Génesis 26
26
Gerar markachö Isaac täranqan
1Tsë witsanmi feyupa muchï karqan. Tsë muchïqa karqan Abraham kawëkanqan tiempu muchïnömi.#Gén. 12.10. Tsënö kaptinmi Gerar markaman Isaac ewkurqan. Gerarchömi filisteo nunakunapa reynin Abimelec tärarqan. 2Tsëchömi Teyta Dios yuripurnin Isaacta nirqan: <<Ama Egiptumanqa ëwëtsu. Mëchöpis täränëkipaq ninqaqllächöraq 3forastëru nunanö täkïkë. Noqaqa imëpis qamwanmi këkäshaq.#Gén. 26.24; 28.15; 31.3; 39.2. Tsënöllam qamta bendisir qamta y mirënikikunata kë llapan partita qoykushqëki. Tsënöpam cumplishaq tëtëki Abrahamta äninqäta. 4Noqam qampita mirënikikunata alli rikäshaq. Tsëmi qoyllurkunanöpis yupëta mana puëdipaq kayanqa. Pëkunatam qoykushaq kë llapan jirkakunata y urankunata. Pëkuna rëkurmi llapan nación nunakunapis bendicionnïta chaskiyanqa.#Gén. 12.1-3; 13.14-15; 15.18-21; 22.16-18. 5Tsënö kanqa mandamientükunata, leynïkunata y yachatsinqäkunatapis Abraham cumplinqanpitam>>.
6Teyta Dios tsënö niptinnam Isaacqa Gerarllachö täkurqan.
7Tsëchö täraq nunakunanam Isaacta tapuyarqan Rebeca iman kanqantapis. Shumaqllallan kaptinmi Isaac mantsakur yarpakacharqan Rebeca rëkur wanïkatsiyänanta. Tsëmi willakurqantsu Rebeca warmin kanqanta. Rasun kaqta ninanpa rantinmi <<pëqa panïmi>> nirqanlla. 8Tsëpita unëtanam filisteo nunakunapa reynin Abimelec wayi ventänanpa rikachakïkanqanchö rikarqan Rebecata Isaac mutsakïkaqta. 9Tsënö rikëkurnam Isaacta qayëkatsir Abimelec nirqan: <<Rebecaqa warmikim ¿aw? Warmiki këkaptinqa ¿imanirtaq <panïmi> nirqunki?>>
Isaacnam nirqan: <<Teyta, tsënölla nirqü warmï rëkur wanïkatsiyämänanta yarparmi>>.
10Tsënö niptinmi Abimelec nirqan: <<¿Imanirtaq tsënö ulipämarqunki? Tsënöchöchi mëqan nunapis warmikiwan punukïkunman karqan. Tsënö ulipäyämanqëkichöchi jutsatapis rurëkatsiyämankiman karqan>>.
11Tsëpitanam llapan nunakuna musyayänanpaq Abimelec nirqan: <<Kë nunata o warminta pipis qallapaq kaqqa wanunqam>>.
12Tsë watam Isaacqa tsëchö murukurqan. Teyta Dios bendicionninta churaptinmi ëllïtapis mana puëdinqanyaq mikïnin wayïkurqan. 13Tsënöpa Isaac rïcuyaptinmi imëkanpis atska kapurqan. 14Üshankunapis, chiwankunapis, wäkankunapis atskamanmi mirayarqan. Chakranta uryapäyänanpaq sirwiqninkunapis atskaqmi kayarqan. Tsënö rïcuyaptinmi filisteo nunakunaqa waqapukur 15Isaacpa tëtan Abraham uchkutsinqan yaku pözukunata tsapar ushayarqan.
16Tsënam Isaacta Abimelec nirqan: <<Këpita ewkï. Noqakunapita masmi rïcuyarqunki>>.
17Tsënö niptinnam Isaac ewkurqan Gerar ruri pampachö täkunanpaq. 18Tsëman chëkurnam tëtan Abraham uchkutsinqan pözukunata Isaac limpiatsirqan. Tsë pözukunataqa Abraham wanuriptinmi filisteo nunakuna tsapakacharkuyarqan. Limpiaratsirnam Isaacpis tëtan churashqannölla shutin churarqan.
