San Lucas 8
8
Nij chana̱ racuíj man Jesús a
1Dan me se cachén do̱j güii, ga̱a ne̱ caꞌanj Jesús queꞌe̱e̱ chumanꞌ noco̱o do̱ꞌ, chumanꞌ raꞌa̱ do̱ꞌ, caꞌmii natáj soꞌ nana̱ sa̱ꞌ cheꞌé da̱j vaa uun chij Yaꞌanj na̱nj ado̱nj. Caꞌanj chuvi̱j nij síí tucuꞌyón snana̱ soꞌ ga̱ soꞌ, 2ne̱ caꞌanj do̱j chana̱ nahuun sa̱ꞌ quiꞌyaj Jesús ga̱ nij soꞌ uún a. Dan me se taꞌa̱j noꞌ me níí nahuun quiꞌyaj Jesús, ne̱ ꞌó taꞌa̱j noꞌ me níí curiha̱nj nana̱ chre̱e nimán quiꞌyaj Jesús a. Chana̱ cuꞌna̱j Mariá Magdalena me ꞌo̱ noꞌ, ne̱ noꞌ me níí curiha̱nj chi̱j nana̱ chre̱e nimán quiꞌyaj Jesús a. 3Ne̱ ꞌó noꞌ roꞌ, me níí cuꞌna̱j Juaná, ne̱ nica̱ noꞌ roꞌ, me síí cuꞌna̱j Chuza síí nicu̱nꞌ rihaan síí nica̱j suun rey cuꞌna̱j Herodes a. Ne̱ ꞌó chana̱ caꞌanj ga̱ Jesús roꞌ, me níí cuꞌna̱j Susana a. Ne̱ vaa queꞌe̱e̱ doj nij chana̱ caꞌanj ga̱ nij soꞌ a. Nu̱ꞌ nij chana̱ nihánj roꞌ, me níí racuíj man nij tuvi̱ꞌ Jesús se vaa rqué nij noꞌ rasu̱u̱n siꞌyaj nij noꞌ se vaa cachiin man nij tuvi̱ꞌ Jesús a.
Nanó Jesús cuentó cheꞌé ꞌnúú trigó tixꞌnuu̱ ꞌo̱ soꞌ a
4Dan me se cavii queꞌe̱e̱ ndoꞌo nij yuvii̱ da̱j a̱ chumanꞌ, caꞌanj ni̱ꞌyaj nij soꞌ man Jesús, ne̱ dan me se quisíj cunuu chre̱ꞌ ri̱i̱ uxrá yuvii̱, ga̱a ne̱ guun cheꞌe̱ Jesús nanó soꞌ se‑cuento̱ ꞌnúú trigó rihaan nij soꞌ a. 5Cataj Jesús nana̱ nihánj a:
―Dan me se curiha̱nj ꞌo̱ síí me rá ti̱xꞌnuu̱ ꞌnúú trigó, ne̱ cayuu do̱j ꞌnúú trigó yoꞌ rá chrej chéé yuvii̱, ne̱ curuꞌmaan cheꞌé yuvii̱ man yoꞌ, ne̱ caꞌnaꞌ xtâj, chá nu̱ꞌ xtâj man ꞌnúú trigó na̱j rá chrej yoꞌ na̱nj ado̱nj. 6Ne̱ ꞌó taꞌa̱j ꞌnúú trigó yoꞌ roꞌ, cayuu rihaan yuvej rej ta̱j catu̱nꞌ yoꞌóó a. Xraꞌ ꞌnúú, tza̱j ne̱ cuchrii naa̱ leꞌe̱j cheꞌé se taj noco̱o ꞌyoo táá xráá yuvej yoꞌ na̱nj ado̱nj. 7Ne̱ ꞌó taꞌa̱j ꞌnúú trigó yoꞌ roꞌ, cayuu scaꞌnúj coj tanj, ne̱ dan me se yo̱o doj cachij coj tanj yoꞌ rihaan naa̱ leꞌe̱j, ne̱ quiriꞌ nu̱ꞌ naa̱ leꞌe̱j, quiꞌyaj coj tanj na̱nj ado̱nj. 8Ne̱ ꞌó taꞌa̱j ꞌnúú trigó yoꞌ roꞌ, cayuu rihaan yoꞌóó sa̱ꞌ, ne̱ naa̱ yoꞌ roꞌ, cachij sa̱ꞌ, ne̱ cientó ya̱ ꞌnúú cavii, quiꞌyaj ꞌo̱ ꞌo̱ ꞌnúú leꞌe̱j nii quinij rihaan yoꞌóó sa̱ꞌ yoꞌ na̱nj ado̱nj ―da̱nj cataj Jesús rihaan nij soꞌ a.
Ga̱a ne̱ guun cheꞌe̱ soꞌ caꞌmii nucua̱j soꞌ, cataj soꞌ a:
―Sese ta̱j yuꞌuj xréé soj, ne̱ cuno̱ soj nana̱ nihánj á ―taj Jesús rihaan nij soꞌ a.
Nataꞌ Jesús me cheꞌé nanó ndoꞌo soꞌ cuentó rihaan nij yuvii̱ a
9Ga̱a ne̱ xnáꞌanj nij síí tucuꞌyón snana̱ Jesús man soꞌ me cheꞌé nanó soꞌ cuentó cheꞌé ꞌnúú trigó yoꞌ a. 10Ga̱a ne̱ cataj Jesús rihaan nij soꞌ a:
―Xa̱ꞌ soj, tza̱j ne̱ tihaa̱n Yaꞌanj nana̱ sa̱ꞌ yuve̱ rihaan soj cheꞌé da̱j vaa uun chij Yaꞌanj ado̱nj. Tza̱j ne̱ rihaan ꞌó nij yuvii̱ me se ina̱nj cuentó cheꞌé nij rasu̱u̱n nanó ꞌu̱nj rihaan nij soꞌ, ga̱a ne̱:
Ni̱ꞌyaj nij soꞌ,
tza̱j ne̱ se̱ queneꞌen nij soꞌ maꞌ.
Ne̱ atúj nana̱ xréé nij soꞌ,
tza̱j ne̱ se̱ xcaj nij soꞌ cuentá a̱ maan ado̱nj
―taj Jesús rihaan nij síí tucuꞌyón snana̱ soꞌ a.
Nataꞌ Jesús me se me raj cata̱a se‑cuento̱ ꞌnúú trigó a
11Canica̱j Jesús, cataj soꞌ a:
―Nihánj me cata̱j xnaꞌanj ꞌu̱nj cheꞌé se‑cuento̱ ꞌnúú trigó, ne̱ ase vaa ꞌnúú trigó yoꞌ roꞌ, da̱nj vaa snana̱ Yaꞌanj ado̱nj. 12Ne̱ ase vaa ꞌnúú cayuu rá chrej roꞌ, da̱nj vaa taꞌa̱j nij síí uno snana̱ Yaꞌanj a. ꞌO̱ se uno nij soꞌ do̱j tzínꞌ, tza̱j ne̱ ꞌnaꞌ Síí Chre̱e, ne̱ aꞌnéj Síí Chre̱e snana̱ Yaꞌanj nimán nij soꞌ cheꞌé se naꞌvej rá Síí Chre̱e cuchuma̱n rá nij soꞌ ne̱ nani̱i̱ nij soꞌ rihaan sayuun quiꞌya̱j Yaꞌanj ado̱nj. 13Ne̱ ase vaa taꞌa̱j ꞌnúú trigó cayuu rihaan yuvej rej ta̱j catu̱nꞌ yoꞌóó roꞌ, da̱nj vaa ꞌó taꞌa̱j nij síí uno snana̱ Yaꞌanj a. ꞌO̱ se uun niha̱ꞌ rá nij soꞌ, ne̱ do̱j tiempó amán rá nij soꞌ, tza̱j ne̱ nu̱ꞌ ꞌnaꞌ sayuun rihaan nij soꞌ, ne̱ nu̱ꞌ tanáj nij soꞌ snana̱ Yaꞌanj a. 14Ne̱ ase vaa taꞌa̱j ꞌnúú cayuu scaꞌnúj tanj roꞌ, da̱nj