San Juan 4
4
Caꞌmii Jesús ga̱ ꞌo̱ chana̱ samaritana a
1Dan me se xcaj Jesús cuentá se vaa cuchiꞌ nana̱ rihaan nij síí fariseo se vaa doj a̱ vaa nij síí tucuꞌyón snana̱ Jesús rihaan nij síí tucuꞌyón snana̱ Juan, ne̱ noco̱o doj nij yuvii̱ cataꞌ ne quiꞌyaj Jesús rihaan nij yuvii̱ cataꞌ ne quiꞌyaj Juan a. 2Tza̱j ne̱ né maꞌa̱n Jesús me síí cutaꞌ ne man nij yuvii̱ maꞌ. Ma̱an nij síí tucuꞌyón snana̱ soꞌ cutaꞌ ne man nij yuvii̱ a. 3Dan me se xcaj Jesús cuentá se vaa cuchiꞌ nana̱ yoꞌ rihaan nij síí fariseo, ga̱a ne̱ cavii soꞌ estadó Judea caꞌanj soꞌ estadó Galilea a.
4ꞌO̱ se naj estadó Samaria tanu̱u̱ chrej va̱j estadó Judea ga̱ Galilea, ne̱ cheꞌé dan cachén soꞌ estadó Samaria a. 5Ne̱ cuchiꞌ soꞌ tuꞌva ꞌo̱ chumanꞌ na̱j estadó Samaria, ne̱ Sicar cuꞌna̱j chumanꞌ yoꞌ a. Dan me se nichru̱nꞌ naj chumanꞌ yoꞌ tuꞌva yoꞌóó rqué síí cuꞌna̱j Jacob rihaan taꞌníí soꞌ síí cuꞌna̱j José ga̱a naá a. 6Ne̱ tuꞌva chumanꞌ yoꞌ nuû ꞌo̱ na yuꞌuj quiꞌyaj síí cuꞌna̱j Jacob ga̱a naá a. Dan me se xeꞌ man Jesús cheꞌé se cachéé uxrá soꞌ caꞌnaꞌ soꞌ chumanꞌ yoꞌ, ne̱ cheꞌé dan caꞌanj ca̱yáán soꞌ tuꞌva yuꞌuj na yoꞌ, ne̱ caxu̱j me yoꞌ a.
7Dan me se caꞌnaꞌ ꞌo̱ chana̱ samaritana rej ta̱j yuꞌuj na quiri̱i̱ noꞌ na, ne̱ cataj Jesús rihaan chana̱ yoꞌ a:
―Qui̱ꞌyáá so̱ꞌ se ndoꞌo, ne̱ rque̱ so̱ꞌ do̱j na coꞌo̱j rugua̱nj ―taj Jesús rihaan chana̱ yoꞌ a.
8Ne̱ taj va̱j nij síí tucuꞌyón snana̱ Jesús nicunꞌ ga̱ soꞌ ga̱a maꞌ. ꞌO̱ se caꞌanj nij soꞌ chumanꞌ quira̱a̱n nij soꞌ se chá a.
9Veé dan, ne̱ cataj chana̱ samaritana yoꞌ rihaan Jesús a:
―Me cheꞌé cachíín so̱ꞌ na rihanj, coꞌo̱ so̱ꞌ, ne̱ ni̱ꞌyaj so̱ꞌ, ne̱ si̱j israelitá mé so̱ꞌ, ne̱ chana̱ samaritana mej ga̱ ―taj chana̱ yoꞌ, xnáꞌanj noꞌ man Jesús a.
ꞌO̱ se ne aꞌmii sa̱ꞌ nij síí israelitá ga̱ nij síí samaritano maꞌ.
10Ga̱a ne̱ cataj Jesús rihaan noꞌ a:
―Sese xcaj so̱ꞌ cuentá cheꞌé se lu̱j quiꞌya̱j Yaꞌanj cheꞌé so̱ꞌ ne̱ sese queneꞌén so̱ꞌ me síí achíín na mán so̱ꞌ cuano̱, ne̱ cachíín so̱ꞌ na ꞌyaj vaa iꞌna̱ꞌ yuvii̱ man soꞌ coꞌo̱ so̱ꞌ, ne̱ rqué soꞌ na yoꞌ coꞌo so̱ꞌ tza̱j ado̱nj ―taj Jesús rihaan chana̱ yoꞌ a.
11Ga̱a ne̱ cataj chana̱ rihaan Jesús a:
―Tza̱j ne̱ taj va̱j sihuu̱ rihaan so̱ꞌ quiri̱i̱ so̱ꞌ na nihánj maꞌ. Ne̱ cunu̱u̱ ndoꞌo nuû na rá yuꞌuj nihánj, señor. Me rej quiri̱i̱ so̱ꞌ na ꞌyaj vaa iꞌna̱ꞌ yuvii̱ rque̱ so̱ꞌ coꞌo̱j ga̱. 12Dan me se xi̱i níꞌ síí cuꞌna̱j Jacob roꞌ, soꞌ me síí coꞌo na nu̱u̱ na yuꞌuj nihánj, ne̱ veé dan me coꞌo taꞌníí soꞌ do̱ꞌ, daán soꞌ xcuu do̱ꞌ, ne̱ rqué soꞌ na nihánj coꞌo̱ núj a. Ne̱ si̱j sa̱ꞌ doj rihaan soꞌ mé so̱ꞌ, rá so̱ꞌ naꞌ ―taj chana̱ yoꞌ rihaan Jesús a.
13Ga̱a ne̱ cataj Jesús rihaan noꞌ a:
―Cunuda̱nj nij síí coꞌo̱ na nu̱u̱ rá yuꞌuj nihánj roꞌ, canaco̱o̱ uún nij soꞌ na vaa güii na̱nj ado̱nj. 14Tza̱j ne̱ síí coꞌo̱ na rque̱ ꞌu̱nj nihánj me se daj chiha̱a̱ míj se̱ canacoo̱ uún soꞌ na yoꞌ a̱ maꞌ. Ase vaa rej veꞌé uxrá avii na roꞌ, da̱nj ga̱a̱ nimán soꞌ, ne̱ cu̱nuû uxrá se lu̱j nimán soꞌ, ne̱ ga̱a̱ iꞌna̱ꞌ soꞌ ga̱ Yaꞌanj nu̱ꞌ cavii nu̱ꞌ caꞌanj, quiꞌya̱j na rque̱j ado̱nj ―taj Jesús rihaan chana̱ yoꞌ a.
15Ne̱ cataj chana̱ rihaan soꞌ a:
―Rque̱ so̱ꞌ do̱j na yoꞌ coꞌo̱j, señor. Ne̱ se̱ canacoó ꞌu̱nj na, ne̱ se̱ caꞌnaꞌ uún ꞌu̱nj quiri̱j na nihánj a̱ maꞌ ―taj chana̱ rihaan Jesús a.
16Ne̱ cataj Jesús rihaan noꞌ a:
―Caꞌa̱nj nacu̱nj so̱ꞌ man nica̱ so̱ꞌ, ne̱ caꞌna̱ꞌ so̱ꞌ nihánj á ―taj soꞌ rihaan noꞌ a.
17Ne̱ cataj chana̱ rihaan soꞌ a:
―Taj va̱j nica̱j maꞌ ―taj chana̱ yoꞌ a.
Ne̱ cataj Jesús rihaan noꞌ a:
―Cuna̱j uxrá caꞌmii so̱ꞌ, cataj so̱ꞌ se vaa taj va̱j nica̱ so̱ꞌ maꞌ. 18ꞌO̱ se asi̱j rque̱ me se quisíj ya̱ ꞌu̱nꞌ snóꞌo xcaj so̱ꞌ, tza̱j ne̱ tanáj so̱ꞌ man nij soꞌ, ne̱ ya̱j nihánj me se nica̱j so̱ꞌ man ꞌó soꞌ, tza̱j ne̱ né ni̱ca̱ so̱ꞌ me soꞌ maꞌ. Cheꞌé dan ya̱ uxrá caꞌmii so̱ꞌ na̱nj á ―taj Jesús rihaan chana̱ yoꞌ a.
