João 10
10
Jeju co Iri' Pastor
1Tomi' ac tococwa na: Wari' co om corom ac nain manain ca tao' caho' nein ovelha ma', wari' co corom xirac ma', wirico co an noc xa ovelha ma'. Quep em' tain ta na. Tomi' iri'o' inuhu' ta. 2Wari' co corom xo' nain manain ma' iri na ne, wirico co pastor ma', co querec wet taxipa' nain ovelha ma'. 3Corom ta' e' iri non wari' co querec wet nain manain ca corom ac wa ma' ne, pa mi' ac tocwa na pain. Tomi' tomi' xam' ac cain na wixinain ovelha nucun, taraju pa' ac nein na ca tomi' nucun, o hwerehwet mama' ac cain na quem. 4An hwet to pi' pin iri nain winacon ne, o mama' ac cain na, ja' ja' pan ac con na quem. Xi om ne ca taraju pa' ara nein ca tomi' nucun. 5Ja' ja' paxi' non waximain ma', ane om ja' ja' camain' con xucun wari' ne. Jein ca' non, xi taraju pa' nein ca tomi' nucun ta. Ac i ma' na ca pijim' tococwa con pastor pain ovelha nucun pane.
6Ac i ma' paxi' na ca pijim' cocon oro fariseu Jeju ma', pain ca pijim' joc mam' mi' tococwa con pastor pain ovelha nucun ma', ane om taraju pa' cacain ca tomi' mao nein ne.
7Tomi' mami' ac tococwa na: Je ca tomi' xuhu' ca', tomi' iri'o' inuhu' ta. Wata' co iri' man ca corom ac ne ovelha ma', pain ca corom ac nein ca tao' caho' nein ma'. Xi wata' ara ne co mi' nonon pain ca corom hwet wa Iri' Jam oro wari' ne ta. 8Oro xucucun ma', co wara maqui' ca' nanapa' ma', co pijim' ni ca' nanain capijacon Iri' Jam ma', ac caxicon wari' nana. Ac ca cut noc xa xin cacain na ovelha. Ac ca quep em' xin cacain na. Howa xut me paxi' nonon oro wari' ne ma'. Ane om ha' tococwa ne. 9Wata' co iri' man ca corom ac wa ca'. Oro wari' co corom ac nanapa' pain ca howa cacapa' ma', witan ac caca tara. Win ne ovelha ma'. Corom na, hwet mao ac ne na, mam' ac nein na tononoin. Ac i ma' tara ca querec wet toton co howa nanapa' ta. 10Caxicon wari' ma', om ca maqui' ximao ca. Maqui' e' na pain ca an noc xa tain cain oro ovelha. Maqui' e' na pain ca to' pa' pin tain cain. Maqui' e' na pain ca to' om pin tain cain quem. Ac i ma' nana co pijim' ni ca' nonon pain capijacon Iri' Jam oro wari' ne quem. Wata' iri na ne, maqui' ina, ma' ta e' cara caca oro wari' ne pain pawin ta inonon. Maqui' ina, ma' ta ma' ma' xam' cocon oro carawa ca mi' toton ta' pain ca to' e' cara toton quem inonon.
