Matthieu 17
17
Yésʉs lɨ́ edwir nyʉ̂l
(Marc 9.28; Luc 9.28-36)
1Melú mésaman, mé osí laa nɛ́ɛ: Yésʉs nzě nʉǎ Pétrus, nʉǎ Jacques bé e mɨ́ɔɔ́ wé, Yʉánɛs. Bê nzě bére écwɨ̂ʼ ɨ́ jaa jaa kʉ́. Bé á be gʉ̂ʼ ó, bé omér. 2Nye nzě dwira nyʉ̂l ɨ́ míh mɔ́ɔ́. Nye mû kǎ nyɨ̂n ó, mbi swîh. Mpǒm nyé á be ó, nye mû pǎn mpʉ dʉ́o. Mikán myé pan ɨ́ pumo pumo mpʉ mímbah mi dʉ́o. 3Kǎ saʼ nɛ́ɛ: bé kǎ bee ó, Moyɨ̂z, bé le Elie, gúmó Yésʉs á be yɨ́. Bé e boo nɔ́ɔ́ lɨ́ elɛ́ɛla. 4Pétrus nzě lɛ́ɛ e Yésʉs ó: «Dâ ɛ̌! Yé mbɨa ó, mɨná díʼee gá wâ. Gó kpɛ̂l nó, me súmaa gá mɨná mpálá, bisaʼ bilɛ̂l: le yô, le yaá mé Moyɨ̂z le yaá mé Elie.»
5Mpʉ nyé á be, nye dína lɨ́ elwib yɨ́, dwiné ɨ́ ngé ngɨ ngé nzě búblo bê. Ompʉ́n, bé kǎ jóʼo ó, lʉ́ʉ́ étyêl lɨ́ eduho ɨ́ dwiné tʉ́ŋlʉ̌, lɨ́ elɛ́ɛ ó: «Nyâ, nye ó mwân wǎm mé dí ɨ́ buú kpɛl nyá. Me lɨ́ ekʉ́ mɛɛla e né. Jʉ́jóʼáá gá nye!»
6Njóʼá ómpʉ́n bé, bé á jóʼo lwǐb yaá yɨ́, bé ntɔ̂ʼ kúrwo sí, píʼe mémpǒm ɨ́ bibwǎh ɨ́ mpǒm mé Yésʉs, ebě, bé á be ó sí buú bil bʉ́á. 7Píe tɨ̂, Yésʉs ntɔ̂ʼ sîhlě nko bé á be yɨ́, nzě nzêʼre bê. Nye ó: «Gbɔlwaa gá sí! Ayɨ́ jóʼo gá bʉ́á!» 8Tyé e tyé yaá, ómpʉ́n ká dwɛ̂ʼ ɨ́ mempah mɨ́mɛ̂h nɛ́ɛ: bé jaá kǎ bee ó, njɨ Yésʉs nye omér.
9Jɔʼ bé á be, bé mû ó lɨ́ esulo écwɨ̂ʼ yɨ́, Yésʉs nzě gbâ bé mpéné ó: «Anyamlě lɛ́ɛ gá mʉr sá bɨ̂n beě yɨ́, tó pyâl ɨ́ jɔʼ Mwân mé Mʉr óbe, nye mû sí pah ɨ́ soo yɨ́.»
10Nó ó ómpʉ́n bé, bé á nze dî e né ó: «Yé bé nó wá, olɛ̂ʼla o métié, bé lɨ́ elɛ́ɛ ó, yé jala ó, Elie táaraa epyâl ɨ́ yé?» 11Nye ntɔ̂ʼ yala e bé ó: «Yê tyeetye ó, Elie, nye ɨ́ jala le enze lɨ́ esú ó, nye báʼa tyêl bísɔ̂ʼ ɨ́ bityé byɔ́ɔ́. 12Nó mě lɛ́ɛ́ bɨ́n ó: Elie, nyɨ́ boó nze. Sâ gwár, bé á bé adweʼe nyê. Bé á sâ nye ó, mbi cére wɨ́wɛ̂h bé á kpɛl esâ nye wɨ́. Mpʉ yaá ntémé ó Mwân mé Mʉr ngá sia e túú ɨ́ mebó mɔ́ɔ́ yɨ́.» 13Ompʉ́n bé ntɔ̂ʼ jóʼo ó, nye á lwib e bé nó ó, dumo e Yʉánɛs Ndubʉr.
