MATEO 17
17
Stelel wtsoow lo Jesus
(Mr. 9:2-13; Lc. 9:28-36)
1Ne wluzh xuup gbiz ne wak yra neguin, wzano Jesus Bëd no le Jacob no le Xwa bech Jacob, wano Ne men noze gyon men te xtoo gyeey ne kesentyent gya. 2Nga zu Ne yra Ne mén guin, nes lo men stelel wtsoow lo Ne; wkabtsa we zegnak ngbiz, wakngyichdoo xab Ne zegnak bnii. 3Tebegue wii men le Moises no le Elías zu kayuno Ne diiz. 4Lex re Bëd lo Jesus:
―Dechey, ¡wen ne zu noo nee gyon noo zeree! Belne rlaan de, yzhexkwaa noo tson guezh: tebo por laa de, stebo por Moises, stebo por Elías.
5Benak kanii Bëd, tebegue wyab te bëw ne rkabnii wrëlo Ne yra Ne men; lad bëw guin wlen te rëz ne re:
―Laa XPee noo nee ne ryaan noo no ne kesentyent rnesak lextoo noo; gugon xdiiz mee.
6Ne won xpén Jesus zenga, wzuzhib men axtegue wtee lo men lyu, kesentyent wdxe men. 7Lex wbig Jesus lo men, wgal Ne men, re Ne:
―Gusuli; ydxedet de.
8Le chene wlis lo men, rutre wiidet men, nonchee laa Ne zu nga.
9Or ne zëdtseeb Ne txu gyeey guin yra Ne men, re Ne lo men:
―Rut lo guedetgue de neree ne wii de axtegue ne yban Men ne wdxiid wak Mén.
10Orguin wnabdiiz yra xpén Ne lo Ne, re men:
―¿Penak re yra maxter ley ne laa Elías rap degne chiid primer?
11Wke Jesus, re Ne:
―Nli ne primer Elías chiid; laa Elías gue lo yrandxee mén ne gakxnëz mén. 12Per yna noo lo de yra de ne le Elías che wdxiid, no wyakbeeydet Elías lo mén, sinke wlaa men Elías zegne wlaantee men. Zenga ke yzakzi men Men ne wdxiid wak Mén.
13Orguin wdee yra xpén Ne kwent ne xkwent Xwa ne rtxobnis nga wzëët Ne.
Wneseyaken Jesus te mee ne nuu menzab lextoo
(Mr. 9:14-29; Lc. 9:37-43)
14Chene wdxiin Jesus yra Ne xpén Ne ledne ndxin ndalyaa mén, wbig te mgyeey lo Ne wzuzhib men, re men:
15―Dechey, gules lextoo de xpee noo porke baanske rlaa mee, ngyidet gyiz rzak mee, ndal tir ryab me lo gyi no le lo nis. 16Che wdxidno noo me lo xpén de, per rundet men gan gyaken mee.
17Wke Jesus, re Ne:
―¡Ake menmal ne rlaleedxdet Dëdyuzh! ¿Pa axtegue lalre tyemp ykaa noo lad de? ¿Pa axtegue lalre tyemp gun noo de wantar? Gutano me nee.
18Orguin wakndux Jesus lo menzab, wruu menzab lextoo mee guin, orgueguin wyaken mee.
19Zhich guin wbig xpén Jesus lo Ne waandxee, wnabdiiz men lo Ne, re men:
―¿Penak wundet noo gan nboo noo menzab lextoo mee gwa?
20Wke Ne re Ne:
―Porke rlaleedxdet de Dëdyuzh ydeblextoo de. Yna noo lo de belne rlaleedx de Dëdyuzh mase medid landxel te medx lyagwlizh, zun de gan gue de lo gyeeyree: “Gubetxee nee, gutsa sob de stebkoo”, no zono xdiiz de. Yët ne gakdet gan gak belne rlaleedx de Dëdyuzh ydeblextoo de. 21Klas menzab gwa rruudet men belne rut ynabdet lo Dëdyuzh no belne rut ykwandet.
Ne wrup tir wzëët Jesus ne guet Jesus
(Mr. 9:30-32; Lc. 9:43-45)
22Ne ka Jesus yra Ne xpén Ne lo lyu ne la Galilea, re Ne lo men:
―Men ne wdxiid wak Mén, sdekwent mén men lo mén 23chen yket mén men; per chene gyon gbiz, yban ke men.
Ne won yra xpén Ne zenga, kesentyent wunles lextoo men.
Rgyizh Jesus zeg xeydoo Dëdyuzh
24Chene wdxiin Jesus Capernaum yra Ne xpén Ne, wa yra men ne rgoob zeg impwest lo Bëd, re men:
―¿Pe rgyizhdet xmaxter de zeg xeydoo Dëdyuzh?
25Wke Bëd, re Bëd:
―Rgyizh zhaa we.
Per zegne wdee Bëd lenyuu, primerdee Jesus re lo Bëd:
―¿Pe na de Simon? ¿Txu lo rgoob rrey ne nuu gyëzlyuree zeg impwest, pe lo zhiin zhaa u lo ste mén?
26Wke Bëd, re Bëd:
―Lo ste mén rgoob zhaa we.
Lex re Jesus:
―Rgyizhdet zhiin zhaa we cheguin. 27Per por ne ynelaadet be mén gwa, gutsa runis ynëëz de mël. Primer mël ne yzuun lo de, koo de maa, lex lenruu ma tsëlen de te med, sen de med guin tsa de tsatizh de zeg ximpwest noo no le zeg ximpwest de.
Currently Selected:
MATEO 17: zpi
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.