Эклц 9
9
Ноахла кесн Бурхна бооцан
1Бурхн Ноахиг болн терүнә көвүдиг йөрәһәд, иигҗ теднд келнә:
– Тооһарн олн болтн, төрәд һазр дүүргтн. 2Һазр деерк аңгуд цугтан, теңгрин шовуд цугтан, һазрар мөлкдгүд цугтан, теңгсин заһсд цугтан таднас сүрдҗ әәтхә, тедниг тадна һарт Би өгчәнәв. 3Ноһан урһмлыг Би таднд өгснлә әдл, әмд болн көндрдг юмиг цугтаһинь тадна эдлврт өгчәнәв. 4Болв цуста мах бичә идтн. Яһад гихлә, цусар әмд бәәдмн. 5Кемр кен чигн күн тадна цус асххла, Би маһд уга өшәһән авхув. Терүнә ормд Би мал болһнас өринь некхүв. Өөрхн улсиннь җирһлин төлә күн болһнас Би хәрү некхүв.
6Кен-негнь күүнәс цус һарһхла,
терүнә бийиннь цусн күүнә һарар асхргдх.
Яһад гихлә Бурхна дүртәһәр
Бурхн күүг үүдәлә.
7Тадн болхла, төрәд өргҗтн, һазр деер бәәрлтн, тендән тооһарн өстн.
8Дәкәд Бурхн Ноахд болн терүнә көвүдт келнә:
9– Ода Би Эврәннь бооцаһан таднла болн тадна хөөтк үйнрлә, 10таднла бәәсн әмтә-киитә тоотла – шовуд, мал болн зерлг аңгуд – кермәс таднла хамдан буусн тоотла цугталань, һазр деер бәәх аң болһнла кенәв. 11Би таднла иим бооца кеҗәнәв: хөөннь цуг әмтә-киитә тоот усна аюлар дәкҗ алгдшго, хөөннь усна аюл һазр дәкҗ үрәшго. 12Бийиннь болн тадна хоорнд, таднла бәәх әмтә-киитә тоот болһнла, иргч үйнрт кевтнь цугинь күргәд мини кех бооцана темдг эн. 13Би үүлн дунд Эврәннь солңһан татҗанав. Мини болн һазрин хоорнд кесн бооцана темдг тер болх. 14Намаг һазр деер үүлн цуглулхла, терүн дунд солңһ һарх. 15Тиигхлә Мини болн тадна хоорндк, әмтә-киитә тоот болһнла кегдсн бооцаг Би тодлхув: хөөннь цуг әмтә-киитә тоотыг алхин төлә усна аюл учршго. 16Үүлн дунд солңһ һарх болһнднь, Би терүг үзәд, Мини болн һазр деер бәәх цуг әмтә-киитә тоотын хоорндк мөңк бооцаг санхув, – гиҗ Бурхн келв.
17– Һазр деер бәәх цуг әмтә-киитә тоотла кесн Мини бооцана темдг эн, – тиигҗ Бурхн Ноахд келв.
Ноахин көвүд
18Кермәс буусн Ноахин көвүд – Шем, Хам, Япет. (Хам – Канана эцк.) 19Эн һурвн Ноахин көвүд. Теднәс һазр күүһәр дүүрсмн.
20Тәрәч Ноах уста үзм тәрсн түрүн күн. 21Нег дәкҗ чаһр ууһад, тер согтна, татата сег дор нүцкәр кевтнә. 22Канана эцк Хам эврәннь эцкән нүцкәр кевтсинь үзәд, ахнртан келнә. 23Болв Шем Япет хойр хувц авад, ээм деерән хаяд, нурһарн цухрн йовҗ сег дор кевтсн нүцкн эцкән хучна. Эцкиннь ил махмуд үзшгон төлә, тедн талдан үзг тал хәләцхәв.
24Уусн чаһрнь һарад, Ноах серәд, бичкн көвүнь Хам терүнд ю кесинь медснәннь хөөн 25иигҗ келнә:
– Канан, харалла харһ!
Эврәннь ахнртан тер
Мухла әмтнә сүүлңкнь болх.
26Тер бас иигҗ келв:
– Шемин Бурхн Деед Эзн тууртха!
Канан Шемин мухла болтха.
27Бурхн Япетин#9:27 Япет – эн нерн әәһәрн «өргҗүлх» гидг еврей келнә үгин бәәдлтә. һазрин меҗә икдүлтхә.
Япет Шемин сег дор бәәтхә,
Канан терүнә мухла болтха.
28Усна аюлын хөөн Ноах 350 җилдән бәәв. 29Ут турштан Ноах 950 нас наслад өңгрв.
Actualmente seleccionado:
Эклц 9: ХКО_ӘБ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Институт перевода Библии, 2002-2023