Ubwandilo 8
8
Ukumalika kwa mwelēsyo
1Lolị Kyala alinkunkumbuka Nwaka pamopēne nifịnyamāna fya nndị̄su, ni ng'ōmbe pakị̄su, po papo amīsi galinkukuluka panāndi panāndi. 2Īnyịbuko sya mbusolofụ ni fịfịgo fya kumwanya fịlinkwịgalịgwa, nifụla iji jōnekaga ịtolo jilinkukya. 3Kangi gōpe amīsi galinkwendelela ukukuluka. Bo gakīndịle amasịku imịa jimo na malōngo mahāno, amīsi galinkumalika. 4Mmwesị gwa buhāno na bubili, pịsịku lya kalōngo na mahāno na mabili, po ingalaba jilinkwịkịnya pamwanya pa kyamba kimo mfyamba fya Alalati. 5Agēne amīsi go galinkwendelela ukūma ukwakufịka mmwesị gwa kalōngo pị̄sịku lya kwanda ilya mwesị gwa kalōngo po fịlinkwada ukuboneka ifyamba pamwanya.
6Bo gakīndịle amasịku amalōngo mana (40), Nwaka alinkwịgula pabwasị ubu ātendekị̄sye mụ ngalaba. 7Alinkulisōsya ilị̄kūngūlu lyo lilinkubēta ịtolo kisịta kugomoka, ukwịsakufịka apa gūmilaga amīsi pa kị̄su. 8Pānyụma Nwaka alinkujisōsya īngūnde ukwakukēta linga amīsi gūmịle pakị̄su. 9Lolị īngūnde bo jikapāga napamo pa bwimo, jilinkugomokela kwa Nwaka mụ ngalaba, namanga amīsi gākāli gālipo pakị̄su kyosa. Po papo Nwaka alinkugolosya ikiboko kyake alinkujāmbilila nu kujị̄ngisya mụ ngalaba. 10Alinkugụ̄lilapo kangi amasịku mahāno na mabili, po alinkujituma kangi īngūnde ukufụma mụngalaba. 11Ījēne īngūnde jilinkwakugomoka namajolo, alinkwaga ulu po jị̄sịle ni lyanị lya nsyunguti kukanwa, po Nwaka alinkusyaganịa ukuti amīsi gakulwịke pakị̄su. 12Alinkugụ̄lila kangi amasịku mahāno na mabili, po alinkwenda nukujituma īngūnde; ijēne jilinkusita nukugomokelako kangi jājōngị̄le jījo.
13Amīsi gālyumịle lōsa pakị̄su pị̄sịku lya kwanda ilya mwesị gwa bubili, bo Nwaka ali nifyinja bāmịa ntandatu ni kyinja kimo (601) pamwanya. Nwaka alinkusōsyapo ikikụpikililo pamwanya pa ngalaba, alinkwenēsya pakị̄su, alinkwaga ukuti amīsi gūmịle. 14Mmwesị gwa bubili pị̄sịku lya malōngo mabili na masịku mahāno na mabili ilya mmwesị gula gula ugwa bubili ikị̄su kyosa kilinkuja kyumụ ịtolo. 15Po papo Kyala alinkummbūla Nwaka alinkuti: 16Usōkege mụ ngalaba pamopēne nu nkasịgo, na banāko abālumyāna, na bakasị bābo. 17Usōkege nafyo fyosa ifya būmị ifị filị nanụngwe, ifya būmị ifya luko lōsa, injunị, nifịnyamāna na fyosa ifi fịkwendela ulwanda ukuti fyolokege fị̄jo pakị̄su; ukuti fịbāle fị̄je fị̄ngị. 18Po papo Nwaka alinkusōka mu ngalaba pamopēne na banāke na ju nkasị, kangi na bakasị ba bānāke. 19Pamopene ni fịnyamāna fyosa ifya nndị̄su ni ng'ōmbe, ni njuni, syosa nifị̄ngị fyosa ifị fịkwendela ulwanda filinkusōka uluko nu luko.
Nwaka ịkwịkemesya kwa Kyala
20Umwene Nwaka alinkunnjēngela UNTWA ikigemo kya kwịkemēkesyapo, alinkwegapo fịmo nifịnyamāna ifị bịkulya, ni njunị sịmo isị bịkulya; fyo alinkuntwalila UNTWA ukuja ịkemo ilyokye pa kigemo kila kila. 21Lelo bo UNTWA alupilịke ulūma ulunyāfụ, alinkujoba mụ ndụmbụla jāke mwene alinkuti: Ndịsakukigụnamo kangi ikị̄su panōngwa ja mụ̄ndu, mmēnye ukuti inyịnogono sya mụ̄ndu mbị̄bị ukufụma mụ mbutụbwa bwake. Kangi ndịsakwandisya ukufịpyụta ifya būmị fyosa bo apa mbōmbịle lilino. 22Bo ikị̄su kikāli kilịko, utubalilo twa kubyalila nu twa ntondolo, utubalilo twa mbepo nutwa mafuku, utubalilo twa kisịku nu twa lumụ, utwa pamụ̄si nu twa pakilo to tukujangako bwịla.
Actualmente seleccionado:
Ubwandilo 8: NYB96
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Nyakyusa Bible © Bible Society of Tanzania, 1996.