От Матфея 13
13
Иисусым Уңипаӷа̄ткыхкаңа Пӣтысиӷаҳта
1Таўани ата̄сими аӷныӷми Иисус а̄нлюни мыңтыӷамың, на̄йвам ысныңакун ақумлюни апыҳтуӷикақ. 2Юлӷутыҳлъягыт каңлъюқаҳсятни, аңьямун ӯхлъюни ақумыхкақ, ынка̄м юлӷутыҳлъягыт ыснымыткат. 3Уңипаӷа̄тытхун алъя̄ҳӣнаӷмың апыҳтуқӣ. Пикӣ: «Пӣтысиӷаҳта пӣтысиӷаӷвигминун агляӷлюни, ифкаҳқуқақ пӣтутның. 4Пӣтысиӷаӷвигмини ифкаҳқиялӷӣми пӣтутның, иляңи тумытхун тыкиткат, ынка̄м қаўа̄гыт тагилютың ныӷуқӣт. 5Иляңи пӣтутыт тыкиткат уйӷагаҳтуқакун сюнапагилңуҳқун. Таўаниңинақ пӣткат қаюҳлъяк сюнаңа угмыста̄ҳақ. 6Иўырңа сиқинық пӣсялӷӣми ма̄тныӷан паныҳтыкӣ қаюҳлъяк акупагилңӯт. 7Иляңи пӣтутым тыкиткат сикуҳлъюхтуқакун, сикуҳлъюгыт пӣсялӷӣмың пӣтфигиқӣт пӣтутыт. 8Иўырңа иляңи пӣтутыт тыкиткат сюнакыхтакун пӣтыстикат зерномың, иляңи 100, иляңи 60, иляңи 30. 9Сигутылгӯси, нагатык!»
Уңипаӷа̄тыт Апалъӣт
10Та̄хкын малихся̄ҳтыңита такулюку Иисус а̄птыка̄т: «Сяңан уңипаӷа̄тмың атуқақсин апыҳтуныҳпыки югыт?»
11Иисусым кӣмсиқӣ: «Лъпысинун Кияӷныӷым лӣтыстыкақа̄ талюӷңалӷӣ ипапиҳқылъҳа Атаныҳпагулъҳан Қилягым, иўырңа лъңитнун лӣтысимаңита̄. 12Ынка̄м ю̄к лӣгикылъыңыхкақ, ўатақа̄ӷақ лӣгикылъыңатаӷаӷьяҳқа̄гуқ, иўырңа ю̄к лӣгикылъыпагилңуқ лӣгикылъҳа иқилъықуқ. 13Тама̄кын апалъюқлъюку апыҳтуӷақанка уңипаӷа̄тытхун, қаюҳлъяк ысҳа̄тыӷңа̄ӷмың ысҳа̄сигалңӯт, нагатыӷңа̄ӷмың нагақӣгалңӯт, талўа лӣгикигалңӯт. 14Ынка̄м лъңитхун Исаиям ӯкналиқуткилъҳа апыӷӣҳтуқ. Та̄хун ӯкналиқылъҳакун Кияӷнық пика̄гуқ:
“Лъңит нагатыпыста̄ҳлъықут та̄ўаңинақ лӣгикна̄нӷитӣт;
ысҳа̄тыпыста̄ҳлъықут, та̄ўаңинақ лӣгикна̄нӷитӣт ысҳақатың,
15қаюҳлъяк лъңита умьюгӣт пиныҳлъюхтыка̄гут.
Сигутңит тусяқныҳлъю̄хтыка̄гут, ийытыңлъю қуныҳтыкақӣт.
Таўатылңӯнӷисяқумың ӣймыхның ысҳа̄нъаяҳтут,
сигутмыхның нагақӯнъаяҳтут, умьюгамыхтыхун лӣгикнаяҳтут,
ынка̄м қӣвнаяҳтут хўаңамнун на̄лъҳутысқылъютың”.
