Matoose 2
2
Yesuusa beya yooda eraxita
1Herodisey Yuuda wude kaate maaqicho woggaaka Yesuusay ye wudiyaka Beeteleeme katamaaka e yelutto. Yenniyaka xhoolinte beedi abay maaqesa ereesiti qoossi kese badefa Yerusaleeme u yoodo. 2Usini <<Ayhuda kaate maaqese yelutta yeley ay e yese? Qoossi kese badefa esuse ohe xhoolintey kesusune beediko e buro akkiriya nu yoodo>> yeydi hissine u oycco.
3Kaati Herodiseni ye zeere siidi iitanawo e du'eydo. Yerusaleeme axitini yeydiwo uddi esuke leemo u kesso. 4Esini ye esuna kahinituse afana maagitaara Muse woga eruseesitaara uddi xheygussi <<Mesihey yeluttesi ayana?>> hidi uso e oycco. 5Usitini <<Mesihey yeluttesi Yuuda wudiyaka Beeteleeme katamaako. Ye esani esuna nu eresi kaayaxi fissharowaka
6<Neno Yuuda wudiyaka bente Beeteleeme! Neekaafa ta axita maaqe Isra'eelaxita kakke bidzi durkesi e kese gisha Yuuda wudiya angusse maaddhese katamittaafa fetto neni eero maaquwannako>
yeydiko e diizecha>> yeydi u hido.
7Ye e geedeni Herodisey xhoolinte eraxita aachiyaanna xheygussi xhoolintey bentecho wogga bidzoni shato badi uddi oycci e erdo. 8Esini <<Hanguwayte, ye yelutta yele naddhi modhussi worguwayte. Hi degessoyna tanini handi esuse akkiroronike yoodi taakoni ohuwayte>> yeydi hissine Beeteleeme uso e anso.
9-10Usini ye kaati Herodisese be siidosi geede kessi dhaddi hangisineni be wude be beedecho xhoolinteni sekke assi beedi orjena keddaysi u maddo. Ye xhoolinteni u burona durkisine aandi ye yeley yese godo e eedho. 11Zawa gelli yeley beyndo Maaramiyara yesune u beedo. Bocuntini u akkirdo. Essaa be oodechosha dodhi worqe, sawwe ixhaane, karawa yeysi ingo u indo. 12Ye e geedeni Wontoy afukkana uso <<Herodiseko maaddhofita>> hidi e hido gisha fede ogiyanna maaddhi be wude u hando.
Gibxhe ba'o
13Xhoolinte eraxiti hando geede Wonto woosaxi Yoosefese afukkana addeydi <<Herodisey ha yele wodhese worgiya e yese gisha denduwa, ha yele esindowara etti Gibxhe wude dhaddi ba'uwa! Hanke ne maaqoronike neeko ta ohoro aallo yaha decuwa!>> yeydi e hido. 14Yoosefeni gehunsaafa dendi yeliyara esindowara etti qama Gibxhe wude dhaddi e hando. 15Herodisey hay'oro aallo yaha e yesso. Ye esini Wontoy be kaayaxuna <<Ta yele Gibxhiyafa xheydusso>> yeydi e zeerdechoshi aaloronikeko e maaddho.
Herodisey nayshe wodhusosa
16Herodisey xhoolinte eraxiti biya qaarusosa be erdo woggaaka iitana e huullo. Beeteleemiyakaara e googe yecha godowakaara uddi be tooraxita ansi u beray lam'i beraara lam'i berame yekkiyara maaddhese na'axhita uddi e wodhusso. Ye lam'i beraseni yeysi e matosi xhoolintey bentecho wogga xhoolinte eraxiti garafa oycci be siidechonikeko. 17-18Yeenkewo kaayaxi Eremiyasey
<<Raama katamaa yeefo gaarey e sinte,
iita yeefowara laga gaariyarako yaha unda,
Raheleko be nayshi gisha yeekesa,
i nayshi haydho gisha oseye i inxha'e>>
yeydi hissine e zeerdechoshini aallo.
Gibxhefa Nazrate yoowe
19Herodisey haydho geede Yoosefey Gibxhe yesune Wonto woosaxi esuse afukkana addeydi 20<<Yele wodhese worgichaashiti haydho gisha denduwa, ha yele esindowara etti Isra'eele wude sekke hanguwa!>> yeydi e hido. 21Yoosefey dendi yele esindowara etti Isra'eele wude maaddhi e yoodo. 22Yoodi biyade Herodise godo Arkelawosey Yuuda wude kaattosa siidi Yoosefey ye wude hame e jhassho. Afukkana hatteni assi Wontoy otinne Galila wude e hando. 23Ye wude be hando geede Nazrate katamaaka e utto. Yeydini e maaddhosi kaayaxituna <<Nazrataxe hidiko e xheygutte>> hidi hiyuttecha kaayoy aalorosako.
Actualmente seleccionado:
Matoose 2: KilleC
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión