SAN MARCOS 9
9
1Te suni ni cahān yā jiín de jíjnáhan de:
Jendaá cahán rī jiín ró jeē sava tēe cáhīin yāhá, ma cúū de chi nde cuni de jeē ndácu Yaā Dios jniñu jíín poder yā, achí yá.
Jeē tucu ni nduu ya
(Mt. 17.1‑13; Lc. 9.28‑36)
2Yūcuán na te nuū iñú quɨvɨ̄ te Jesús ni jeca ya Pedro jiín Jacobo jiín Juan, cuahān sɨ́ɨn ya jiín de ɨɨn yucu súcún. Te yūcuán, tucu ni nduu ya nuū de. 3Te sahma ya ni ndindēé, te ni nducuíjín quɨyɨ, nájnūhun yuhvā volcán. Te tú ni ɨɨn ñayuu ñayɨ̄vɨ yáha cuu nacate jeē ndúquɨyɨ ndasɨ́ súcuan. 4Te ni cajito de jeē Elías jiín Moisés cándajnūhún de jíín yá. 5Yūcuán na te ni cahān Pedro jiín Jesús:
Maestro, nacā jeē váha jeē cáhīin na yáha. Te na sáha ná únī vehe ramada, ɨɨn cuu máá ní, ɨnga cuu Moisés, te ɨnga cuu Elías, achí de.
6Chi yōhyo ni cayūhu tée cáscuáha ún, te Pedro tu ní sáha de cuenta na vé cúu jeē cahán de. 7Te ni quiji vicō nūhun ní jesɨ‑ni nuū de. Te nuū vicó un ní cahān ɨɨn jnūhun:
Yāha cúu Sēhe ri jeē maní ndasɨ́ rí jiín. Te na cúni nahín ró jnūhun cáhán yā. Achí.
8Te ni candacoto‑ni de, te tuá tēe un ní cájito de, chi máá ɨɨn na Jesús.
9Te ni cananuu de jíín yá yucu ún. Te ni ndacu nīhin ya jniñu nuū de jeē ma cáchi de nuū ní ɨɨn jeē súcuan ni cajito de, chi nde na nátecu maá yá, Yaā ní nduu tēe, áchí yá. 10Jeē yúcuan ní cachuvāha de tāca jéē ní cuu ún, te cácajnūhun jnáhan de na jnūhun cúu jeē nátecu yā. 11Te ni cacajnūhún de ya:
Te tēe cástéén tutu ley Yaā Dios, ¿najehē cácahān de jeē cánuú ndiji Elías xīhna gā, te sáá te quiji Yaā cúu Cristo? achí de.
12Te ni cahān yā:
Jendaá cúu jeē xíhna gā quiji ɨɨn tēe cúu nájnūhun Elías, te sátūhva de ndɨhɨ, áchí tutu. ¿Te ndese cáhán tucu tutu iī sɨquɨ̄ ruhū, Yaā ní nduu tēe? Cáhán jeē ndoho xeēn rī, te sájéē ni i nuū rī. 13Te cáhán rī jiín ró jeē jé ni quiji tēe ni cuu nájnūhun Elías, te ni casáha ndevāha ñayuu jiín de tāca jéē ní cacuu ni maá i, nájnūhun cáhán jnūhun de nuū tútu, áchí yá.
Jeē ní nasávāha ya ɨɨn sūchi ñúhun tachī ini
(Mt. 17.14‑21; Lc. 9.37‑43)
14Te ni najinū yā jiín de nuū sava ga tēe cáscuáha jíín yá, te ni cajito ya ñayuu cuehē ndasɨ́, ni cajicó ndúū i de. Te suni cáhīin tēe cástéén tutu ley Yaā Dios, cátejnáhan jíín de. 15Te nuū ní cajito tāca ñáyuu un jéē véji ya, te ni canaa ni i. Te cájinu i cuangoo i nuū yā jeē cahān i jíín yá. 16Te ni cajnūhun yá i:
¿Na sɨquɨ̄ cátejnáhan ró jíín de jíjnáhan de? áchí yá.
17Te ni cahān ɨɨn tēe íne yūcuán:
Maestro, vendeca ná séhe ná núū ní, chi ñúhun ɨɨn tachī ini i, te ni cuñɨ́hɨ́n i ni sáha. 18Te ndé-ni cúu nuū íne i, te tachī un scótúú i, te jéhni yɨ̄hɨ́‑ni i. Te jée tiñū yuhu i, te squɨ́hñɨ jnúhun i. Te cuacuxií ndasɨ́ i sáha. Te ni cahān ndahú ná jiín tée cáscuáha jíín ní jeē na quénehen de tachī ún, te tu ní cúu sáha de, áchí de.