vaa ꞌó taꞌa̱j nij síí uno snana̱ Yaꞌanj uún, ne̱ dan me se achén güii, ga̱a ne̱ anica̱j nij soꞌ niga̱nj nanó rá nij soꞌ cheꞌé rasu̱u̱n achiin man nij soꞌ do̱ꞌ, cheꞌé saꞌanj do̱ꞌ, cheꞌé se niha̱ꞌ ndoꞌo vaa rasu̱u̱n ma̱n rihaan chumii̱ nihánj rá nij soꞌ do̱ꞌ, ne̱ cheꞌé dan me tanáj xco̱ nij soꞌ snana̱ Yaꞌanj, ne̱ ne ꞌyaj nij soꞌ se sa̱ꞌ a̱ maꞌ. 15Ne̱ ꞌó taꞌa̱j nij síí uno snana̱ Yaꞌanj me se ase vaa ꞌnúú cayuu rihaan yoꞌóó sa̱ꞌ ne̱ sa̱ꞌ uxrá cachij yoꞌ roꞌ, da̱nj vaa síí sa̱ꞌ uno snana̱ Yaꞌanj a. ꞌO̱ se sa̱ꞌ uxrá vaa nij soꞌ, ne̱ veꞌé nanó xre̱j nij soꞌ snana̱ Yaꞌanj, ne̱ nocoꞌ xraan nij soꞌ snana̱ Yaꞌanj, ne̱ ina̱nj se sa̱ꞌ ꞌyaj nij soꞌ, ne̱ ne aꞌneꞌ rá nij soꞌ ga̱ snana̱ Yaꞌanj maꞌ ―taj Jesús rihaan nij síí tucuꞌyón snana̱ soꞌ a.
Nanó Jesús cuentó cheꞌé agaꞌ yaꞌan a
16Dan me se guun cheꞌe̱ Jesús cataj soꞌ a:
―Nuviꞌ a̱ ꞌó síí achrón yaꞌan raa̱ agaꞌ yaꞌan, ne̱ axríj yuve̱ soꞌ agaꞌ rque xruj do̱ꞌ, rque camá do̱ꞌ maꞌ. Tana̱nj utaꞌ nii agaꞌ yaꞌan rej xta̱ꞌ, ga̱a ne̱ chugu̱u̱n yoꞌ rihaan cunuda̱nj nij síí atúj rá veꞌ ado̱nj. 17Dan me se vaa nana̱ cu̱u yuve̱ cuano̱, tza̱j ne̱ vaa güii quiꞌya̱j Yaꞌanj se vaa queneꞌe̱n yuvii̱ nana̱ yoꞌ a. Vaa nana̱ aráán rihaan soj cuano̱, tza̱j ne̱ vaa güii ti̱haa̱n Yaꞌanj nana̱ yoꞌ a.
18’Cheꞌé dan nuchru̱j ra̱a̱ soj nana̱ caꞌmij nihánj á. ꞌO̱ se síí nariꞌ nda̱a vaa me raj cata̱a nana̱ roꞌ, doj a̱ nari̱ꞌ uún soꞌ quiꞌya̱j Yaꞌanj na̱nj ado̱nj. Ne̱ síí naꞌvej rá nari̱ꞌ sa̱ꞌ nda̱a vaa me raj cata̱a nana̱ roꞌ, tana̱nj caꞌne̱e̱ Yaꞌanj do̱j snana̱ Yaꞌanj a̱j nariꞌ soꞌ rá soꞌ, ne̱ quina̱j u̱u̱n soꞌ na̱nj ado̱nj ―taj Jesús rihaan nij soꞌ a.