11Wata' co iri' pastor co querec wet xo' nain ovelha. Iri' pastor ma', om ca nain ho' xucun pain ca querec wet xo' cain ovelha nucun. Mi' pin caho' tain ovelha ne ta na. Ac i ma' ina quem. Om ca nain ho' xije cocon oro wari' co howa nanapa' ma'. Mi' pin caho' toton inonon. 12Om ca ac i ma' ca wari' co taramaja mi' e' nain dinheiro pain ca querec wet taxipa' cain ovelha ma'. Xi iri' pastor ca ta. Om ca mene cain ovelha quem. Querec iri non copacao' pain ca mo hwet tain cain ne, an to pin ac cain na oro ovelha, mo mao ac ca na quem. Mo hwet ac cain ovelha na copacao' ma', quep ac cain na wirain, ja' wawaran ac cain na oro wirain ma' quem. 13Mo mao na co ma' co taramaja mi' e' nain dinheiro. Xi win xumu cain ovelha ta. Ac i ma' nana co pijim' ni ca' nanain capijacon Iri' Jam quem. Om ca win xumu cocon oro wari' nucun Iri' Jam. 14Wata' co iri' pastor. Querec pin' inonon oro wari' ne, querec pin' nanapa' quem. 15Win ne ca querec pin' capa' Te cwa', querec pin' inon quem. Om ca nain ho' xije pain ca querec wet toton oro wari' ne quem. Mi' pin caho' toton ta inonon. 16Ma' nanapa' oro xucucun wari' co om howa querec nanapa' quem. Wari' ne toton inonon. An xiho' nanain oro ovelha ca corom to nain xijein ca tao' caho' nein ma'. Na e' na pain ca cut qui' toton quem. Taraju wet tatarain ca tomi' ne. Jao jao ma' ac cocon tara co wara howa nanapa', querec wet querec wet pi' pin ac toton tara quem. Xica' pe ta' pain ca querec wet toton ta#10.16 Pain ca tomi' ac i ma' ca Jeju ma', tomi' mi' nonon oro wari' co om judeu nana. Tomi' napari' pain ca om judeu iri' ca' quem. Main howa tatarapa' ta napari'..
17Om ca noc capa' Te. Xi nain ho' xije ta. Mi' pin caho' toton oro wari' ne ina. Ma' ta e' mami' ta' ina. 18Om na wari' co ha' non pain ca to' pa' pin ton pan capa' ta. Mi' pin ta' pan ina, maqui' nain ca param ne. Na napa' pain ca mi' pin ta', na napa' pain ca e' mami' ta' quem. Je ara xi' na ca ara ra capa' Te ta na ca tomi' tococwa ma'.
19Oro wari' ma', taraju iri nanain ca tomi' nucun ne, coromicat ni ca' mami' ac xucucun na. Mija nana co tomi' ca' nana: 20Corom pe ho' con caxicon jam ma' ira! Tamanain pin na! Para taraju wet hwein ca tomi' nucun ma' nana.
21Ma' ac caca na oro xucucun co tomi' ca' nana quem: Om ca corom pe ho' con caxicon jam wari' co tomi' ac i ma' ta. Ma' tara caxicon jam co quep xio taxi' non wari' co om tocon ra na ca tomi' caca ma'.
Ca om howa jun na cocon Jeju oro taramaxicon nuxut pain ca judeu urut
22Maqui' pin ac ne na xec nein ca tomi' querec te wi urut pain ca judeu urut ca', pain ca mam' pe wet urut pain ca ara xo' mami' xine cote ne xiricon Iri' Jam pain Jerusalém pane. Wara maqui' na ca xio tamana ne oro xec quem. 23Je ca xut in pe cain ca tao' caho' nein xiricon Iri' Jam Jeju ma'. Xut in pe nain ca tacan tiquin' ne xirim pain cacarain ma', pain Maxicon Salomão ma', je i ma' wixinain. 24To to mam' pin ac cocon na oro taramaxicon nuxut pain ca judeu urut ca'. Tomi' querec ac cocon na: Para joc xim cara xijem ma' quem nonon. Mo ta Cristo iri'o' ma, tomi' xo' ac maparut tara ta na ca tomi' querec cocon ma'.
25Wara tomi' xo' xuhu' ne ira, ane om howa mahu' ne ac tococwa na. Noro jein oro ca ara ta' ca', ca ara ra capa' Te ca'. Mo xi querec pin' hwein con, querec pin' ac mahu' xira quem. 26Ane om howa mahu' ne. Xi wari' ne hwe ta. 27Win ne oro ovelha ca taraju wet nain ca tomi' nucun co querec wet nain ma', ac i ma' na ca taraju wet cacain ca tomi' ne oro wari' ne ma' quem. Querec pin' inonon, ja' ja' ac cacapa' na quem. 28Mi' inonon pain ca e' cara wa. Om ta pan' ara'am camain' caca. Quep xat cara inonon, om na wari' co coc xicot ca' ac napa' cocon. 29Te ma', co mi' napa' cocon, hwara' opa na. Om na win hwara' opa ca. Om na wari' co coc xicot ca' ac nonon pain micon. 30Wata', Te, ca' urut, win cwere xujuxut. Ac ca xica' pe ne na xumuxut ta na ca tomi' tococwa ma'.
