiyi Simeon kako ta Ummanai Mori ta kota Yerusalem. Neɗaʄalai Maria monoi Yusup ɗangidiyi Yesus ta hadau neɗo tannam kaharakan ɓaɗaunani Mori, naharayiɗa ɗoukɗage uk-pareha ata Yahudi. 28Simeon nangalai naɗa Lakawa nawawarai mono naɗaikayi Alla malinage,
29“Ɓatauge Mori naban ge Yau hakira hake-Mu,
pahaini ata-Mu kana mate waina mout moli mono makora.
30Oroge ɓag eta waiɓen mata
Kahatoulka-manemara#2.30 Kahatoulka-manemara nyiꞌnai Yesus kapahoilayi ata walta doku-jalaɗa tannam kaɗa mourha ole ɗangani Alla kahha ana murri ana murri. wal tabara-Mu.
31Naɗa Kahatoulka-manemara paha inyakaɓe-Mu
tuɓana tangngana ata ta pan-tana:
32Nyi natuʄayi magakaha, kahamagakahaɗan laraɗa tangngaɗa ata aika ata Yahudi,
ka ammid tabara-Mu;
nna magakaha hamanghiiɗangaɗage
ana huhu-Mu, Israel.”
33Amana mono inyana naɗa Lakawa ɓangara rangewe hataknai Simeon tutna Anaɗa. 34Simeon nakaraiyi Alla hamaringiy yiɗɗa mono linage tabarai Maria, inyana naɗa lakawa, “Naɗe Lakawa hapedeɓenani Alla tannam buta ata Israel pahouk mate mono buta ʄala pahatoulka-manemara. Nyi taadkai waltai Alla, hagaɓɓana ata buta, 35mono ɓatauge maɓugerawe ngihi ateɗa ata buta. Nim enga maropowe atem Maria, katauna kito tama kaɗuhkaguge atem.”
36Ɗaa ɗummohon wu lede-liinai Alla kangaranai Hana. Naɗei Hana ananani Fanuel walta kaɓihui Asyer. Kole ɓapit dauna ha ummana matenage laina manaɗaꞌ lawai ɓaal kahha ɓana kaweɗa, 37ɓatauge podopata bul pata dauna. Hana walena kal tannaꞌmage Ummanai Mori ta kota Yerusalem. Dukaɗahege haɗi-ɗaikayi Alla gaɗi-laɗo, mono nadut habayang hagapege aina yaa-enu. 38Tangaɗawei Hana ɓanamai, manahaɗiyi Alla mono natakkiyi tutna naɗa Lakawa tabara tangngaɗa ata karemage rahgei Alla kapahoilawe Yerusalem walta muhɗa.
Yusup monoi Maria haggaɗage ta kota Nazaret
39Kolei Yusup monoi Maria rayige tangngage ɗoukge Uk-parehanai Mori, maɗa hagga ta kota Nazaret ta tana Galilea. 40Naɗa Lakawa namatabawe matuna mono kulhana. Maniwola takkawe pahangaɗa-Na mono hadda hamanawaranani Alla.
Yesus ɓa lakawahoi ta Ummanai Mori
41Ɗa nahiyi dau atatunai Yesus ɗakako ta kota Yerusalem rayaramen Laɗo Paskah ata Yahudi.#2.41 Ta Jurata Hajaj Kamema (Keluaran 12:24-27; Ulangan 16:1-8), rayarame Paskah halinawe wui laɗo ha apewai ɓa pahoilayi ata Israel wal ɓa atadi ta tana Mesir. Tabolo nehe ɓatauge ata Kristen, rayarame Paskah nyiꞌna laɗo ha apewai ɓana mourha haggai Mori Yesus walta mate tut pahoilayi kaɗaꞌ ata walta kawaha mate. 42Kolei Yesus ɓa kabul ɗuɗa dauna, ɗakako ta rayarame Paskah ata Yahudi ɗoukge kakaldamma. 43Kole ɓaɓeyi rayaramen laɗo Paskah ata Yahudi yiɗɗa haggaɗage, tabolo atatunai Yesus waleɗa tadaꞌmawe ɓa enganai Yesus ta kota Yerusalem. 44Yiɗɗa ɗahawaugei Yesus ɗaan ta jonga ata buta. Kole ɓa pijage ɗiha laɗo ɓaɗa kako, ubɗa mayegani Yesus ta jonga oleɓaiɗa mono hadammaɗa. 45Tabolo wale ɗataɓoꞌmayi Yesus, nyiwe maɗa hagga mayegani Yesus ta kota Yeruselam. 46Kole ɓa tauɗa laɗoɗa mayega, ɗaɗikkini Yesus ta Ummanai Mori. Nangoɗo rangeyi guru agama ata Yahudi mono butayi hakanukanai Yesus. 47Tangngaɗa ata karangeyi Yesus ɗaɓangara oro baleha-Na katuɓa. 48Ama-inya-Na ɗaɓangara ɓaɗa eta-Yi. Inya-Na linage tabara-Na, “Ana, ahha Yau mam hamayillama? Ama-Mu mono nauwa jorata mayega-Gu?”
49Balehanai Yesus, “Ahha mam mayega-Ga? Walem tadaꞌmawe ɓa ɗaaɗahoga ta Umma-Na Ama-Gu?” 50Tabolo waleɗa yappaꞌmawe ngihge balehanai Yesus.
51Ɓe neꞌge Yesus na oled hagga ta kota Nazaret, mono nahaɗouk hatak tabaraɗa. Tangngage nna kaɗaꞌ Maria na ijalawe lar ta atena. 52Yesus nakii-kii matu mono maniwolawe pahangaɗa-Na. Nyi namanawarani Alla mono kaɗaꞌ ata.
Currently Selected:
Lukas 2: lmy
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.