KEJADIAN 1
1
Allah nen pogot kweang yi mene ti mene mondogat elalhikhe wene
1O eroba Allah nen he, pogot inom, kweang inom, elalhikhe 2Elalhikhe andi re, pogot kweang fanorogo afe hale'lek, we hesangge-pesangge were'ma, yi mene ti mene mondogat a'ma sebelek logolik, o mondok mum hikhaksek welagaikhe. A'nogo werek kwelek At Allah Areagun i agum ebene lagik wagik ikhi lagaikhe. 3A'nogo hilingitunem At Allah nen ikhi logolik mel isikhe, ”O wei uago.” iluk isikhemo, arat wei isikhe.#2Kor. 4:6 4Wei isikhemo, At Allah nen eilenggen hasikhesik he, ”Andi fano hilingisogo figi higi,” iluk anggasikhesik, o wei isikhemo selek mene andi mum anggele'ma nen minggilogo ale'ma fesikhe. 5Fesikhesik he, o wei isikhe andi linggene salhikhe. Nen, o mum andi enu, hubanggo salhikhe. A'nogo salhikhe andi re, enggi attagat hubagaikhesigen wei isikhe re andi.
6-7Hobuk Allah nen he, mel isikhe, ”I yi re, minggilogo ekhe ponggwe lagagik, ekhe manggwe pigik, ikhi logobagaigen, tulem huli warogo pogot talasuak, iluk at Allah nen a'nogo i minggilogo ekhe ponggwe liakfigik ekhe manggwe pelakfigik isikhesik he, huli warogo fesikhe andi.#2Ptr. 3:5 8A'nogo huli warogo amu-amu logouwageluk fesikhesik huli warogo ekhe pogot talagaikhe a'nogo enu pogot salhikhe. Salhikhemo nen enggi pirenek engge o hubagaikhesik he, o wei isikhe andi.
9Hobuk Allah nen he, mel isikhe: ”I pogot a'ma welagen ari, kweang weinam asimbik logouwagen he, elesi wulagaisogo misi'mo andogosi laga logoino o,” iluk isikhemo, arat hilinglagaikhe. 10A'nogo hilinglagaikhemo, Allah nen kweang wurik agaikhe mene andi enu kweang salhik, i misi'mo andogosi lagaikhe mene andi enu, ”I laut yenggelek,” salhik, isikhe. A'nogo salhikhesik, eilenggen hasikhesik he, ”Andi fano elalogo fisigi higi,” iluk isikhe.
11At Allah nen a'nogo isikhesik he, ekhe mel isikheat: ”Kweangma re, e yi agayo ti agayo engga yi engga ti engga, enggen ebe lek awi faget enek iterek mene inom, enggen ebe were'ma nenggarek mene inom, fulelogo wilibuago,” iluk isikhemo, arat fulelogo hilinglagaikhe. 12Allah nen he, ”A'nogo wilibuago,” iluk isikhemo higithogoat, kweangma nen yi engga ti engga, e yi agayo ti agayo fulelogo wilifikhe. A'nogo hilingitesik, eilenggen kwelakhasikhesik he, ”Mondok fano elalogo fisigi higi,” iluk anggasikhe. 13A'nogo hilingitikhemo nen, enggi henaganek mene hubagaikhesik he, wei isikhe andi.
14-15Hobuk Allah nen he, ”O selek mene nen, kweangma selegeratik, o hup a'lugen wei ikhi logogin mene andi huli warogo figik, o lingge inenggi wenatik, mo lagagik, pigik, ugu kwelek yi tahun ti tahun inenggi wenatik, o andem higit Allah faget hilingiti logouwok, iluk inenggi wenatik, ikhi logouwagen pogoroba nen ekhe hilinglame o,” iluk yagatikhemo, arat hilinglagaikhe. 16A'nogo hilinglagaikhe andi re, Allah nen selek hokho mene ebe pire elalhikhe. Andi re, linggene faget esin logouwageluk, mo hokho mene elalhik, hubanggo faget esin logouwageluk he, tugi hokho mene elalhik, isikhesik, ekhe hesagal hokhorogo elalhikheat. 17At Allah nen a'nogo elalhikhe andi re, selegeraterek mene kweangma mondogat selegerati logouwageluk pogoroba fesikhe. 18Allah nen he, linggene selegerati logouwageluk he mo figik, hubanggo selegerati logouwageluk he tugi figik, ikhi logolik mum ale'ma, selek ale'ma, logouwageluk fesikhe. A'nogo fesikhesik, eilenggen hasikhesik he, ”Mondogat fano elalhogo fisigi higi,” iluk isikhe. 19A'nogo hilingitikhemo nen, o enggi enggaminogonek engge o hubagaikhesik he, wei isikhe re andi.
20Hobuk Allah nen he, mel isikhe: ”Yi mene ti mene ima ineluk logogun mene inom, yirue-tirue inesi yinik-hunik kweang honggolek pogot honggolek tulemkwe tarogo nikhi logogun mene inom mondok hokhorogo hilinglasuago,” iluk isikhe. 21A'nogo isikhesik, i laut yenggelek a'ma ebe hokhondek mene ekhe hokhorogo elalinafik, yi mene ti mene i a'ma eluk logogin mene ekhe hokhorogo elalinafik, yirue-tirue tarogo nikhi logogin mene hokhorogo elalinafik, isikhe. A'nogo elalinafikhesik, eilenggen hasikhesik he, ”Mondok fano elalogo fisigi higi,” iluk isikhe. 22A'nogo isikhesik, it mondogat andi, i a'ma ineluk logogun mene andi inebe hokhorogo hilingla'luk, i laut yenggelek a'ma yi awi ti awi mondogat welagik, yirue-tirue tarogo nikhi logogin mene andi inebe hokhorogo hilinglagik, uageluk, at Allah nen fanot fisikhi logolik: ”Hit hinebe mondok hokhorogo sik-pik ini o,” iluk isikhe. 23A'nogo isikhemo nen, enggi fuap enggeba hup agaikhesik he, o wei isikhe andi.
24Hobuk Allah nen he, mel isikhe: ”Kweang elema yoma nen yi mene ti mene kweang amboloba logogin mene, ebe hokhondek mene inom magendek mene inom, eil ena mene inom, eil polok mene inom, alaburen serap warik nikhi logogin mene inom, wulibime o,” iluk isikhemo, arat wulibi wagaukwa. 25Allah nen yi mene ti mene eil ena mene inom, eil polok mene inom kweang kwe pololangerik nikherek mene inom, elalhikhesik at Allah nen, eilenggen hasikhesik he, mondok fano elalogo fisigi higi,” iluk isikhe.
26Hobuk Allah nen he, mel isikhe: ”Niren afuni nit ninebe higit, ninobabut higit ekhe elal inabuogo. A'nogo elalogo fisamo iren, yi ikan ti ikan i laut yenggele'ma logogin mene inom, yirue-tirue pogot ebene tarogo nikhi logogin mene inom, yi mene ti mene eil ena mene eil polok mene ebe hokhondek mene inom magendek mene inom, kweanggwe pololangerik nikhi logogin mene inom, mondogat it inenggiba logouwageluk elalinabuogo,” iluk isikhe.#1Kor. 11:7 27A'nogo isikhesik, afuni inebe at ebe higit ap inom, he inom, elalinafikhe.#Mat. 19:4; Mrk. 10:6#Kej. 5:1-2 28A'nogo elalinafikhesik, Allah nen fanot fisikhi logolik, mel yagaisasikhe: ”Hiren taginabugun mene o yi awi ti awi eise asimbik it inenggiba logouwageluk, hinebe hokhorogo sik-pik ikhi logolik yi ikan ti ikan inom, yirue-tirue inom, yi mene ti mene ekhe eil ena mene ekhe eil polok mene mondogat hit eise logoino o.
29Nen, hinamburu ninggi logogun mene re: yi engga, ti engga, e yi agayo ti agayo enggen ebe lek awi faget enek iterek mene inom, enggen ebe itunem nenggarek mene inom, iti logogin mene yoma hit wokhisigi o. 30Ariginik oba nen yi wam ti wam, yirue-tirue, eil polok mene inom, kweangma pololanghogo nikhi logogin mene inom, ninggi logogun mene iluk yi mene ti mene yatu mene inom amu wilifu mene inom andi mondogat it ninggi logogun mene wokhisigi o,” isikhemo, isikhe mene higithogo nek agaikhe. 31At Allah nen yi mene ti mene andi mondogat elalik waga lagaikhesik, eilenggen hasikhesikhe he, ”Yoma fano mondok elalogo fisigi higi,” iluk isikhe. A'nogo isikhesik he, o inenggi falfalik oba hubagaikhesik, wei isikhe re andi.
Actualmente seleccionado:
KEJADIAN 1: inohap
Destacar
Compartir
Copiar
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fes-ES.png&w=128&q=75)
¿Quieres tener guardados todos tus destacados en todos tus dispositivos? Regístrate o inicia sesión