19Ne̱ cataj chana̱ rihaan soꞌ a:
―Cuano̱ nihánj xcaj ꞌu̱nj cuentá se vaa si̱j nataꞌ snana̱ Yaꞌanj mé so̱ꞌ, señor. 20Dan me se xi̱i núj roꞌ, aráj gue̱e̱ nij soꞌ rihaan Yaꞌanj xráá quij nihánj, tza̱j ne̱ soj si̱j israelitá taj se vaa o̱rúnꞌ chumanꞌ Jerusalén me rej no̱ xcúún níꞌ cara̱a̱ gue̱e̱ níꞌ rihaan Yaꞌanj, taj soj ado̱nj ―taj chana̱ yoꞌ rihaan Jesús a.
21Ga̱a ne̱ cataj Jesús rihaan chana̱ a:
―Cuchuma̱n rá so̱ꞌ nana̱ nihánj nana̱ cata̱j xnaꞌanj ꞌu̱nj rihaan so̱ꞌ, nocoj. Vaa güii, ne̱ se̱ cavii nij soj raa̱ quij nihánj do̱ꞌ, se̱ caꞌanj nij soj chumanꞌ Jerusalén do̱ꞌ, cara̱a̱ gue̱e̱ soj rihaan Rej níꞌ Yaꞌanj maꞌ. 22Dan me se ne neꞌen nij soj man síí aráj gue̱e̱ soj rihaan maꞌ. Tza̱j ne̱ xa̱ꞌ núj si̱j israelitá, tza̱j ne̱ neꞌen núj man síí aráj gue̱e̱ núj rihaan a. ꞌO̱ se scaꞌnúj núj si̱j israelitá cavi̱i̱ síí ti̱nanii man nij yuvii̱ rihaan sayuun a. 23Tza̱j ne̱ vaa güii, ne̱ nij síí ya̱ aráj gue̱e̱ rihaan Rej níꞌ Yaꞌanj roꞌ, gu̱un ina̱nj rá nimán nij soꞌ ya̱ cara̱a̱ gue̱e̱ nij soꞌ rihaan Yaꞌanj na̱nj ado̱nj. Ne̱ cuano̱ nihánj me a̱j guun cheꞌe̱ yuvii̱ quiꞌyaj yuvii̱ da̱nj ado̱nj. ꞌO̱ se me ndoꞌo rá Rej níꞌ Yaꞌanj cara̱a̱ gue̱e̱ ya̱ yuvii̱ rihaan soꞌ chugua̱nj. 24Yaꞌanj me se taj nee̱ taj cúú man soꞌ, ne̱ me maꞌa̱n rej va̱j níꞌ nicunꞌ soꞌ, ne̱ cheꞌé dan níꞌ si̱j aráj gue̱e̱ rihaan Yaꞌanj roꞌ, me maꞌa̱n rej mán níꞌ, ne̱ no̱ xcúún níꞌ gu̱un niha̱ꞌ rá nimán níꞌ cara̱a̱ gue̱e̱ ya̱ níꞌ rihaan soꞌ ado̱nj ―taj Jesús rihaan chana̱ yoꞌ a.
25Ga̱a ne̱ cataj chana̱ rihaan Jesús a:
―Neꞌén ꞌu̱nj se vaa vaa güii, ne̱ caꞌna̱ꞌ Síí Caꞌne̱j Yaꞌanj Ti̱nanii man Yuvii̱ rihaan Sayuun, ne̱ asa̱ꞌ caꞌnaꞌ soꞌ, ne̱ cata̱j xnaꞌanj maꞌa̱n soꞌ cheꞌé cunuda̱nj rasu̱u̱n rihaan níꞌ na̱nj á ―taj chana̱ rihaan Jesús a.
26Ga̱a ne̱ canica̱j Jesús cataj Jesús rihaan noꞌ a:
―ꞌU̱nj si̱j aꞌmii ga̱ so̱ꞌ cuano̱ nihánj roꞌ, me Síí Caꞌnéé Yaꞌanj ado̱nj ―taj Jesús rihaan chana̱ yoꞌ a.
27Veé dan, ne̱ nu̱ꞌ ꞌnaꞌ nique nij síí tucuꞌyón snana̱ Jesús, ne̱ caráyaꞌa̱nj nij soꞌ se vaa caꞌmii Jesús ga̱ chana̱ yoꞌ a. Tza̱j ne̱ a̱ ꞌó nij soꞌ ne xna̱ꞌanj man soꞌ da̱j quiꞌyaj soꞌ do̱ꞌ, me cheꞌé caꞌmii soꞌ ga̱ chana̱ yoꞌ do̱ꞌ a̱ maꞌ. 28Ga̱a ne̱ tanáj chana̱ se‑sihu̱u̱ noꞌ, ne̱ cavii noꞌ quinanꞌ noꞌ chumanꞌ, ga̱a ne̱ cataj noꞌ rihaan nij yuvii̱ ma̱n chumanꞌ a:
29―Caꞌa̱nj níꞌ, ne̱ queneꞌe̱n soj ꞌo̱ snóꞌo síí cataj xnaꞌanj rihanj cheꞌé nu̱ꞌ se vaa quiꞌyáj ga̱a rque̱ á. Né Si̱j Caꞌnéé Yaꞌanj Ti̱nanii man Yuvii̱ rihaan Sayuun me soꞌ, rá soj naꞌ ―taj chana̱ rihaan nij snóꞌo ma̱n chumanꞌ yoꞌ a.
30Ga̱a ne̱ curiha̱nj nij soꞌ chumanꞌ, ne̱ caꞌnaꞌ nij soꞌ rihaan Jesús a. 31Dan me se ga̱a caꞌmii chana̱ ga̱ nij síí ma̱n chumanꞌ yoꞌ, ne̱ guun cheꞌe̱ nij síí tucuꞌyón snana̱ Jesús rquee̱ nij soꞌ se chá man Jesús, cataj nij soꞌ a:
―Cha̱ so̱ꞌ do̱j se chá, maestro ―taj nij soꞌ a.
32Tza̱j ne̱ cataj Jesús rihaan nij soꞌ a:
―Vaa se chá rihanj, tza̱j ne̱ ne neꞌen soj maꞌ ―taj Jesús rihaan nij soꞌ a.
33Ga̱a ne̱ xnáꞌanj nij síí tucuꞌyón snana̱ Jesús man tuviꞌ nij soꞌ, cataj nij soꞌ a:
―Vaa síí caꞌnaꞌ rqué se chá soꞌ, rá soj naꞌ ―taj nij soꞌ rihaan tuviꞌ nij soꞌ a.
34Ga̱a ne̱ cataj Jesús rihaan nij soꞌ a:
―Sese ꞌyáá ꞌu̱nj nda̱a vaa me rá síí caꞌnéé manj qui̱ꞌyáj, ne̱ sese navij quisíj suun caꞌneꞌ soꞌ rihanj, ne̱ ase vaa se chá vaa yoꞌ rihanj ado̱nj. 35Se̱ guun cata̱j soj se vaa cache̱n ꞌó caꞌa̱nj yavii, ga̱a ne̱ quiri̱i̱ níꞌ naa̱, cata̱j soj maꞌ. Ma̱an se cuano̱ nihánj cata̱j xnaꞌanj ꞌu̱nj rihaan soj se vaa na̱xcaj soj rihaan soj, ni̱ꞌyaj soj nij yuvii̱ á. Ase vaa naa̱ ꞌnúú trigó vaa nij yuvii̱, ne̱ catzi̱i̱ ndoꞌo vaa naa̱ ꞌnúú trigó yoꞌ, cachij yoꞌ a. Ne̱ cuano̱ nihánj me se no̱ xcúún níꞌ quiri̱i̱ níꞌ ꞌnúú trigó yoꞌ ado̱nj. 36Naruꞌvee Yaꞌanj rihaan nij síí rii naa̱ yoꞌ, ne̱ naquiꞌyaj chre̱ꞌ ndoꞌo nij soꞌ man nij síí ca̱yáán ga̱ Yaꞌanj nu̱ꞌ cavii nu̱ꞌ caꞌanj, ne̱ rej riha̱a̱n gu̱un niha̱ꞌ rá síí cunô ga̱ síí rii naa̱ ado̱nj. 37ꞌO̱ se ya̱ uxrá vaa nana̱ nihánj se vaa ino̱ vaa síí cunô naa̱ ga̱ síí rii naa̱, 38ne̱ a̱j caꞌnéé ꞌu̱nj man soj quiri̱i̱ soj naa̱ rej ne quiꞌya̱j suun soj maꞌ. ꞌÓ yuvii̱ me nij síí quiꞌyaj suun naa̱ yoꞌ ga̱a rque̱, ne̱ catúj soj quiꞌyaj suun soj se‑su̱u̱n nij soꞌ ado̱nj ―taj Jesús rihaan nij síí tucuꞌyón snana̱ soꞌ a.
39Dan me se cheꞌé se nataꞌ chana̱ yoꞌ rihaan nij yuvii̱ samaritano ma̱n chumanꞌ yoꞌ se vaa cataj xnaꞌanj Jesús rihaan noꞌ nu̱ꞌ se vaa quiꞌyaj noꞌ ga̱a rque̱ roꞌ, cheꞌé dan me cuchumán rá queꞌe̱e̱ uxrá nij yuvii̱ ma̱n chumanꞌ yoꞌ niꞌya̱j nij yuvii̱ man Jesús a. 40Dan me se cuchiꞌ nij síí ma̱n chumanꞌ yoꞌ rihaan Jesús, ne̱ rquee̱ ndoꞌo nij soꞌ man soꞌ se vaa cara̱nꞌ soꞌ do̱j tucuá nij soꞌ, ne̱ cheꞌé dan vi̱j güii quináj soꞌ chumanꞌ yoꞌ a. 41Ne̱ guun ri̱i̱ doj nij síí cuchumán rá cuno snana̱ Jesús a. 42Ne̱ nij yuvii̱ amán rá niꞌya̱j man Jesús roꞌ, cataj nij soꞌ rihaan chana̱ yoꞌ a:
―Né ina̱nj cheꞌé do̱j nana̱ natáꞌ so̱ꞌ rihaan núj me cuchumán rá núj niꞌya̱j núj man soꞌ maꞌ. Ma̱an se cuno maꞌa̱n núj snana̱ soꞌ, ne̱ xcaj núj cuentá se vaa ya̱ Síí Ti̱nanii rihaan Sayuun man Yuvii̱ ma̱n rihaan chumii̱ nihánj me síí nihánj na̱nj ado̱nj ―taj nij soꞌ rihaan chana̱ yoꞌ a.
Nahuun sa̱ꞌ taꞌníí ꞌo̱ síí nica̱j suun, quiꞌyaj Jesús a
43Dan me se quisíj vi̱j güii caranꞌ Jesús chumanꞌ yoꞌ, ga̱a ne̱ cavii soꞌ caꞌanj soꞌ estadó Galilea a. 44Dan me se maꞌa̱n Jesús me síí cataj xnaꞌanj se vaa nij síí ma̱n chiháán ꞌo̱ síí aꞌmii natáj snana̱ Yaꞌanj me se ne aráj cochro̱j nij soꞌ rihaan soꞌ maꞌ.
45Ga̱a caꞌnaꞌ Jesús estadó Galilea, ga̱a ne̱ veꞌé uxrá caꞌmii nij síí ma̱n estadó yoꞌ ga̱ soꞌ cheꞌé suun sa̱ꞌ noco̱o quiꞌyaj soꞌ chaꞌanj canuû chumanꞌ Jerusalén a. ꞌO̱ se maꞌa̱n nij soꞌ caꞌanj chaꞌanj yoꞌ a.
