മറ്‌ക്കോസ് 16
16
ഏസു ഉജുറെ്ന്ത്‌റാ്
1ഒയിവു ണാള് തീന്ത പ്‌റ മദ്ദള പട്ടണക്കാറിസി മറിയാമ് ആക്കോവുദ് അവ്വെ മറിയാമ് സലോമിമ് ണല്ല ബാഡെ അഡിക്ക ജാദിഗ ഏസുദ് സാവുക്ക് പൂസ്യ ഏറ്റാര്. 2അവാര് ണാറ്റിക്ക്‌ളാമെ ബെ്ഡ്യാലെ ണേരകാല് കഡാക്കാട്ടി താനെ കല്ലളേക്കെ എജ്ജിനാര്. 3<<കല്ലളെ ബായിക്ക് അഡേത്ത് ബെത്തിര്‌ക്ക കല്ല്‌ണ ആര് ണമാക്ക് ഉന്തി ജറേത്ത് തരുവാര്?>> എന്ത് തമ്മ തമ്മ പേസിനാര്.
4ആന അവാര് പോയി ണോഡുഗാട്ടി കല്ല്‌ണ ഉന്തി ജറേത്തിര്‌ക്കാദ്‌ണ കണ്ടാര്. അയ്യി കല്ല് ബെല്ല്യ കല്ലായിര്‌ന്ത്‌ദ്. 5അവാര് കല്ലളേക്കെ പുക്കിനാര്. അക്കുളെ ബെ്ള്ളെ ജൊഗെ ഇക്കി ഒരു ബണ്ടാ് ബല സാരി ഇര്‌ക്കാദ്‌ണ കണ്ട് അവാര് അഞ്ചിനാര്.
6അക്കുളെ അയാള് സൊന്നാ്: <<അഞ്ചാദി, കുരുസ്‌ക്കെ സേത്തി ആണി അഡിത്ത് കൊന്റ ണസറത്ത് ഊര്‌ക്കാറാ് ഏസുണാത്തെ ണിമ്മ പരാക്കേര് എന്ത് എനാക്ക് തെര്യു. അയാള് ഇദിലി ഇല്ലെ; അയാള് ഉജുറെ്ന്താ്; ണിമ്മ ബന്ത് അവാന ക്‌ഡാത്തി ബെത്ത പട്ട്‌ണ ണോഡി. 7ആന ണിമ്മ പോയി പത്ത്‌റോസ്‌ക്കേമ് ഏസുദ് സൊല്ലുപഡി ണഡാക്ക ബാക്കി ആള്‌ഗാക്കേമ്: <ഏസു സൊല്ലിര്‌ന്ത പാസെ ണിമാക്ക് മുദ ഗെലീലേക്കെ പോരാ്. അദിലി ബെത്ത് ണിമ്മ അവാന കാണുവേര്> എന്ത് സൊല്ലിരി.>>
8അയ്യി പെ്ണ്ണ്‌മക്ക കയ്യികാല് ബരാദെ സദ്‌റബെ്ട്ടി കൊണ്ട് കല്ലളേലിര്‌ന്ത് ഓഡിനാര്. അവാര്‌ക്ക് കോവെ പ്‌ഡിത്തിര്‌ന്താദ്‌ണാലെ ആരോഡേമ് പേസ്യ ഗൂഡി ബായി ബരാലെ.
മദ്ദള പട്ടണക്കാറിസി മറിയാക്ക് ഏസു ബെ്ളിപഡ്‌റാ്
9 # 16:9 മുദ എ്ള്‌ദി ബെത്തിര്‌ന്താദ്‌ണ ണോഡി എ്ള്‌ദിന പഗ്‌ദി കായിദാത്തിലി ഈ സുലാക്കഗ ഇല്ലെ. ആന പഗ്‌ദി കായിദാത്തിലി ഈ പാഡ തീര്‌റാദ് ഇച്ചെത്തെ: 9. ദൂദാ് തമാക്ക് സൊന്ന കാര്യഗണ അയ്യി പെ്ണ്ണ്‌മക്കഗ പത്ത്‌റോസ്‌ക്ക്‌മ് ഒപ്പ ഇര്‌ന്തവാര്‌ക്ക്‌മ് സുരുക്കി സൊല്ലികൊഡുത്താര്. 10. അദ്‌ക്ക് പ്‌റ മന്‌സാര്‌ണ കാപാറ്റ്യ എപ്പേക്ക്‌മ് ഇര്‌ക്ക ണല്ല സേദിന ക്‌ളാക്ക് ഇര്‌ന്ത് മേക്ക്‌മാട്ട് ഇര്‌ക്ക ആള്‌ഗാക്ക് സൊല്ല്യ ഏസു തന്ന് സൊല്ലുപഡി ണഡാക്കവാര്‌ണ സൊല്ലിബ്‌ട്ടാ്. [ഏസു ണാറ്റിക്ക്‌ളാമെ ബെ്ഡ്യാകാലാത്തിലി ഉജുറെ്ന്ത പ്‌റ മുദ ബെ്ളിപട്ടാദ് മദ്ദള പട്ടണക്കാറിസി മറിയാക്ക്‌ത്തെ. ഇവാക്ക് തട്ടിര്‌ന്ത ഏ്ള് കെ്ട്ടജാദിഗണാത്തെ ഏസു ഒയിപ്പിസിനാദ്. 10ഏസുദ് ഒപ്പ ഇര്‌ന്തവാര് സങ്കഡാക്ക് അഗ്‌ദ്‌കൊണ്ട് ഇര്‌ക്കാട്ടി അവ പോയി ഏസു ഉജുറെ്ന്തിര്‌ക്ക സേദിന അവാര്‌ക്ക് സൊന്ന. 11ഏസു പെ്ളേത്ത് ഇര്‌ക്കാ് എന്ത്‌മ് താന് ഏസുണ കണ്ടെ എന്ത്‌മ് മറിയ സൊന്നാദ്‌ണ കേ്ട്ട് അവാര് അദ്‌ണ ണമ്പാലെ.
