Jenesis 3
3
Batu Ndramak Boto-on
1Eme ya mwak badeh tanan tan badeh ndrala labai udu bolo iri katin haka mari ala Laban Kindrei mwesekei. Eme ya mwak lelen i badih, “Em Kindrei tiye i tam handru ta ou badeh saimon buwa kei badu bolo bilin dah?”
2Eme i badih anya eh, “Aru badeh winiyan aimon buwa kei badu bilin. 3Arile kei udu alih ta bilin badeh Kindrei tiye anya, aru badeh saimon buwan. Ma aru sanyokar ale, bakameh aru amak.”
4Eme badeh mwak anya eh, “Badeh wasai oh; ou winiyan bamak bwe. 5Kindrei tiye badeh, tasah iy tanan i buku ou aniy kameh ou kameh asahan i buku iri Kindrei. Ma ou kameh atanam lakou mwasin ma lakou ndra-in.”
6Eme i badih dah anyolom kei dah ma buwan badeh mwasin labai ta aimon, eme iy lomondra, “Mwasin handru en i buku jo kasahan badih ta tanan.” Eme iy andrei rayah ma iy aimon ai. Ano badeh iy andrei rayah i mine udun ma udun aimon ale. 7Eme uru aniy le badeh, ma uru akohok tanan ma uru atanan ai, uru badeh kolau bwe; eme ma uru asowek la-u kei aloh pik i se ma uru taliye ai.
8Eme na beyeh doh le badeh uru anuhun Laban Kindrei edek bolo bilin le badeh, uru aton ala bolo ndrokowa kei udu bolo bilin. 9Eme Laban Kindrei aloh iy, “Ou ndraheh?” 10Eme iy anya eh, “Jo anuhun ou ado bolo bilin; eme jo inoh ma jo aton tam, tasah jo kolau bwe.” 11“Are tiye ta ah anya, ah kolau bwe?” Kindrei ndremenya, “Ah ndrani buwa kei ala jo mene anya ah saimon en?” 12Eme i mwan anya eh, “I badih ou atehei iy udu hawek kada-ah, badeh atehei buwa kei eme ma jo iniy.” 13Eme badeh Laban Kindrei lelen i badih, “Ou anya amwekes tasah?” Eme iy anya eh, “Mwak wendreyani jo ma jo iniy.”
Kindrei I Bolosen
14Ano Laban Kindrei tiye i ta mwak, “Ou le kameh ou akohok isi ta aliy. Ou le ari badu bolo iri katin haka mari, ala adek ma seselek ya jo tandrakan ou le ari. Na len dah ma na len eme kameh, ou kameh seselek na baha ndrinem ma ou kameh kaniyam kameh ndren na len ari i buku ari udu le buku doh.
Mwak Iso Ma Aimon Kati
15“Ya jo kameh mwesekei ou hawe i badih kameh ah kameh baseken ah bwe; nadu ah kameh uru kameh andra-i udu le buku doh. Ya nadu i badih kameh tihisiy batum abwesek ma i dah kameh ou kameh aso ma aimon katin.”
16Ano iy tiye i ta i badih, “Jo kameh amwekes isi labai i buku nah ere ndrinem ma i dah kameh jo edeu sisi-in i buku ou anya adeu nah. Ya ta i doh kameh ou kameh anya udum sala len, arile i mwan le badeh atondrok ou.” 17Eme iy tiye i ta i mwan, “Ou anuhun boho udum ma ou aniy buwa kei mene jo tiye anya ou saimon. Ya eme ta lakou ou ndramwesekei, i dah kameh munyak andra-i. Ya i dah kameh len ou ado kameh ou amwekes lahou boto-on boto-on ta amwekes munyak ta atah nam nyamon. 18Ya i dah kameh iri bwidiu bobodon kameh ateh ma i dah kameh ou kameh aimon buwa kei badu lokei. 19Ma i dah kameh ou amwekes lahou boto-on ma sa-ar asahan ta amwekes nyamon. Winiya len ou le barala hamon barala munyak ja mene amwekes ou na aliy, ma ou kameh a munyak leleyah.”
20Adam tondrohani nyara udun badeh Ewa, tasah iy badeh tine iri lau mari. 21Eme Laban Kindrei mwesekei kolau i turu na ku-i katin haka ma iy tani i turu.
Kindrei Tikahei Adam Uru Ewa Au A Len Ta Bilin
22Ano Kindrei tiye, “Abo iri ndramak badeh ndrasahan ndra buku to ai, ndratanan saba lakou mwasin ma saba lakou ndra-in. Eme ya iy badeh sakohok buwa kei ala ta amwekes kohan udu le buku doh ma iy badeh saimon. Bakameh iy kameh kohan kudu le buku doh.” 23Eme ma Laban Kindrei suni iy iu i len ta bilin Iden ma mwesekei iy apou munyak ala mene bwidi iy mene asahan na aliy.
24Eme ya loboho an eme loken manan ta bilin badeh iy atehei iri angelo, lau ta ndrokei; ma samen badeh anya ili eme udu mada san ta i bolo bilin Iden, badeh ta nohowa lau same mirihik ta kei ta edeu kohan mwasin.
Actualmente seleccionado:
Jenesis 3: lidNTpo
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2001, Wycliffe Bible Translators, Inc. All rights reserved.