16Иўырңа қуянаҳалык лъпыси! Ийыси ысҳа̄тақут, сигутысилъю нагақӯтақут. 17Ипа уңипа̄тамси, ӯкналиқистылӷутытлъю, юлӷутаңанлъю Кияӷныӷым, ысҳаӷьюкақсяӷӣт ысҳақаси, иўырңа ысҳа̄маңитӣт. Нагақуӷьюкақсяӷӣтлъю нагақуқаси, иўырңа нагақӯмаңитӣт».
Иисусым А̄пқаңа Уңипаӷа̄ткыхкани Пӣтысиӷаҳта
18«Нагатыху сямың пӣқутаңа уңипаӷа̄ткыхкақа пӣтысиӷаҳта. 19Пӣтутыт тумыт ся̄ӷўитхун тыкиткат успутңа̄т китумун алңунак нагақӯлъҳӣмун уңипа̄мың Атаныҳпагулъыӷмың аюқылӷӣмың. Лӣгикынӷилъкагу уңипақ Туӷныӷа̄м тагилюни ўаяҳлъықа̄ тыкитка̄ялӷӣ илюңакун. 20Тама̄кут пӣтутыт уйӷахтуқакун сюнакун тыкиткат успутңа̄т китумун алңунак нагақӯлъҳӣмун уңипа̄мың, таўаниңинақ уңипақ тугуклъиқа̄ қуякусиқлъюку. 21Иўырңа уңипақ илюңани мулюмаңилңуқ қаюҳлъяк акуңылъҳилңуқ. Ынка̄м сыӷлылӣӷьялӷӣми налиӷмың амьюқыта̄ткылъыңьялӷӣми, апалъюқлъюку уңипақ таўаниңинақ ухпықинаниҳтуқ. 22Тама̄кут пӣтутыт сикуҳлъюхтуқакун сюнакун тыкиткат успутңа̄т китумун алңунак нагақӯлъҳӣмун уңипа̄мың, та̄ўаңинақ тыхылъҳӣлъҳан кияҳта̄ӷусиҳқамың, аклъюңиӷиюлъыҳлъяганлъю пӣтфигиӷақа̄ уңипақ. Тама̄кын апалъюқлъюку пӣтыстиңигатуқ. 23Тама̄кут пӣтутыт тыкиткат сюнакыхтакун успутңа̄т югнун нагақӯлъҳӣнунлъю лӣгикилӷӣнунлъю уңипа̄мың. Ынка̄м пӣтысқуӷақут иляңи 100, иляңи 60, иляңи 30».
Иисусым Уңипа̄ӷа̄ткыхкаңа Плевелы
24Та̄хкын Иисусым а̄пқа̄ иляңа уңипаӷа̄н лъңитнун, пикӣ: «Атаныҳпагулъҳа Қилягым юхтун пӣтысиӷақатун пинилӷӣмың пӣтутмың пӣтысиӷаӷвигмини аюқуқ. 25Унугми ата̄сими қавасималюки, аңуяга тагилюни пӣтысиӷақақ плевелымың акулңитхун пшеницат, та̄хкын аӷуляқыхкақ. 26Нунивахсыӷат пӣсялӷӣмың, пшеницат акумлютың плевелымың аюқыфтут. 27Пӣтысиӷаҳта қыпҳаҳтылӷутңан такулюку а̄птыка̄т: “Атанық, пинилӷӣмыңми пӣтутмың пӣтысӣӷаҳсин пӣтысиӷаӷвихпыни; накын плевелыт пӣт?” 28Югым кӣмсиқӣ: “Аңуягым таўатын пикақӣ”. А̄птыка̄т: “Плевелыт икӯлътыкӣ?” 29Кӣмсиқӣ: “Нака̄, қаюҳлъяк плевелыт икуқуфсики қымалъ пшеницатлъю илялъкӣлъықаси. 30Қырңӣта пшеницатлъю, плевелытлъю нагустыки кынляңанун унаталъыҳқамун. Ынан унатаӷьяҳқа̄ҳтыката унатаҳтыт уңипа̄нъа̄ӷанка плевелыт сивукысқылъюки, қыпуӷлюки паныҳсяҳқа̄люки. Ынка̄м пшеницат унатаҳтыслъюки кахпахтысна̄ӷанка кахпагвимнун”».
Иисусым Уңипаӷа̄ткыхкаңа Горчицам Пӣтутаңа
31,32Алъямың Иисусым а̄пқа̄ уңипаӷа̄н: «Атаныҳпагулъҳа Қилягым пӣтутңатун горчицам аюқуқ. Пӣтутым мыкыста̄лъыҳпигақа̄, иўырңа югым пӣтысиӷаныӷминигу пӣтысиӷаӷвигмикун нунивахсыӷаӷьяхаӷның а̄ңылъыҳпига̄каюгӯқ. Уқфигуҳныӷани қаўа̄гыт тагилютың авая̄кун уңлюсӣқут».
Иисусым Уңипаӷа̄ткыхкаңа Закваска
33Алъямың Иисусым а̄пқа̄ уңипаӷа̄н: «Атаныҳпагулъҳа Қилягым закваскатун аюқуқ. Аӷнам тугулюку акӯтускаңа авляўаҳлъягмун, ынка̄м акӯтаҳлъяга ҳӯҳтыстыҳлъяка̄».
Иисусым Атуқыхкаңи Уңипаӷа̄тыт
34Иисусым апыҳтуныӷминики юлӷутыҳлъягыт қӯнпың атуқақӣ уңипаӷа̄тыт. Ипапыста̄қ сяңўа̄ қамахлъюку апыҳтӯсяқыхка̄ уңипаӷа̄тытхун аюқуқ. 35Таўатын пика̄лӷӣ апыӷӣӷналюку ӯкналиқистым пилъҳа:
«Уңипаӷа̄тыт атуқылъықанка алыҳқуқумки.
Уңипа̄лъықанка Кияӷныӷым лӣтысимаңилъкаңаның има улимаюха̄лъҳаның нуна».
Иисусым А̄пқаңи Уңипаӷа̄ткыхкани Плевелыт
36Та̄хкын Иисусым унилъюки юлӷутыт ӣтқақ мыңтыӷамун. Малихся̄ҳтыңита такулюку а̄птыка̄т: «Сямың писӣгўат уңипаӷа̄ткыхкаҳтын плевелыт пӣтысиӷаӷвигмылңӯт?»
37Иисусым кӣмсиқӣ: «Ю̄к пӣтысиӷақақ пинилӷӣмың пӣтутмың, Иӷнықа̄ Югым; 38пӣтысиӷаӷвик нунаңӯқ; пинилӷӣт пӣтутыт югӯт Атаныҳпагулъҳым пикӣ; плевелыт югӯт Туӷныӷа̄м пикӣ. 39Аңуяк пӣтыстикақ плевелымың Туӷныӷа̄гуқ. Унаталъық нунам кынлытҳӯтылъқа̄, унатаҳтыт яқулгӯт. 40Унаталъыӷми плевелыт қырңуҳлъюки паныҳтақӣт. Таўатыҳпигақ кынлытҳӯтылъҳани нунам, югыт Туӷныӷа̄м пиңи қырңуҳлъюки паныҳсяҳқа̄гут. 41Иӷныӷа Югым яқулыгминың каяхтияҳқа̄гуқ иқитысқылъюки Атаныҳпагулъыӷминың қамахлъюки сыӷлыҳқуситлъю, сыӷлытунлъю пистыт. 42Ынка̄м кынӷыгнун милю̄лъықӣт, таўани қия̄ӷўаҳлъяхлъықут, хутытың тышқита̄хта̄мӣта. 43Та̄хкын Кияӷныӷым юги кӯкхулъықут сиқиныҳтун Атаныҳпагулъҳани Атамың. Сигутылгӯси, нагатык!»
Иисусым Уңипаӷа̄ткыхкаңа Ӣӷңалӷӣ Аклъюңи
44«Атаныҳпагулъҳа Қилягым аклъюңистун аюқуқ ӣӷңалӷӣ пӣтысиӷаӷвигми. Югым на̄лъкылъюки ӣнқихтыкӣ. Қуям аңталяңаның, аӷуляқлъюни қамахлъюки сяӷьяни акиклъюки, та̄хкын та̄на пӣтысиӷаӷвик тукфиқа̄».
Иисусым Уңипаӷа̄ткыхкаңа Жемчуг
45«Хўатытуқлъю Атаныҳпагулъҳа Қилягым: тукфиҳтуҳта иваӷилӷӣ пинӣпихлъыҳӣмың жемчугымың тукфиӷьяҳқамың. 46На̄лъкунъыӷмини пинӣпихлъыҳӣмың акитуқамың, акикуӷақа̄ қамахлъюку сяӷьяни, тукфиӷналюку та̄на жемчуг».
Иисусым Уңипаӷа̄ткыхкаңа Ныгаҳпак
47«Атаныҳпагулъҳа Қилягым, ныгаҳпахтунлъю аюқуқ. Иқалъинӣҳтыт ныгаҳпахтың на̄йвамун атыҳлъюку аҳқылъя̄қут ынка̄м алъя̄ҳӣнаӷмың иқалъюхтыҳлъягақут. 48Ныгаҳпак сяюглюку қӯтмун, ақумлютың иқалъюгыт авуӷақӣт, пинилӷӣт канаҳсимӣта қалътанун, ынка̄м сыӷлылъҳи ыхтақӣт. 49Таўатысяҳқа̄гуқ кынлытҳӯтылъҳани нунам. Яқулгыт тагилютың авуҳлъықӣт сыӷлыӷыт югыт пинилӷӣның. 50Ынка̄м сыӷлыӷыт кынӷыгнун милю̄лъықӣт, таўани қия̄ӷўаҳлъяхлъықут, хутытың тышқита̄хта̄мӣта».
Нутаӷатлъю, Ныӷиҳтатлъю Апыҳтӯсят
51Та̄хкын Иисусым а̄птыкӣ малихся̄ҳтыни: «Қамахлъюки тама̄кут лӣгикыстыкӣ?» Кӣмсиқа̄т: «А̄а». 52Та̄хкын пикӣ: «Тамаҳаӷми апыҳтуӷикаюк Лӣлиҳтӯсяның апыҳтуқақ Атаныҳпагулъҳаның Қилягым хўатылңӯгуқ: мыңтыӷалык ю̄к нусюгралӷӣ кахпагвигминың нутаӷамыңлъю, ныӷиҳтамыңлъю».
Назаретыми Иҳсякыхкаңат Иисус
53Иисус та̄қсями апыҳтуӷиныӷмың уңипаӷа̄тның аӷуляқыхкақ. 54Агляӷлюни ныминун апыҳтуӷиян синагогаңитни, югыт сяӷӣӷаягутка̄т. Лъмыхның а̄пқуӷа̄ӷуткат: «Накын пыҳқинылъыңа? Накынлъю аҳтуӷьяҳқа̄нӷилъыңа алъя̄ҳлъюхўаҳтимун? 55Иӷнықынӷитагӯ плотникым? Мария на̄кынӷитагӯ, ӯк аңлыгуткынӷитакӣ Иаковлъю, Иосифылъю, Симонлъю ынка̄м Иудалъю? 56Наягилъю ма̄нъыӷита̄т? Накын лӣтылъыңыҳлъяхталъю, аҳтуӷьяҳқа̄нӷилъыңалъю?» 57Ынка̄м тугуклъиӷьюнӷитка̄т.
Иисусым пикӣ: «Нани алңунак югыт сӣвакақа̄т ӯкналиқиста иўырңақун лъңан катам нунаңанилъю ныңлъюгутаңанилъю». 58Тама̄ни алъя̄ҳлъюхўаҳтипагумаңилңуқ қаюҳлъяк ухпықынӷилъкаңат.
Actualmente seleccionado:
От Матфея 13: ess2
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe Bible Translators, Inc. All rights reserved.
