Matìyò 23

Yeso pàti bəd imbə̀ʼ Mə̀chwitì mə̀nɔ̀ʼɔ̀ tì mə̀Farìsi

(Mag 12:38-39; Lug 11:43,46; 20:45-46)

1Yeso ya ghàm abə tinɔ̰ bəd fɔrɔ abə mə̀mə̀nənùg məd gha, 2“Mə̀chwitì mə̀nɔ̀ʼɔ̀ tì mə̀Farìsi ya bəd ne kyeri ni taŋ tòʼrì mə̀nɔ̀ʼɔ̀ Muse. 3Icheg ne ze yaʼi ane, mbə zug inug ijìm ne mbɔb gha inən bə̀ ya fàʼà. Si ya gha, imbə̀ʼ mbə̰ ya fàʼà awən inug ne mbɔb mbe fàʼà imbə̀ʼ icheg ne chəyi mbɔb mbe fàʼà inug ne mbɔb mbe chwìte. 4Mbɔb ya kɔ̀rɔ ighi ne nìrè nàʼà abə bəd gha mbe beʼe. Si ya gha, chəyi wə̀d abɔ̀ʼ inɔb we kə̀bə̀ ni wètì wə̀d ka iki piʼì. 5Mbɔb ya ghìyə̀ inug ijìm ni gha bəd bara awɔb. Ìmbɔb ìbàn gɔb ne mbe ŋwàʼrà Ìngam Ŋwiye zìyè inga ya kwàʼ ìmbi kyen kyen. Mbɔb ya ta ìtɔb ndwi zìyè itɔŋ ne taŋ sà angu. 6Anyumə̀ ne mbɔb gho ane iteri fɔrɔ anyumə̀ ne mbɔb yaʼi inga ichamì Ŋwiye mbɔb ya kà kɔ̀ŋɔ̀ məyi itən bəd kyen kyen. 7Mbɔb ya kɔ̀ŋɔ̀ gha bəd ya chàʼrà awɔb a sàmi iywin ane ighumni. Mbɔb ya bə̀ kɔ̀ŋɔ̀ gha bəd ndəŋ ya kàrà awɔb ane ‹Àchwitìnùg›. 8Imbə̀ʼ mbə̰ saŋa awən gha wə̀d mɔ̀ʼɔ ya kàrà awən ane ‹Àchwitìnùg› imbə̀ʼ icheg ne mbə̰ ya məfi bə̀ bèrì Àchwitìnùg məyi imɔ̀ʼ. 9Imbə̀ʼ mbə̰ kara awən wə̀d mɔ̀ʼɔ igun isəg ane ‹Mbaʼ›. Mbə bèrì Mbaʼ məyi imɔʼ ne yaʼi ikaŋ àbɔ̀ŋɔ. 10Imbə̀ʼ mbə̰ saŋa awən gha wə̀d mɔ̀ʼɔ ya kàrà awən ane ‹àchwitìnùg› imbə̀ʼ icheg ne mbə bèrì Àchwitìnùg məyi amɔʼ ne ya Wə̀d we ne Ŋwiye zɔ̀ʼi. 11Wə̀d ne beri ati ne taŋ faŋ abɔ̀ʼ inən bèrì ni yaʼ ìwən wə̀d àfàʼì. 12Wə̀d ne nɔ̀ nyɔd, Ŋwiye biri swi aməd aseg. Wə̀d ne swi ìwi nyɔd aseg, Ŋwiye biri nɔ̀ aməd ikaŋ.”

Ngəʼ kyen biri nyi igun bəd ne bèmnè inug

(Mag 12:40; Lug 11:39-42,44; 11:47-52; 20:47)

13Yeso ya chè imbìghè gha, “Ngəʼ kyen biri nyi igun inən, mbə̰ mə̀chwitì mə̀nɔ̀ʼɔ̀ tì mə̀Farìsi! Mbə̰ ya kwàʼ bəd ne bèmnè inug! Mbə̰ mbe kə̰ inuʼ akɔŋi gha imbə̀ʼ bəd nɔ̀ʼ nyi inga anug ìfɔ̀n ikaŋ. Chəyi mbə̰ mbe nyḭ̀yḛ inga. Chəyi mbə̰ mbe bə̀ kə̀bə̀ gha bəd ndəŋ ne kirə ika ni nyi inga, mbe nyi. 14[Ngəʼ kyen biri nyi igun inən, mbə̰ mə̀chwitì mə̀nɔ̀ʼɔ̀ tì mə̀Farìsi! Ngəʼ kyen biri nyi igun inən mbə̰ mbe ne tàmba məku-àyi nìŋə ìmbɔb ighi se fùbrə̀ aghə inɔb chàʼrà Ŋwiye tà̰. Ŋwiye biri taŋ chə awən chè bəd ndəŋ məjìm ne ghìyə̀ inug tibɔ̀ŋ.]

