 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

ࢡَاوٛ مَنْ، عِيسَى دِلِّ غَطَ وٜىٰندُ غَلِيلِ، وِعٜتٜىٰندُ بٛو وٜىٰندُ تِبٜرِيَسْ؞ مٛوࢡْرٜ طُوطْندٜ طٛنّٛ تٛکِّمٛ، نغَمْ يِمْࢡٜ طٛنّٛ ندَارَ کَايٜىٰڢِيجِ طِ عٛطٛنّٛ وَطَ بٜى يَمْطِتِنْغٛ ࢩَوْࢡٜ؞ عِيسَى وَعِّ دٛوْ حٛوسٜىٰرٜ، عٛجٛوطِ تٛنْ بٜى ݠُکَرَعٜنْ مَاکٛ؞ وَکَّتِ ݠَسْکَ ، جُولْدٜ يَحُودُعٜنْ ࢡَدَکٜ؞ عِيسَى ࢡَنغْتِ غِتٜ، يِعِ مٛوࢡْرٜ طُوطْندٜ طٛنْ وَرَ حَا مُوطُمْ؞ عٛوِعِ ڢِلِݠْ‏: «تٛيْ عٜنْ شٛودٛيْتَ ࢩَامْدُ نغَمْ حَا يِمْࢡٜ ࢡٜعٜ ࢩَامَ؟» عٛوِعِ طُمْ نغَمْ ڢٛونْدُغٛ ڢِلِݠْ، نغَمْ عٛعَنْدِ کٛ عٛتَمِّ وَطُغٛ؞ ڢِلِݠْ جَابِمٛ‏: «کٛو تَمْسٜىٰجٜ شٜىٰدٜ شَرْدِ تٜىٰمٜطّٜ طِطِ بٛو کٜعَتَا حَا کٛو مٛيْ مَࢡّٜ حٜࢡَ ࢩَامْدُ سٜطَّ‏!» عَندِرٜ، دٜىٰرْطُ سِمٛنْ ݠِيٜرْ، غٛوتٛ ندٜرْ ݠُکَرَعٜنْ مَاکٛ وِعِمٛ‏: «ندَا، وٛودِ دٜرْکٜىٰجٛ حَا طٛ، عٛوٛودِ تَمْسٜىٰجٜ سَعِيرُورِ جٛوِ عٜ لِطِّ طِطِ، عَمَّا طُمٜ طُمْ نَڢَتَ حَا يِمْࢡٜ طُوطْࢡٜ ࢡٜعٜ؟»
عِيسَى وِعِ‏: «نغٜشّٜ يِمْࢡٜ ࢡٜعٜ ڢُو ࢡٜنجٛوطٛ؞» حُطٛ طُوطْکٛ طٛنّٛ حَا نٛکُّورٜ مَنْ؞ ندٜنْ ࢡٜنجٛوطِ، لِمْغَلْ مَࢡّٜ وَطِ وٛرْࢡٜ بَاکِنْ عُجِنٜ نجٛوٛ؞ عِيسَى حٛوعِ تَمْسٜىٰجٜ غٛ، يٜتِّ اَللَّه، ندٜنْ عٛسٜنْدَنِ طٜ يِمْࢡٜ وٛنْࢡٜ تٛنْ؞ عٛوَطِ نٛنْ بٜى لِطِّ بٛو؞ کٛو مٛيْ حٜࢡِ دٜيْدٜيْ بَنَ عٛيِطِ؞ ندٜ ࢡٜکَارِ، عِيسَى وِعِ ݠُکَرَعٜنْ مُوطُمْ‏: «مٛوࢡْتٜ لُتُّطُمْ مَنْ نغَمْ تَا طُمْ وٛنّٛ؞» ندٜنْ ࢡٜمٛوࢡْتِ لُتُّطُمْ تَمْسٜىٰجٜ جٛوِ طٜ يِمْࢡٜ ࢩَامِنٛ، ࢡٜکٜبِّنِ شِلَاجٜ سَݠّٛ عٜ طِطِ؞
ندٜ يِمْࢡٜ ࢡٜعٜ نغِعِ کَايٜىٰڢِوٛلْ نغٛلْ عِيسَى وَطِ، ࢡٜمبِعِ‏: «ڢَکَتْ غٛرْکٛ عٛو وٛنِ اَلنَّبِيجٛ مٛ تَمِّ وَرْغٛ ندٜرْ دُنِيَارُ‏!» عِيسَى عَنْدِ ࢡٜتَمِّ وَرْغٛ نغَمْ ࢡٜنَنغَ مٛ بٜى سٜمْبٜ، ࢡٜمبَطَ مٛ لَامِيطٛ، عٛدِلِّ دٛوْ حٛوسٜىٰرٜ ڢَحِنْ، کَنغْکٛ ڢٜىٰرٜ مَاکٛ؞


ندٜ حِيرِ، ݠُکَرَعٜنْ عِيسَى ندِيرْتِ دٛوْ ڢٛمٛوندٜ مبٜىٰلَ؞ ࢡٜنَسْتِ کٛومْبٛوَلْ نغَمْ يَحُغٛ کَڢَرْنَحُمْ؞ جٜمَّ جٜنغِ، عِيسَى بٛو وَرَايْ حَا مَࢡّٜ تَوٛنْ؞ ندِيَمْ دِمْبِ مَسِنْ، نغَمْ حٜنْدُ سَاتُندُ طٛنْ وَطَ؞ ندٜ ࢡٜلَاࢩِ کٛومْبٛوَلْ بَاکِنْ کِلٛمٜىٰتِرْ جٛوِ مَلَّ جٛوٜىٰغٛ، ࢡٜنغِعِ عِيسَى طٛنْ ࢡَدِتٛ کٛومْبٛوَلْ، عٛطٛنْ يَحَ دٛوْ ندِيَمْ بٜى کٛسْطٜ، ࢡٜکُلْتٛرِ؞ عَمَّا عِيسَى وِعِ ࢡٜ‏: «تَا کُلْتٛرٜ، طُمْ مِنْ؞» ࢡٜنغِطِنٛ حٛوسُغٛ مٛ ندٜرْ کٛومْبٛوَلْ، عَمَّا لَوْ نغَلْ دُکِّ لٜسْدِ حَا نٛکُّورٜ ندٜ ࢡٜنغِطْنٛ يَحُغٛ؞

جَنغٛ مَنْ، يِمْࢡٜ ندٜرْ مٛوࢡْرٜ غَطَ مبٜىٰلَ غٛ ندَارِ وَلَانٛ کٛومْبٛوَلْ ڢٜىٰرٜ حَا تٛنْ، سٜيْ غٛوتَلْ تَنْ؞ ࢡٜعَنْدِ بٛو عِيسَى نَسْتَايْنٛ نغَلْ بٜى ݠُکَرَعٜنْ مُوطُمْ، ݠُکَرَعٜنْ ڢٜىٰرٜ مُوطُمْعٜنْ نَسْتِ نغَلْ، ندِلِّ؞ عَمَّا کٛومْبٛوجٜ غٛطّٜ عِوِ حَا تِبٜرِيَسْ، نغَرِ حَا نٛکُّورٜ ندٜ جَوْمِرَاوٛ حٛکُّنٛ ࢡٜ تَمْسٜىٰجٜ، ࢡَاوٛ عٛيٜتِّنٛ اَللَّه نغَمْ مَاجٜ؞ ندٜ يِمْࢡٜ مٛوࢡْرٜ نغِعِ عِيسَى وَلَا تٛنْ، کٛو ݠُکَرَعٜنْ مَاکٛ بٛو نغَلَا تٛنْ، ࢡٜنَسْتِ کٛومْبٛوجٜ غٛ، ࢡٜندِلِّ حَا کَڢَرْنَحُمْ نغَمْ ࢡٜتٜڢَ مٛ؞

ࢡٜتَوِ عِيسَى غَطَ مبٜىٰلَ، ࢡٜمبِعِمٛ‏: «مٛودِبّٛ، ندٜيْ نغَرْطَ حَا طٛ؟» عِيسَى جَابِ ࢡٜ‏: «غٛونغَ مِوِعَتَ عٛنْ‏: عٛنْ طٛنْ تٜڢَمِّ نَا نغَمْ عٛنْ نغِعِ کَايٜىٰڢِيجِ طِ مبَطْمِ، عَمَّا نغَمْ عٛنْ ࢩَامِ تَمْسٜىٰجٜ، عٛنْ کَارِ؞ تَا کُووٜ نغَمْ ࢩَامْدُ وٛنّٛتٛوندُ، عَمَّا نغَمْ ࢩَامْدُ تَبِتَنْدُ، حٛکَّنْدُ نغٜىٰندَمْ ندُومِيطَمْ؞ ࢩَامْدُ ندُعُ، ࢡِي-نٜطّٛ حٛکَّتَ عٛنْ ندُ، ڢٛدّٜ بَاوْطٜ طٜ عٛحٜࢡِ حَا اَللَّه بَابِرَاوٛ؞» ندٜنْ ࢡٜࢨَمِمٛ‏: «نٛيْ مِنْ مبَطَتَ حَا مِنْ کُووَ کُوطٜ طٜ اَللَّه يِطِ؟» عِيسَى جَابِ ࢡٜ‏: «کُوغَلْ نغَلْ اَللَّه يِطِ وٛنِ‏: عٛنْ نُطِّنَ مٛ عٛنٜلِ؞» ࢡٜࢨَمِمٛ‏: «کَايٜىٰڢِوٛلْ نغٛلٜ عَوَطَتَ نغَمْ حَا مِنْ نُطِّنٜ؟ کُوغَلْ نغَلٜ عَحُووَتَ؟ کَاکِرَاࢡٜ عَمِنْ ࢩَامِ مَنُّ ندٜرْ لَدّٜ، بَنَ کٛ وِنْدَ‏: عٛحٛکِّ ࢡٜ ࢩَامْدُ عِوْندُ دِغَ عَسَمَ؞» عِيسَى وِعِ ࢡٜ‏: «غٛونغَ مِوِعَتَ عٛنْ، نَا طُمْ مُوسَى حٛکِّ عٛنْ ࢩَامْدُ عِوْندُ دِغَ عَسَمَ، عَمَّا بَابِرَاوٛ عَمْ حٛکَّنْ عٛنْ کٛ وٛنِ ࢩَامْدُ ڢَکَتْ، عِوْندُ دِغَ عَسَمَ؞ نغَمْ ࢩَامْدُ ندُ اَللَّه حٛکَّتَ، کَيْرُ جِݠِّ دِغَ عَسَمَ، کَيْرُ حٛکَّتَ دُنِيَارُ نغٜىٰندَمْ؞» ندٜنْ ࢡٜمبِعِمٛ‏: «جَوْمِرَاوٛ، حٛکُّ مِنْ ࢩَامْدُ ندُعُ ڢٛرٛيْ؞» عِيسَى وِعِ ࢡٜ‏: «مِنْ وٛنِ ࢩَامْدُ ندُ حٛکَّتَ نغٜىٰندَمْ؞ کٛو مٛيْ وَرِ حَا عَمْ، مٜىٰتَتَا مَاتُغٛ دٛلٛ سَمْ؞ کٛو مٛيْ نُطِّنِ يَمْ بٛو، مٜىٰتَتَا طٛمْطُغٛ سَمْ؞ عَمَّا مِ بِعْطٛ عٛنْ طُمْ‏: عٛنْ نغِعِ يَمْ، بٜى نٛنْ ڢُو عٛنْ نُطِّنَايْ؞ مٛ بَابِرَاوٛ حٛکِّ يَمْ ڢُو، وَرَنْ حَا عَمْ؞ کٛو مٛيْ وَرِ حَا عَمْ بٛو، مِوُدِنْتَا مٛ يَاسِ؞ نغَمْ مِجِݠَّاکِ دِغَ عَسَمَ نغَمْ وَطُغٛ کٛ مِيِطِ، عَمَّا کٛ نٜلْطٛ يَمْ يِطِ؞ ندَا کٛ نٜلْطٛ يَمْ يِطِ‏: تَا مِمَجِّنَ کٛو غٛوتٛ ندٜرْ يِمْࢡٜ ࢡٜ عٛ حٛکِّ يَمْ، عَمَّا، مِعُمِّتِنَ ࢡٜ دِغَ مَايْدٜ، ࢩَلَادٜ دَرْنغَلْ؞ ندَا کٛ بَابِرَاوٛ عَمْ يِطِ‏: کٛو مٛيْ يِعِ ࢡِطّٛ ، نُطِّنِمٛ، حٜࢡِ نغٜىٰندَمْ ندُومِيطَمْ، مِعُمِّتِنَنْ مٛ دِغَ مَايْدٜ، ࢩَلَادٜ دَرْنغَلْ؞»
يَحُودُعٜنْ نغُرْنغُرْتِ دٛوْ عِيسَى، نغَمْ عٛوِعْنٛ‏: «مِنْ، مِ ࢩَامْدُ جِݠِّيندُ دِغَ عَسَمَ؞» ࢡٜطٛنّٛ مبِعَ‏: «نَا کَنغْکٛ وٛنِ عِيسَى، ࢡِي يُوسُڢُ مٛ عٜنْ عَنْدِ بَابَ مُمْ عٜ دَادَ مُمْ؟ کَدِ، نٛيْ عٛوِعْرَتَ عٛجِݠِّ دِغَ عَسَمَ؟» عِيسَى جَابِ ࢡٜ‏: «تَا نغُرْنغُرْتٜ حَکُّندٜ مٛوطٛنْ؞ وَلَا مٛ حٜࢡَتَ وَرْغٛ حَا عَمْ، سٛنَا تٛ بَابِرَاوٛ نٜلْطٛ يَمْ ڢٛوطِمٛ؞ کٛو مٛيْ وَرِ حَا عَمْ، مِعُمِّتِنَنْ مٛ ࢩَلَادٜ دَرْنغَلْ؞ اَلنَّبِعٜنْ مبِنْدِ‏: ࢡٜ ڢُو ࢡٜلَاتٛتٛ عٜکِّتِنَاࢡٜ اَللَّه؞ کٛو مٛيْ حٜطِتِ بَابِرَاوٛ، جَࢡِ عٜکِّتِنٛلْ مَاکٛ، وَرَنْ حَا عَمْ؞ طُمْ يِطَا وِعْغٛ، غٛطّٛ مٜىٰطِ يِعُغٛ بَابِرَاوٛ، سٜيْ عِوْطٛ حَا اَللَّه، کَنغْکٛ ڢٜىٰرٜ مَاکٛ يِعِ بَابِرَاوٛ؞
«غٛونغَ مِوِعَتَ عٛنْ‏: کٛو مٛيْ نُطِّنِ، حٜࢡِ نغٜىٰندَمْ ندُومِيطَمْ؞ مِنْ، مِ ࢩَامْدُ حٛکَّنْدُ نغٜىٰندَمْ؞ کَاکِرَاࢡٜ مٛوطٛنْ ࢩَامِ مَنُّ ندٜرْ لَدّٜ، بٜى نٛنْ ڢُو ࢡٜمَايِ؞ عَمَّا کٛو مٛيْ ࢩَامِ ࢩَامْدُ عِوْندُ حَا عَسَمَ، مَايَتَا سَمْ؞ مِنْ، مِ ࢩَامْدُ يٜىٰرُ، جِݠِّيندُ دِغَ عَسَمَ؞ تٛ غٛطّٛ ࢩَامِ ندُ، عٛيٜىٰطَنْ حَا عَبَدَ؞ ࢩَامْدُ ندُ مِحٛکَّتَ مٛ، طُمْ ࢡَنْدُ عَمْ؞ مِحٛکَّنْ ندُ نغَمْ حَا دُنِيَارُ يٜىٰطَ؞»
بٛلّٜ طٜعٜ عُمِّنِ غَابٛتِرَلْ حَکُّندٜ يَحُودُعٜنْ؞ ࢡٜࢨَمْࢨَمْتِرِ‏: «نٛيْ عٛوَاوْرَتَ حٛکُّغٛ عٜنْ ࢡَنْدُ مَاکٛ نغَمْ عٜنْ ࢩَامَ؟» عِيسَى وِعِ ࢡٜ‏: «غٛونغَ مِوِعَتَ عٛنْ‏: تٛ عٛنْ ࢩَامَايْ ࢡَنْدُ ࢡِي-نٜطّٛ ، تٛ عٛنْ نجَرَايْ ࢨِيࢨَمْ مَاکٛ، عٛنْ نغَلَا نغٜىٰندَمْ ندٜرْ مٛوطٛنْ؞ مٛ ࢩَامِ ࢡَنْدُ عَمْ، يَرِ ࢨِيࢨَمْ عَمْ بٛو، حٜࢡِ نغٜىٰندَمْ ندُومِيطَمْ، مِعُمِّتِنَنْ مٛ ࢩَلَادٜ دَرْنغَلْ؞ نغَمْ غٛونغَ، ࢡَنْدُ عَمْ وٛنِ ࢩَامْدُ، ࢨِيࢨَمْ عَمْ بٛو وٛنِ نجَرَمْ؞ کٛو مٛيْ ࢩَامِ ࢡَنْدُ عَمْ، يَرِ ࢨِيࢨَمْ عَمْ بٛو، طٛنْ تَبِتِ ندٜرْ کَوْتَلْ بٜى عَمْ، مِنْ بٛو مِطٛنْ تَبِتِ ندٜرْ کَوْتَلْ بٜى مَاکٛ؞ بَابِرَاوٛ نٜلْطٛ يَمْ، عٛ غٜىٰتٛ، مِطٛنْ يٜىٰطَ نغَمْ دَلِيلَ مَاکٛ؞ بَنَ نٛنْ بٛو کٛو مٛيْ ࢩَامِ ࢡَنْدُ عَمْ، يٜىٰطَنْ نغَمْ دَلِيلَ عَمْ؞ کَنْجُمْ وٛنِ ࢩَامْدُ جِݠِّيندُ دِغَ عَسَمَ؞ ندُ نَنْدَايْ بٜى ندُ کَاکِرَاࢡٜ مٛوطٛنْ ࢩَامْنٛ؞ ࢡٜࢩَامِ طُمْ، ࢡٜمَايِ؞ کٛو مٛيْ ࢩَامِ ࢩَامْدُ ندُعُ، يٜىٰطَنْ حَا عَبَدَ؞» عِيسَى وٛلْوِ بٛلّٜ طٜعٜ سَاعِ عٛطٛنْ عٜکِّتِنَ ندٜرْ سُودُ دٜوَلْ يَحُودُعٜنْ حَا کَڢَرْنَحُمْ؞

طُوطْࢡٜ ندٜرْ ݠُکَرَعٜنْ عِيسَى، ندٜ نَنِ طُمْ، مبِعِ‏: «حَالَ کَ سَاتِ؞ مٛيْ وَاوَتَ جَࢡُغٛ کَ؟» عِيسَى عَنْدِ ݠُکَرَعٜنْ مَاکٛ طٛنْ نغُرْنغُرْتَ دٛوْ مَاجُمْ، عٛوِعِ ࢡٜ‏: «طُمْ لَاتَنَکٜ عٛنْ ڢٜرْغٜرٜ نَ؟ کَدِ نٛيْ تٛ عٛنْ نغِعِ ࢡِي-نٜطّٛ طٛنْ عٜىٰنغَ حَا عٛوٛنّٛ عَرَنْ؟ رُوحُ اَللَّه حٛکَّتَ نغٜىٰندَمْ، ࢡَنْدُ نٜطّٛ نَڢَتَا کٛو طُمٜ؞ بٛلّٜ طٜ مِوٛلْوَنِ عٛنْ، کَنْجٜ نغٛنِ رُوحُ عٜ نغٜىٰندَمْ؞ عَمَّا وٛودِ وٛطْࢡٜ شَکَ مٛوطٛنْ نُطِّنَايْ؞» نغَمْ دِغَ ڢُطَّمْ عِيسَى عَنْدِ ࢡٜيٜ نغٛنِ ࢡٜنُطِّنْتَا مٛ، عٛعَنْدِ زَمْبٛتٛوطٛ مٛ بٛو؞ عٛࢡٜسْدِ وِعُغٛ‏: «نغَمْ مَنْ مبِعْمِ عٛنْ، وَلَا مٛ وَاوَتَ وَرْغٛ حَا عَمْ سٛنَا تٛ بَابِرَاوٛ حٛکِّ يَمْ مٛ؞»
دِغَ سَاعِ مَنْ طُوطْࢡٜ شَکَ ݠُکَرَعٜنْ مَاکٛ عَشِّ يَحْدُغٛ بٜى مَاکٛ؞ ندٜنْ عِيسَى ࢨَمِ ݠُکَرَعٜنْ سَݠّٛ عٜ طِطٛ‏: «نٛيْ عٛنٛنْ بٛو، عٛنْ نغِطَا دِلُّغٛ نَ؟» سِمٛنْ ݠِيٜرْ جَابِمٛ‏: «جَوْمِرَاوٛ، حَا مٛيْ مِنْ نجَحَتَ؟ عَنْ عَوٛودِ بٛلّٜ دٛکَّنْطٜ نغٜىٰندَمْ ندُومِيطَمْ؞ مِنِنْ، مِنْ نُطِّنِ، مِنْ عَنْدِ عَنْ وٛنِ شٜنِيطٛ عِوْطٛ حَا اَللَّه؞» عِيسَى جَابِ ࢡٜ‏: «نَا مِنْ سُࢡِ عٛنْ سَݠّٛ عٜ طِطٛ ڢُو نَ؟ عَمَّا غٛوتٛ مٛوطٛنْ عٛعِبْلِسَ؞» عٛوٛلْوِ طُمْ دٛوْ يَحُودَ ࢡِي سِمٛنْ عِسْکَرِيٛتْ؞ نغَمْ طُمْ کَنغْکٛ، غٛوتٛ ندٜرْ ݠُکَرَعٜنْ سَݠّٛ عٜ طِطٛ زَمْبٛتٛ مٛ؞

Escucha a يُحَنَّ 6