Mateo 9
9
Jesús mynguera pente kuimbai vatamba vekua
1Jesús jupi pente kanoaperã yy hyvaisho kyty hasarã, vãhẽ oho tenta Capernaumpe hai iko'i vekuape. 2Haipe veruashu hupa ryheve pente kuimbai vatambava; Jesús heshama ko kuaretare jyrojaherã, heishu kuimbai hasyva: “Yrẽĩ shyray, mbai porãmba rijapo vekua hejareiima ndyhevi”. 3Haipe Moisés mbypara vekua pyrỹmboi'iheare hei ijupe reta: “Ko kuimbai rãnga ijeta porããhe Tũpa”. 4Jesús kuaa mbaivara heijyre pyaperã, heishu reta: Marã'ĩrãra porã'ãĩte pypya pimbijeta? 5Mbaivara javaĩã jaishu ko kuimbai: “Mbai porãmba rijapo vekua hejareiima ndyhevi”. Maĩrã jairaposhu: “Pũã hareka vata”. 6Aheshakapo pee, kuareta Tay ĩmere mbaikatu hejareii pyndyhevi verã mbai porãmba pijapova ko yvy'ĩãrẽ. Haipe heishu kuimbai vatamba'ia: “Pũ'ã, mupuã ndurupa, ekuajy nyrẽntape. 7Haipe kuimbai vatamba'ia pũã hareka ohojy hentape. 8Kuaretare hesha kovarã kyje, hãrã õmombaishu Tũpa meẽshurã rehe mbaikatu kuaretare”.
Jesús hẽno Mateo
9Jesús oho haivirã hesha pente kuimbai Mateo he'iashua, kyrypoti mbatyhasea Roma pevãrã hyvache vapy'õ. Hãrã heishu: “Ei, shimi'ĩrũ”. Mateo pũã hareka oho hãndi. 10Mateo hentape Jesús hareka mboireare karu ñynoĩ verãpe, haipe jyveru jyve, kyrypoti mbatyse'iare Roma pevarã, hareka heta mbai porãmba japo'iare. 11Fariseore hokava hesharã pyrãndushu Jesús mboireare: Marã'ĩrãra pynymboi'ia vapy karu hãndi kyrypoti mbatyse'iare Roma pevarã, hareka mbai porãmba japo'iare? 12Jesús hendu fariseore heivarã heishu: Mambaimba'ia ikotẽvẽãhe pyrỹpỹhãno'iare; koñeĩ ñymbairasy'ivaĩ. 13Pekua pikuaa mbaivara he'ise Tũpa ĩñeepe heirã vekua: “She rãnga aipota pypareko papishare hareka ha'eã mymba jukahavare”. She aĩã ãhẽno heko kavivape, koñeĩ heko porãmba'iare opa heja verã mbai porãmba japo vekua.
Pyrãnduashu Jesús karuamba ryheva
14Haipe Juan Bautista mboireare ou Jesús ẽvãpe, hãrã pyrãndushu: “Ore hareka fariseore karumbape ikoha, marã'ĩrãra rỹmboiryreare japoã hai reta?” 15Jesús heishu reta: Pimoãrapo omendaha'õpe ĩme'õre vy'ãã ñynoĩ, temerã ẽẽteri hãndi retarã? Tẽvã, vãhẽpokui ara ẽẽveama ñynoĩ hãndi verã; haiperãmapo karumbape ñynoĩkui. 16Mba'etypo mondeava pysevẽ py'ahuva mbyvyvyhe verã mondeava ndeshivare; shara johearã mantapo py'ahuva mondeava ndeshiva, hãrã tivishavepo myndoro. 17Hãrã vino py'ahuva mbyhyruhãpo vakapi ndeshivapy; kyrã japoarã vakapi sororã vino opapo jyvare ijehe; hãrã vino py'ahuva mbyhyruañoĩpo vakapi py'ahuvapy, hãmerãpo mokuevea kỹỹ nantuhapy.
Jairo tajy hareka taupe Jesús mondeva pokohe vekua
18Jesús ijetateri'ẽshuva kuaretare vãhe ou pente Judiore juhuvisha, ĩñesu hỹnonderã heishu: “Shyrajy rãnga kurite mano, tẽvã reho ndepo rĩñono'ĩãrẽrã, kuerajypo”. 19Jesús pũãrã ohohipi hareka mboireare hãndi. 20Hãrã kuaretare mbytepe'ẽ pente taupe hasyva tuvyvasuivi, hareka japoma 12 ãño, ñymboja Jesús haykueivi mondeva pokohe verã. 21Shara pyapeĩmba hei: “Mondevarẽĩ apokorã akueramapokui”. 22Jesús jerepy, hesha tauperã heishu: “Ỹrẽĩ shyrajy, shara rirojarãmeĩ rykuera”. Haipevãĩ ko taupe kuera. 23Vãhẽma Jesús mburuvisha hentaperã, hesha ñimimby'õre, hareka heta jaheo ñynoĩva. 24Hãrã heishu reta: “Opa pẽhẽ koivi! Ko kuñataĩray manoã, ocheĩ'ẽ”. Hãrã haipe kuaretare õñepyrõ joje jyre. 25Tẽvã opama mohẽhã hetava katuaperã, Jesús iche kuñataĩ ẽvãperã pysy ipope, haipe kuñataĩray pũã. 26Hãrã opaite hokava tentaipi kuaaha kova, Jesús japova.
Jesús mynguera mokue heshamba kũvãĩpiare
27Jesús õhẽjy haivirã, haykueivi ou mokue kuareta heshamba kũvãĩpiare, sapuke jyveru: Yryparekomĩnteve David tay! 28Jesús ichema o'iperã, vãhẽ jyveru mokue kuareta heshamba kũvãĩpia, haivi Jesús pyrãndushu reta: Pyrojara she apyrỹmynguera verã? Haire hei: Yreja, rojaha rãnga. 29Jesús hesare pokorã heishu: Tiko pee pyrojava rãĩmi. 30Hãma hesare opa kueraherã hesha kavijy reta. Jesús hei kavijyshu: Avy mbava pymbeushukui kova ikova. 31Tẽvã haire haivi õhẽĩ opa mbeushu kuaretare hoka yvy ẽvãipi mbaivara Jesús japohe reta.
Jesús, pente ña'ẽnguva mbijetajy
32Haire õhẽjymarã, ĩme'ẽ kuaretare veruva Jesús ẽvãpe, pente kuimbai ña'ẽnguva mbaiposhy ĩmere vekua. 33Jesús mohẽshi mbaiposhyrã, ña'ẽngu'ia õñepỹrõ ijetajy, hãrã kuaretare haĩrã hesha retarã heijyre: “Mapeã kyrãva mbai heshaha Israelpe”. 34Tẽvã fariseore hei: “Ko kuimbai mbaiposhy juhuvisha ñymbaikatu rupii rãnga mohẽ mbaiposhyre”.
Jesús pareko opava retape
35Jesús vata opaite tentamire'õĩpi, hareka tenta vasu retaipi pyrỹmboihe Ñee kaviva Judiore ñymbatyseape mbeu Mburuvisha vasurã vate araivi ouva ryheva, hareka mynguera ñymbairasyvare. 36Jesús maĩhe kuareta retarã, parekoshu reta, shara haire kangyrã opa ipy reta, avishare ijamba rãĩmi jyre. 37Haipe Jesús heishu mboireare: “Ãñete ñotyãvare hetate'õ, tẽvã mynõõ'ia reta mbovyĩ jyre. 38Hãrã pirureshu koo ija hareka tymboushu kuaretare mba'apo verãre”.
Actualmente seleccionado:
Mateo 9: TPJ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
©2023 LETRA Paraguay