19Te ni cahān yā jiín de jíjnáhan de:
Ñayuu tu cándíje cuɨtɨ cácuu ró. ¿Nasaa ga quɨvɨ̄ condee rī jiín ró? ¿Te nasaa ga quɨvɨ̄ cuandeyɨ́ ni rī jiín ró? Cuáquihin sūchí un, na quíji i, áchí yá.
20Te ni caquindeca de i nuū yā. Te nuū ní jito tachī un núū yā, te ni jehni yɨ̄hɨ́‑ni i. Te ni cotúú i, te cónéhén cócáni i, te jée tiñū yuhu i. 21Te Jesús ni cajnūhun yá tatá i:
¿Nasaa cuiyā ni cuu jeē sáha súcuan jíín i?
Te ni cahān de:
Nde lulí i. 22Te ni cuu cuehē jínu scótúú táchī ún i nuū ñuhún nuū ndúte, jeē cáhni i cúní. Te núu cuu sáha ní, te cundáhú ni ní chindéé ñáhán ní sāña jéē ndúvāha sēhe ná, áchí de.
23Te ni cahān Jesús jiín de:
Núu cuu candíje ró jéē sáha ri, chi ñayuu candíje te cuu tāca jéē cuní i, áchí yá.
24Te máá tátá sūchí un ní cahān jee de:
Cándíje ná, te chindéé ñáhán ní sāña jéē candíje nīhin ga ná, áchí de.
25Te ni jito Jesús jeē ní cutútú cuéhē ñayuu nuū yā. Te ni cahān yā nuū tachí:
Tachī jeē sañɨ́hɨ́n sásóhó, ruhū ndácu ri jniñu jeē na quénda ró ini sūchi yáha, te ma ndɨ́vɨ ga rō ini i, áchí yá.
26Yūcuán na te ni cana cóhó táchī ún, te ni jehni yɨ̄hɨ́ tucu i, te ni quenda cuahān. Te sūchí un ní cuu i nájnūhun ndɨ̄yɨ. Te ni cacahān cuehē ñayuu jeē jé ni jihī i. 27Te Jesús ni jnɨɨ ya ndaha i, te ni ndonehen ya i, te ni nucuɨñɨ̄‑ni i.
28Yūcuán na te ni quɨ̄vɨ ya ini ɨɨn vehe, te tēe cáscuáha jíín yá, ni cacajnūhun sɨ́ɨn de ya:
¿Najehē tu ní cúu quenehen ná tachī un jíjnáhan ná? áchí de.
29Te ni cahān yā:
Ɨɨn tachī súcuan chi ma quénda cuɨtɨ te núu tú cacān tahú rō te coo ndite ni rō, achí yá.
Jeē ni cáhān tucu ya jeē cúū yā
(Mt. 17.22‑23; Lc. 9.43‑45)
30Te ni quenda ya yūcuan jíín de jíjnáhan de, te ni yāha ya ndañúū Galilea cuahān yā. Te tu ní cúní yā jeē cúni ni ɨɨn ñayuu. 31Chi stéén yā nuū tée cáscuáha jíín yá, te áchí yá:
Máá rí, Yaā ní nduu tēe, nastúu i ruhū nuū tāca tée xeēn. Te cahni de ruhū, te núu ni jihī rī, te nuū uní quɨvɨ̄ te natecu rī, achí yá.
32Te tu ní cájecūhun ni de jnūhun yáha, te cáyūhú de cajnūhún de ya sɨquɨ̄ jnúhun ni cahān yā.
Ndé ñáyuu cúu jeē cujéhnu ga
(Mt. 18.1‑5; Lc. 9.46‑48)
33Te ni jinū yā jiín de ñuu Capernaum, te nuū ni quɨ́vɨ ya ini vehe, te ni cajnūhun yá de:
¿Na jnūhun ni candajnūhun ró ichi véji yó? áchí yá.
34Te tu ní cácahān cuɨtɨ de, chi ichi un ní cacahān de sɨquɨ̄ núu ndé ɨɨn de cújéhnu ga. 35Yūcuán na te ni cucōo ya, te ni cana ya ndɨhúxí uū de, te ni cahān yā:
Núu ndé ɨɨn ró cúní cujéhnu ga, na cúu ró tée núu ga nuū tāca jnáhan ró, te cuajníñu ró núū jnáhan ró.
36Yūcuán na te ni jnɨɨ ya ndaha ɨɨn sūchi lúlí, te ni jeni ya i mēhñú de jíjnáhan de. Te ni nundee yā i, te ni cahān yā jiín de:
37Na‑ni ñayuu núu jeē sɨquɨ́ ruhū jetáhú i ɨɨn sūchi lúlí nájnūhun sūchi yáha, te ruhū jetáhú i. Te ñayuu jetáhú rúhū, nasūu máá ɨɨn‑ni ruhū, chi suni Yaā ní tají rúhū jetáhú i, áchí yá.
Ñayuu tu cáhán sɨquɨ̄ yā, íin i jíín yá
(Mt. 10.42; Lc. 9.49‑50)
38Yūcuán na te ni cahān Juan jiín yá:
Maestro, ni cajito ná ɨɨn tēe jeē jiín sɨ́hvɨ́ ní quénehen de tachī ini ñayuu. Te ni cajesɨ ná jéē sáha de, chi tu jíca de jíín yó, achí de.
39Te ni cahān Jesús jiín de:
Ma cásɨ rō jeē sáha de. Chi ni ɨɨn tēe jeē jiín sɨ́hvɨ́ rí sáha de jniñu jéhnu, ma cúu nacahān de sɨquɨ̄ rī. 40Chi tēe tu cáhán sɨquɨ̄ yō, íin de jíín yó. 41Te na‑ni ñayuu núu jeē sɨquɨ́ ruhū cuāha i vēsú ɨɨn ñajin ndute coho ró, sɨquɨ̄ jeē cácandíje ró ruhū, ndaā ndije cúu jeē nihín i tahū i. Achí yá.
Xeēn coo sɨquɨ̄ ñáyuu quɨ́vɨ nuū cuéchi
(Mt. 18.6‑9; Lc. 17.1‑2)
42’Te núu ɨɨn sūchi lúlí yáha cándíje i ruhū, te núu quɨ̄vɨ i cuēchi sáha na‑ni ñayuu, te vāha ga núu ni conuhnī ɨɨn yōso cáhnu sucūn ñayuu ún, te quēe i chīji ndute mar nuú. 43Te núu ndaha ró sáha jeē quɨ́vɨ ró cuéchi, vāha ga cahnde rō na quíhín, návāha tuá sáha ró cuéchi. Chi vāha ga jeē cóndee ɨɨn‑ni ndaha ró te quɨ̄vɨ ró núū cotecu rō nɨɨ́ cáni, vēsú jeē cóndee ndɨndúú ndaha ró te quɨ̄vɨ ró infierno, nuū cayú ñuhūn jeē ma ndahvá cuɨtɨ. 44Te yūcuán chi tu cájihī tɨndacú, te tu ndáhvá cuɨtɨ ñuhūn. 45Te núu jehē rō sáha jeē quɨ́vɨ ró cuéchi, suni vāha ga cahnde rō na quíhín, návāha tuá sáha ró cuéchi. Chi vāha ga jeē cóo cúhndu ró te quɨ̄vɨ ró núū cotecu rō nɨɨ́ cáni, vēsú jeē cóndee ndɨndúú jehē rō te quɨ̄vɨ ró infierno, nuū cayú ñuhūn jeē ma ndahvá cuɨtɨ. 46Te yūcuán chi tu cájihī tɨndacú, te tu ndáhvá cuɨtɨ ñuhūn. 47Te núu tɨnūu ró sáha jeē quɨ́vɨ ró cuéchi, vāha ga tava ró na quíhín, návāha tuá sáha ró cuéchi. Chi vāha ga jeē quɨ́vɨ ró ñuu nuū ndácu Yaā Dios jniñu jíín ɨɨn na tɨnūu ró, vēsú jeē cóndee ndɨndúú tɨnūu ró te quɨ̄vɨ ró infierno. 48Te yūcuán chi tu cájihī tɨndacú, te tu ndáhvá cuɨtɨ ñuhūn.
49’Chi nájnūhun quénda vāha oro sáha ñuhūn, súcuan quénda vāha ñayuu sáha jnūndóho. Te tāca cúñu jeē socó ñayuu nuū yā, cúhuhvuā sáha ñɨɨ̄. 50Vāha íyó ñɨ́ɨ̄, te núu ñɨɨ̄ ún na náā jeē uhvuá, ¿te ndese nduu uhvuā tucu sáha ró? Núu súcuan te cuu ró ñáyuu váha, nájnūhun íyó váha ñɨɨ̄. Te na cóyūcu váha ró jíín jnáhan ró. Achí yá jiín de.
Sɨquɨ̄ jeē ma stóo jnáhan tēe jíín ñahan
(Mt. 19.1‑12; Lc. 16.18)
Currently Selected:
SAN MARCOS 9: mibDBL
Highlight
Share
Copy
Want to have your highlights saved across all your devices? Sign up or sign in
© 1973, Wycliffe Bible Translators, Inc. All rights reserved.