15Ngəʼ kyen biri nyi igun inən, mbə̰ mə̀chwitì mə̀nɔ̀ʼɔ̀ tì mə̀Farìsi! Mbə̰ ya kwàʼ bəd ne bèmnè inug! Mbə̰ mbe ghò mà isiŋi ijìm igun iseg bə̀ bàna tìbà ni ghì gha wə̀d bḛ àzən anug Ŋwiye. Anyumə̀ ne tengàŋ fə se bḛ, mbə ghì aməd wì bə chè awən achug abe bə̀ ghì wì nyi inga asiŋi ichə. 16Ngəʼ kyen biri nyi igun inən, mbə̰ məfəg ne chwìte inɔnjì abə bəd! Mbə̰ mbe gha, ‹Wə̀d mə zɔ̀m anug kàn mbàn Ŋwiye, àze kayi anug mɔ̀ʼɔ. Wì mə zɔ̀m anug kàn gol we ne yaʼi inga mbàn Ŋwiye, tengàŋ mənyìʼ fàʼ anug ze ne wì zɔ̀mi.› 17Mbə̰ ya kwàʼ məfəg bə̀ yaʼ inen! Aghi ne faŋi chè àzin àkə azeg? Àkə gol kə̀ àkə mbàn Ŋwiye ne ghìyə̀ aghi ne chəyi ze zḛ ze ywìrì bə̀ŋə̀ ane aghi ne zḛ? 18Mbə̰ mbe bə̀ gha, ‹Wə̀d mə zɔ̀m anug kàn ikwijə̀ŋ àfàtì, chəyi àze yaʼi anug mɔ̀ʼɔ. Wì mə zɔ̀m kàn aghi àfàtì, wì mənyìʼ fàʼ anug ze ne wì zɔ̀mi.› 19Mbə̰ ya məfəg! Aghi ne beri ati chè àzin àkə aghə? Àkə ighi àfàtì kə̀ ikwijə̀ŋ àfàtì ne ghìyə̀ ighi ne yaʼi igun mbi zḛ? 20Ane ya gha, wə̀d mə fə zɔ̀m anug ane ikwijə̀ŋ àfàtì, tengàŋ fə bə̀ zɔ̀m fɔrɔ ane ighi ijìm mbe ne yaʼi angu. 21Wə̀d mə bə̀ zɔ̀m anug kàn mbàn Ŋwiye, wì fə bə̀ zɔ̀m kàn mbàn Ŋwiye fɔrɔ wə̀d we ne chùghə inga mbàn Ŋwiye. 22Wə̀d mə zɔ̀m anug kàn ikaŋ àbɔ̀ŋɔ, tengàŋ fə bə̀ zɔ̀m kàn atən ifɔn Ŋwiye tì Ŋwiye we ne chùghə igun atən ifɔn ze.

23Ngəʼ kyen biri nyi igun inən, mbə̰ mə̀chwitì mə̀nɔ̀ʼɔ̀ tì mə̀Farìsi. Mbə̰ ya kwàʼ bəd ne bèmnè inug! Mbə̰ mbe ghàpà titeti min tì dil fɔrɔ kumìn ane iba ìghum, nàʼà aba afibì abə Ŋwiye. Si ya ghi, mbə̰ mbe se wàʼra inug ne beri ati chè inug ijìm inga mə̀nɔ̀ʼɔ̀. Inug mbe ya: anug ni ghì inug ne koʼi, tì anug ni bèrì àsɔ̀mnəfiŋ, fɔrɔ anug ni bèrì ibḛfiŋ. Mbə bèrì ni fàʼ inug mbo̰ kwàʼ ijìm witì sàŋì àze mɔ̀ʼɔ. 24Mbə̰ ya məfəg ne chwìte inɔnjì abə bəd! Mbə̰ mbe kyàŋà tèmbɔ̀ŋɔ̀ chìyè inga mənoʼ se mèrè kàme.

25Ngəʼ kyen biri nyi igun inən, mbə̰ mə̀chwitì mə̀nɔ̀ʼɔ̀ tì mə̀Farìsi! Mbə̰ ya kwàʼ bəd ne bèmnè inug! Mbə̰ mbe sò njìm toʼ fɔrɔ njìm akaŋ, si ya gha, ighi ne sweghi inga toʼ te fɔrɔ ikaŋ mbe ya ighi ne mbə ghəʼri niŋ abə bəd fɔrɔ ighi ne mbə ghəʼri pàŋì abə bəd. 26Mbə̰ mə̀Farìsi mbo̰ ya məfəg! Mbə̀ fə bi sò toʼ fɔrɔ ikaŋ a njìm inga, njìm isəg biri si zen.

27Ngəʼ kyen biri nyi igun inən, mbə̰ mə̀chwitì mə̀nɔ̀ʼɔ̀ tì mə̀Farìsi! Mbə̰ ya kwàʼ bəd ne bèmnè inug! Mbə̰ ya icheg iseg ne mbi bɔmi zɔʼ mbem fu wi bɔŋ ane njìm isəg. Si ya gha, njìm inga ya iwu bəd tì aku aghi bɔbi ajìm. 28À ya bə̀ ane ne, bəd mbe nḛ̀ awən gha mbə̰ təm kòʼ, ne à ya inug bemni tì inug izəg sweghi inən inga fìŋ!

29Ngəʼ kyen biri nyi igun inən, mbə̰ mə̀chwitì mə̀nɔ̀ʼɔ̀ tì mə̀Farìsi! Mbə̰ ya kwàʼ bəd ne bèmnè inug! Mbə̰ ya bɔ̀mɔ itog iseg abə bədkə̀n Ŋwiye bə̀ zìyè ighi ngwèn igun iseg abə bəd ne ya təmi kòʼ. 30Mbə̰ mbe bə̀ gha, ‹Àkə aghi ne tì ya yaʼi inga nyùmə̀ we abə ìmba mə̀mbaʼ aneg, nji chəyi tì ya fɔti abɔ̀ʼ inɔb ni zweti bədkə̀n Ŋwiye.› 31Mbə̰ ya anìŋ bḛ bə̀ zìyè isaʼi igun ìmbən itog gha mbə̰ ya bɔn inga inəbi bəd mbe ne ya zweti bədkə̀n Ŋwiye. 32Mbə̀ che imbìghè mànì àfàʼì ze ne ìmbən mə̀mbaʼ aneg ya ko.

33Mbə̰ ya kwàʼ jo! Mbə̰ ya kwàʼ ifighi! Mbə̀ kə dù inga ngəʼ ze ne yaʼi inga asiŋi ichə iye? 34Ane, mə̀ ya anìŋ chà ìmbum bədkə̀n tì ìmbum bəd iwe fɔrɔ ìmbum mə̀chwitì mə̀nɔ̀ʼɔ̀ inən. Mbə̰ biri zweti bəd mɔ̀ʼɔ abɔ̀ʼ inɔb, kɔ̀mbì mbi mɔ̀ʼɔ igun azed abaʼri, bə̀ ywìri bəd mɔ̀ʼɔ abɔ̀ʼ inɔb inga ìmbən məchamì Ŋwiye. Mbə̰ biri bə kamni ìmbum bədtɔm mɔ̀ʼɔ chà mbi sàkà ghò iben iben. 35Ane, anəm bəd mbe ne təmi kòʼ ne mbi zweti igun isəg aŋa biri nyi igun inən, ni ko ane anəm àze Abè ghò pè ane anəm àze Zàkàriyà, ŋwan Bèrekìyà we ne mbə̀ ya zweti inga ìsàn asiŋi ighumni tì ikwijə̀ŋ àfàtì. 36Mə ghà tesiʼ inən, ngəʼ ìzo̰ ijìm biri nyi igun iwaŋ bəd gho̰ kwàʼ ijìm.”

Yeso sɔ̀mnɔ̀ igun Jèrusalèm

(Lug 13:34-35)

37Yeso ya chè imbìghè gha, “O Jèrusalèm! Àghò we zwète bədkə̀n Ŋwiye bə̀ tùmbə bəd ne Ŋwiye tɔ̀mi ine ane ateg. Mə fə kə̀b ni ywìri feti ìmbe bɔn icheg ne ngɔb ngub we fète ìmbi bɔn aton ìti tibabì, si ya gha, chəyi àghò we bḛ gha mə̀ ghiyə ane. 38Nḛ, Ŋwiye fə sàŋi ìze nəb zì fumə̀. 39Mə gha tesiʼ ine, chəyi àghò biri ywìri bàd amə ghò pè ane aneg ne àghò biri gha, ‹Ŋwiye zì àbɔrɔ̀bɔd igun wə̀d we ne yèʼe inga ikum Anɔŋisəg.›”

Actualmente seleccionado:

Matìyò 23: MBTP

Destacar

Copiar