If you would like a copy of this version please contact info@davaraudiobibles.org

Wagri New Testament

तणी वला पवितर आतमा ईसुई हुनी जगा मा लई गई ताकि सेतान हू विने परक किदी जाई हके। साळीस रात नी दाड़ो पुकजो रेवा बाद वणाय कईक पुक लागी। ते वणाय परकवा वालो वणा कनी आजो नी केजू, “अगर तु परमेसवर ने सुरो वे ते अणा पाटा हू केई दे के, या पाटा रूटा बणी जय।”
ईसुई उतर आलजू, “दरम सासतर मा लकजू हे,
“‘मनक बस अणा रूटा हूस जीवतु नीं रे हे,
पण परमेसवर ने मुड़े हू निकलवा वाला हरेक वसन हू जीवतु रे हे।’”
पसे सेतान वणाय परमेसवर ने पवितर नगर यरूसलेम लई गियो नी मनदिर ने फु‌न्गी माते ऊबो किदो, नी ईसु हू केजू, “अगर तु परमेसवर ने सुरो वे, ते आपड़े पोता ने नीसे पाड़ी दे, केमके दरम सासतर मा लकजू हे,
“‘वी तारे बारामा आपड़े हरगदुतो ने हुकम आलहीं,
नी वा तय आतो आत उटावी लीहीं,
ताकि तारे पोगय पाटा हू ठेपर नीं लागे।’”
ईसुई उतर आलजू, “पण दरम सासतर यू बी के हे,
“‘तु आपड़े परबू परमेसवर ने परके नकी।’”
पसे सेतान ईसुई एक मुटा मगरा माते लई गियो। नी दनिया ने हेता राज नी वणनो वेभव पाळजू। सेताने ईसु हू केजू के, “अगर तु मय दणवत करी ते ई हेती सीजी तय आली दई।”
पसे ईसुई वणाहू केजू, “हे सेतान सीटी थाई जा, केमके सासतर मा लकजू हे के,
“‘तु आपड़े परबू परमेसवरेस दणवत कर,
नी विनेस सेवा कर।’”
तेरे सेतान वणा कनी हू जातो रेजो, नी जुओ, हरगदुत आवीनी विने सेवा साकरी करवा लागा।


ईसुई जेरे यू हबलजू के, यूहना हवाडी दिदो गियो हे, ते ईसु गलील परदेस मा जातो रेजो। पण ईसु नासरत सुड़ीनी कफरनहूम नगर मा जी तलाव ने कानी जबूलून नी नपताली ने देस मा जाईनी रेवा लागो। यू तणी थाजू के, परमेसवर ने हाड़े हू बुलवा वाला यसायाय जी केजू वु पुरू थाए,
“जबूलून नी नपताली ने देस,
दरिया वाली वाट माते यरदन नदी ने आतमणी हाड़े,
परमेसवर ने नीं जाणवा वाला ने देस गलील मा।
जी मनका अदारा मा जीवी रेजअ त,
वणय मुटू उजाळू डिटु,
नी जी मोत ने बिक मा जीवी रेजा ता,
वणअ माते उजाळू समकजू।”
वणी वळा हू ईसुई परसार करवू नी यू केवू सरू किदू के, “तमो आपड़े पाप हू मन बदलो, केमके हरग ने राज कनी आवी गियू हे।”


जेरे ईसु गलील ने दरिया ने कनी हू जाई रेजो तो, ते वणाय बे पाई डिटा, समोन जी पतरस केवाए हे नी विने पाई अन्दरियास जी दरिया मा जाळ दड़ी रेजा ता, केमके वा मातली हावा वाला ता। ईसुई वणहू केजू, “मय हाते आवो, ते मुँ तमय हिकाड़ी के, मनका केम परमेसवर ने राज मा लावे।” वणय तरत आपड़े जाळ सुड़ी दिदी नी वणा वाहे थाई गिया।
नी वी विय हू मोरी गियो ते वणाय बे पाई जबदी ने सुरो याकूब नी विने पाई यूहना वा आपड़े बाप जबदी ने हाते नाव माते आपड़े जाळी सई करता थकण डिटा, ईसुई वा बी हादजा। नी वा तरत नाव नी आपड़े बापे सुड़ीनी वणा वाहे थाई गिया।


नी ईसु हेता गलील देस मा फरतो थकण वणा ने परातना घेर मा परसार करतो नी हरग ने राज ने असल खबर हबलावतो नी मनका ने हर तरह ने बिमारी नी कमजोरी सीटी करतो रेजो। नी हेता सीरिया देस मा विने खबर फेलाई गई। तणी मनका हेते बिमारे जिय नानी बिमारजअ हू नी दुक मा हवाईलअ थकण त, नी जणअ मा बुरी आतमा नी उमार आवणा वालअ नी लकुआ ने बिमारे वणा कनी लाजअ नी वणाय वणय होज किदअ। नी गलील, नी दिकापुलिस, नी यरूसलेम, नी यहुदिया नी यरदन नदी ने पेली हाड़े हू पीढ़ वणा वाहे थाई गई।

Escucha a मती 4