19Tsë pampachö mushuq pözuta oqtikäyanqanchömi Isaacpa sirwiqninkuna shumaq tsuya yakuta tarïkuyarqan. 20Tsënam Gerarchö täraq mitsiqkunawan Isaacpa mitsiqninkuna tsë yakuta qochinakur pelyayarqan. Tsëpitam Isaac tsë pözupa shutin churarqan Esek#26.20 Esek ninanqa pelyatsikuq ninanmi. nir. 21Tsëpitanam Isaacpa sirwiqninkuna juk pözutana uchkuyarqan. Tsë janaqpis yapëmi pelyayarqan. Tsëmi tsë pözupa shutin Isaac churarqan Sitna#26.21 Sitna ninanqa chikinakï ninanmi. nir. 22Tsënö pelyayaptinmi juk lädupana ewkur tsëchöpis pözuta uchkutsirqan. Piwanpis tsë rëkur mana pelyarnam shutin churarqan Rehobot#26.22 Rehobot ninanqa yamë ninanmi. nir. Tsëmi nirqan: <<Kananqa Teyta Diosmi yanapëkämantsik këchö yamëna kawakunantsikpaq. Tsëmi wamrantsikkunapis wätantsikkunapis atskaman mirayanqa>>.
23Tsëchö täranqanpitanam Beersebamanna ewkuyarqan. 24Tsëman chanqan paqasmi Teyta Dios Isaacta yuripurnin nirqan:
<<Noqam kä tëtëki Abraham creyikunqan Dios.
Qamwan këkaptïqa ama mantsakïtsu.
Sirwimaqnï Abrahamta änishqa karmi bendisïkushqëki.
Tsënöllam mirënikikunatapis bendisishaq atskaman mirayänanpaq>>.
25Tsëchömi altarta perqarir Teyta Diosta Isaac adorarqan. Tsëchö täraptinmi sirwiqninkuna juk pözuta yakupaq uchkuyarqan.
Isaacwan Abimelec äninakuyanqan
26Juk junaqnam Gerar markapita Abimelec ëwarqan Isaacwan parlayänanpaq. Abimelecwanmi#Gén. 21.22. ëwarqan käyitsiqnin Ahuzat y soldädunkunapa mandakuqnin Ficolpis. 27Chäriyaptinnam Isaac nirqan: <<Chikiyämar markëkikunapita qarqëkämarqa ¿imaqtaq shayämurqunki?>>
28Tsënö niptinnam pëkuna niyarqan: <<Noqakuna käyikuyarqümi qamtaqa Teyta Dios imachöpis yanapëkäshunqëkita. Tsëmi pactuta ruranantsikpaq shayämurqü. 29Kanan äniyämë imëpis alli kawanantsikpaq. Manam qamkunata chikiyarquqtsu, tsëpa rantinqa imëpis allim kawarqantsik. Yarqakamurpis yamëllam ewkamurqunki. Qamtaqa Teyta Diosmi imëkachöpis yanapëkäshunki>>.
30Tsënö niyaptinnam Isaacqa alli allillata arukaratsir pëkunawan mikuyarqan y upuyarqan. 31Waränin qoyanam Abimelecwan Isaac juramentuta rurayarqan alli kawayänanpaq. Tsëpitanam Isaac despachaptin alläpa kushishqa kutikuyarqan.
32Tsë junaqmi Isaacpa sirwiqninkuna willayarqan uchkïkäyanqan pözuchö yakuta tariyanqanta. 33Tsëmi tsë pözupa shutin Isaac churarqan Seba#26.33a Seba ninanqa juramentu ninanmi. nir. Tsëpitam kananyaqpis tsë markapa shutin këkan Beerseba.#26.33b Beerseba ninanqa Juramentu Pözu ninanmi.
Esaúpa warminkuna
34Esaúqa chusku chunka (40) watayuq këkarmi Beeripa tsurin Juditta warmïkurqan. Beeriqa heteo nunam karqan. Tsënöllam Esaúqa warmïkurqan Elónpa tsurin Basematta. Elónpis heteo nunam karqan. 35Tsë warmikunawan täraptinmi Isaac y Rebeca alläpa piñakuyarqan.
Currently Selected:
Génesis 26: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.