Matthieu 16
16
Yésʉs lɨ́ ebene ékǎ sâ bé mesimá
1OFarizyɛ̂n, bé le oSadwisyɛ̂n, bê nzě pyâl kwá mé Yésʉs. Bé e né ó, nye sâʼ bé esimá e nkul dí eduho ɨ́ jʉ́o kʉ́ nyɨ́. Sâ gwár, bé á lwib nó ó, lɨ́ ebóblo nyê. 2Yésʉs nzě lɛ́ɛ e bé ó: «[Bɨ̌n sɨ́sá ó, bɨ́n sí bee jʉ́o kaá e kaá ɨ́ bíí kʉ̌ʼ nó, bɨ̌n bé ó: “Dwéhé, yé ókah ómɛ́n.” 3Ɨ́ melɔ́ma mé mɛ́n, bɨ́n béé jʉ́o kaá e kaá nó, bɨ̌n lɛ́ɛ́ ó: “Mpíé ónwɨ́ɨ̌ ndǔm.” Nye ntémé bánǎ nwɨ́ɨ. Bɨ̌n bé náǎ lɨ́ ekʉ́ gʉ́a bísâ bi dí ecémlě dwéhé le mpíé bí. Nzê bɨ̌n bé abe e nkul dwéʼé sá mû lɨ́ esyɛ́ɛ ɨ́ jɔʼ yɨ̂ʼ yɨ́ ɛ́!] 4Bibɨ́bla bi bʉ̂r le odûl bé ónzyɛ̌m oswîh ó dí edǐ bee mésimá. Yé ákóʼó kǎ be le esimá eswîh, alaa ó laá lé á syɛ́ɛ ɨ́ twiʼ mé Yʉ́nas lɨ́.»
Jɔ̌ʼ Yésʉs á sil elwib nó yɨ́, bé le ompʉ́n bé ntɔ̂ʼ kalwo ɨ́ byɛ̂l, tóŋɔɔ.
Metwɨ́ɨ́ mé óFarizyɛ̂n, mé lɨ́ ebol bʉ̂r
5Jɔʼ bé á to kumo ɨ́ lʉ́ʉ́ ébʉ́m é mâŋ yɨ́, ompʉ́n bé ntɔ̂ʼ bee ó, bé á bé anze e biblêr. 6Yésʉs nzě lɛ́ɛ e bé ó: «Bɛɛngɛ́ɛ! Bɨ̌n e báʼ óFarizyɛ̂n le oSadwisyɛ̂n ɨ́ lɔ̌b levure yɔ́ɔ́ bé dí e yé yɨ́.» 7Ompʉ́n bé, bê nzě lɛ́ɛla páʼ nyɔ́ɔ́ ó: «Sá nyê lɛ́ɛ́ yɨ́, nye lɛ́ɛ́ yé ó, ebě, ɨ́ jɔʼ mɨ́nâ nzé gá wâʼ yɨ́, mɨná bé anze gá e biblêr.»
8Mpʉ̌ Yésʉs á gʉ́a jwɨʼ yɔ́ɔ́ yaá yɨ́, nye e bé ó: «Á twâʼwǒ búʼó yɨ́n ɛ̂! Bɨ̌n bé lɨ́ elwǐb mpʉ́nʉ̌ ɨ́ yé? Nzê ebe bɨ̂n nzé kâʼ, abe e biblêr ɛ̌? 9Nzê bɨ̌n dína apǎ gwá gʉ́a ɛ̌? Nzê bɨ̌n bé akǎ símsa bíblêr bitɛ̂n byé á jala e bʉrʉ̂m otɔ́ɔ́sin otɛ̂n bí ɛ́? Bɨ̌n bé á tœ̂ʼ bimpubuʼó bi tɨ̂, lóŋlo mékwám méntíá e byê? 10Nzê bɨ̌n bé akǎ símsa bíblêr nzaangbá byé á jala e bʉrʉ̂m otɔ́ɔ́sin onâ bí ɛ́? Bɨ̌n bé á tœ̂ʼ bimpubuʼó bi tɨ̂, lóŋlo ómpyáa ontíá? 11Bɨ̌n bé lɨ́ ekâr égwá jóʼo mé ɨ́ yé? Me bé alwib e bɨ̌n dumo e biblêr. Bɨ̌n a báʼ óFarizyɛ̂n le oSadwisyɛ̂n ɨ́ lɔ̌b levure yɔ́ɔ́, bé dí e yé yɨ́.»
12Nó yaá ó bé á ka jóʼo nye yɨ́. Nye á bé alwib e bé ɨ́ levure. Nye á lwilwib e bé ó, dumo le oFarizyɛ̂n, bé le oSadwisyɛ̂n, ɨ́ lɔ̌b mílɛ́ʼlá bé á dwidwe bʉr lɨ́ onzyɛ́h ónzyɛ́h mí.
