Matìù 22

Èngà̧teme ane èpǎ̧ ndzɔꞋɔ kǒ

(Lk 14:15-24)

1Yesò mè me làꞋa abua bòt bu wuê ane mèngà̧teme, nê 2“Kèfɔ̧̀ Mbɔ̧ɔ̧mà wu mbɨ̀Ꞌɨ̀ fɔ̧̀ ko, tà li nkaꞋa èpà̧ ane ndzɔꞋɔ waã vi la. 3Tà li ntsà bètsoêꞋ bi nê bɔ gha ntɔ bòt bu bɔ yaã nkàꞋà wɔb a èpǎ̧ wu la, bɔ tu̧ ekɨꞋɨ.

4“Tà mè ntsà bètsoêꞋ ko tsa nê bɔ̀ gha shu abua bòt bu bɔ yaã nkàꞋà wɔb a èpà̧ wu la nê ye taŋkè èghɨ ègème tè ndɔ̀Ꞌ, nê ye wààle èdzaꞋa mpɔ̀ŋtsə nè ngule bɔ̧ mpɔ̀ŋ, tè àghɨa àgème a me wu anè nko laꞋ nê a kuêꞋ, nê bɔ̀ kɨꞋɨ a èpǎ̧ ndzɔꞋɔ yu!

5“Ka bègɨ̧̀ bu efəənè, ndzəè ngà me ghɨ̀ mènəè mɔb, wòt kǒ baãaã èlu̧ mbȩ zi, wekǒ baãaã èlu̧ èwen li, 6èbeko nè bòt e baãaã bètsoêꞋ tò bu, ndènè àwɔb, mbɔ̂ mbùŋè àwɔb. 7Fɔ̧̀ wu ye ale a saa tò kwàꞋ ànyaꞋne tè tà tsà bèshujà bɔ ghà bùŋè bòt mbɔŋ mbɔ̂ ntò̧ àpfəè ayɔb.

8“Tà tɔ̂ bètsoêꞋ bi shu abua yɔb nê, ‘Mâ taŋke èpǎ̧ ndzɔꞋɔ wu tè e kùꞋ, ka bòt bu bɔ yaã nkàꞋà wɔb la, e kà lem nkùꞋù èwuu bòt bɔ ghɨ̂ ngu èkaꞋà la. 9È wu ale, bɨ gha a tebùꞋte èlu̧ ènɨ̧, nkàꞋà wòt ègème bɨ ye la a èpǎ̧ ndzɔꞋɔ’ 10BètsoêꞋ tò bu e ndzəè nga a tebùꞋte èlu̧ fète bòt bàgème bɔ ye la, èbe ntsɔ̧̀ nè èbe kàbɔ̀ŋ, tè lob èpǎ̧ ndzɔꞋɔ yu lu̧ ne bègɨ̧̀.

11“Fɔ̧̀ wu tseke tê nkɨ̀Ꞌɨ̂ elàꞋ nê bègɨ̧̀ bu, ndzě wòt kǒ kà kwaãaã ndìte ndzɔꞋɔ, mbììte atò nê, 12‘Shu̧, à ntsè ne ŋa ka nyi a lob ŋaà kà kwaãaã ndìte ndzɔꞋɔ à?’ Ŋut zə ale, èngà̧ e tsea tò.

13“Ale, fɔ̧̀ wu shu abua bètsoêꞋ bi nê, ‘Bɨ̀ kuule èbu tò nè èka tò, maꞋa tò àbȩ a èbem kèbìꞋà, àdziꞋa bòt àa me dɨ̀a nkwèla àsɔŋ yɔb ane ntso la.’

14“Yesò ghɨ̀ ale, ndià nê, ‘Bɨ̀ ko nê bɔ̀ɔ ngɨ̀ bɔ tɔ bòt nyaŋ, ka mbɔ̂ ndàà wu èbe mpiꞋa nɨŋ.’ ”

Èngà̧ ane ànəa màŋa èkab taksì

(Mk 12:13-17; Lk 20:20-26)