46Dan me se caꞌanj uún Jesús chumanꞌ Caná chumanꞌ na̱j estadó Galilea a. Chumanꞌ yoꞌ me chumanꞌ naquiꞌyaj soꞌ na vinó man na u̱u̱n ga̱a rque̱ a. Ne̱ chumanꞌ Capernaum roꞌ, yáán ꞌo̱ síí nica̱j suun rihaan rey a. Ne̱ canó chiꞌii̱ man taꞌníí soꞌ ꞌo̱ snóꞌo cunii a. 47Dan me se cuchiꞌ nana̱ rihaan síí nica̱j suun yoꞌ se vaa cavii Jesús estadó Judea caꞌnaꞌ Jesús estadó Galilea a. Ga̱a ne̱ caꞌanj soꞌ cuchiꞌ soꞌ rihaan Jesús, ne̱ cachíín niꞌya̱j uxrá soꞌ rihaan Jesús se vaa caꞌa̱nj Jesús quiꞌya̱j conoꞌó Jesús man taꞌníí soꞌ a. ꞌO̱ se da̱j doj cavi̱ꞌ taꞌníí soꞌ, taj soꞌ a. 48Ga̱a ne̱ cataj Jesús rihaan soꞌ a:
―Sese se̱ quiꞌyáj da̱j a̱ suun sa̱ꞌ noco̱o queneꞌe̱n soj, ne̱ daj chiha̱a̱ míj se̱ cuchumán rá soj ni̱ꞌyaj soj manj maꞌ ―taj Jesús rihaan soꞌ a.
49Ga̱a ne̱ cataj síí nica̱j suun yoꞌ rihaan Jesús a:
―Da̱j doj cavi̱ꞌ taꞌníj, na̱nj señor. Qui̱ꞌyáá so̱ꞌ se ndoꞌo uxrá, ne̱ caꞌa̱nj níꞌ do̱j rugua̱nj ―taj soꞌ, cachíín niꞌya̱j soꞌ rihaan Jesús a.
50Ne̱ cataj Jesús rihaan soꞌ a:
―Caꞌve̱e caꞌa̱nj so̱ꞌ á. ꞌO̱ se a̱j nahuun sa̱ꞌ taꞌníí so̱ꞌ na̱nj ado̱nj ―taj Jesús rihaan soꞌ a.
Ga̱a ne̱ cuchumán rá snóꞌo yoꞌ nana̱ cataj xnaꞌanj Jesús rihaan soꞌ, ne̱ cavii soꞌ caꞌanj soꞌ a. 51Veé dan, ne̱ tiha̱j va̱j nanꞌ soꞌ chrej, ne̱ caꞌanj cara̱nꞌ nij se‑mo̱zó soꞌ man soꞌ, ne̱ cataj xnaꞌanj nij mozó yoꞌ rihaan soꞌ se vaa a̱j nahuun sa̱ꞌ taꞌníí soꞌ na̱nj ado̱nj. 52Veé dan, ne̱ xnáꞌanj soꞌ man nij mozó yoꞌ a:
―Me orá me guun cheꞌe̱ taꞌníj nahuun sa̱ꞌ soꞌ ga̱ ―cataj soꞌ rihaan nij mozó yoꞌ a.
Ga̱a ne̱ cataj nij mozó yoꞌ rihaan soꞌ a:
―Quii agaꞌ ꞌo̱ me naꞌmaân cachiꞌ man xnii na̱nj á ―taj nij mozó yoꞌ rihaan soꞌ a.
53Cheꞌé dan me xcaj snóꞌo yoꞌ cuentá se vaa ma̱an orá cataj xnaꞌanj Jesús rihaan soꞌ se vaa nahuun sa̱ꞌ taꞌníí soꞌ roꞌ, ma̱an orá dan me nahuun sa̱ꞌ ya̱ taꞌníí soꞌ a. Ga̱a ne̱ cuchumán rá nij tucua̱ soꞌ niꞌya̱j nij soꞌ man Jesús a. 54Dan me se quisíj vi̱j suun sa̱ꞌ noco̱o quiꞌyaj Jesús tihaa̱n me síí me ya̱ soꞌ ga̱a cavii soꞌ estadó Judea caꞌanj soꞌ estadó Galilea a.
Currently Selected:
San Juan 4: trc
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. 2024 segunda versión electrónica