Vute - 2007 Edition (Non-Drama - NT)

Vute - 2007 Edition (Drama - NT)

Yésù ɨ́ gà̧à̧nà nɨ̀fuùb noò gɨ̀gàìn, tànànɨ ŋgáb ɨnayâna ɗú ŋgáb yóŋ Mèín ɓe mɨ̀súktéín á. Gɨ̀gàìn kɨ́ á ɨnè: «Kwɨ́í kù no, tɨ́ŋgù̧ú̧ kù yaá ku. Ŋgə́ yi nɨ́ Mèín jə̀ŋnɨ ɗàà, ŋgə́ yɨɨ́mɓwê pénɨ kùb mvɨ̀tí ŋgwéé ɗàà. Mámkwííb kù yaá ɓwê kwɨ́í kɨ́ no. Ŋgə́ yaá gòlɨ́ŋnɨ yɨ́ tɨ́ŋgù̧ú̧ rèè, ŋgə́ a tànà ŋgə́ ɨnè: ‹Àm nɨ́me nò mo ɓi̧ní rè, ténnàhá mɨ.› Ɓwâ lâs, tɨ́ŋgù̧ú̧ rè ya nɨ́ ɗúháwa àm kɨ́ ténnɨ, á ye rè ŋgə́ ta: ‹Mɨ ma á rè Mèín jə̀ŋ, kùb mvɨ̀tí ŋgwéé pə̂r; ɨ́dù mɨ á nɨ̀gwi rè ténnàhánɨ àm no rè, ɓetí ŋgə́ ndóoŋtɨ́ mɨ. Duú u̧ ɗàà, ŋgə́ ɓahá nɨ́ mɨ jábɨ̀lɨ́ŋnɨ á.› » Á Kéké tagi ɨnè: «Óknáɓaye nɨ́m tɨ́ŋgù̧ú̧ ɓáŋhîn ndè nyinndé. Tɨ́ŋgù̧ú̧ rè a tɨ ə́ə̀mgɨ̀ kpɔ́knɨ mámkwííb lè, ɗóògɨ̀ Mèín à? Ɓwâ nùb ŋgə́ ya caré du ŋgə́ kɨ́ŋɓénɨ cɨ́m ɓe mvii cúú, ŋgə́ ɓa ɗà̧nɨ̀nɨ kpɔ̂ ŋgábè á à? Mɨ tànàɓà nyí wááŋ, ŋgə́ ɓa ŋgáb kpɔ́kɓànɨ kɔ́klîn á. Ɨ́dù ɓwâ Mwin Nɨ̀rì kwá cuworé, ŋgə́ kwá kwaɓacéye nùb ə́mne Mèèín yá?»

Nùb du pénɨ vúm á bɨ ɗɨ́ɗɨ̧́ ŋgáb a pə́tə̀ə̀ŋkî kùb ɓoò rɨ, Yésù ɨ́ gà̧à̧nà ŋgáb gɨ̀gàìn ɨnè: «Nɨ̀ŋgwáàb bɨrɨ́b yi gií Dúú Jíri Mèèín no, gùr mɨ̀yú̧ú̧. Nɨ̀mwi̧ yɨɨ́m Fàrísà á, nɨ̀mwi̧ kù cè nò ɓáhɨ làmpóò. Fàrísà rè ɨ́ ə́ə̀ŋwúsò tíí, ŋgə́ ɨ́ yà yóŋnɨ no sumí ɨnè: ‹Mèín móò, mɨ á wu sáktɨ̀nɨ ɓetí yúk yoo, nɨ́ɨ́b ɓáŋhɨ́b yoo, dùgɨ̀ mààŋ kùb ndɨŋtee rɨ́, nɨ́ɨ́b kɨ́ lâs mɨ mɨ ndɨ̀ŋnɨ ɗàà. Mɨ cè mɨ́ hȩ nò ɓáhɨ làmpóò rè ɗàɓwêwá. Sóndè mwi̧í̧ no, mɨ á jìnɨ ɓɔ̧ gwì bɨrɨ́b. Nɨ́m mɨ du kwàniì lâs, mɨ á wu kwàtɨ̀hó̧nànɨ kɨ́ du ɗúnɨ mɨ nà we.› Nò ɓáhɨ làmpóò rè ɨ́ ə́ə̀ŋsò nɨ́ kɨ́ noò cùrì, ŋgə́ ɨ́ tɨ̀ɨ̀msékî nɨ́ ɗàá, ŋgə́ ɨ́ bì kàmé, ŋgə́ a tace: ‹Yée Mèín, ók mɨ mwàm, ɓetí mɨ cɨcóm á.› Yésù ɨ́ tàkwà: Mɨ tànà nyí, nò ɓáhɨ làmpóò rè, ŋgə́ gɨ̀cùnɨ no yó, Mèín átɨ́ nɨ́ ŋgə́ nò ɗɨ́ɗɨ̧́, ɨ́ ndôŋ Fàrísà rè. Ɓetí nò gewú síí nóò còmné, Mèín ɓa gèsénɨ nò kɨ́ ɗàá á. Nò geséce síí nóò ɗàá, Mèín ɓa nò kɨ́ gèwúnɨ còóm á.»


Kùb ya gewonaɓwéetɨ́ Yésù mucutɨ́b, dùgɨ̀ nánááb, ŋgə́ hèìwú ŋgáb ŋgáár só, fàmnɨ ŋgáb. Nɨ̀fuùb ɨ́ hàrè bɨ́ nùb kɨ́. Ɨ́dù Yésù ɨ́ tà kùb gèndóŋwò mucutɨ́b, ɗà ŋgə́ ɨ́ tà: «Mbɨ́knáam mucutɨ́b, ŋgáb gò yɨ́ moò, nyí ŋgáb hàrɨ̀wá ɓetí Ŋgɔ̧́ɔ̧̀ Mèèín ók ɓe nùb fɨ́te ŋgábè á. Mɨ tana nyí àmɨɨr wááŋ á, nò du Ŋgɔ̧́ɔ̧̀ Mèèín ə́ə̀mwá hȩ mutíí kwá nɨ Mèèín hamnin ku lə́ɓàr.»


Kɨ̀jíri kù yi du Jwîf ɨ́ fɔ̂ Yésù ɨnè: «Tá tɔ̀hí nyɔ̧ɔ̧́, ní á ɗú mɨ ndɨ̀ŋtɨ ɗà mɨ a kwà mè mɨ̀cɨ̧̀?» Á Yésù pihe ɨnè: «Àm níì á wu ɓéce mɨ tá tɔ̀hí nyɔ̧ɔ̧́? Nò kù nɨ nyɔ̧ɔ̧́ ɗàà, sé Mèín mwi̧. Wu ɗəəŋhaá ɓíhɨ̀b du tànɨ: ‹Wu mààŋ ndɨ̀ŋ, wu nɨ̀vɨ́tè kwíhɨ̀r, wu yúk yɨ̂r, wu mɨ̀námé kum gè, jə̀ŋ tá woò ɓe yà wóò› rɨ ye.» Á nɨ̀ŋgwá rè ta: «Mɨ ndɨŋtɨ́ nɨ́ɨ́b kɨ́ lâs yàwû mó mutíí.» Hȩ Yésù ónɨ u̧nèé, ŋgə́ ɨ́ tànà nɨ̀ŋgwá rè: «Menatɨ́ wu nɨ́m mwi̧. Sə́rɨkɨ́ɨm njɔdì woò lâs, wu a gɔ̀knà nùb tiri mwèìn kɨ́, ɗà wu a gò mɨ tùnɨ. Wu ɓa kwànɨ njɔdì ɓɨllin á.» Ɨ́dù ɓwâ nɨ̀ŋgwá rè ók nyindí kíì, ŋgə́ ɨ́ kpáì nɨ́ tí, ɓetí ŋgə́ yaáɓà nɨ ɓe njɔdì cei. Hȩ Yésù pə́ nɨ̀ŋgwá rè kpáttɨ́ nɨ́ tí rèé, á ŋgə́ ta: «Ɓa nɨ dùɓà nɨ ɓí ɓe nò njɔdìì lénɨ Haam Mèèín no á yáà. Á ɓí ŋgɨ̀rɨ̀mà ndóŋhó̧ mvì batallì no, ɨ́dù kɨ́ nò njɔdìì lə́ Haam Mèèín noò á ndóŋɓàgɨ̀ ɓí.» Nùb yi du ɓèé ɨ́ tà: «Na ma ɨ́ ɓa ɓáíhó̧bɨ̂ŋnɨ?» Á Yésù piina ŋgáb: «Nɨ́m yɔ́k nɨ̀vɨ́tɨ̀bì nɨ yɔ́knɨ Mèín ɗàà.» Á Píyéèr tana Yésù: «Kɨ́ nɨ́mè, nɨ́m ma tɨ mbɨ́ktɨ́ nɨ́ɨ́b nɨ́mè lâs àm nɨ́m tu wé.» Á Yésù tana ŋgáb: «Mɨ tanaɓa nyí àmɨɨr wááŋ á, nɨ̀vɨ́tè ɨ́ mbɨ́kkɨ́sò dúú nóò, gwi noò, mwin yàá bɨ noò, tá noò ɓe yà nóò ɓe munɨ́b noò àm Ŋgɔ̧́ɔ̧̀ Mèèín, jíì mwánnè no, ŋgə́ ɓa kwàcùnɨ a ndôŋ kí á, ŋgə́ a kwàɓwêcè mè mɨ̀cɨ̧̀ cɨ́m yȩné.»


Yésù ɨ́ ɓéhô̧ nɨ̀fuùb no cóóŋ ɨ́ bɨrɨ́b lè gɨ́ní, ŋgə́ ɨ́ tànà ŋgáb: «Ɗàrò nɨ́m wúíná Yèrúsàlèm á, ku á cè nɨ́ɨ́b tɨ́kɨ̀nɨ́b Mèèín ya tɨin ɓe ɨ́r Mwin Nɨ̀rì ɓa fó̧nɨ hàrák. Nɨ̀gwííb du bɨ́ Jwîf séé ŋgáré á kùb ɓa ŋgə́ nàrénɨ ru. Nùb kɨ́ a kə́hè ŋgə́, ŋgáb a àndè ŋgə́, ŋgáb a túùŋwû ŋgə́ cwàá só. Ŋgáb ɓa ŋgə́ jɨ̀mnɨ ɓe lòré á, ŋgáb a kwíhè ŋgə́. Jíì taarɨ́bí, Mèín a tì sə̀ə̀mcùhô̧ ŋgə́.» Ɨ́dù nɨ̀fuùb ɨ́ dù bɨ́ ókwa àm níì á Yésù yi nyin u̧. Njàb nyindí kíì yaá nà nɨ ŋgáb yo̧ó̧, ŋgáb ɨ́ dù bɨ́ ókwa.


Yésù yi ŋgóobtɨ́ ɓe Yèríkò. Ɓùɓú̧ ti tiri kù yaácè du̧ú̧ gín jɨ̀rì, ju ɓoréé. Hȩ ŋgə́ ók wùúm nɨ̀vɨ́tɨ̀b du ndóŋniì, á ŋgə́ fɔ́ kóo, ní ɨ́ du nɨ́ ku yàà? Kùb ɨ́ tànà ŋgə́ Yésù nò Nàsàréèt ɨ́ du ndóŋnɨ ru yáá. Á ŋgə́ kɨ́ŋso, ŋgə́ ɨ́ tà ɨnè: «Yésù, Nyȩ Dàvíìt, ók mɨ mwàm!» Nùb yi du ŋgwé gùrí ɨ́ yà ŋgə́ páámɨ̀nɨ, ŋgə́ ɗèìn ɓɔ̧, ɨ́dù ŋgə́ ɨ́ yà nɨ́ kɨ́ŋndóŋɓàgɨ̀nɨ tíí tíí: «Nyȩ Dàvíìt, ók mɨ mwàm!» Kí á Yésù ə́ŋhȩ, ŋgə́ ɨ́ tà kùb ɗààmwònà ní ŋgə́ yáá. Ɓwâ ŋgə́ féín gín Yésùù, á Yésù fɔ́ ŋgə́: «Wu ɗúce mɨ ndɨ̀ŋnà wu ní?» Nɨ̀ŋgwá rè ɨ́ tà: «Kéké, ndɨŋ mɨ pə́cù íhín.» Á Yésù tana ŋgə́: «Pə́cum íhín, ə́ə́m wóò ɓátií wu.» Ɓè mu̧u̧, nɨ̀ŋgwá rè ɨ́ yàrê pénɨ. Ŋgə́ ɨ́ yàrê tùnɨ Yésù, ŋgə́ a mgbíigece Mèín. Hȩ nùb yi du ɓèé pénɨ nɨ́m yi ndóŋ kíì, ŋgáb ɨ́ yàrê ŋgə̀mnɨ Mèín.

Escucha a Lúkàs 18