Ase vaa nii Jesús do̱ꞌ, ase vaa tinúú Jesús do̱ꞌ, vaa nij síí uno snana̱ Yaꞌanj a
19Dan me se cuchiꞌ nii Jesús cuchiꞌ nij tinúú Jesús cuchiꞌ nda̱a rej va̱j Jesús, tza̱j ne̱ ne caꞌve̱e nichru̱nꞌ nij soꞌ rihaan Jesús, cheꞌé se nda̱a xraan maꞌa̱n mán nij yuvii̱ ri̱i̱ a. 20Ne̱ cataj ꞌo̱ soꞌ rihaan Jesús a:
―Nicu̱nꞌ nií so̱ꞌ ga̱ nij tinúú so̱ꞌ xeꞌ, ne̱ me rá nij soꞌ queneꞌe̱n nij soꞌ mán so̱ꞌ na̱nj á ―taj soꞌ, cataj xnaꞌanj soꞌ rihaan Jesús a.
21Tza̱j ne̱ cataj Jesús rihaan nij yuvii̱ a:
―Ase vaa nií ꞌu̱nj do̱ꞌ, ase vaa tinúú ꞌu̱nj do̱ꞌ, vaa nij síí nihánj ado̱nj. ꞌO̱ se nanó xre̱j nij soꞌ snana̱ Yaꞌanj, ne̱ ꞌyaj nij soꞌ nda̱a vaa taj nana̱ yoꞌ ado̱nj ―taj Jesús rihaan nij yuvii̱ a.
Caꞌneꞌ Jesús suun rihaan na do̱ꞌ, rihaan nana̱ do̱ꞌ, se vaa canicu̱nꞌ yoꞌ a
22Dan me se ꞌo̱ güii catúj Jesús rque ꞌo̱ rihoo chéé rihaan na ga̱ cunuda̱nj nij síí tucuꞌyón snana̱ soꞌ, ne̱ cataj Jesús rihaan nij soꞌ se vaa caꞌa̱nj cunuda̱nj nij soꞌ nda̱a ꞌó níchrej tuꞌva na laguaná a. Ga̱a ne̱ guun cheꞌe̱ rihoo chéé rihoo rihaan na, quiꞌyaj nij soꞌ a. 23Do̱j caꞌanj rihoo, ne̱ cotoj Jesús a. Cachén ꞌo̱ orá nii, ga̱a ne̱ guun cheꞌe̱ nana̱ yuva̱a̱ cavii uxrá yoꞌ goꞌ ndoꞌo yoꞌ rihaan na, ne̱ dan me se catúj ndoꞌo na rque rihoo, ne̱ da̱j doj caꞌa̱nj ni̱j rihoo rque na a. 24Ga̱a ne̱ caꞌanj nari̱i̱ nij síí tucuꞌyón snana̱ Jesús nej rihaan soꞌ, ne̱ cataj nij soꞌ a:
―Da̱j doj cavi̱ꞌ níꞌ, na̱nj maestro ―taj nij soꞌ rihaan Jesús a.
Ga̱a ne̱ canicunꞌ caya̱ soꞌ, ne̱ nucua̱j caꞌmii soꞌ rihaan nana̱ do̱ꞌ, rihaan na do̱ꞌ a. Ga̱a ne̱ canicunꞌ nana̱ canicunꞌ na do̱ꞌ, ne̱ cunuu dínj rihaan na laguaná yoꞌ, quiꞌyaj Jesús na̱nj ado̱nj. 25Ga̱a ne̱ xnáꞌanj Jesús man nij síí tucuꞌyón snana̱ soꞌ, cataj soꞌ a:
―Me cheꞌé ne amán rá soj niꞌya̱j soj man Yaꞌanj ga̱ ―taj soꞌ rihaan nij soꞌ a.
Tza̱j ne̱ caꞌanj rá nij soꞌ, ne̱ cuchuꞌviꞌ nij soꞌ, ne̱ cataj nij soꞌ rihaan tuviꞌ nij soꞌ a:
―Da̱j si̱j me síí nihánj ga̱. Nda̱a rihaan nana̱ do̱ꞌ, nda̱a rihaan na do̱ꞌ, aꞌneꞌ soꞌ suun, ne̱ uno ro̱j yoꞌ aꞌmii soꞌ asunj ―taj nij soꞌ rihaan tuviꞌ nij soꞌ a.