Yésʉs ó dí Mʉ̌r Nzyɛ̌m á lœm múló mé jwɨ́ɨ nyá
13Yésʉs ntɔ̂ʼ tó pyâl ɨ́ nkanǎ Kesáre mé Fílipi. Nye nzě dî le ompʉ́n bé ó: «Bʉr lɨ́lɛ́ɛ́ ó, Mwân mé Mʉr, nye nzé?» 14Ompʉ́n, bé ntɔ̂ʼ yala ó: «Bâʼ bʉ̂r, bé lɛ́ɛ́ ó, go ó Yʉánɛs Ndubʉr. Bʉ́ʉ́, bé ó, go ó Elie. Bʉ́ʉ́ ntémé, bé ó, go ó Jérémie, nkʉ̂ nyʉ́ʉ́ ngwíha milɔ̌b mé Nzyɛ̌m swîh.» 15Nye ntɔ̂ʼ báʼǎ dî e bé ó: «Nó bɨ̌n bɨɛ̌ lɛ́ɛ́ ó, me nzé?» 16Simon Pétrus ntɔ̂ʼ yala ó: «Go ó Mʉ̌r Nzyɛ̌m á lœm múló mé jwɨ́ɨ nyá. Go ó Mwân mé Nzyɛ̌m dí kublakúbla nyá.»
17Yésʉs ntɔ̂ʼ lɛ́ɛ e né ó: «Go ó e metyɛʼ me mpóm, Simon Bar-Yónas. Ntʉ nyʉ̂l bipúno le metiê gwíh gó sâ yaá. Yê bé ó Sɔ́ŋ wǎm dí ɨ́ jʉ́o kʉ́ nyá. Nye ô lɛ́ʼlé gó yǎ. 18Mě lɛ́ɛ́ gó ó, díé lô, lé ó: “ekóʼ: Pétrus”. Nó lɨ́ ekóʼ énɨ̌ kʉ́ ó mé ngá bonǒ Mbɛ̌r-Nzyɛ̌m wâm yɨ́. Wé lwímlá le Sátan lɨ́ ebɨ̌m e dɔ̂m lé nɛ́ɛ: bisá bí dɔ̂m byé, byé ántaa wé ɨ́ nkul. 19Me ódwe gó sab Mpóʼo mé Dâ Nzyɛ̌m. Nó sá gó ngá kamle ɨ́ sí yɨ̂ʼ yɨ́, yé díʼee sâ gwár yé á pa kamlɔɔ kʉ́ yɨ́. Yaá ntémé gó ngá kam ɨ́ sí yɨ̂ʼ yɨ́, yé díʼee ntémé yaá Nzyɛ̌m á boo kam yɨ́.» 20Yésʉs ntɔ̂ʼ gbâ ómpʉ́n bé mpéné ó, bé l'anyamlě lɛ́ɛ mʉ̂r ó, nye ó Mʉ̌r Nzyɛ̌m á lœm múló mé jwɨ́ɨ nyá.
21Táare ɨ́ jɔʼ yaá, Yésʉs nzě gɔ́na le elɛ́ɛ ómpʉ́n bé ó, yé jala ó, nye tôʼ ɨ́ Yerʉ́zalɛm, nye síaa e mitúú ɨ́ buo buo ɨ́ mebó mé ótɔ́má bʉ̂r, le ojwɨ́ɨ o mpáh Nzyɛ̌m le olɛ̂ʼla o métié. Nye ntémé ójʉ́ŋɔɔ. Lɨ́ elú élɛ̂l píe tɨ̂, nye ópah ɨ́ soo. 22Nó Pétrus á nze tô e né ɨ́ bʉm, nzě dwe nyé mebě. Nye e né ó: «Nzyɛ̌m kámlaa sâ yaá yɨ́yɛ̂h lɨ́ edira ɨ́ go!» 23Yésʉs nzě dwira, le elɛ́ɛ e Pétrus ó: «Sátan, duhaa mé ɨ́ mîh. Go ó ebɔ̌ʼ e dí e nkul ebɨma mé ɨ́ léme lɨ́. Mipahlá myô, myé abe myaá mé Nzyɛ̌m, njɨ myaá mi bʉ̂r.»
24Yésʉs nzě lɛ́ɛ le ompʉ́n bé ó: «Mʉ̂r sí kpɛl édû mé nó, nye bénaa nye mʉr tɨ̂. Nye e nkɛ́ɛ́ kolôs yé. Nye e dú mê. 25Ebě, mʉr dí ekpɛl ékamle e twiʼ yé nyá, ódímle yê. Tó kœb ó, waá ngá bîr yé lɨ́ esú lâm nyá, nyɨ́haá ó ngá baʼle yê. 26Mʉ̂r nʉ́á sí yɨ̂ʼ yɨ́yɛ̂h, kǎ tó dímlě twiʼ yé nó, wáǎ nyɔm nyé ngá kǎ lîʼ e wé wɨ́? Yáǎ sɔ̂ʼ mʉ̂r dí e nkul esyɛ́ɛla lɨ́ esú lé ébáʼǎ bǐ twiʼ yé? 27Ebě, Mwân mé Mʉr múo nzě pyâl ɨ́ mentyɛnwa me Sɔ́ŋ wé, bé e bééngeles bé. Jɔʼ yaá ó nyé ngá tíʼe bʉ̂r milɔ̌b, dû mpʉ bísyɛ́ɛla byɔ́ɔ́, byé á be yɨ́. 28Mě lɛ́ɛ́ bɨ́n lɨ́ otyeetye ó, ɨ́ sɔ́má bʉ̂r o dí wâʼ báánâʼ bá, bʉ́ʉ́, bé ádwe, apǎ bee Mwân mé Mʉr lɨ́ enzě tyêl Mpóʼo nyé.»
Actualmente seleccionado:
Matthieu 16: ozm
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión