От Матфея 15
15
Сивулӣӷа̄т Апыҳтӯсӣт
1Та̄хкын иляңи Фарисеитлъю, апыҳтуӷикаюгытлъю Лӣлиҳтӯсяның Иерусалимымың тагилютың а̄птыка̄т Иисус: 2«Сяңамың малихся̄ҳтытын қа̄ткусигатат сивунымта апыҳтӯсӣтнун? Ныӷнақныӷмыхни ӯҳтӣгатут ылъқуӷулъютың апыҳтӯсӣтнун».
3Иисусым а̄птыкӣ: «Сяңан лъпыси қа̄ткигатақыстики Кияӷныӷым қылӷусӣ малихналюки лъпыси катам апыҳтӯсяси? 4Кияӷныӷым қылӷусяқа̄: “Қӯлваӷлюкык атанлъю, на̄нлъю”. Хўатынлъю пика̄гуқ: “Китум алңунак атани, налиӷмың на̄ни сыӷлыпыста̄тун акузиткыхкумигу, туқусяҳқа̄гуқ”. 5,6Иўырңа лъпыси апыҳтуӷӣқуси: “Югым қӯлванӷисяӷңа̄гу атани налиӷмың на̄ни хўатын пикагу”, Каюсӣсяҳқалгӯңа лъпынун, иўырңа тӯна̄нӷитақа қаюҳлъяк акықусяқыхкақақа тӯнылъықнилюку Кияӷныӷмун. Таўатын пилъыҳпысигун пакигақаси Кияӷныӷым Лӣлиҳтӯсӣ апалъюқлъюки лъпыси катам апыҳтӯсяси. 7Укуҳси пинӣюгныӷни! Ылъқуҳлъюси хўатын Исаиям ӯкналиқуткыхкақӣси!
8Кияӷнық пӣқ: “Укут югыт акузитмыхтыхун қӯлваӷақа̄тңа, нака̄н илюмыхның.
9Тымңи манигуӷақа̄тңа қаюҳлъяк апыҳтӯсяқақӣт лӣлиҳтӯсяңлъяқатың,
катам хўаңа Лӣлиҳтӯсяқыпихлъыҳӣстун”».
Югым Нукыхнаҳқусӣ
10Та̄хкын Иисусым юлӷутыт тахсиӷлюки пикӣ: «Нагалъюңа лӣгикитык! 11Югым сяңўа̄ қаныӷминун канаҳтыка̄ нукыхнаҳқиңигатуқ, иўырңа югым қа̄нӷаның а̄ныхкақ нукыхнаҳқикаюгӯқ».
12Та̄хкын малихся̄ҳтыңита такулюку а̄птыка̄т: «Лӣсимакынӷисигӯ Фарисеит анахтыкит таўатын пилъыҳпыгун?»
13Иисусым кӣмсиқӣ: «Нунивахсыӷақ қамахлъюку Атама қилягмылңӯм пӣтысиӷа̄маңилъкаңа нусюгьяҳқа̄гуқ. 14Авылӷақӣнаӷлюки Фарисеит! Ая̄кастун маӷьяҳқуӷӣқут. Югым ая̄кам иляңа ая̄кақ таслъюқумигу, ля̄гўа̄ӷмун калыфкахта̄лъықук».
15Петырым а̄птыка̄: «Уңипа̄таҳтикут, сямың писӣгўа уңипаӷа̄тын югыт нукыхнаҳқиганъикытын ныӷыхкамыхтыхун?»
16Иисусым пикӣ: «Лъпысилъю сялин лӣгикинӷисык? 17Лӣсимакынӷистыхӯ сяңўа̄ алңунак югым қаныӷминун канаҳтыка̄ ақсяқҳўанун пӣқуқ, та̄хкын а̄нақуқ югусӣның? 18Иўырңа сяңўа̄ қамакын а̄ныхкақ қаныҳқун нукыхнаҳқикаюгӯқ югмың. 19Қаюҳлъяк югым илюңаның сыӷлық сюмыҳтаӷалъық пика̄югӯт, юхтақ, гылгаӷнӣқ, алъянӣқ, тыглыгнӣқ, иқлъыңиқутки ынка̄м сыӷлықӯқ югның. 20Тама̄кут нукыхнаҳқикаюгыт югның, иўырңа ӯҳтуҳпынани ныӷылъҳым нукыхнаҳқынъа̄нӷита̄ ю̄к».
Аӷнам Ухпықилъҳа
21Та̄хкын Иисус аӷуляқыхкақ тама̄кын нунамың туңыхкынун Тирылъю, Сидонылъю. 22Та̄ўаңуқ Ханааныӷмӣ аӷнақ. Иисус такука̄ акилӷӯмаӷми: «Ка̄й Атанық, Иӷныӷа Давидым, наңлъыгьягутықыҳтиңа! Паника туӷныӷа̄м ӣтҳума̄, сыӷлыӷўа̄ӷӯқ».
23Иўырңа Иисусым авылӷақӣнақа̄. Малихся̄ҳтыңита такулюку каяхтаӷўа̄қа̄т: «Иқитысқигу! Малихся̄ӷума̄мта акилӷӯгуқ!»
24Та̄хкын Иисусым пикӣ: «Кияӷныӷым каяхтыкақа̄ңа Израилыӷмӣңинаҳаӷнун, пынъӣӷыстун ифлъякастун аюқылӷӣнун».
25Иўырңа аӷнақ тагилюни Иисусым сивуңакун қуңуҳтуткылъюку пикақ: «Атанық, каюсӣтаҳтиңа!»
26Иисусым пика̄: «Анахутңа̄қ таӷнуҳа̄т нықңит тугулюки қикминун милю̄скумың».
27Аӷнам пика̄: «А̄а, Атанық, талўа югым қикмӣ ифкаҳқылъҳаның ныӷақут».
28Та̄хкын Иисусым пика̄: «Аӷнақ лъпык, ухпықилъыҳтупихтутын! Апыӷӣӷли пиюкылъыҳпытун». Таўаниңинақ панига на̄лъҳуткақ.
Иисусым На̄лъҳускаңа Ю̄к Углялӷӣ
29Та̄хкын Иисус аӷуляқыхкақ тама̄кын нунамың, ысныңакун На̄йвам Галилеям. Қымимун маюӷлюни ақумыхкақ. 30Юлӷутыҳлъягыт такуляӷа̄тка̄т, тагисимӣта Иисусым сивуңанун пиюхпагниңилңӯт, ақниҳтыкат, ая̄кат, акузиңигалңӯт, иляңилъю қинуюлӷӣт. Ынка̄м на̄лъҳуқуқӣ. 31Юлӷутыҳлъягыт сяӷӣӷаюкат ысҳапаглюки акузиңигалңӯт акузиягулъҳӣт, ақниҳтыкат на̄лъҳулъҳӣт, пиюхпагниңилңӯт пиюгьягулъҳӣт, ая̄катлъю ысҳа̄сягулъҳӣт. Ынка̄м усюқыхка̄т Кияӷныӷа Израилым.
Иисусым Ныӷыстилъҳа 4,000 Сӣпңалӷӣның Югның
32Та̄хкын Иисусым малихся̄ҳтыни тахсиӷлюки пикӣ: «Ма̄кут наңлъыгьягутыпихтанка қаюҳлъяк хўаңамнитут пиңают аӷныӷыт, талўа ныӷьяҳқӣтут. Ныӷыстыхпынаки аӷуляқысюнӷитанка, лю̄рақ тумаңани кая̄линаюката».
33Малихся̄ҳтыңита а̄птыка̄т: «Ма̄ни килга̄ни накын нықыңнақыста на̄маяҳқамың юлӷутыҳлъягнун?»
34Иисусым а̄птыкӣ: «Натын угляҳқака̄н нықыкшаңлгуси?» Кӣмсиқа̄т: «Ма̄ӷраӷвинлыгӯт, қафсинатлъю иқалъюха̄т».
35Ынка̄м Иисусым юлӷутыҳлъягыт қылъқӣ ақумӯтысқылъюки нунакун. 36Та̄хкын тугулюки ма̄ӷраӷвинлык нықыкшагыт иқалъюгытлъю, Кияӷнық игамсиқаюгвикыхка̄. А̄вгуӷлюки тӯныхкӣ малихся̄ҳтыминун ынка̄м уйыхтыкӣт юлӷутыҳлъягнун. 37Қамахлъютың ныӷӯткат кыпсю̄лъютың. Та̄хкын малихся̄ҳтыт сӣпнық қырңуҳлъюку ма̄ӷраӷвинлык корзинат имӣқӣт ыслъықагаҳлъюки. 38Угляҳталяңит ныӷӯткат югыт 4,000ңуфтут, кысюткыхпынаки аӷнатлъю, таӷнуҳа̄тлъю.
39Та̄хкын Иисусым юлӷутыҳлъягыт агляҳтӯтыслъюки лъңитнун лъңа аңьямун ӯхлъюни увитаңанун Магдалам агляқақ.
Actualmente seleccionado:
От Матфея 15: ess2
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe Bible Translators, Inc. All rights reserved.
От Матфея 15
15
Сивулӣӷа̄т Апыҳтӯсӣт
1Та̄хкын иляңи Фарисеитлъю, апыҳтуӷикаюгытлъю Лӣлиҳтӯсяның Иерусалимымың тагилютың а̄птыка̄т Иисус: 2«Сяңамың малихся̄ҳтытын қа̄ткусигатат сивунымта апыҳтӯсӣтнун? Ныӷнақныӷмыхни ӯҳтӣгатут ылъқуӷулъютың апыҳтӯсӣтнун».
3Иисусым а̄птыкӣ: «Сяңан лъпыси қа̄ткигатақыстики Кияӷныӷым қылӷусӣ малихналюки лъпыси катам апыҳтӯсяси? 4Кияӷныӷым қылӷусяқа̄: “Қӯлваӷлюкык атанлъю, на̄нлъю”. Хўатынлъю пика̄гуқ: “Китум алңунак атани, налиӷмың на̄ни сыӷлыпыста̄тун акузиткыхкумигу, туқусяҳқа̄гуқ”. 5,6Иўырңа лъпыси апыҳтуӷӣқуси: “Югым қӯлванӷисяӷңа̄гу атани налиӷмың на̄ни хўатын пикагу”, Каюсӣсяҳқалгӯңа лъпынун, иўырңа тӯна̄нӷитақа қаюҳлъяк акықусяқыхкақақа тӯнылъықнилюку Кияӷныӷмун. Таўатын пилъыҳпысигун пакигақаси Кияӷныӷым Лӣлиҳтӯсӣ апалъюқлъюки лъпыси катам апыҳтӯсяси. 7Укуҳси пинӣюгныӷни! Ылъқуҳлъюси хўатын Исаиям ӯкналиқуткыхкақӣси!
8Кияӷнық пӣқ: “Укут югыт акузитмыхтыхун қӯлваӷақа̄тңа, нака̄н илюмыхның.
9Тымңи манигуӷақа̄тңа қаюҳлъяк апыҳтӯсяқақӣт лӣлиҳтӯсяңлъяқатың,
катам хўаңа Лӣлиҳтӯсяқыпихлъыҳӣстун”».
Югым Нукыхнаҳқусӣ
10Та̄хкын Иисусым юлӷутыт тахсиӷлюки пикӣ: «Нагалъюңа лӣгикитык! 11Югым сяңўа̄ қаныӷминун канаҳтыка̄ нукыхнаҳқиңигатуқ, иўырңа югым қа̄нӷаның а̄ныхкақ нукыхнаҳқикаюгӯқ».
12Та̄хкын малихся̄ҳтыңита такулюку а̄птыка̄т: «Лӣсимакынӷисигӯ Фарисеит анахтыкит таўатын пилъыҳпыгун?»
13Иисусым кӣмсиқӣ: «Нунивахсыӷақ қамахлъюку Атама қилягмылңӯм пӣтысиӷа̄маңилъкаңа нусюгьяҳқа̄гуқ. 14Авылӷақӣнаӷлюки Фарисеит! Ая̄кастун маӷьяҳқуӷӣқут. Югым ая̄кам иляңа ая̄кақ таслъюқумигу, ля̄гўа̄ӷмун калыфкахта̄лъықук».
15Петырым а̄птыка̄: «Уңипа̄таҳтикут, сямың писӣгўа уңипаӷа̄тын югыт нукыхнаҳқиганъикытын ныӷыхкамыхтыхун?»
16Иисусым пикӣ: «Лъпысилъю сялин лӣгикинӷисык? 17Лӣсимакынӷистыхӯ сяңўа̄ алңунак югым қаныӷминун канаҳтыка̄ ақсяқҳўанун пӣқуқ, та̄хкын а̄нақуқ югусӣның? 18Иўырңа сяңўа̄ қамакын а̄ныхкақ қаныҳқун нукыхнаҳқикаюгӯқ югмың. 19Қаюҳлъяк югым илюңаның сыӷлық сюмыҳтаӷалъық пика̄югӯт, юхтақ, гылгаӷнӣқ, алъянӣқ, тыглыгнӣқ, иқлъыңиқутки ынка̄м сыӷлықӯқ югның. 20Тама̄кут нукыхнаҳқикаюгыт югның, иўырңа ӯҳтуҳпынани ныӷылъҳым нукыхнаҳқынъа̄нӷита̄ ю̄к».
Аӷнам Ухпықилъҳа
21Та̄хкын Иисус аӷуляқыхкақ тама̄кын нунамың туңыхкынун Тирылъю, Сидонылъю. 22Та̄ўаңуқ Ханааныӷмӣ аӷнақ. Иисус такука̄ акилӷӯмаӷми: «Ка̄й Атанық, Иӷныӷа Давидым, наңлъыгьягутықыҳтиңа! Паника туӷныӷа̄м ӣтҳума̄, сыӷлыӷўа̄ӷӯқ».
23Иўырңа Иисусым авылӷақӣнақа̄. Малихся̄ҳтыңита такулюку каяхтаӷўа̄қа̄т: «Иқитысқигу! Малихся̄ӷума̄мта акилӷӯгуқ!»
24Та̄хкын Иисусым пикӣ: «Кияӷныӷым каяхтыкақа̄ңа Израилыӷмӣңинаҳаӷнун, пынъӣӷыстун ифлъякастун аюқылӷӣнун».
25Иўырңа аӷнақ тагилюни Иисусым сивуңакун қуңуҳтуткылъюку пикақ: «Атанық, каюсӣтаҳтиңа!»
26Иисусым пика̄: «Анахутңа̄қ таӷнуҳа̄т нықңит тугулюки қикминун милю̄скумың».
27Аӷнам пика̄: «А̄а, Атанық, талўа югым қикмӣ ифкаҳқылъҳаның ныӷақут».
28Та̄хкын Иисусым пика̄: «Аӷнақ лъпык, ухпықилъыҳтупихтутын! Апыӷӣӷли пиюкылъыҳпытун». Таўаниңинақ панига на̄лъҳуткақ.
Иисусым На̄лъҳускаңа Ю̄к Углялӷӣ
29Та̄хкын Иисус аӷуляқыхкақ тама̄кын нунамың, ысныңакун На̄йвам Галилеям. Қымимун маюӷлюни ақумыхкақ. 30Юлӷутыҳлъягыт такуляӷа̄тка̄т, тагисимӣта Иисусым сивуңанун пиюхпагниңилңӯт, ақниҳтыкат, ая̄кат, акузиңигалңӯт, иляңилъю қинуюлӷӣт. Ынка̄м на̄лъҳуқуқӣ. 31Юлӷутыҳлъягыт сяӷӣӷаюкат ысҳапаглюки акузиңигалңӯт акузиягулъҳӣт, ақниҳтыкат на̄лъҳулъҳӣт, пиюхпагниңилңӯт пиюгьягулъҳӣт, ая̄катлъю ысҳа̄сягулъҳӣт. Ынка̄м усюқыхка̄т Кияӷныӷа Израилым.
Иисусым Ныӷыстилъҳа 4,000 Сӣпңалӷӣның Югның
32Та̄хкын Иисусым малихся̄ҳтыни тахсиӷлюки пикӣ: «Ма̄кут наңлъыгьягутыпихтанка қаюҳлъяк хўаңамнитут пиңают аӷныӷыт, талўа ныӷьяҳқӣтут. Ныӷыстыхпынаки аӷуляқысюнӷитанка, лю̄рақ тумаңани кая̄линаюката».
33Малихся̄ҳтыңита а̄птыка̄т: «Ма̄ни килга̄ни накын нықыңнақыста на̄маяҳқамың юлӷутыҳлъягнун?»
34Иисусым а̄птыкӣ: «Натын угляҳқака̄н нықыкшаңлгуси?» Кӣмсиқа̄т: «Ма̄ӷраӷвинлыгӯт, қафсинатлъю иқалъюха̄т».
35Ынка̄м Иисусым юлӷутыҳлъягыт қылъқӣ ақумӯтысқылъюки нунакун. 36Та̄хкын тугулюки ма̄ӷраӷвинлык нықыкшагыт иқалъюгытлъю, Кияӷнық игамсиқаюгвикыхка̄. А̄вгуӷлюки тӯныхкӣ малихся̄ҳтыминун ынка̄м уйыхтыкӣт юлӷутыҳлъягнун. 37Қамахлъютың ныӷӯткат кыпсю̄лъютың. Та̄хкын малихся̄ҳтыт сӣпнық қырңуҳлъюку ма̄ӷраӷвинлык корзинат имӣқӣт ыслъықагаҳлъюки. 38Угляҳталяңит ныӷӯткат югыт 4,000ңуфтут, кысюткыхпынаки аӷнатлъю, таӷнуҳа̄тлъю.
39Та̄хкын Иисусым юлӷутыҳлъягыт агляҳтӯтыслъюки лъңитнун лъңа аңьямун ӯхлъюни увитаңанун Магдалам агляқақ.
Actualmente seleccionado:
:
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022, Wycliffe Bible Translators, Inc. All rights reserved.