31Cut mami' ac cacain na pacun oro taramaxicon ma', to' to' mi' pin xun pain pacun ta ac cocon na.
32Tomi' ac tococwa na: Querec mahu' pain oro carawa ca awi ca ara ra capa' Te pane. Ma' carawa ca ara ta' pahu' pain ca to' to' mi' pin xim mahu' pain pacun ma' quem tata.
33Om ca to' pa' xim urut pum pain carawa ca awi ca ara ma ma' ac cocon na. To' pa' pin xim urut pum, xi tomi' ximao ara mon Iri' Jam ta. Iri' Jam ina ta a xima ma ron? Wari' ma ma' ira ac cocon na.
34-36Para tomi' ximao ma mahu' pain ca Panxica Iri' Jam ina ta' ca' quem? Win ne ca xirao' pe xine ca tomi' nucun Iri' Jam pain capijacon ca howa hwe ma', pain ca tomi' cocon oro taramaxicon co juiz nana pane: Ac wata' hwe, iri' jam hwe pain ca taramaxicon hwe ta nonon pane. Taxi' urun Iri' Jam pain ca iri' jam hwe cocon caram pacara pane co tomi' hwet ca pain capijacon pane. Taxi' urun pain ca om xin in taxi' ne capijacon quem. Je ca tomi' xuhu' ca' quem: Om ca na ne pain ca tomi' ximao ma mahu' pain ca Panxica Iri' Jam ina ta' ca'. Tora' pan napa' Te pain ca mi' capa' pain ca taramaja ne ca', pain ca hwet roron pain macan' ta capa' pahu'#10.34-36 Je ca xirao' pe xine pain capijacon Iri' Jam pain Salmo 82 ma': Ac wata' hwe, iri' jam hwe ta nonon oro taramaxicon co juiz nana pane. An xiho' mahu' pain ca hwara' opa ne ca'. Wahu' co tomi' xo' nonon pain capija oro wari', an xiho' mahu' pain ca taramaxicon nuhu' ma' quem na ca tomi' tococwa oro taramaxicon co juiz nana pane. . 37Mo xi om ara tain ca ara ra capa' Te cwa', hohot ac ne xira pain ca om howa mahu' ta. 38Om paxi' na ca howa mahu' pain ca tomi' ne ca', ane ara e' tain ca ara ra capa' Te ne. Je xi howa mahu' pain ca querec pin' hwein oro ca ara ta' ca' quem, pain ca ara tain ca om ara taxi' ne ca wari' wa ca'? Querec pin' ac mahu' xira pain ca win cwere capa' Te. Querec pin' ac mahu' xira pain ca win cwere ton ca' quem na ca tomi' tococwa ma'.
39Quep xun ta mami' ac cocon na. Ane witan ca' tococwa ne.
40Maji ta ac caparut na Jeju, in mama' ac urut pain na xijein cacarain Jordão cain. Mama' ac urut pain na ca ja' to cocon pain com oro wari' João cara pane, pain ca xo' ja' ten qui' ca com pain cara pane. Mon to wet ac urut pain na i cain. 41Mija ac caca na oro wari' co hwet nonon pain i cain quem. Tomi' ca' nana: João cara pane, om paxi' na ca an hwet cain ca hwara' opa wa pane, om paxi' na ca ara cain ca om ara taxi' ne ca wari' wa pane. Ane iri'o' ne oro ca tomi' hwet nucun con Jeju ne. Iri'o' iri'o' pi' pin na con ta na ca tomi' caca ma'. 42Mija pin ac caca na oro wari' co howa pin nonon Jeju pain i cain. Howa nonon pain ca maqui' iri'o' con Iri' Jam.
Actualmente seleccionado:
João 10: TBPN
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Copyright 2023 Missão Novos Tribos do Brasil