Quirii Jesús man queꞌe̱e̱ nana̱ chre̱e nimán ꞌo̱ snóꞌo a
26Dan me se guun ga̱nꞌ rihoo nu̱u̱ Jesús ga̱ estadó Galilea, ne̱ caꞌanj yoꞌ nda̱a níchrej tuꞌva na laguaná yoꞌ, nda̱a rej ya̱nj nij síí “gadareno” a. 27Cuchiꞌ nij soꞌ yoꞌóó yoꞌ, ne̱ nanij Jesús rihoo, ga̱a ne̱ nariꞌ tuviꞌ soꞌ ga̱ ꞌo̱ síí chiha̱nj chumanꞌ yoꞌ, ne̱ soꞌ me síí nu̱u̱ nana̱ chre̱e nimán, ne̱ taj yatzíj nu̱u̱ soꞌ do̱ꞌ, naꞌvej rá soꞌ ca̱yáán soꞌ veꞌ tucuá soꞌ do̱ꞌ, tana̱nj ina̱nj rihaan santó yáán soꞌ a. 28-29Dan me se caꞌneꞌ Jesús suun rihaan nana̱ chre̱e se vaa cu̱riha̱nj nana̱ chre̱e nimán soꞌ a. ꞌO̱ se quisíj queꞌe̱e̱ canó nana̱ chre̱e man soꞌ a. Dan me se nda̱a agaꞌ ne̱ꞌ numíj nii raꞌa soꞌ do̱ꞌ, tacóó soꞌ do̱ꞌ, tza̱j ne̱ xuun soꞌ, ne̱ xꞌneꞌ yoꞌ, quiꞌyaj soꞌ, ga̱a ne̱ nica̱j nana̱ chre̱e man soꞌ caꞌanj nij soꞌ tacaan naco̱o̱ na̱nj ado̱nj. Dan me se ga̱a queneꞌen soꞌ man Jesús, ne̱ caguáj soꞌ, ne̱ quinij ru̱j soꞌ rihaan Jesús, ne̱ nucua̱j caꞌmii soꞌ, cataj soꞌ a:
―Veé neꞌén ꞌu̱nj se vaa Taꞌni̱j Yaꞌanj Si̱j Uun Chij Doj mé so̱ꞌ, Jesús. Me cheꞌé ꞌnáꞌ so̱ꞌ rej ya̱nj ꞌu̱nj ga̱. Rqueé ꞌu̱nj mán so̱ꞌ se vaa se̱ quiꞌyáá so̱ꞌ sayuun manj maꞌ ―taj soꞌ rihaan Jesús a.
30Ga̱a ne̱ xnáꞌanj Jesús man nana̱ chre̱e yoꞌ, cataj soꞌ a:
―Da̱j cuꞌna̱j so̱ꞌ ga̱ ―taj Jesús, xnáꞌanj soꞌ man nana̱ chre̱e a.
Ne̱ dan me se cataj nana̱ chre̱e yoꞌ a:
―Xꞌneꞌ noco̱o cuꞌna̱j núj á ―taj soꞌ cheꞌé se a̱j catúj queꞌe̱e̱ ndoꞌo nij soꞌ nimán snóꞌo yoꞌ a.
31Ga̱a ne̱ rquee̱ ndoꞌo nij nana̱ chre̱e rihaan Jesús se̱ gaa na̱nj caꞌne̱j soꞌ man nij soꞌ rej cunu̱u̱ rej nu̱u̱ yaꞌan a.
32Ne̱ dan me se chéé ꞌo̱ xꞌneꞌ noco̱o xcáá rej tacaan rej yoꞌ, chá nij xoꞌ coj, ne̱ dan me se cachíín niꞌya̱j nij nana̱ chre̱e rihaan Jesús se vaa caꞌve̱j rá Jesús catu̱u̱ nij soꞌ nimán xcáá a. Ne̱ caꞌvej rá Jesús quiꞌya̱j nij soꞌ da̱nj a. 33Cheꞌé dan me curiha̱nj nij nana̱ chre̱e nimán snóꞌo, ne̱ catúj nij soꞌ nimán xcáá a. Dan me se ruva̱a̱ uxrá tacaan nicu̱nꞌ tuꞌva na laguaná rej va̱j nij xcáá yoꞌ, ga̱a ne̱ cunánj ndoꞌo nij xoꞌ, ne̱ veé da̱nj vaj nij xoꞌ, ne̱ quinij nij xoꞌ rque na, ne̱ canó xráá nij xoꞌ na̱nj ado̱nj.