От Матфея 13
13
Иисусым Уңипаӷа̄ткыхкаңа Пӣтысиӷаҳта
1Таўани ата̄сими аӷныӷми Иисус а̄нлюни мыңтыӷамың, на̄йвам ысныңакун ақумлюни апыҳтуӷикақ. 2Юлӷутыҳлъягыт каңлъюқаҳсятни, аңьямун ӯхлъюни ақумыхкақ, ынка̄м юлӷутыҳлъягыт ыснымыткат. 3Уңипаӷа̄тытхун алъя̄ҳӣнаӷмың апыҳтуқӣ. Пикӣ: «Пӣтысиӷаҳта пӣтысиӷаӷвигминун агляӷлюни, ифкаҳқуқақ пӣтутның. 4Пӣтысиӷаӷвигмини ифкаҳқиялӷӣми пӣтутның, иляңи тумытхун тыкиткат, ынка̄м қаўа̄гыт тагилютың ныӷуқӣт. 5Иляңи пӣтутыт тыкиткат уйӷагаҳтуқакун сюнапагилңуҳқун. Таўаниңинақ пӣткат қаюҳлъяк сюнаңа угмыста̄ҳақ. 6Иўырңа сиқинық пӣсялӷӣми ма̄тныӷан паныҳтыкӣ қаюҳлъяк акупагилңӯт. 7Иляңи пӣтутым тыкиткат сикуҳлъюхтуқакун, сикуҳлъюгыт пӣсялӷӣмың пӣтфигиқӣт пӣтутыт. 8Иўырңа иляңи пӣтутыт тыкиткат сюнакыхтакун пӣтыстикат зерномың, иляңи 100, иляңи 60, иляңи 30. 9Сигутылгӯси, нагатык!»
Уңипаӷа̄тыт Апалъӣт
10Та̄хкын малихся̄ҳтыңита такулюку Иисус а̄птыка̄т: «Сяңан уңипаӷа̄тмың атуқақсин апыҳтуныҳпыки югыт?»
11Иисусым кӣмсиқӣ: «Лъпысинун Кияӷныӷым лӣтыстыкақа̄ талюӷңалӷӣ ипапиҳқылъҳа Атаныҳпагулъҳан Қилягым, иўырңа лъңитнун лӣтысимаңита̄. 12Ынка̄м ю̄к лӣгикылъыңыхкақ, ўатақа̄ӷақ лӣгикылъыңатаӷаӷьяҳқа̄гуқ, иўырңа ю̄к лӣгикылъыпагилңуқ лӣгикылъҳа иқилъықуқ. 13Тама̄кын апалъюқлъюку апыҳтуӷақанка уңипаӷа̄тытхун, қаюҳлъяк ысҳа̄тыӷңа̄ӷмың ысҳа̄сигалңӯт, нагатыӷңа̄ӷмың нагақӣгалңӯт, талўа лӣгикигалңӯт. 14Ынка̄м лъңитхун Исаиям ӯкналиқуткилъҳа апыӷӣҳтуқ. Та̄хун ӯкналиқылъҳакун Кияӷнық пика̄гуқ:
“Лъңит нагатыпыста̄ҳлъықут та̄ўаңинақ лӣгикна̄нӷитӣт;
ысҳа̄тыпыста̄ҳлъықут, та̄ўаңинақ лӣгикна̄нӷитӣт ысҳақатың,
15қаюҳлъяк лъңита умьюгӣт пиныҳлъюхтыка̄гут.
Сигутңит тусяқныҳлъю̄хтыка̄гут, ийытыңлъю қуныҳтыкақӣт.
Таўатылңӯнӷисяқумың ӣймыхның ысҳа̄нъаяҳтут,
сигутмыхның нагақӯнъаяҳтут, умьюгамыхтыхун лӣгикнаяҳтут,
ынка̄м қӣвнаяҳтут хўаңамнун на̄лъҳутысқылъютың”.
16Иўырңа қуянаҳалык лъпыси! Ийыси ысҳа̄тақут, сигутысилъю нагақӯтақут. 17Ипа уңипа̄тамси, ӯкналиқистылӷутытлъю, юлӷутаңанлъю Кияӷныӷым, ысҳаӷьюкақсяӷӣт ысҳақаси, иўырңа ысҳа̄маңитӣт. Нагақуӷьюкақсяӷӣтлъю нагақуқаси, иўырңа нагақӯмаңитӣт».
Иисусым А̄пқаңа Уңипаӷа̄ткыхкани Пӣтысиӷаҳта
18«Нагатыху сямың пӣқутаңа уңипаӷа̄ткыхкақа пӣтысиӷаҳта. 19Пӣтутыт тумыт ся̄ӷўитхун тыкиткат успутңа̄т китумун алңунак нагақӯлъҳӣмун уңипа̄мың Атаныҳпагулъыӷмың аюқылӷӣмың. Лӣгикынӷилъкагу уңипақ Туӷныӷа̄м тагилюни ўаяҳлъықа̄ тыкитка̄ялӷӣ илюңакун. 20Тама̄кут пӣтутыт уйӷахтуқакун сюнакун тыкиткат успутңа̄т китумун алңунак нагақӯлъҳӣмун уңипа̄мың, таўаниңинақ уңипақ тугуклъиқа̄ қуякусиқлъюку. 21Иўырңа уңипақ илюңани мулюмаңилңуқ қаюҳлъяк акуңылъҳилңуқ. Ынка̄м сыӷлылӣӷьялӷӣми налиӷмың амьюқыта̄ткылъыңьялӷӣми, апалъюқлъюку уңипақ таўаниңинақ ухпықинаниҳтуқ. 22Тама̄кут пӣтутыт сикуҳлъюхтуқакун сюнакун тыкиткат успутңа̄т китумун алңунак нагақӯлъҳӣмун уңипа̄мың, та̄ўаңинақ тыхылъҳӣлъҳан кияҳта̄ӷусиҳқамың, аклъюңиӷиюлъыҳлъяганлъю пӣтфигиӷақа̄ уңипақ. Тама̄кын апалъюқлъюку пӣтыстиңигатуқ. 23Тама̄кут пӣтутыт тыкиткат сюнакыхтакун успутңа̄т югнун нагақӯлъҳӣнунлъю лӣгикилӷӣнунлъю уңипа̄мың. Ынка̄м пӣтысқуӷақут иляңи 100, иляңи 60, иляңи 30».
Иисусым Уңипа̄ӷа̄ткыхкаңа Плевелы
24Та̄хкын Иисусым а̄пқа̄ иляңа уңипаӷа̄н лъңитнун, пикӣ: «Атаныҳпагулъҳа Қилягым юхтун пӣтысиӷақатун пинилӷӣмың пӣтутмың пӣтысиӷаӷвигмини аюқуқ. 25Унугми ата̄сими қавасималюки, аңуяга тагилюни пӣтысиӷақақ плевелымың акулңитхун пшеницат, та̄хкын аӷуляқыхкақ. 26Нунивахсыӷат пӣсялӷӣмың, пшеницат акумлютың плевелымың аюқыфтут. 27Пӣтысиӷаҳта қыпҳаҳтылӷутңан такулюку а̄птыка̄т: “Атанық, пинилӷӣмыңми пӣтутмың пӣтысӣӷаҳсин пӣтысиӷаӷвихпыни; накын плевелыт пӣт?” 28Югым кӣмсиқӣ: “Аңуягым таўатын пикақӣ”. А̄птыка̄т: “Плевелыт икӯлътыкӣ?” 29Кӣмсиқӣ: “Нака̄, қаюҳлъяк плевелыт икуқуфсики қымалъ пшеницатлъю илялъкӣлъықаси. 30Қырңӣта пшеницатлъю, плевелытлъю нагустыки кынляңанун унаталъыҳқамун. Ынан унатаӷьяҳқа̄ҳтыката унатаҳтыт уңипа̄нъа̄ӷанка плевелыт сивукысқылъюки, қыпуӷлюки паныҳсяҳқа̄люки. Ынка̄м пшеницат унатаҳтыслъюки кахпахтысна̄ӷанка кахпагвимнун”».