ഏസുദ് സൊല്ലുപഡി ണഡാക്ക റണ്ട് ആള്‌ക്കെ ബെ്ളിപഡ്‌റാ്
12അദ്‌ക്ക് പ്‌റ ഏസുദ് സൊല്ലുപഡി ണഡാക്ക റണ്ട് ആള് ഊര്‌ക്ക് പോഗാട്ടി ഏസു അവാര്‌ക്കെ ബെ്ളിപട്ടാ്. ആന മുദ ബെ്ളിപട്ട പാസെ അല്ല ബെ്ളിപട്ടാദ്. 13ഇവാര് തിലിമ്പി ബന്ത് ഈ സേദിന ഏസുദ് സൊല്ലുപഡി ണഡാക്ക ബാക്കി ആള്‌ഗാക്ക്‌മ് സൊന്നാര്. ആന അവാര് അദ്‌ണാമ് ണമ്പാലെ.
സൊല്ലുപഡി ണഡാക്ക പദിണൊണ്ണ് ആള്‌ഗാക്കെ ഏസു ബെ്ളിപഡ്‌റാ്
14കഡേസിലി തന്ന് സൊല്ലുപഡി ണഡാക്ക പദിണൊണ്ണ് ആള്‌ഗ ഒന്റായി തീനി തിന്ത്‌കൊണ്ട് ഇര്‌ക്കാട്ടി ഏസു അവാര്‌ദ് മുന്തുക്ക് ബെ്ളിപട്ടാ്. താന് ഉജുറെ്ന്ത പ്‌റ തനാണ കണ്ണാറ കണ്ടവാര് സൊന്നാദ്‌ണ അവാര് ണമ്പാത്താദ്‌ക്ക്‌മ് അവാര്‌ദ് കല്ല് ണെഞ്ച്‌ണാമ് കണ്ട് ഏസു അവാര്‌ണ സണ്ടെ കൊഡുത്താ്.
15അദ്‌ക്ക് പ്‌റ അവാര്‌ക്കെ ഏസു സൊന്നാ്: <<ഉലഗ മുച്ചുഡ പോയി ണിമ്മ എല്ല ആള്‌ഗാക്കേമ് ഈ ണല്ല സേദിന സൊല്ലിരി. 16അദ്‌ണ ണമ്പി തണ്ണിക്കെ മുളുഗിനാക്കി ദണ്ടണേലിര്‌ന്ത് അവാര് ദെങ്കി കഡാക്കുവാര്. ഇദ്‌ണ ണമ്പാത്തവാര്‌ക്ക് ദണ്ടണെ കെ്ഡേക്കു. 17ഇദ്‌ണ ണമ്പ്‌റവാര്‌ക്ക് അദിസ്യമാന അഡ്യാളഗ സെയ്യ അദിഗാര കെ്ഡേക്കു. അവാര് എന്ന് പേരിലി കെ്ട്ടജാദിഗണെല്ല മുഡിക്കി ബ്‌ഡുവാര്. അവാര് ബേ്റെബേ്റെ ണായഗ പേസുവാര്. 18അവാര് പാമ്പ്‌ഗണ കയ്യിക്ക് എ്ഡ്‌ത്താല്‌മ് മര്‌ന്ത്‌ഗ കുഡിത്താല്‌മ് അവാര്‌ക്ക് ഒന്റുമ് തട്ടമാട്ട. അവാര് ണോയിക്കാറാര്‌ക്ക് കയ്യി ബെത്താക്കി ണോയിക്കാറാര് തെ്ളിവാര്.>>
ഏസു മേലോഗാക്കെ പോരാ്
19ഇച്ചെല്ല സൊന്ന പ്‌റ ആണ്ടവാനാന ഏസുണ സാമി മേലോഗാക്കെ എ്ഡ്‌ത്താ്; ഏസു സാമിദ് ഒപ്പ ആള്യ സാമിദ് ബല സാരി കുക്കാന്താ്. 20ഏസുദ് സൊല്ലുപഡി ണഡാക്കവാര് ഊരൂര പോയി സാമിദ് ണല്ല സേദിന സൊന്നാര്. ആണ്ടവാ് അവാര്‌ദ് ഒപ്പ ഇര്‌ന്താ്. അവാര് സൊന്ന ണല്ല സേദിഗെല്ല ണേര് എന്ത് സാമി അദിലി ണഡാന്ത അദിസ്യമാന അഡ്യാളത്തിലി കാട്ടി കൊഡുത്താ്.]
Actualmente seleccionado:
മറ്‌ക്കോസ് 16: സാമിദ് സേദി
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
New Life Literature