34Dan me se queneꞌen nij síí tumé xcáá se vaa guun, ga̱a ne̱ cunánj nij soꞌ ne̱ cataj xnaꞌanj nij soꞌ rihaan nij yuvii̱ ma̱n chumanꞌ do̱ꞌ, rihaan nij yuvii̱ ma̱n tacaan do̱ꞌ a. 35Ga̱a ne̱ caꞌnaꞌ ni̱ꞌyaj nij yuvii̱ se vaa guun, ga̱a ne̱ caꞌnaꞌ nij soꞌ rej nicu̱nꞌ Jesús, ga̱a ne̱ queneꞌen nij soꞌ man síí curiha̱nj nana̱ chre̱e nimán a. A̱j nanuû soꞌ saga̱nꞌ soꞌ, ne̱ dínj ne soꞌ rihaan Jesús a. Ne̱ a̱j tiꞌinj se snúú soꞌ, ne̱ nuu sa̱ꞌ soꞌ a. Ga̱a ne̱ cuchuꞌviꞌ ndoꞌo nij yuvii̱ se vaa quiꞌyaj Jesús a. 36Ga̱a ne̱ cataj xnaꞌanj nij síí queneꞌen rihaan nij yuvii̱ da̱j quiꞌyaj Jesús ne̱ nahuun sa̱ꞌ síí nu̱u̱ nana̱ chre̱e nimán a.
37Cheꞌé dan cuchuꞌviꞌ ndoꞌo nij síí ma̱n chumanꞌ Gadara ga̱ ꞌó nij chumanꞌ na̱j nu̱ꞌ anica̱j rej yoꞌ, ne̱ cheꞌé dan rquee̱ ta̱ranꞌ nij soꞌ rihaan Jesús se vaa caꞌa̱nj yaníj Jesús rihaan nij soꞌ a. Dan me se catúj Jesús rque rihoo, ne̱ guun cheꞌe̱ soꞌ canica̱j soꞌ caꞌa̱nj soꞌ a. 38Ga̱a ne̱ rquee̱ síí nahuun sa̱ꞌ rihaan Jesús se vaa caꞌve̱j rá Jesús caꞌa̱nj soꞌ ga̱ Jesús, tza̱j ne̱ ne caꞌve̱j rá Jesús maꞌ. Ga̱a ne̱ cataj Jesús a:
39―Ca̱nica̱j so̱ꞌ nánꞌ so̱ꞌ tucuá so̱ꞌ, ne̱ cata̱j xnaꞌanj so̱ꞌ rihaan tuvíꞌ so̱ꞌ cheꞌé se sa̱ꞌ ndoꞌo quiꞌyaj Yaꞌanj cheꞌé so̱ꞌ á ―taj Jesús rihaan soꞌ a.
Ga̱a ne̱ canica̱j síí nahuun sa̱ꞌ yoꞌ quinanꞌ soꞌ, ne̱ caꞌmii natáj soꞌ rihaan ta̱ranꞌ nij yuvii̱ ya̱nj chumanꞌ yoꞌ cheꞌé se sa̱ꞌ quiꞌyaj Jesús ga̱ soꞌ a.
Nahuun sa̱ꞌ ꞌo̱ chala̱ cunii do̱ꞌ, ꞌo̱ chana̱ chij do̱ꞌ, quiꞌyaj Jesús a
40Nanica̱j Jesús, namán uún soꞌ tuꞌva na laguaná a. Ga̱a ne̱ ma̱n ndoꞌo yuvii̱ naꞌvi̱j man soꞌ, ne̱ guun niha̱ꞌ rá nij yuvii̱ se vaa namán uún soꞌ a. 41Ga̱a ne̱ dan me se caꞌnaꞌ ꞌo̱ soꞌ rihaan Jesús, ne̱ Jairo cuꞌna̱j soꞌ, ne̱ soꞌ me síí ꞌni̱j raꞌa ꞌo̱ veꞌ tucuꞌyón nij yuvii̱ israelitá stucua̱nj Moisés, ne̱ dan me se cayáán ru̱j soꞌ rihaan Jesús, ne̱ rquee̱ soꞌ rihaan Jesús se vaa caꞌa̱nj Jesús tucuá soꞌ a. 42Ne̱ o̱rúnꞌ ra̱a̱ taꞌnij cha̱na̱ soꞌ chala̱ cunii va̱j chuvi̱j yoꞌ ta̱ꞌ asuun, tza̱j ne̱ ranꞌ ndoꞌo noꞌ, ne̱ da̱j doj cavi̱ꞌ noꞌ, ne̱ cheꞌé dan guun rá soꞌ caꞌa̱nj Jesús tucuá soꞌ a.
Veé dan me caꞌanj Jesús ga̱ soꞌ, ne̱ caꞌanj ndoꞌo yuvii̱ ga̱ soꞌ, ne̱ nda̱a xraan maꞌa̱n chrej va̱j yuvii̱ ga̱ soꞌ a.
43Dan me se scaꞌnúj nij soꞌ vaj ꞌo̱ chana̱ ranꞌ ndoꞌo, ne̱ quisíj chuvi̱j ya̱ yoꞌ xraꞌ ton man noꞌ, tza̱j ne̱ taj va̱j a̱ ꞌó síí guun nucua̱j quiꞌyaj nahuun sa̱ꞌ noꞌ maꞌ. 44Dan me se nichrunꞌ noꞌ rej xco̱ Jesús, ne̱ canó raꞌa noꞌ do̱j tuꞌva saga̱nꞌ soꞌ a. Dan me se nu̱ꞌ canó raꞌa noꞌ tuꞌva saga̱nꞌ soꞌ, ne̱ nu̱ꞌ canicunꞌ xraꞌ ton man noꞌ na̱nj ado̱nj.
45Ga̱a ne̱ xnáꞌanj Jesús se vaa me síí canó raꞌa man soꞌ, tza̱j ne̱ a̱ ꞌó nij yuvii̱ ne cano̱ raꞌa man soꞌ maꞌ, taj nu̱ꞌ nij yuvii̱ a. Ga̱a ne̱ cataj Pedró rihaan Jesús a:
―Ma̱an cheꞌé se xraan va̱j nij yuvii̱, ne̱ canó rmaꞌa̱n raꞌa ꞌo̱ soꞌ mán so̱ꞌ, maestro ―taj Pedró rihaan Jesús a.
46Tza̱j ne̱ cataj Jesús rihaan soꞌ a:
―Vaa ꞌo̱ yuvii̱ canó raꞌa mán ꞌu̱nj ado̱nj. Neꞌenj se vaa nahuun yuvii̱ quiꞌyaj se‑nu̱cuáj ado̱nj ―taj Jesús rihaan soꞌ a.
47Ga̱a ne̱ xcaj chana̱ cuentá se vaa queneꞌen Jesús se vaa quiꞌyaj noꞌ, ga̱a ne̱ riꞌíj man noꞌ, ne̱ caꞌnaꞌ noꞌ, ne̱ cayáán ru̱j noꞌ rihaan soꞌ a. Ga̱a ne̱ cataj xnaꞌanj noꞌ rihaan nu̱ꞌ nij yuvii̱ se vaa ma̱an se canó raꞌa noꞌ man Jesús, ne̱ nu̱ꞌ ma̱an orá dan nahuun sa̱ꞌ noꞌ ne̱ canicunꞌ se xraꞌ ton man noꞌ, taj noꞌ a. 48Ga̱a ne̱ cataj Jesús rihaan noꞌ a:
―Nahuún so̱ꞌ cheꞌé se amán rá so̱ꞌ niꞌya̱j so̱ꞌ manj, nocoj. Veꞌé caꞌa̱nj so̱ꞌ, ne̱ dínj ga̱a̱ nimán so̱ꞌ á ―taj Jesús rihaan noꞌ a.
