Mateyo 7
7
Ukupingula bambi
(Luk. 6.37-38,41-42)
1“Mulokupingulapo bambi, pakuti namwe Lesa ekamupingulapo. 2Pakuti Lesa akamupingwila mumusango umo wenka uwo mupingwilamo bambi, nomulingo uwo mukolingilako bambi ewo namwe Lesa akamulingilako. 3Mba nindo ukololesesha akapande akali mulinso lyakuwenu, elo we wasula ichipande ichili mulinso lyobe? 4Elo kuti wasosa shani kuli wenu ati, ‘Leka mfunye akapande akali mulinso lyobe,’ ulo mulinso lyobe muli ichipande? 5We wakutumpayika we! Bala uyishibule ichipande ichili mulinso lyobe, elo wakulolesha bwino nokufunya akapande akali mulinso lyakuwenu.
6“Mwipelako ichili ichapatulikwa kumbwa, epali shamwalukila nokumusuma. Nakambi mulokuposelapo inkumba impande shenu ishamutengo, epali shanyantaulapo.
Lomba, fwaya, konkonsha
(Luk. 11.9-13)
7“Lombeni, elo mwakupelwa. Fwayeni, elo mwakusanga. Konkosheni, elo mwakwiswilwa. 8Pakuti onse uulomba alapelwa, uufwaya alasanga, nangulya uukonkonsha aleswilwa. 9Napo ninani pali mwe, ulo umwana wakwe amulomba umufuba, angamupela ibwe? 10Nangula ulo amulomba inswi, angamupela insoka? 11Nomba nga mwebo mwebabi mfi, mwalishiba ukupela abana benu ifiweme, mba Bawishinwe abakumulu kuti bafilwa shani ukupela ifintu ifiweme kuli bo abakobalomba?
12“Fyonse ifyo mukofwaya ukuti abantu bamuchitile, efyo namwebo mulokubachitilako. Pakuti nku ekusambisha kwamafunde akwa Mosesi nabasoseshi.
Umulyango uuche
(Luk. 13.24)
13“Injileni pamulyango uuche, pakuti umulyango uutwala kukonayika ukulu, elo nenshila yauko nayo ikulu. Echo nabantu abendamo benji. 14Elo umulyango uutwala kubumi ubutapwa uuche, elo nenshila yauko iiche. Echo nabantu abayisanga bakupenda bwaka.
Ichiti nefitwalo fyachiko
(Luk. 6.43-44)
15“Chenjeleni nabasoseshi ababufi. Mba besa kuli mwe bakoboneka kubati nimbelele, kuntu mukati mimbulu iikali. 16Mwakubeshibila kufitwalo fyabo. Napo abantu balaswa impesha kumyunga nangu amakunyu kumituntulwa? 17Ichiti ichiweme chitwala ifitwalo ifiweme, kuntu ichiti ichabipa chitwala ifitwalo ifyabipa. 18Ichiti ichiweme tekuti chitwalepo ifitwalo ifyabipa, nechabipa tekuti chitwalepo ifitwalo ifiweme. 19Ichiti chonse ichitatwalapo ifitwalo ifiweme bakachitema nokuchiposa mumulilo. 20Kanshi kumichitile yabo eko mwakubeshibila.
Mwebo tanshamwishibilepo
(Luk. 13.25-27)
21“Te bonsepo abanjita ati, ‘Shikulu, Shikulu’ bakwinjila mubufumu bwakumulu, kuntu bo abachita ukufwaya kwaku Bata abali kumulu. 22Ulo akasuba kabupingushi kakwisa, abantu abenji bakusosa kuli ne ati, ‘Shikulu, Shikulu, nimwishina lyenu umo twalikushimikila amashiwi enu. Nimwishina lyenu umo twalikutamfishamo imipashi iibi, elo nokuchitilamo ifyafiso ifikulu ifinji.’ 23Elo nandibo nakubasuka ati, ‘Nshimwishibilepo! Fumeni mpa mwe bachita ububi.’
Bakemaka bamananda babili
(Luk. 6.47-49)
24“Echo umuntu onse uukoumfwa amashiwi anji nga nokuyachita eupalene nomuntu uwamano uwayimeke inanda yakwe pamwala. 25Imfula yalilokele, inika shalyamine nechipupu chalikuntile pali njilya nanda, kuntu tayawilepo iyowo, pantu yayimekwe pamwala.
26“Kabili umuntu onse uukoumfwa amashiwi anji nga nokutayachita, eupalene nomuntu uutumpile uwayimeke inanda yakwe pamusenga. 27Imfula yalilokele, inika shalyamine nechipupu chalikuntile pali njilya nanda, nayo kayikunta napanshi natuyu!”
Ukusambisha kwaku Yesu kwafiso
28Ulo Yesu ashilile ukusosa nga mashiwi, ibumba lyabantu lyalishimbilwe ukwinekantu pakusambisha kwakwe. 29Talipo kubati basambishi ba Mafunde yakwa Mosesi, kuntu Ye alikusambisha umo abelele nensambu.
Actualmente seleccionado:
Mateyo 7: LalaNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Chilala New Testament © Bible Society of Zambia, 1998.