Matthieu 22
22
Kɨkɛna nzɔ́ɔ ebâ
1Yésʉs á be lɨ́ ebáʼǎ sâ bé bikɨkɛna. Nye ó:
2«Mpóʼo mé Dâ Nzyɛ̌m nwɨɨlá ó e nyʉ́ʉ́ njwɨ́ɨ á tyêl nzɔɔ ebâ lɨ́ esú é mwân wé nyá. 3Nye nzě lómo ósyɛ̂l o mésá bé ó, bé tôʼ jébe bʉ̂r o nyé á boo báŋle ɨ́ nzɔɔ nyaá bá. Bɨ́ɛ ntɔ̂ʼ bene énze. 4Nye nzě báʼǎ lómo bʉ́ʉ́ ósyɛ̂l o mésá bé. Nye ó: “Lɛ́yɨ́ɨ́ gá bʉr o mé á báŋle bá ó: mɨ́ sîl ékomlo nzɔ́ɔ. Mɨ́ tíʼe bíntœœ le otír o dí ɨ́ nwaʼwo bá. Sá yɨ́yɛ̂h mû ó kʉmsá. Ntáʼ gá ɨ́ nzɔɔ.” 5Bʉr o nyé á báŋle bá, pyéhɔɔ mpáŋla nyé nyaá, atóŋɔɔ. Bé á sɨsâ ó: nyâ, tô ɨ́ yé pemé; nyʉ́ʉ́, tô ɨ́ wé mbɛ̌r mpɛ́ma. 6Baá bʉ́ʉ́, mɛ́rɔɔ ósyɛ̂l o mésâ ónɨ̌, sáŋɔɔ bé cére, jʉ́ŋɔɔ. 7Lémé mé njwɨ́ɨ, wé ntɔ̂ʼ lóno ɨ́ nkpaa, nye nzě lómo bísója byé lɨ́ etó jʉ̂ ójʉ̂l o bʉ̂r baá le edîʼ nkana yɔ́ɔ́. 8Píe tɨ̂, nye nzě lɛ́ɛ le osyɛ̂l o mésá bé ó: “Nzɔɔ ebâ nyɨɛ, nye mû ó kʉmsá. Nó bʉr o mé á báŋle bá, bé ajala le edi tɨ̂. 9Nó, tyɛ́bɨ́ɨ́ gá ɨ́ meman. Bɨ̌n a báŋlé mʉ̂r nyɨnyɛ̂h bɨ́n ngá bɔma e né nyá. Nye bwálaa ɨ́ nzɔɔ ebâ nyǎm.” 10Osyɛ̂l o mésá bé ntɔ̂ʼ tô ɨ́ menzɨ̌ mɨ́mɛ̂h, tô le egôhlɔɔ bʉ̂r o bé á bʉbɔma e bé bá, le bibɨ́bla bi bʉ̂r le otîtyěl o bʉ̂r. Mbɛ̌r nzɔ́ɔ ebâ nzě lóno lɨ́ ojwóo ɨ́ lúrúdú.
11«Jɔʼ njwɨ́ɨ á nî mbɛ̌r yɨ́, nye nzě dwɛ̂ʼ ójwóó bé á be ɨ́ téble bá. Nyě kǎ bee ó, nyʉ́ʉ́ mʉ̂r abe e mikán mí nzɔ́ɔ ebâ ɨ́ nyʉ̂l. 12Nye nzě dî e né ó: “Só wǎm, yê nyá? Gua ka nzé wâ, abwâr yɨ́ɛ kán nzɔ́ɔ ebâ ɨ́ yé ɛ́?” Mʉr waá kâr éyalǎ sɔ̂ʼ. Nye á jaa di ó, njɨ ɨ́ jwɨ́m. 13Njwɨ́ɨbʉr nzě lɛ́ɛ le osyɛ̂l o mésá bé ó: “Káʼáá gá nye mebô e mekʉ̌. Bɨ̌n a gúhó nyé lɨ́ edúrʉ́ʉ́ dí kʉ̌l lɨ́, nko bʉ̂r, bé ójóno le epûʼlo médye yɨ́.”»
14Yésʉs nzě kɛl tɨ̂ʼ ó: «Ebě, baá o dí ebáŋlɔɔ bá, bé ɨ́ buo. Sâ gwár, baá o dí mitwárá bá, bé abuo.»