49Ataa navi̱j caꞌmi̱i̱ Jesús, ne̱ caꞌnaꞌ ꞌo̱ síí cavii tucuá Jairo, ne̱ cataj soꞌ rihaan Jairo a:
―A̱j caviꞌ taꞌnij cha̱na̱ so̱ꞌ, ne̱ taj cheꞌé cara̱a̱ chrúú so̱ꞌ rihaan maestró a̱ maꞌ ―taj síí ꞌnaꞌ cataj xnaꞌanj rihaan Jairo a.
50Dan me se cuno Jesús nana̱ caꞌmii síí caꞌnaꞌ, ga̱a ne̱ cataj soꞌ rihaan Jairo a:
―Se̱ cuchuꞌvíꞌ so̱ꞌ maꞌ. Ma̱an se cuchuma̱n ya̱ rá so̱ꞌ ni̱ꞌyaj so̱ꞌ manj, ne̱ nahu̱un taꞌnij cha̱na̱ so̱ꞌ na̱nj ado̱nj ―taj Jesús rihaan soꞌ a.
51Dan me se cuchiꞌ Jesús tucuá Jairo, ne̱ ne caꞌve̱j Jesús catu̱u̱ nij yuvii̱ rá veꞌ ga̱ soꞌ maꞌ. Ma̱an Pedró do̱ꞌ, Juan do̱ꞌ, Jacobo do̱ꞌ, ro̱j ni̱ca̱ Jairo do̱ꞌ, caꞌvej soꞌ catu̱u̱ rá veꞌ ga̱ soꞌ a. 52Dan me se taꞌvee ndoꞌo nij síí cunuu chre̱ꞌ rá veꞌ cheꞌé chala̱ cunii caviꞌ, ne̱ nanó uxrá rá nij soꞌ, ne̱ goꞌ nij soꞌ cuxruꞌ rucua̱a̱ nij soꞌ a. Tza̱j ne̱ cataj Jesús rihaan nij soꞌ a:
―Se̱ taꞌvee soj maꞌ. ꞌO̱ se ne cavi̱ꞌ noꞌ maꞌ. Ma̱an se otoj u̱u̱n noꞌ na̱nj á ―taj Jesús rihaan nij soꞌ a.
53Ga̱a ne̱ caꞌngaꞌ naco̱o̱ nij soꞌ niꞌya̱j nij soꞌ man Jesús cheꞌé se a̱j queneꞌen nij soꞌ se vaa a̱j caviꞌ ya̱ noꞌ a. 54Tza̱j ne̱ taꞌaa Jesús raꞌa noꞌ, ne̱ nacúún soꞌ man noꞌ, cataj soꞌ a:
―Na̱xaga̱a̱ so̱ꞌ, chala̱ cunii ―taj soꞌ rihaan noꞌ a.
55Ne̱ cunuu iꞌna̱ꞌ uún noꞌ, ga̱a ne̱ nu̱ꞌ naxaga̱a̱ noꞌ, ne̱ nu̱ꞌ caꞌneꞌ Jesús suun rihaan ro̱j ni̱ca̱ Jairo se vaa rque̱ ro̱j soꞌ do̱j se chá cha̱ chala̱ cunii a.
56Dan me se caꞌanj rá ro̱j soꞌ se vaa quiꞌyaj Jesús, ga̱a ne̱ cataj Jesús rihaan ro̱j soꞌ se vaa rihaan a̱ ꞌó yuvii̱ se̱ cataj xnaꞌanj ro̱j ni̱ca̱ ro̱j soꞌ da̱j quiꞌyaj Jesús cheꞌé chala̱ cunii maꞌ.
Currently Selected:
San Lucas 8: trc
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. 2024 segunda versión electrónica