San Lucas 11
11
Nataꞌ Jesús da̱j caꞌmi̱i̱ níꞌ ga̱a achíín niꞌya̱j níꞌ rihaan Yaꞌanj a
1Ga̱a ne̱ cachíín niꞌya̱j Jesús rihaan Yaꞌanj ꞌo̱ güii, ne̱ ga̱a quisíj cachíín niꞌya̱j soꞌ rihaan Yaꞌanj, ga̱a ne̱ cataj ꞌo̱ síí tucuꞌyón snana̱ soꞌ rihaan soꞌ a:
―Señor, tu̱cuꞌyón so̱ꞌ man núj da̱j caꞌmi̱i̱ núj ga̱a cachi̱nj niꞌya̱j núj rihaan Yaꞌanj, ase vaa quiꞌyaj Juan Síí Cutaꞌ Ne man yuvii̱ rihaan nij síí tucuꞌyón snana̱ soꞌ a ―taj soꞌ rihaan Jesús a.
2Ga̱a ne̱ caꞌmii Jesús nana̱ nihánj rihaan nij soꞌ a:
―Na̱nj cata̱j soj ga̱a cachi̱nj niꞌya̱j soj rihaan Yaꞌanj á:
Ata̱j Chij, síí nicu̱nꞌ xta̱ꞌ,
me rá nimán núj cara̱a̱ cochro̱j yuvii̱ mán so̱ꞌ ado̱nj.
Ne̱ me rá nimán núj gu̱un chij so̱ꞌ a.
Ne̱ me rá nimán núj quiꞌya̱j yuvii̱ nu̱ꞌ se vaa me rá so̱ꞌ a.
Ase vaa ꞌyaj nij síí ma̱n rej xta̱ꞌ nu̱ꞌ se vaa me rá so̱ꞌ roꞌ, da̱nj ga̱a̱ quiꞌya̱j núj si̱j ma̱n rihaan chumii̱ nihánj uún á.
3Se chá achiin man núj ꞌo̱ ꞌo̱ güii roꞌ, rque̱ so̱ꞌ man núj cuanꞌ rugua̱nj.
4Ti̱navíí so̱ꞌ cacunꞌ tumé núj,
da̱j se vaa aráj xꞌnaa núj cheꞌé cacunꞌ quiꞌyaj tuviꞌ núj rihaan núj na̱nj ado̱nj.
Ca̱ráán raꞌá so̱ꞌ xráá núj rihaan chrej chiꞌi̱i̱,
ne̱ ti̱nanii so̱ꞌ man núj se̱ quiꞌyaj núj cacunꞌ, quiꞌya̱j Síí Chre̱e maꞌ.
Da̱nj cata̱j soj ga̱a cachi̱nj niꞌya̱j soj rihaan Yaꞌanj ado̱nj ―taj Jesús rihaan nij síí tucuꞌyón snana̱ soꞌ a.
No̱ xcúún níꞌ cachi̱nj niꞌya̱j níꞌ rihaan Yaꞌanj cheꞌé rasu̱u̱n achiin man níꞌ a
5Ga̱a ne̱ canica̱j Jesús, ne̱ cataj uún soꞌ a:
―Dan me se cata̱j níꞌ, ne̱ cuchi̱ꞌ ꞌo̱ soꞌ tucuá tuviꞌ soꞌ nii̱ ya̱nꞌ, ne̱ cata̱j soꞌ rihaan tuviꞌ soꞌ a: “Qui̱ꞌyáá so̱ꞌ se ndoꞌo, ne̱ ra̱cuíj so̱ꞌ vaꞌnu̱j rachrúún manj, tinu̱j. 6Caꞌnaꞌ ꞌo̱ tuvij síí achén chrej, ne̱ caranꞌ soꞌ tucuaj, tza̱j ne̱ taj va̱j rachrúún rihanj rque̱j cha̱ soꞌ maꞌ”, cata̱j soꞌ rihaan tuviꞌ soꞌ a. 7Ne̱ da̱j cata̱j tuviꞌ soꞌ rihaan soꞌ, rá soj ga̱. Cata̱j tuviꞌ soꞌ a: “Se̱ narii so̱ꞌ nej rihanj, maan tinu̱j. A̱j naquiꞌyaj xraan ꞌu̱nj taꞌyaa, ne̱ a̱j otoj nij taꞌni̱j núj, ne̱ rmi̱j na̱xagaj rque̱j rachrúún mán so̱ꞌ na̱nj á”, cata̱j tuviꞌ soꞌ rihaan soꞌ, rá soj naꞌ. 8Dan me se cata̱j xnaꞌanj ꞌu̱nj rihaan soj cuano̱ se vaa síí otoj yoꞌ roꞌ, nda̱ꞌ se naꞌvej rá soꞌ na̱xagaa soꞌ rque̱ soꞌ rachrúún man tuviꞌ soꞌ, tza̱j ne̱ cheꞌé se ne uun naꞌa̱j tuviꞌ soꞌ achíín achíín soꞌ rachrúún, ne̱ cheꞌé dan gu̱un rmi̱i̱ xréé síí na̱j otoj, ga̱a ne̱ na̱xagaa soꞌ, ne̱ rque̱ soꞌ me maꞌa̱n rasu̱u̱n achiin man síí nicu̱nꞌ taꞌyaa yoꞌ ado̱nj.
9’Ne̱ ꞌu̱nj nihánj me síí taj xnaꞌanj rihaan soj se vaa cachi̱nj soj se vaa achiin man soj rihaan Yaꞌanj, ne̱ soꞌ me síí rque̱ man soj, ne̱ nano̱ꞌ soj rasu̱u̱n achiin man soj, ne̱ nari̱ꞌ soj rasu̱u̱n yoꞌ, ne̱ ase vaa ꞌyaj síí ticaꞌmii taꞌyaa tucuá tuviꞌ roꞌ, da̱nj quiꞌya̱j soj ga̱ Yaꞌanj, ne̱ caꞌnu̱u̱ Yaꞌanj taꞌyaa yoꞌ, ne̱ rque̱ Yaꞌanj rasu̱u̱n achiin man soj ado̱nj. 10ꞌO̱ se síí achíín rasu̱u̱n rihaan Yaꞌanj roꞌ, quiri̱ꞌ soꞌ rasu̱u̱n achiin man soꞌ, ne̱ síí nanoꞌ rasu̱u̱n achiin man roꞌ, quiri̱ꞌ soꞌ rasu̱u̱n yoꞌ, ne̱ síí ticaꞌmii taꞌyaa rej ya̱nj Yaꞌanj roꞌ, caꞌnu̱u̱ Yaꞌanj taꞌyaa, ne̱ quiri̱ꞌ síí ticaꞌmii taꞌyaa rasu̱u̱n achiin man soꞌ ado̱nj.
11’Xca̱j soj cuentá se vaa maꞌa̱n soj, na̱nj yuvii̱ me soj, tza̱j ne̱ sese achíín taꞌníí soj rachrúún cha̱ yoꞌ man soj, ne̱ se̱ nanoꞌ soj yahij ne̱ caxri̱i̱ soj ston yoꞌ maꞌ. Ne̱ sese achíín taꞌníí soj nee̱ xcuaj cha̱ yoꞌ man soj, ne̱ se̱ nanoꞌ soj xcuáá ne̱ caxri̱i̱ soj ston yoꞌ maꞌ. 12Ne̱ sese achíín taꞌníí soj xrúú xee cha̱ yoꞌ man soj, ne̱ se̱ nanoꞌ soj xcuun ne̱ caxri̱i̱ soj ston yoꞌ maꞌ. 13Dan me se nda̱ꞌ se síí chiꞌi̱i̱ nimán me soj, tza̱j ne̱ neꞌen soj rque̱ soj se sa̱ꞌ cha̱ taꞌníí soj ado̱nj. Cheꞌé dan táá a̱ Rej soj síí nicu̱nꞌ xta̱ꞌ, ne̱ soꞌ me síí rque̱ ya̱ Nimán man nij síí achíín Nimán Yaꞌanj rihaan soꞌ na̱nj ado̱nj ―taj Jesús rihaan nij síí tucuꞌyón snana̱ soꞌ a.
Cutaꞌ nij síí fariseo cacunꞌ rmi̱ꞌ xráá Jesús se vaa caꞌmii Jesús ga̱ Síí Chre̱e a
14Dan me se quirii Jesús ꞌo̱ nana̱ chre̱e yaꞌmi̱i nimán ꞌo̱ snóꞌo, ne̱ ga̱a curiha̱nj nana̱ chre̱e, ne̱ caꞌmii síí yaꞌmi̱i ado̱nj. Ne̱ caráyaꞌa̱nj uxrá nij yuvii̱ queneꞌen nij soꞌ se vaa quiꞌyaj Jesús, 15ne̱ taꞌa̱j nij yuvii̱ cataj se vaa aꞌmii Jesús ga̱ síí cuꞌna̱j Beelzebú, síí uun chij doj rihaan nij nana̱ chre̱e, ne̱ cheꞌé dan rii soꞌ man nij nana̱ chre̱e nimán yuvii̱, taj taꞌa̱j nij yuvii̱, niꞌya̱j nij yuvii̱ man Jesús a.
16Ne̱ ꞌó taꞌa̱j nij yuvii̱ guun rá cuta̱ꞌ cacunꞌ xráá Jesús, ne̱ cheꞌé dan cachíín niꞌya̱j nij soꞌ rihaan Jesús se vaa quiꞌya̱j soꞌ ꞌo̱ suun sa̱ꞌ noco̱o ꞌnaꞌ rej xta̱ꞌ ni̱ꞌyaj nij soꞌ, taj nij soꞌ a. 17Dan me se queneꞌen maꞌa̱n Jesús da̱j vaa nimán nij yuvii̱, ne̱ cheꞌé dan cataj soꞌ a:
―Neꞌen soj se vaa sese vaa ꞌo̱ yoꞌóó noco̱o, ne̱ sese xra̱ꞌ taꞌa̱j nij síí uun chij rihaan yoꞌóó noco̱o yoꞌ ne̱ cunu̱ꞌ maꞌa̱n nij soꞌ ga̱ tuviꞌ nij soꞌ, ne̱ vaa güii, ne̱ nu̱ꞌ yoꞌóó noco̱o yoꞌ quiri̱ꞌ nu̱ꞌ na̱nj ado̱nj. Ne̱ sese cunu̱ꞌ taꞌa̱j nij tucua̱ ꞌo̱ soꞌ ga̱ maꞌa̱n tuviꞌ nij soꞌ, ne̱ vaa güii quiri̱ꞌ nu̱ꞌ nij tucua̱ soꞌ, quiꞌya̱j nij soꞌ na̱nj ado̱nj. 18Cheꞌé dan me sese racuíj Síí Chre̱e manj rii ꞌu̱nj man tuviꞌ soꞌ nana̱ chre̱e nimán nij yuvii̱, ga̱a ne̱ asa̱ꞌ caꞌve̱e ꞌo̱ gu̱un chij ndoꞌo soꞌ rihaan nij nana̱ chre̱e, rá soj ga̱. Nana̱ nihánj xnáꞌanj ꞌu̱nj man soj cheꞌé se me rá soj cata̱j soj se vaa Síí Chre̱e síí cuꞌna̱j Beelzebú roꞌ, me síí racuíj manj rij man nana̱ chre̱e nimán nij yuvii̱, rá soj vaa na̱nj á. 19Dan me se rii ꞌu̱nj man nij nana̱ chre̱e nimán nij yuvii̱, ꞌyaj Síí Chre̱e, síí cuꞌna̱j Beelzebú, cheꞌé se aꞌmii ꞌu̱nj ga̱ soꞌ, rá soj a. Tza̱j ne̱ nij síí tucuꞌyón snana̱ soj me se veé da̱nj rii nij soꞌ man nij nana̱ chre̱e nimán nij yuvii̱ uún ado̱nj. Ne̱ asa̱ꞌ aꞌvee ꞌyaj nij soꞌ da̱nj, rá soj ga̱. Ne̱ vaa nij soꞌ vaa, veé da̱nj aꞌmii nij soꞌ ga̱ Síí Chre̱e, rá soj ga̱a naꞌ. Cheꞌé nana̱ caꞌmii soj me se maꞌa̱n nij síí tucuꞌyón snana̱ soj cuta̱ꞌ cacunꞌ xráá soj se vaa caꞌmii ne̱ soj ado̱nj. 20Tza̱j ne̱ ꞌu̱nj me se ya̱ maꞌa̱n raꞌa Yaꞌanj racuíj manj rii ꞌu̱nj man nij nana̱ chre̱e nimán nij yuvii̱ ado̱nj. Cheꞌé dan xca̱j soj cuentá se vaa a̱j guun cheꞌe̱ Yaꞌanj uun chij Yaꞌanj scaꞌnúj soj ado̱nj.
21’Dan me se sese ꞌo̱ síí nucua̱j ya̱nj rá veꞌ me se vaa agaꞌ siha̱a̱ do̱ꞌ, vaa mixté do̱ꞌ, rihaan soꞌ, ne̱ tumé soꞌ siꞌyaj soꞌ yáán soꞌ, ne̱ taj síí caꞌne̱e̱ siꞌyaj soꞌ maꞌ. 22Tza̱j ne̱ sese caꞌna̱ꞌ ꞌó síí nucua̱j doj, ga̱a ne̱ quiꞌya̱j canaán soꞌ rihaan síí ya̱nj xraan, ga̱a ne̱ caꞌne̱e̱ soꞌ nu̱ꞌ saga̱ꞌ soꞌ do̱ꞌ, nu̱ꞌ siꞌyaj soꞌ do̱ꞌ, ne̱ cuxra̱ꞌ taꞌa̱j soꞌ ga̱ tuviꞌ soꞌ na̱nj ado̱nj.
23’Síí naꞌvej rá gu̱un tuvi̱ꞌ ga̱ ꞌu̱nj roꞌ, síí ta̱j riꞌyunj manj me soꞌ a. Ne̱ síí ne racuíj manj naquiꞌya̱j chre̱ꞌ ꞌu̱nj man yuvii̱ canoco̱ꞌ man Yaꞌanj roꞌ, soꞌ me síí tichaꞌnuu̱ man nij yuvii̱, ne̱ aráán soꞌ rihaan nij yuvii̱ se̱ canocoꞌ nij yuvii̱ man Yaꞌanj maꞌ ―taj Jesús rihaan nij yuvii̱ a.
Nataꞌ Jesús da̱j ꞌyaj nana̱ chre̱e ga̱a anica̱j uún nana̱ chre̱e nimán yuvii̱ a
24-25Ga̱a ne̱ cataj uún Jesús rihaan nij yuvii̱ a:
―Ne̱ ga̱a tiha̱j yu̱u̱n avii ꞌo̱ nana̱ chre̱e nimán snóꞌo, ne̱ chéé rmaꞌa̱n nana̱ chre̱e yoꞌ nanoꞌ soꞌ rej ca̱yáán soꞌ, tza̱j ne̱ taj se qui̱ꞌyáꞌ quiri̱ꞌ nana̱ chre̱e yoꞌ rej ca̱yáán soꞌ maꞌ. Ga̱a ne̱ me rá uún nana̱ chre̱e yoꞌ ca̱nica̱j soꞌ rej cavii soꞌ ga̱a rque̱ a. Dan me se taj nana̱ chre̱e yoꞌ a: “Ca̱nica̱j uún ꞌu̱nj nánꞌ ꞌu̱nj rej cavii ꞌu̱nj a. Veꞌé na̱nj vaa tucuaj, ne̱ naruvii rá veꞌ tucuaj cuano̱, ne̱ uun yâj ya̱nj rá veꞌ tucuaj cuano̱ ado̱nj”, taj nana̱ chre̱e yoꞌ a. 26Ga̱a ne̱ anica̱j uún nana̱ chre̱e yoꞌ nimán snóꞌo yoꞌ, ne̱ nanoꞌ nana̱ chre̱e yoꞌ ꞌó chi̱j tuviꞌ nana̱ chre̱e yoꞌ síí chiꞌi̱i̱ doj, ne̱ ꞌnaꞌ nique uún soꞌ nimán snóꞌo yoꞌ, ga̱a ne̱ ca̱yáán ta̱ranꞌ nij nana̱ chre̱e yoꞌ a. Dan me se ga̱a rque̱ ga̱a cayáán o̱rúnꞌ nana̱ chre̱e yoꞌ, ne̱ ma̱an taꞌngaꞌ qui̱j vaa nimán snóꞌo yoꞌ, tza̱j ga̱a namán ꞌó chi̱j nana̱ chre̱e yoꞌ, ga̱a ne̱ doj a̱ tico nana̱ chre̱e man soꞌ, ne̱ doj a̱ qui̱j vaa nimán snóꞌo yoꞌ, ꞌyaj nij nana̱ chre̱e yoꞌ na̱nj ado̱nj ―taj Jesús rihaan nij yuvii̱ a.
Cataj Jesús me síí cavi̱i̱ sa̱ꞌ rihaan Yaꞌanj a
27Dan me se ga̱a caꞌmii Jesús nana̱ vaa da̱nj, ga̱a ne̱ nucua̱j caꞌmii ꞌo̱ chana̱ nicu̱nꞌ scaꞌnúj nij yuvii̱, cataj noꞌ a:
―Cavi̱i̱ sa̱ꞌ nií so̱ꞌ, cheꞌé se cuchruj noꞌ mán so̱ꞌ, ne̱ tucutzii noꞌ mán so̱ꞌ á ―taj chana̱ yoꞌ, caguáj noꞌ rihaan Jesús a.
28Tza̱j ne̱ cataj Jesús a:
―Síí cavi̱i̱ sa̱ꞌ ya̱ roꞌ, me síí uno snana̱ Yaꞌanj ne̱ ꞌyaj nda̱a vaa taj nu̱ꞌ nana̱ yoꞌ ado̱nj ―taj Jesús rihaan nij yuvii̱ yoꞌ a.
Cataj Jesús se vaa se̱ quiꞌyaj soꞌ suun sa̱ꞌ noco̱o cheꞌé yuvii̱ a
29Dan me se cunuu chre̱ꞌ doj yuvii̱ rihaan Jesús, ne̱ cheꞌé dan guun cheꞌe̱ soꞌ caꞌmii soꞌ nana̱ nihánj a:
―Ina̱nj cheꞌé se yuvii̱ vaa chiꞌi̱i̱ nimán me soj roꞌ, cheꞌé dan me rá soj qui̱ꞌyáj suun sa̱ꞌ noco̱o queneꞌe̱n soj na̱nj á. Tza̱j ne̱ se̱ quiꞌyáj suun sa̱ꞌ noco̱o cheꞌé soj maꞌ. Ma̱an se queneꞌe̱n soj se vaa ase vaa quiranꞌ síí cuꞌna̱j Jonás ga̱a naá roꞌ, da̱nj qui̱ránꞌ ꞌu̱nj, vaa güii na̱nj á. 30Dan me se quiꞌyaj Yaꞌanj suun sa̱ꞌ noco̱o ga̱ Jonás queneꞌen nij síí ma̱n chumanꞌ Nínive ga̱a naá, ne̱ veé da̱nj quiꞌya̱j uún Yaꞌanj ga̱ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱, queneꞌe̱n soj si̱j ma̱n ya̱j ado̱nj.
31’Ne̱ güii caꞌne̱ꞌ Yaꞌanj cacunꞌ cheꞌé yuvii̱ roꞌ, cuchi̱ꞌ chana̱ nica̱j suun reiná guun chij rihaan chumanꞌ na̱j ga̱nꞌ ndoꞌo rihaan yoꞌóó rej sur, ne̱ canicu̱nꞌ noꞌ rihaan soj, quiꞌya̱j Yaꞌanj, ne̱ cuta̱ꞌ noꞌ cacunꞌ xráá soj ado̱nj. ꞌO̱ se ga̱nꞌ ndoꞌo cachéé noꞌ cuchi̱ꞌ noꞌ rihaan síí cuꞌna̱j Salomón, ne̱ cuno noꞌ nana̱ cu̱u tucuꞌyón Salomón man noꞌ ado̱nj. Ne̱ xa̱ꞌ ꞌu̱nj si̱j nicu̱nꞌ rihaan soj cuano̱, tza̱j ne̱ síí cu̱u doj raa̱ mé ꞌu̱nj rihaan Salomón ado̱nj. 32Ne̱ nij síí ma̱n chumanꞌ Nínive roꞌ, canicu̱nꞌ nij soꞌ ga̱ maꞌa̱n soj si̱j vaa iꞌna̱ꞌ rihaan chumii̱ nihánj cuano̱ asa̱ꞌ quisíj güii caꞌne̱ꞌ Yaꞌanj cacunꞌ cheꞌé yuvii̱, ne̱ cuta̱ꞌ nij síí ma̱n chumanꞌ Nínive yoꞌ cacunꞌ xráá soj ado̱nj. Cuno nij soꞌ nana̱ caꞌmii natáj Jonás, ne̱ nuchranꞌ nimán nij soꞌ, ne̱ canocoꞌ nij soꞌ man Yaꞌanj ado̱nj. Ne̱ xa̱ꞌ ꞌu̱nj si̱j nicu̱nꞌ rihaan soj cuano̱, tza̱j ne̱ síí noco̱o doj mé ꞌu̱nj rihaan Jonás ado̱nj ―taj Jesús rihaan nij yuvii̱ yoꞌ a.
Cataj Jesús se vaa no̱ xcúún níꞌ xca̱j níꞌ cuentá da̱j quiꞌya̱j níꞌ a
33Ne̱ cataj uún Jesús rihaan nij soꞌ a:
―Ga̱a rmi̱ꞌ, ne̱ a̱ ꞌó yuvii̱ ne utaꞌ yaꞌan raa̱ agaꞌ yaꞌan ne̱ axríj yuve̱ nij soꞌ rque ꞌo̱ chrúún maꞌ. Sese rmi̱ꞌ, ne̱ achrón nii yaꞌan raa̱ agaꞌ yaꞌan ne̱ utaꞌ nii agaꞌ yoꞌ rej xta̱ꞌ, ne̱ da̱j a̱ nij yuvii̱ atúj rá veꞌ roꞌ, chuguu̱n niꞌya̱j nij soꞌ ado̱nj.
34’Rlij rihaan níꞌ me yaꞌan nica̱j yuꞌunj man níꞌ ado̱nj. Dan me se sese rlij rihaan níꞌ roꞌ, niꞌya̱j yoꞌ ne̱ uun sa̱ꞌ rá yoꞌ, ga̱a ne̱ nu̱ꞌ nee̱ man níꞌ roꞌ, sa̱ꞌ vaa a. Ne̱ adi̱ꞌ se chuguu̱n agaꞌ yaꞌan roꞌ, da̱nj chuguu̱n man níꞌ ga̱a sa̱ꞌ rihaan níꞌ ado̱nj. Tza̱j ne̱ sese rlij rihaan níꞌ roꞌ, niꞌya̱j yoꞌ ne̱ ina̱nj uun chiꞌi̱i̱ rá yoꞌ, ga̱a ne̱ nu̱ꞌ nee̱ man níꞌ roꞌ, uun chiꞌi̱i̱ rá a. Ga̱a ne̱ adi̱ꞌ síí nicu̱nꞌ yan rmi̱ꞌ ne̱ cunuda̱nj man soꞌ roꞌ, rmi̱ꞌ, ne̱ da̱nj vaa síí uun chiꞌi̱i̱ rá ado̱nj. 35Xca̱j ndoꞌo soj cuentá se̱ gaa na̱nj quinaꞌa̱j yaꞌan nica̱j yuꞌunj man soj ne̱ gu̱un soj ꞌo̱ se rmi̱ꞌ a. 36Dan me se sese cunuda̱nj man níꞌ nuû yaꞌan, ne̱ taj a̱ doj se rmi̱ꞌ nu̱u̱ man níꞌ, ga̱a ne̱ cunuda̱nj man níꞌ roꞌ, chuguu̱n a. Ne̱ adi̱ꞌ ga̱a oꞌ cachu̱nꞌ yaꞌan xráá nii ne̱ chuguu̱n nu̱ꞌ man nii roꞌ, da̱nj vaa níꞌ ado̱nj ―taj Jesús rihaan nij yuvii̱ yoꞌ a.
Caꞌmii Jesús cheꞌé cacunꞌ tumé nij síí fariseo a
37Dan me se ga̱a quisíj caꞌmii Jesús rihaan nij yuvii̱, ne̱ canacúún ꞌo̱ síí fariseo man soꞌ caꞌa̱nj soꞌ tucuá síí fariseo yoꞌ cha̱ soꞌ, ga̱a ne̱ caꞌanj ca̱yáán ro̱j soꞌ rihaan mesá a. 38Dan me se xcaj síí fariseo yoꞌ cuentá se vaa ne nocoꞌ Jesús stucua̱nj nij síí fariseo cheꞌé se ne naꞌyaꞌ soꞌ ga̱a chá soꞌ, ne̱ caráyaꞌa̱nj ndoꞌo síí fariseo yoꞌ a. 39Cheꞌé dan cataj Síí ꞌNi̱j Raꞌa man níꞌ rihaan soꞌ a:
―Xa̱ꞌ soj si̱j fariseo, tza̱j ne̱ ase vaa rasu̱u̱n sa̱ꞌ uxrá naꞌnuꞌ nii xráá yoꞌ, tza̱j ne̱ rque yoꞌ roꞌ, vaa gue̱e̱ nacaj, ne̱ taꞌngaꞌ da̱nj vaa gue̱e̱ nij soj a. ꞌO̱ se xráá soj me se veꞌé naruvii, tza̱j ne̱ nimán soj me se qui̱j vaa a. Ne̱ niha̱ꞌ uxrá rá soj caꞌne̱e̱ soj siꞌyaj tuviꞌ soj, ne̱ noco̱ꞌ ndoꞌo soj chrej chiꞌi̱i̱ ado̱nj. 40Né si̱j acaj cuentá me soj a̱ maꞌ. Ne neꞌen soj se vaa Yaꞌanj me síí quiꞌyaj raꞌa soj do̱ꞌ, nimán soj do̱ꞌ naꞌ. 41Dan me se rque̱ soj taꞌa̱j siꞌya̱j soj man nij síí nique̱ yan ti̱haa̱n soj se vaa a̱j cunuu sa̱ꞌ nimán soj á. Nda̱a síj, ga̱a ne̱ a̱ ꞌó xcoꞌ se̱ gaa nacaj xráá soj do̱ꞌ, rá nimán soj do̱ꞌ maꞌ.