Иисусым Уңипаӷа̄ткыхкаңа Горчицам Пӣтутаңа
31,32Алъямың Иисусым а̄пқа̄ уңипаӷа̄н: «Атаныҳпагулъҳа Қилягым пӣтутңатун горчицам аюқуқ. Пӣтутым мыкыста̄лъыҳпигақа̄, иўырңа югым пӣтысиӷаныӷминигу пӣтысиӷаӷвигмикун нунивахсыӷаӷьяхаӷның а̄ңылъыҳпига̄каюгӯқ. Уқфигуҳныӷани қаўа̄гыт тагилютың авая̄кун уңлюсӣқут».
Иисусым Уңипаӷа̄ткыхкаңа Закваска
33Алъямың Иисусым а̄пқа̄ уңипаӷа̄н: «Атаныҳпагулъҳа Қилягым закваскатун аюқуқ. Аӷнам тугулюку акӯтускаңа авляўаҳлъягмун, ынка̄м акӯтаҳлъяга ҳӯҳтыстыҳлъяка̄».
Иисусым Атуқыхкаңи Уңипаӷа̄тыт
34Иисусым апыҳтуныӷминики юлӷутыҳлъягыт қӯнпың атуқақӣ уңипаӷа̄тыт. Ипапыста̄қ сяңўа̄ қамахлъюку апыҳтӯсяқыхка̄ уңипаӷа̄тытхун аюқуқ. 35Таўатын пика̄лӷӣ апыӷӣӷналюку ӯкналиқистым пилъҳа:
«Уңипаӷа̄тыт атуқылъықанка алыҳқуқумки.
Уңипа̄лъықанка Кияӷныӷым лӣтысимаңилъкаңаның има улимаюха̄лъҳаның нуна».
Иисусым А̄пқаңи Уңипаӷа̄ткыхкани Плевелыт
36Та̄хкын Иисусым унилъюки юлӷутыт ӣтқақ мыңтыӷамун. Малихся̄ҳтыңита такулюку а̄птыка̄т: «Сямың писӣгўат уңипаӷа̄ткыхкаҳтын плевелыт пӣтысиӷаӷвигмылңӯт?»
37Иисусым кӣмсиқӣ: «Ю̄к пӣтысиӷақақ пинилӷӣмың пӣтутмың, Иӷнықа̄ Югым; 38пӣтысиӷаӷвик нунаңӯқ; пинилӷӣт пӣтутыт югӯт Атаныҳпагулъҳым пикӣ; плевелыт югӯт Туӷныӷа̄м пикӣ. 39Аңуяк пӣтыстикақ плевелымың Туӷныӷа̄гуқ. Унаталъық нунам кынлытҳӯтылъқа̄, унатаҳтыт яқулгӯт. 40Унаталъыӷми плевелыт қырңуҳлъюки паныҳтақӣт. Таўатыҳпигақ кынлытҳӯтылъҳани нунам, югыт Туӷныӷа̄м пиңи қырңуҳлъюки паныҳсяҳқа̄гут. 41Иӷныӷа Югым яқулыгминың каяхтияҳқа̄гуқ иқитысқылъюки Атаныҳпагулъыӷминың қамахлъюки сыӷлыҳқуситлъю, сыӷлытунлъю пистыт. 42Ынка̄м кынӷыгнун милю̄лъықӣт, таўани қия̄ӷўаҳлъяхлъықут, хутытың тышқита̄хта̄мӣта. 43Та̄хкын Кияӷныӷым юги кӯкхулъықут сиқиныҳтун Атаныҳпагулъҳани Атамың. Сигутылгӯси, нагатык!»
Иисусым Уңипаӷа̄ткыхкаңа Ӣӷңалӷӣ Аклъюңи
44«Атаныҳпагулъҳа Қилягым аклъюңистун аюқуқ ӣӷңалӷӣ пӣтысиӷаӷвигми. Югым на̄лъкылъюки ӣнқихтыкӣ. Қуям аңталяңаның, аӷуляқлъюни қамахлъюки сяӷьяни акиклъюки, та̄хкын та̄на пӣтысиӷаӷвик тукфиқа̄».
Иисусым Уңипаӷа̄ткыхкаңа Жемчуг
45«Хўатытуқлъю Атаныҳпагулъҳа Қилягым: тукфиҳтуҳта иваӷилӷӣ пинӣпихлъыҳӣмың жемчугымың тукфиӷьяҳқамың. 46На̄лъкунъыӷмини пинӣпихлъыҳӣмың акитуқамың, акикуӷақа̄ қамахлъюку сяӷьяни, тукфиӷналюку та̄на жемчуг».
Иисусым Уңипаӷа̄ткыхкаңа Ныгаҳпак
47«Атаныҳпагулъҳа Қилягым, ныгаҳпахтунлъю аюқуқ. Иқалъинӣҳтыт ныгаҳпахтың на̄йвамун атыҳлъюку аҳқылъя̄қут ынка̄м алъя̄ҳӣнаӷмың иқалъюхтыҳлъягақут. 48Ныгаҳпак сяюглюку қӯтмун, ақумлютың иқалъюгыт авуӷақӣт, пинилӷӣт канаҳсимӣта қалътанун, ынка̄м сыӷлылъҳи ыхтақӣт. 49Таўатысяҳқа̄гуқ кынлытҳӯтылъҳани нунам. Яқулгыт тагилютың авуҳлъықӣт сыӷлыӷыт югыт пинилӷӣның. 50Ынка̄м сыӷлыӷыт кынӷыгнун милю̄лъықӣт, таўани қия̄ӷўаҳлъяхлъықут, хутытың тышқита̄хта̄мӣта».
Нутаӷатлъю, Ныӷиҳтатлъю Апыҳтӯсят
51Та̄хкын Иисусым а̄птыкӣ малихся̄ҳтыни: «Қамахлъюки тама̄кут лӣгикыстыкӣ?» Кӣмсиқа̄т: «А̄а». 52Та̄хкын пикӣ: «Тамаҳаӷми апыҳтуӷикаюк Лӣлиҳтӯсяның апыҳтуқақ Атаныҳпагулъҳаның Қилягым хўатылңӯгуқ: мыңтыӷалык ю̄к нусюгралӷӣ кахпагвигминың нутаӷамыңлъю, ныӷиҳтамыңлъю».
Назаретыми Иҳсякыхкаңат Иисус
53Иисус та̄қсями апыҳтуӷиныӷмың уңипаӷа̄тның аӷуляқыхкақ. 54Агляӷлюни ныминун апыҳтуӷиян синагогаңитни, югыт сяӷӣӷаягутка̄т. Лъмыхның а̄пқуӷа̄ӷуткат: «Накын пыҳқинылъыңа? Накынлъю аҳтуӷьяҳқа̄нӷилъыңа алъя̄ҳлъюхўаҳтимун? 55Иӷнықынӷитагӯ плотникым? Мария на̄кынӷитагӯ, ӯк аңлыгуткынӷитакӣ Иаковлъю, Иосифылъю, Симонлъю ынка̄м Иудалъю? 56Наягилъю ма̄нъыӷита̄т? Накын лӣтылъыңыҳлъяхталъю, аҳтуӷьяҳқа̄нӷилъыңалъю?» 57Ынка̄м тугуклъиӷьюнӷитка̄т.
Иисусым пикӣ: «Нани алңунак югыт сӣвакақа̄т ӯкналиқиста иўырңақун лъңан катам нунаңанилъю ныңлъюгутаңанилъю». 58Тама̄ни алъя̄ҳлъюхўаҳтипагумаңилңуқ қаюҳлъяк ухпықынӷилъкаңат.
Actualmente seleccionado:
:
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe Bible Translators, Inc. All rights reserved.