Mɔnɨ́ tœ́a mé Kɛ́ɛza
(Marc 12.13-17; Luc 20.20-26)
15OFarizyɛ̂n, bê nzě tó sáa pɨ̂ʼ ó, bé nkʉ̂ lâm nyé lâm dí ó, bé mɛ́rɨɨ nye ɨ́ lɔ̌b bíyalá byé. 16Bé ntɔ̂ʼ lómo bʉ́ʉ́ ómpʉ́n bɔ́ɔ́ nko nyé á be yɨ́, bé e bʉ́ʉ́ bʉ̂r o nkɔ́m mé Erôd. Nó ó bé á lɛ́ɛ e né ó: «Lɛ̂ʼla, bɨ̌h bɨ́ gʉ́a ó, gǒ lɛ́ɛ́ ó, otyeetye. Go ntémé, gǒ lɛ́ʼlé bɨ́h ó, nzɨ̌ mé Nzyɛ̌m lɨ́ otyeetye. Go ntémé, gó abe lɨ́ edwáawo bʉ̂r mempǒm. 17Lɛ́yɨ́ɨ́ bɨ́h jwɨʼ yô mpʉ yé dí yɨ́. Nzê metié gá mɨ́ná, mé kam ó, mɨná jánaa gá Kɛ́ɛza tœ́a ɛ̌? Nzê yê mpéné ó, mʉ̌r sá ajána nyé yǎ ɛ̌?»
18Náǎ yé ó, Yésʉs nyɨɛ lɨ́ egʉ́a míkóo myɔ́ɔ́. Nye ó: «Bɨ̌n bóbló mé ɨ́ yé, bɨ̌n baányâ-mikóo bâ? 19Lɛ́ʼláá gá me mɔnɨ́ bɨ́n dí ejánǎ tœ́a e tɨ̂ʼ yɨ́.» Bé ntɔ̂ʼ lɛ̂ʼle nyé nzǎŋ mɔnɨ́. 20Yésʉs ntɔ̂ʼ dî e bé ó: «Mpǒm mé nzé le díé mé nzé dí lúlá ɨ́ nzaŋ wɨ̂?» 21Bé e né ó: «Yé ó bisá mé Kɛ́ɛza.» Nye nzě lɛ́ɛ e bé ó: «Bwóóláá gá bé Kɛ́ɛza bisá mé Kɛ́ɛza; bɨ̌n e bwóóló Nzyɛ̌m byaá mé Nzyɛ̌m!» 22Mpʉ bé á jóʼo nye lɨ́ elɛ́ɛ nó yɨ́, bé ntɔ̂ʼ buú kâm nyê, líʼɔɔ nyê, tóŋɔɔ.
Lɛ́ʼlá ɨ́ lɔ̌b épah ɨ́ mesoo
(Marc 12.18-27; Luc 20.27-40)
23Ɨ́ dʉ́o egwár laá ntémé ó, óSadwisyɛ̂n, bʉr o dí elɛ́ɛ ó, odwe, bé ákóʼó pah ɨ́ mesoo bá, bé á tô kwá mé Yésʉs. Bê nzě tó dî e né ó:
24«Lɛ̂ʼla, Moyɨ̂z á si tyêl mɨná gá etié lɨ̂. Yê cɛmá ɨ́ Mekaná mé Nzyɛ̌m ó: “Mbɛ́á mʉ̂r óbe, sí dwe, alíʼe mwân nó, yé jala ó, mɨ́ɔɔ́ wé bâʼ mʉmá wé, bé e mʉmá waá nkʉ̂ byâ bwân lɨ́ esú é mɨ́ɔɔ́.” 25Tó kœb ó, yé á be bɨ̌h wâʼ ó e bʉ́ʉ́ bʉ̂r. Bé á byɛ̂l ɨ́ mo ngwár ó, nzaangbá, bʉrʉ̂m e bʉrʉ̂m. Medwéʼe nzě bâ mʉ́má. Di ɨ́ di di di, nye nzě dwe, alíʼe mwân sí. Mpʉ nyé á be abyâ yɨ́, nye ntɔ̂ʼ líʼe mʉ́má wé ɨ́ mebó mé mɨ́ɔɔ́ wé, waá á bɔma nye nyá. 26Syɛ́ɛla yaá pyâl ɨ́ waá mbá, le waá lɛ̂l, tó tôʼ, tó pyâl ɨ́ waá nzaangbá. 27Jɔʼ bɨ́bɛ̂h bé á be, bé mû sí dwe yɨ́, mʉmá waá ntémé nzě dwe. 28Nó dʉ́ó bʉ̂r ngá pah ɨ́ mesoo yɨ́, mʉmá waá ójóʼo e nzé lɨ́ bɨ́ɔɔ́ nzaangbá baá? Ebě, bɨ́bɛ̂h, bé á si bâ nye!»
29Yésʉs nzě yala e bé ó: «Bɨ̌n bê sí bɔ́ʼa le otyeetye, ebě, bɨ̌n bé agʉ́a Mékaná mé Nzyɛ̌m, agʉ́a ntémé nkul nyé. 30Ɨ́ jɔʼ bʉ̂r, bé ópah ɨ́ mesoo yɨ́, bé ákǎ bɛ́a. Bé ódidi ó mpʉ bééngeles dí eboó di ɨ́ jʉ́o kʉ́ yɨ́. 31Bɨ́n dí mé tíá ɨ́ nkǒ páʼ ódwe, le mpʉ bé ópah yɨ́ nó, bɨ̌n e gʉ́á ó, ntʉ ódwe dí edwě Nzyɛ̌m kûm. Yé ó njɨ bʉr o dí etiʼe bá. Nzê bɨ̌n á bé aláa ékǎn Nzyɛ̌m á cɨ tɨ̂ʼ lɨ́? 32Yê cɛmá tɨ̂ʼ ó: “Me ó Nzyɛ̌m, waá Abraham, Isaac, ndu e Yákɔb dí edwe kûm nyɔ́ɔ́ nyá.” Nzyɛ̌m, nyé abe waá odwe. Nye ó Nzyɛ̌m mikublakúbla mi bʉ̂r.» 33Entumo e bʉ̂r lé á be tɨ̂ʼ lɨ́, lê nzě buú kâm mílɛ́ʼlá Yésʉs á dwidwe bé mí.
Etié dí entaa métié mɨ́mɛ̂h lɨ́
(Marc 12.28-34; Luc 10.25-28)
34Jɔʼ óFarizyɛ̂n, bé á jóʼo ó, Yésʉs á si pɨr oSadwisyɛ̂n minum yɨ́, bé ntɔ̂ʼ sáa pɨ̂ʼ ɨ́ lɔ̌b wé. 35Mʉr ngwár ɨ́ sɔ́má yɔ́ɔ́ á be tîʼ milɔ̌b nyá, nzě bóblǒ Yésʉs. Nye e né ó:
36«Lɛ̂ʼla, ɨ́ metié gá mɨ́ná, láa étié dí elaa mʉ́ʉ́ ɨ́ medile?» 37Yésʉs nzě yala e né ó: «Etié e dí elaa mʉ́ʉ́ ɨ́ medile lɨ́, lé ó: “Kpɛlɨɨ̌ Dâ, dí Nzyɛ̌m gǒ nyá, le lémé gô wɨ́wɛ̂h, le sísǐm gô wɨ́wɛ̂h le pɨʼ nyǒ nyɨnyɛ̂h!” 38Lɨ́haá, lé ó dí esôʼ. Lé ntémé, lé ó etié e dí elaa mʉ́ʉ́ ɨ́ medile lɨ́. 39Nó laá émbá, bé e laá lé ésôʼ dile ó, jwɨʼ gwár. Lɨ́haá, lé ó: “Kpɛlɨɨ mɨ́ɔɔ́ gǒ mʉr mpʉ gó kpɛ́l gó mʉr tɨ̂ʼ yɨ́!” 40Metié mebá ménɨ̌, mé ó mpɔmá bisá Moyɨ̂z, bé le ogwíha o mílɔ̌b bé á cɛma bí.»
Mʉ̌r Nzyɛ̌m á lœm múló mé jwɨ́ɨ nyá, bé e David
41Mpʉ óFarizyɛ̂n, bé á be, bé dína sɔ́má gwár yɨ́, Yésʉs ntɔ̂ʼ dî bé tíá nyɨ̂ʼ ó:
42«Bɨ̌n pʉgʉ́ jwɨʼ nyá, dumo e Mʉ̌r Nzyɛ̌m á lœm múló mé jwɨ́ɨ nyá? Nye mwân mé nzé?» Bé ntɔ̂ʼ yala e né ó: «Nye ó Mwân mé David.» 43Yésʉs nzě lɛ́ɛ e bé ó: «David, nye mʉr tɨ̂, e nzɨ̌ Sísǐm mé Nzyɛ̌m, á jébe Mʉ̌r Nzyɛ̌m á lœm múló mé jwɨ́ɨ nyá ó, “Tî wǎm” ɨ́ yé? David á lɛ́ɛ ó: #22.43: Nye á cɛma nó ó, ɨ́ Sâm 110.1. 44Dâ Nzyɛ̌m á lɛ́ɛ e Tî wǎm ó: “Diʼee sí wâ, ɨ́ páʼ mbó éjʉ́m wâm. Go e bónó ɨ́ puuu náǎ, tó pyâl ɨ́ jɔʼ mé ósâ óntɨ̂m le obɨn bô ó, bé díʼee sí mebo mô yɨ́.”
45«Olɛ̂ʼla o métié jébé Mʉ̂r Nzyɛ̌m á lœm múló mé jwɨ́ɨ nyá ó: “Mwân mé David.” David nyɨɛ á jébe nye ó: “Tî wǎm”. Á bɨ̌n bɨɛ̌ kǎ lɛ́ɛ ó, Mʉ̌r Nzyɛ̌m á lœm múló mé jwɨ́ɨ nyá, nye ó “Mwân mé David” e nyáa nzɨ́?»
46Mʉr á bé akǎ be e nkul eyala tíá nyé. Táare ɨ́ jɔʼ yaá, abe e mʉr á ka baʼa dî nye tíá ɨ́ gúú lɔ̌b, ebě, bé á bé akoʼo nyê.
Actualmente seleccionado:
Matthieu 22: ozm
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión