HLIMI 3
3
Naŋa nì cɛlɛ nì pe prɔmo kayoʔo wa Edɛn nagɔ ni we
1Wa ajobo ni be wɔgɔ ki dá bo ticlimi nì mà toro pì bɛfu na bì gban bì da pèè fanla. Àʔa bâ cɛlɛ yugu mà yo: «Kayocɛnŋɛ gi yo mâ yo Nyɛʔɛlɛ lí yo yò gáa nagɔ tiri ti pibi pà ka ge?»
2Cɛlɛ wɔ̀ɔ kí yo wɔgɔ ma mà yo: «Pa wo gban bì da nagɔ tiri ti pibi pì bɛfu ka, 3fɔ mà laʔa tiʔi ga na kí nyɛ wa nagɔ wi nulala ni le. Nyɛʔɛlɛ li diʔí yo wo kan mà yo: ‹Yò je gá kà ka. Yò je gá maʔa ki na kpo, ná kiì ban, pa ye gu.› »
4Wɔgɔ àʔa wí po: «Ayo, yoo gu dɛ! 5Di Nyɛʔɛlɛ lí maʔa cɛn mà yo: Nyiŋi ga na yé bi gà kà ka, pa ye kanyɛmɛ cɛn me. Pa ye bo nɛ pa liì nyɛ le bì da gbanni bì da kmaʔa nì tipeʔe cɛnni ge.»
6Cɛlɛ wɔ̀ɔ ki wele màʔa nya, nà ma da ki tiʔi pibi wele pí nyɛ kmama. Wɔ̀ɔ pí nya akakmaʔa gi ga ki laa kí na hɛn cun we mâ nì mâ po, nà maʔa ka, pa ma kaʔa fafaʔa cɛn ge. Wɔ̀ɔ kà cɔ nigbe màʔa ka mà kà kan wi pɔlɔ ma ŋa wi dá bo be wì tanla. Wiì wɔ̀ɔ kí syɔ màʔa ka kpo. 7Pe syɛnmu à pe kanyɛmɛ cɛn me. À peʔe cɛn mà yo pe dá bo waʔafeele. À pe fige tiʔi wɛbɛ kpe mà pi lyɔli pì na mà pi pwɔ pe na.
8Yaakwɔʔɔ na, tiflɛʔɛ nì kí na funnu, naŋa nì cɛlɛ nì à pe Bajegɔ Nyɛʔɛlɛ li tanʔama loʔo wa nagɔ lama ni me. À pe fɛ mà hra li na wa tiri wɛbɛ ni be. 9Bajegɔ Nyɛʔɛlɛ à li naŋa yeri mà yo: «Má nyɛ hanbe?»
10Naŋa wɔ̀ɔ yo: «Mí ma ma tanʔama loʔo naʔa nagɔ ni we. À mi fya, mɛjɛn mí nyɛ waʔafe. Ki kala na, à mi hra.» 11Bajegɔ Nyɛʔɛlɛ à li yo: «Han maʔa yo má kan mâ yo ma dí bo waʔafe ge? Má ma tiʔi pibi pà ka yo ba mi dá yo mò je ga pà ka ge?»
12Naŋa wɔ̀ɔ yo: «Cɛlɛ ŋa ma dá gan ná ma mâ yo wi kò nà tanla ge, wiì wi wí ma ki tiʔi pibi kan be na ma, à mi pi ka.»
13Ki nyiŋi na, Bajegɔ Nyɛʔɛlɛ à li cɛlɛ po we: «Nyaʔa ma kan á ma ki woʔo ga hanri ge?» Cɛlɛ wɔ̀ɔ yo: «Wɔgɔ kí ma na fanla, à mi ki tiʔi pibi ka be.»#3:13 ma wèle wa 2Kor 11:3; 1Tim 2:14 ni wè.
14Bajegɔ Nyɛʔɛlɛ à liʔi yo wɔgɔ ma mà yo:
«Pa ma gâ ki woʔo ga hanri ge,
má bi danŋa mo nigbe to wa ajobo pì bɛfu ni.
Má bi da flolo ma lala na le
bì da taplɔʔɔ ka ma nyuwyeʔe ki bɛfu ni.
15Mí bi bɛnʔɛmɛ le yè kpafoʔo ni, mo ní cɛlɛ nì we,
bì mì le nɛ cɛlɛ wi kluʔu pii ní, mo ma kluʔu pii ní pe kpafoʔo ni.
Cɛlɛ wi kluʔu pii wà bi ba ma yugu jaʔabu ge,
di mo pa moo no wi cyele na le.»#3:15 ma wèle wa Tyɛ 12:17 ni wè.
16Bajegɔ Nyɛʔɛlɛ à liʔi yo cɛlɛ ma we nɛ́ mà yo:
«Mi bi acɛnŋɛɛ tama cɔlɔʔɔ wa ma na.
Má bi baa deʔe bi naa ma pii hin be.
Ma pɔlɔ wi laa kí bi ma co,
di wí bi glɛn ma yugu na.»
17À liʔi yo naŋa ma we mà yo: «Má ma ma cɔ wi kayoʔo kiì kpɔʔɔ mà tiʔi pyɔ ka we ga mi dá yo mò je gá ge.
Kiì kɔsɔ na tra tí ma danŋa ma kala na.
Má bi da deʔe ceŋge bì naa ma akaba taʔa be
ma nyuwyeʔe kì bɛfu na.
18Tí bi da huru ní nyapeʔe fin.
Má bi da ma akaba taʔa wa kere ni.
19Má bi kafuʔu kon wa ma jɔlɔ na bìʔi wa kpɛn bì na ma hro ta de
fɔ ma ba nì ma hrù ma je wa nɛ tra ni,
deʔe ga na ma dá nyini ge.
Mɛjɛn má nyɛ taplɔʔɔ.
Má bi ba nì bì gɛri nɛ taplɔʔɔ ni ge.»
20Naŋa ŋa pé na yeri Adan wɔ̀ɔ yele kan wi cɔ na mà noo yeri Ɛfe. Ki na po pé yo: Nyuwyeʔe. Mɛjɛn wi dá bo drunya hɛɛn pè bɛfu pe no. 21Bajegɔ Nyɛʔɛlɛ à li ajoʔo hlɛʔɛ kpe màʔa hanri naŋa nì, wi cɔ kan we drere mà ti le pé na. 22Bajegɔ Nyɛʔɛlɛ à li yo: Welé, naŋa wí ma krɛʔɛ nɛ pa wòó nyɛ be kmaʔa nì tipeʔe ní pi cɛnmɛ namyɛlɛ na le. Kí ma yala kloʔò ki ton wí na, wò gá no wa nyuwyeʔe tiʔi na ŋaŋa ni ge, mɛjɛn nòo kà ka, pɔɔ go nyuwyeʔe na su.#3:22 ma wèle wa Tyɛ 22:14 ni wè.
23Bajegɔ Nyɛʔɛlɛ à li naŋa yrigi we wa Edɛn nagɔ ni jango wi kɛri wi yaa tra fali da ni wi dá nyini ge. 24Bajegɔ Nyɛʔɛlɛ li gɔ́ɔ̀ yrigi kɔ, à li syerubɛnyee yrigí be Edɛn nagɔ tanla wi yaajɛhaʔa namyɛlɛ na le mà plɛn mlaʔa kpele ní la li dáa nyi kwɔʔɔ ge. À li na wa na krɛʔɛ be jango bì da nyuwyeʔe tiʔi kɔrɔsi ge.
Actualmente seleccionado:
HLIMI 3: NLK10
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Bible Society of Côte d'Ivoire