15ÀfɨꞋa mbɔŋ Bèfalèsiì ko e ghà taŋke ndɨ bɔ̀ɔ baãaã Yesò ane èngǎ̧ tò la. 16Ale, bɔ tsà bɔkatè bɔb nè bòt bu bɔ̀ɔ nkuŋa Elɔ̀d la abua Yesò, bɔ kɨꞋɨ̀ mbììte atò nê, “NyɨꞋtà, baa ko nê àà ndàꞋà wuê nkûŋ, mè nyɨ̀Ꞌta mènəè Mbɔ̧ɔ̧mà wuê mbɨ̀Ꞌɨ̀ nàa la, kà wua njùta ànəa bòt àa ndàꞋà la. Nkàà nê àà kà nɨ àghɨa wòt wu yùà la mbɨ̀Ꞌɨ̀ àghɨa ko. 17Ale, shua wa, tè mbɨ̧ ta tê bɨ̧ɨ̧nè nê bà me ŋa èkab taksì abua Sisà kò wu nê bà ka ŋa à? Àa mɨ̀ɨ̀tà naa?”

18Yesò ko mèmɨ̀ɨ̀te kàbɔ̀ŋ mɔb nê, “Bɨ̀a wu bɨ̀a shua nê bɨ wu àghɨa kà wu yùà la, bɨ ghɨ̀ na ka me taãaãte am à? 19Bɨ̀ nyɨꞋte am àkwȩkab yu bɨ̀a ŋǎ ane èkab taksì la.”

Bɔ nɨ àkwȩkab yu nkɨ̀Ꞌɨ̂ ŋǎ abua tò. 20Tà bììte awɔb nê “Àtsə yàa nè èlen làa adù̧ la wu ayea wàà?”

21Bɔ bɨ̀ɨ̀lè nê “Àtsəa Sisà.”

Ale, Yesò shu abua yɔb nê “Bɨ̀ ŋa àghɨa è wu àyea Sisà la abua tò, ŋà àghɨa è wù àyea Mbɔ̧ɔ̧mà la abua Mbɔ̧ɔ̧mà.”

22Bɔ zə ale, a taꞋa tsèa wɔb bɔ lɔꞋɔ abot ntsiꞋi me ghà gha.

Èngà̧ ane ànəa mànju̧u̧ma

(Mk 12:18-27; Lk 20:27-40)

23È li ngu ane àlia mbɔŋ Bèsadùsiì, bòt bu bɔ̀ɔ shua nê betsiꞋa wòt kà pfə mè njù̧ù̧me la, e kɨꞋɨ ndze a Yesò mbììte atò 24nê, “NyɨꞋtà, Musì li shu nê, ‘Wòt pfəa kà bi bɔ̧, wanyɨ tò bɔ ndɨ tàa nɨ vi tò mbɨ̀Ꞌɨ̀ bi bɔ̧ abua wanyɨ vi wu tà pfə la.’ 25Bòt ko basà̧à̧mbe e li ngu bɔ̧ wòt wemɔ̀Ꞌ a kètsìà wa. We mbì yɔ̀Ꞌɔ̀ vi vi mpfəè ka bɔ bɔ̧, ngwaꞋa àvi wu abua wanyɨ vi, 26we kwèn wu nɨ ale, mè mpfəè àzi mɨ̧̂ wu a èlɨ̀, tè bɔ̀ɔ sà̧à̧mbe e pfəꞋte bàgème. 27Bɔ pfəꞋte ale, àvi wu tseke tè mè mpfəè àzi mɨ̧̂. 28Naa li ngu ane àli bèmpfəà be yu̧u̧me la, àvi mbɔŋ wu vi wa ane yɔb wu basà̧à̧mbe la à? Bɔ̀ɔgème e li ndzɔ̀Ꞌɔ atò.”

29Yesò bɨ̀ɨ̀lè èngǎ̧ wɔb nê, “Bɨ fâ̧, nkàà nê bɨ bakà ko èngǎ̧ Mbɔ̧ɔ̧mà, bɨ̀ ka mě ko mètàŋ tò. 30Naa li ngu àfɨꞋa bèmpfəà be yu̧u̧me la, bɔ tsiꞋi mbɨ̀Ꞌɨ̀ bɔntu̧ Mbɔ̧ɔ̧mà, mbâ̧ nè àvi ka tsi ngua ndzɔ̀Ꞌa. 31È me wu ane ànəa bèmpfəà mànju̧u̧ma, ko bɨ bakà tɔ te zə ànəa Mbɔ̧ɔ̧mà shu abua yɨ̧ la nê, 32‘E ngu Mbɔ̧ɔ̧mà Abàlàghâm, ndɔ̀Ꞌ ngu Mbɔ̧ɔ̧mà Asàk nè Mbɔ̧ɔ̧mà Jàkɔ̂b?’ Tà wu Mbɔ̧ɔ̧mà bòt yu̧, tà ntsě Mbɔ̧ɔ̧mà bèmpfəà.”

33Ènɔ̧̂ bòt bu è zə èngà̧ waa ale, a taꞋa tsè àwɔb ane mèngǎ̧ tà nyɨ̀Ꞌta la.

Mbɨ̧ mbì

(Mk 12:28-34; Lk 10:25-28)

34Bèfalèsiì e zə nê Yesò laꞋa èngà̧ nɨŋ ndììme mètsəê Bèsadùsiì ale, bɔ bu̧u̧te adzìꞋ yeamɔꞋ, 35wòt kǒ ane yɔb è wu nyɨꞋtà mbɨ̧tsə la, biite Yesò èngà̧ enɨ taãaãte tò nê, 36“NyɨꞋtà, mbɨ̧ è tɨ̧ɨ̧ a mbì ane mbɨ̧tsə tègème la wu ye ŋa à?”

37Tà bɨ̀ɨ̀lè nê, “ ‘Me kɔ̀ŋke Tǎt wè Mbɔ̧ɔ̧mà nè èntɨ̧ɨ̧ wê ègème, ŋà wê nènkèm abua tò, mè me mɨ̀ɨ̀tè wuê atò.’ 38Eyaa wu mbɨ̧ mbì, mè ngu mbɨ̧ è tse mbɨ̧ tègème la. 39Mbɨ̧ è kɨꞋɨ akwèn la nàà mbɨ̀Ꞌɨ̀ yùà, ‘Me kɔ̀ŋke wanyɨ wê mbɨ̀Ꞌɨ̀ àwɔ̀ mbɔŋ.’ 40Mènəè ègème mbɨ̧te Musì nè bèndàꞋàtɔŋ Mbɔ̧ɔ̧mà àa shua la, e dzə a èbem mbɨ̧ tàa tebe la.”

Fɔ̧̀ wu Mbɔ̧ɔ̧mà yɔꞋ ntsà la

(Mk 12:35-37; Lk 20:41-44)

41Bèfalèsiì ko e fete adzìꞋ yeamɔꞋ, Yesò bììte awɔb nê, 42“Bɨ̀a mɨ̀ɨ̀tà na ane ànəa Fɔ̧̀ wu Mbɔ̧ɔ̧mà li ndzɔꞋ etsàà la à? Tà wù waã wàà?”

Bɔ bɨ̀ɨ̀lè nê, “Tà wu waã Fɔ̧̀ Dàbid.”

43Tà mè mbììte awɔb nê, “Ale, ghǎ li ngɨ̀ ka Fo Mbɔ̧ɔ̧mà ghɨ̀ Fɔ̧̀ Dàbid me tɔ tò ane tǎt vi à? Dàbid li nê,

44‘Mbɔ̧ɔ̧mà Lefɨ̀Ꞌ shu abua Lefɨ̀Ꞌ am nê,

Tseke àbâ àbualu̧ am

tè e ŋà èlu̧ à tsite èka bê a ègwet bɔmbù̧ bê.’

45Fɔ̧̀ Dàbid wu tɔ atò ane tǎt vi, tà ghɨ̀ na ka ntsiꞋi waã Dàbid à?” 46Wòt li tà kà wuê tàa ko etsɔꞋɔ èngǎ̧ tò la. E bùꞋu ane àlia mbɔŋ me ghà ne mbì, wòt kà tsi mè nyɔ̀Ꞌtè ebiite atò èngà̧.

Actualmente seleccionado:

Matìù 22: mnf

Destacar

Copiar

¿Quieres tener guardados todos tus destacados en todos tus dispositivos? Regístrate o inicia sesión

Aprende más sobre Mundani

Matìù 22

Versículos bíblicos populares de
Matìù 22

Biblia:

Mundani

Versión: Mundani - mnf

Matìù 22

Matìù 22

Versículos bíblicos populares de Matìù 22

Biblia:

Mundani

Versión: Mundani - mnf

Matìù 22

Versículos bíblicos populares de
Matìù 22