42’Tza̱j ne̱ nique̱ soj si̱j fariseo na̱nj á. ꞌO̱ se quira̱nꞌ uxrá soj sayuun na̱nj ado̱nj. ꞌO̱ se sese vaa nuu xlá do̱ꞌ, coj ruda do̱ꞌ, me maꞌa̱n cuêj do̱ꞌ, rihaan soj, ne̱ rqué soj ꞌo̱ nánj rasu̱u̱n yoꞌ rihaan Yaꞌanj cheꞌé ꞌo̱ ꞌo̱ chi̱ꞌ nánj rasu̱u̱n vaa rihaan soj na̱nj á. Tza̱j ne̱ ne aꞌneꞌ nica̱ soj cacunꞌ cheꞌé tuviꞌ soj maꞌ. Ne aráj cochro̱j soj rihaan Yaꞌanj maꞌ. Tza̱j ne̱ me rá Yaꞌanj quiꞌya̱j soj nu̱ꞌ suun noco̱o nihánj, ne̱ naꞌvej rá Yaꞌanj ta̱náj xco̱ soj ꞌó suun leꞌe̱j doj yoꞌ a̱ maꞌ.
43’Nique̱ soj si̱j fariseo na̱nj á. Quira̱nꞌ uxrá nij soj sayuun ado̱nj. ꞌO̱ se niha̱ꞌ rá soj quita̱j soj chruun xlá sa̱ꞌ doj nicu̱nꞌ rá veꞌ tucuꞌyón níꞌ stucua̱nj Moisés, ne̱ niha̱ꞌ rá soj cara̱yaꞌa̱nj yuvii̱ man soj ga̱a chéé soj yuꞌvee a.
44’Nique̱ soj cheꞌé sayuun quira̱nꞌ soj á. Ase vaa rej ꞌni̱j yuve̱ xnangá rque yoꞌóó vaa soj a. Chéé yuvii̱ rej yoꞌ ne̱ ne xcaj yuvii̱ cuentá se vaa rej nij ꞌni̱j cúú riꞌyuj me yoꞌ maꞌ ―taj Jesús rihaan nij síí fariseo yoꞌ a.
Caꞌmii Jesús cheꞌé cacunꞌ tumé nij síí naquiꞌyaj cu̱u stucua̱nj Moisés a
45Ga̱a ne̱ caꞌmii ꞌo̱ síí naquiꞌyaj cu̱u stucua̱nj Moisés, ne̱ cataj soꞌ rihaan Jesús a:
―Tza̱j ne̱ nachríꞌ so̱ꞌ niꞌya̱j so̱ꞌ man maꞌa̱n núj ga̱a aꞌmii so̱ꞌ nana̱ vaa da̱nj na̱nj á ―taj soꞌ rihaan Jesús a.
46Ga̱a ne̱ cataj Jesús rihaan soꞌ a:
―Ne̱ nique̱ maꞌa̱n soj si̱j naquiꞌyaj cu̱u stucua̱nj Moisés á. Maꞌa̱n soj uún quira̱nꞌ uxrá sayuun na̱nj ado̱nj. ꞌO̱ se aꞌneꞌ uxrá soj suun rihaan yuvii̱ da̱j quiꞌya̱j nij yuvii̱ canoco̱ꞌ nij yuvii̱ man Yaꞌanj, tza̱j ne̱ ase vaa yuvii̱ araa ndoꞌo rasu̱u̱n ꞌe̱e̱ xráá tuviꞌ vaa nij soj, ne̱ a̱ doj ne racuíj soj man yuvii̱ ca̱ta̱ yuvii̱ rasu̱u̱n ꞌe̱e̱ yoꞌ a̱ maꞌ. A̱ ꞌó raa̱ raꞌa nij soj ne racuíj soj man yuvii̱ a̱ maan ado̱nj.
47’Nique̱ soj cheꞌé sayuun quira̱nꞌ soj á. Veꞌé uneꞌ soj chraan rej na̱j cúú man nij síí nataꞌ snana̱ Yaꞌanj ga̱a naá, tza̱j ne̱ maꞌa̱n xi̱i soj roꞌ, me síí ticaviꞌ man nij soꞌ ado̱nj. 48Dan me se cheꞌé se neꞌen níꞌ se vaa ꞌyaj maꞌa̱n soj, ne̱ cheꞌé dan xcaj níꞌ cuentá se vaa ꞌo̱ vaa rá soj ga̱ xi̱i soj síí ma̱n ga̱a naá, ne̱ cuya̱a̱n ꞌyaj soj ga̱ xi̱i soj ado̱nj. ꞌO̱ se nij soꞌ roꞌ, ticaviꞌ man nij síí nataꞌ snana̱ Yaꞌanj, ne̱ soj roꞌ, uneꞌ chraan rej na̱j cúú man nij soꞌ ado̱nj.
49’Cheꞌé dan cavii ꞌo̱ nana̱ cu̱u raa̱ Yaꞌanj, cataj Yaꞌanj a: “Xa̱ꞌ yuvii̱ nihánj, tza̱j ne̱ caꞌne̱j ꞌu̱nj síí nata̱ꞌ snana̱j rihaan nij soꞌ a. Dan me se ticavi̱ꞌ nij soꞌ man taꞌa̱j nij síí caꞌne̱j ꞌu̱nj, ne̱ ꞌó taꞌa̱j nij soꞌ me se me rej maꞌa̱n vaj nij soꞌ, ne̱ quita̱j riꞌyunj uxrá nij soꞌ man nij síí caꞌne̱j a”, taj Yaꞌanj a. 50Nda̱a síj, ga̱a ne̱ nu̱ꞌ ton cayanj man nij síí nataꞌ snana̱ Yaꞌanj asi̱j ga̱a guun cheꞌe̱ chumii̱ roꞌ, nu̱ꞌ cacunꞌ yoꞌ roꞌ, nata̱ꞌ xráá nij síí ma̱n ya̱j a. 51Dan me se asi̱j ton cayanj man síí cuꞌna̱j Abel ne̱ nda̱a ton cayanj man síí cuꞌna̱j Zacarías ga̱a caviꞌ soꞌ rihaan nuvií rej nicu̱nꞌ chraan altar xi̱j roꞌ, nu̱ꞌ cacunꞌ yoꞌ roꞌ, nata̱ꞌ xráá nij soꞌ a. Dan me se cata̱j xnaꞌanj ꞌu̱nj rihaan soj cuano̱ se vaa quira̱nꞌ maꞌa̱n soj si̱j ma̱n ya̱j sayuun cheꞌé nu̱ꞌ cacunꞌ yoꞌ ado̱nj.
52’Nique̱ soj si̱j naquiꞌyaj cu̱u stucua̱nj Moisés á. Quira̱nꞌ uxrá soj sayuun ado̱nj. Taj se qui̱ꞌyáꞌ xca̱j yuvii̱ cuentá, ꞌyaj soj maꞌ. Dan me se maꞌa̱n soj roꞌ, naꞌvej rá catu̱u̱ stucua̱nj Yaꞌanj, ne̱ nij síí me rá catu̱u̱ me se aráán soj chrej rihaan nij soꞌ, ne̱ naꞌvej rá soj catu̱u̱ nij soꞌ a̱ maan ado̱nj ―taj Jesús rihaan nij síí naquiꞌyaj cu̱u stucua̱nj Moisés a.
53Dan me se curiha̱nj Jesús veꞌ yoꞌ, ne̱ guun cheꞌe̱ nij síí naquiꞌyaj cu̱u stucua̱nj Moisés do̱ꞌ, nij síí fariseo do̱ꞌ, táá riꞌyunj uxrá nij soꞌ man Jesús, ne̱ guun cheꞌe̱ nij soꞌ xnáꞌanj nij soꞌ man soꞌ cheꞌé queꞌe̱e̱ rasu̱u̱n a. 54Dan me se nanó xre̱j uxrá nij soꞌ nana̱ caꞌmii Jesús cheꞌé se guun ndoꞌo rá nij soꞌ cuta̱ꞌ nij soꞌ cacunꞌ xráá Jesús cheꞌé nana̱ tuꞌva soꞌ a.
Currently Selected:
San Lucas 11: trc
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. 2024 segunda versión electrónica