Yésʉs lɨ́ etiʼ mwân á be le eleme nyá
(Marc 9.14-29; Luc 9.37-43)
14Jɔ̌ʼ Yésʉs, bé le ompʉ́n bé, bé á be, bé mû lɨ́ ekúnwo e gúmó éntumo e bʉ̂r lé á be yɨ́, nyʉ́ʉ́ mʉ̂r ntɔ̂ʼ nze, bɨʼ mébóó sí ɨ́ mpǒm mé Yésʉs. 15Nye e né ó: «Dâ ɛ̌, jɨ́ʼɨ́ɨ́ mwân wǎm nkoó, ebě, nye ó nzwoó, lɨ́ esílě bʉ̂ʼ. Nyě sɨ́sá ó, duma ɨ́ muró, nkʉ̂ ntémé ɨ́ medíbé. 16Me á si tô e né kwá ompʉ́n bô. Sâ gwár, bé á bé akoʼo étiʼ nyê.» 17Yésʉs ntɔ̂ʼ lɛ́ɛ e bé ó: «Bɨ̌n myǎ bʉ̂r o dí abûʼla wɨ́! Bɨ̌n bé ó njɨ e mesónó. Me káa báʼǎ di ɨ́ sɔ́má yɨ́n, tó pyâl ɨ́ yáǎ jɔʼ ɛ̌? Me ódûhwo bɨ́n, tó swîʼ yáǎ sûm ɛ̌? Ntáʼ gá me e mwân nɨ̌ wâ.» 18Bê nzě nze e mwân. Yésʉs ntɔ̂ʼ nkáŋla le eleme, lé ntɔ̂ʼ duho. Táare lɨ́ ewala egwár laá, tô dóló, loʼo yaá ntɔ̂ʼ tiʼe.
19Píe tɨ̂, ompʉ́n bé, bê nzě sîhlě nkǒ Yésʉs á be yɨ́, bé mû bé omér. Bé ó: «Bɨ̌h bɨɛ, bé akoʼo épɛʼ lé ɨ́ yé?» 20-21Nye nzě yala e bé ó: «Yé ó ɨ́ lɔ̌b búʼó yɨ́n dí ɨ́ twâʼwo yɨ́. Mě lɛ́ɛ́ bɨ́n lɨ́ otyeetye ó, bɨ́n óbe e mâ búʼó mpʉ díh é nyʉ́ó nó, bɨ̌n bé óbe e nkul elɛ́ɛ le ecwɨ́ʼ lɨ̂ʼ ó: “Nkɛ́yɨ́ɨ́ gó mʉr tɨ̂ʼ wâ. Tó tyɛ̂b kâ,” yé óbánǎ sâ nó. Abe e sá yé ógbâ bɨ́n mekɔbla tɨ̂.»
Yésʉs, lɨ́ elɛ́ɛ̌ lɔ́ɔ́ éswie lé ɨ́ jɔʼ mbá
(Marc 9.30-32; Luc 9.43b-45)
22Jɔʼ bé á be, bé dína lɨ́ etye ɨ́ sí Galilê yɨ́, Yésʉs, nye e bé ó: «Mwân mé Mʉr mû ó kúno ebɛ́mɔɔ kwá bʉr o ngá jʉ̂ nyé bá. 23Bé ójʉ̂ nyê. Sâ gwár, ɨ́ móhó lɛ̂l, nye ópah. Nyʉ̂l ntɔ̂ʼ tyɛʼ bé lɨ́ ejóʼo ékǎn laá.»
Yésʉs lɨ́ ejánǎ tœ́a lɨ́ esú é mpáh Nzyɛ̌m
24Jɔ̌ʼ Yésʉs, bé le ompʉ́n bé, bé á pyâl ɨ́ Kapernáʉm yɨ́, bʉr o b'á nʉnʉa bimɔnɨ́ bítœ́a lɨ́ esú é mpáh Nzyɛ̌m bá, bé á si nze nkǒ Pétrus á be yɨ́. Bé e né ó: «Nzê lɛ̂ʼla wɨ́n nyɨɛ, nye ájɨ́jáná tœ́a ɛ̌?» 25Pétrus, nye e bé ó: «Yé ó nó. Nyě sɨ́sá ó, jána.»
Jɔ̌ʼ Pétrus á nî mbɛ̌r yɨ́, Yésʉs nzě nyɛɛ́ nʉǎ lwǐb. Nye e né ó: «Simon, guǎ pahlě sɨ̂ʼ nyá ɛ́? Ojwɨ́ɨ́ ó sí yɨ̂, bé nʉnʉǎ mɔnɨ́ tœ́a kwá onzé? Nzê kwá bwán bɔ́ɔ́? Nzê kwá bʉr oswîh?» 26Nye nzě yala e né ó: «Yé ó kwá ojwóo.» Yésʉs nzě lɛ́ɛ e né ó: «Ɨ́ tɨ̂, yé lɛ́ʼlé ó, yê mpéné ó, mʉ̌r sá adî bwán mé njwɨ́ɨ mɔnɨ́ tœ́a. 27Damá be nó, mɨná bé agwɨ̂m egbâ gá bé ebɔ̌ʼ lé óbɨma bé ɨ́ miléme lɨ́. Nó, tóʼ, tó guho ésyɛb ɨ́ mâŋ. Sû esôʼ gó ójʉ̂ nyá, go e bɛ́ɛ́ nyé num. Go ókœ̌b nzǎŋ mɔnɨ́ tɨ̂. Nzaŋ waá, wé lɨ́ ejala e mɔnɨ́ tœ́a lɨ́ esú é bʉ̂r obá. Go e nʉ́á wê, gó otó jána mɨ́ná bitœ́a e tɨ̂.»
Actualmente seleccionado:
Matthieu 17: ozm
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión