YUNIRÜBO RHIMO 4

Peter tüsho Johan Kiuthsü-binkiu miki

1Anenü mihtsürübo ki thade alachoki, amükeamrübo le arüngyam wühkenorü tüsho Sadukirübo Peter tüsho Johan kilim atu. 2Anenü mihtsürübo ki Jisu ashe chingnü arhang kamlokhi dünkheak thsangyukhi hode arü mulong kipathsükde kam. 3Tüsho ane rambah zhinga lamonü ashido khiungde rihyam ching zo. 4Tüshe thiyu sorü ahihdonü kin, tüsho mihtsürübo khekhi 5000 bande kam.

5Ashidopü arü yakzanshuhrü, azothsürü, tüsho athrütrü Jirusalem ching rukhüh mukhung, 6ju lung achangbe amükeambuh Anna le Kaifa tüsho Johan le Alexander, tüsho achangbe amükeamrü yamkhün chingnü alala bekheah. 7Arünü arübo arü müngüh zhipshihbah keokhi, “Tümü wunü yungsho tümü mung hode nüsanü ha rhimokhea?” 8Judüki Peternü Amüsüh Menü mibah arü ki tha, “Mihtsürübo yo yakzanshuhrübo tüsho azothsürübo, 9jingkikrü ki atsü rhimode, ha mihtsürü thsüngukhi dünkheak isa ki keokhisho, 10nüsa alala tüsho Israel mihtsürü alalanü, nüsanü yümkihbah Thrünpuhnü ashe chingnü arhang kamloshihkhi Nazarethrü Jisu Khrista mung chingnü ha mihtsürü tsüde zhiplah de mükheahang. 11Ha lung nüsa thüyam-thsürübonü bahyuk, tüshe amühit lung adungtobe kamdo. 12Tüsho püpü tümü ching she akhümkhit müla, tümüde thüning bukkhüp mihtsürü bolung isa khümkhitpü püpü mung jih-a müla.”

13Küyimki arünü Peter le Johan mulong tokhi ngükhea, tüsho ane amümükheahrü, mihtsürü dümung kheahkhitkhea, arünü müyinsah; tüsho ane Jisu lung lade arüa lah de mütsan. 14Tüshe arü rheang ki zhipkhi mihtsürü thsüngukhi ngübah arünü azhihde athapü tümü mülakheah. 15Tüshe küyimki arünü ane kiuthsü-binkiu chingnü wungdo wukhiukpü thiyukhüm jihkhea, arünü arü bolung atsangachih, 16“Isanü harü mihtsürübo ki tümü rhimoba? Atsütsü anenü münchi hode khinthiyinbe rhimokhi Jirusalem ching larü alalanü mütsanlah, tüsho isanü ju mükhenokhuk. 17Mihtsürü bolung alü thsüde mubushihpü, ha mung chingnü kheaküa masukpü isanü ane müzünanü.” 18Jumonü arünü ane jibah Jisu mung chingnü masukpü yungsho müthsangyupü müneah. 19Tüshe Peter le Johan bünenü arü ki alo, “Thrünpuh kheaknü alü nüsa ki anipü Thrünpuh miki alim la shi yungnü nüsanü lümakheahang. 20Tümüde isanü angükhi tüsho asokhi thapü isanü atuklopü mukuk.” 21Jumonü küyimki arünü ane müzünkheanü ane thsümüchipü limro müyimkhitde mihtsürübo dünkheaknü ane tsoshih tümütüsho anenü arhimokhi alala thsungkheak arü alalanü Thrünpuh müretah. 22Tümütüsho mihtsürü shepü kheak ha athsüngukhi khinthiyinbe rhimokheanü kam 40 akumung lakheah.

Akinrübo Tamkhüntamnü

23Ane dükheshu, anenü müyamrübo kilim yü tüsho amükeam putungrübo le azothsürübonü athakhi arü ki thiyusheak jih. 24Küyimki arünü ju sokhea, arünü rukhüh thsübah Thrünpuh ki zhi: “Atungpuh, nü a thüning le alomi, keto, tüsho ju ching alala thrünkhi Thrünpuh ah. 25Nünü nü yamlarü isa jipürü David mün hode Amüsüh Menü asuk:

‘Tümü thsükhi trükshihbonü mulong zhipzhipkhea,

tüsho mihtsürübonü akeangkeang lümkhi thsükhea?

26Alomi kiulongthsürübonü thsakham,

tüsho yakzanshuhrübonü Atungpuh tüsho api yo Khrista azhihde rukhüh mukhung.’

27 # Lk 23.7-11; Mt 27.1,2; Mk 15.1; Lk 23.1; Jhn 18.28,29 Tümütüsho ha kiuto ching nünü mujude-müsühkhitkhi, amüsüh nü yamlarü Jisu azhihde khiungkerü tüsho Israel mihtsürü lungnü Herod tüsho Pontia Pilat ane chido mukhung, 28ju nü wu tüsho nü lümkhinü pungkhia lakhi dünjipü rhimopü lakheah. 29Atungpuh, arünü amüzünkhi kheakü mükheahjang tüsho nü yamlarübonü khide mulong tode nü yubo thakhukshang. 30Nü yo amüsüh yamlarü Jisu hode athsüngupü tüsho khinthiyinbebo rhimopü nü khah chungkihang.” 31Küyimki arünü tamkhüntamnükhea, arü rukhüh mukhungkhi dangpung ju niuk; tüsho arü alala Amüsüh Menü mide kambah Thrünpuh yu thapü mulong tode tha.

Akinrübonü Lakhit-kukruk Chamachihkhi

32 # Yunir 2.44,45 Kheakü akinrü borü ju mulong tüsho me khülang lakheah, tüsho shenü she nihbuh kukruk ju api yo ah de mütha, tüshe lüpdükhi rukhüh yo lakheah. 33Tüsho wu atonü amüsüh-thsangyurübonü Atungpuh Jisu Khrista arhang kamlokhi thiyumütsan thsü, tüsho arü alala kheak amüthsüm ato lakheah. 34Arü bolung sheshe müthsümülarü mülakheah, tümüde sherü thulubo le thüyambo lakheanü yinbah sho lude arü, 35tüsho amüsüh-thsangyurübo kilim jih; tüsho sho ju mihbüm aban nihbuh yihnüpü ayannü chama jih. 36Junangde amüsüh-thsangyurübonü Barnaba (amütsan, mulong toshihkhi tsührü), Saipra chingnü azübekhi Levirü Josepnü 37api lu khülang yin, tüsho sho lude arübah amüsühthsangyurübo kilim jih.

Actualmente seleccionado:

YUNIRÜBO RHIMO 4: YIMCBSI

Destacar

Copiar