João 6
6
Ca tomi' hwara' pin cain capam' con hwam Jeju
Mateus 14.13-21; Marcos 6.30-44; Lucas 9.10-17
1Om ca pain homa ne, maji ta ac caparut na Jeju, pan horoho mama' ac urut pain na xijein cacarain com ma', Galileia ma'. Ma' na xijein wixinain quem. Tiberíades nanain quem. 2Mija nana wari' co ja' ja' nanaparut. Om ca paric camain' caca. Xi om ne ca querec ara cocon Jeju pain ca an hwet pe cain ca hwara' opa nucun pain ca quep xio pin cocon oro wari' co caxi nana pane. 3Piri' xi' e' ac caparut na, piri' mama' ac urut pain na ca tamaja pan ne macan'. Xao to ac urut na. Wirico Jeju ma', warut pain ca taxipa' urut con ca', xao to ac urut na. 4Wixicam pin na xec nein Páscoa ma', je i ma' xec nein ca tomi' querec te wi urut pain ca judeu urut ca'.
5Noro noro ac ca na Jeju. Querec ac tococwa na oro wari' co hwet xun nonon ma'. Mija nana wari' ta. Om ca paric camain' caca. Tomi' querec ac con na Filipe Jeju: Main xi cut to xin carawa ca cao' xi' caca oro wari' cwa' quem non. 6Tomi' querec e' non. Xi taxi' pan ara xucun pain ca ara ta' ca ma'.
7Mo xi ma' 200 capari' denário#6.7 Denário na wixinain dinheiro nucucun oro romano pain cara pane. Wari' co taramaja mi' non xucun wari' ma', pain ca taramaja qui' cain iri' xo' xec, taramaja taramaja irawin pa' ac con na pain ca taramaja nucun ma', an xica' pe ac cain na denário pain ca taramaja nucun. ca mam' cut xin capam' iri', iri' cote ne dinheiro paxi' xira, om xi xam' cocon. An an wijimain e' xirarain, om om xiroron. Om xi xam' cocon ta! Ac i ma' na ca tomi' ca Filipe.
8Tomi' ac ca na win ma' nuxut ma', André coxa' ca Pedro ma': 9Ma' paxi' na pije' cwa' Jeju. Ma' non wijimain carawa ca cao' wa. Ma' 5 non wijimain capam', ma' 2 non wixicon hwam quem. Om xi ma'am camain' caca pain wijimain caramaxicon ta. Xi mija ara caca ta na ca tomi' ca André ma'.
10Xao to je ta jujun oro wari' cwa' ta ac caparut na Jeju. Mija nain i ma' tononoin. Je ca xao to to caca ma', xao to xao to pi' pin nana. Mija nana wari'. Ac ca ma' 5.000 caca na ca tarama' nucucun co to nanain i ma'#6.10 Ma' paxi' nana oro narima' cacam oro hwijima' quem. Ane om tomi' tacacama ne.. 11Cut ac cain na capam' Jeju. Tomi' ac con na Iri' Jam: Tomi' querec te urut pum pain ca mi' maparut pain capam' ca' quem Te non, maxiram' mi' ac tococwa pain na co xao to nanain i ma'. Ac i ma' na con hwam quem. Cao' cao' ma'am ac caca na.
12Ma'am pin iri nana ne, tomi' ac caparut na pain ca taxipa' urut con ca': Om ta waraju xin oro pawirinain ma'. Pan cut jein ta naparut.
13Pan cut ac urut pain na, cut ho' cut ho' ac urut pain na pain coco quem. Moin' 12 na cotain parut. Je i ma' pawirinain capam' ca ma' 5 ma' ira. Cao' cao' ma'am ca' ara xi' nanain.
14Querec iri nanain i ma' oro wari' ne, pain ca an hwet pe cain ca hwara' opa nucun ma', pain ca tomi' hwara' pin cain capam' con hwam ma', tomi' ac caca na: Wirico co cwa' xin profeta co xirao' pe caca pain cara pane, co main maqui' tarain macan' ca' caca pane. Wirico ma' ira nana.
15Jeju ma', taxi' nonon oro wari' pain ca quep xat xun cocon pain ca taramaxicon pe ho' xut ta cocon ma' quem. Je ca paca' mami' cocon ma'. Piri' mao xica' pe ac cain na pacun.
Ca xut cain quimain com Jeju
Mateus 14.22-33; Marcos 6.45-56
16Xo' um pin iri na ne, quiji' mama' ac urut pain na com. 17Wara xim pin na, om ca hwet querec caparut Jeju. Piton to ac urut pain na mam' horoho wa ma'. Pan horoho mama' xin xijein cacarain cain ta ac urut na, pan horoho mama' ac urut na. Xumu urut pain Cafarnaum ma'. 18Nuru mip ac ne na hotowa ma' quem. Nocom nocom ac ne na com. 19Pan horoho pan horoho, to pira ca' ac urut pain na cacarain ma'. Am 5 ne tara quilômetro nein ca pan horoho urut ma', am 6 ne tara quilômetro ca pan horoho mama' urut ma'. Querec ac urut con na Jeju ma', pain ca xut cain quimain com ma'. Xut hwet naparut pain mam' horoho nuxut. Jin' tamana ac urut na.
20Om na, wata' ta. Ta jin' mahu' me ta ac caparut na.
21Tomi' querec te urut con. Piri' pe rain mam' horoho wa ca' ac urut con na, ane ane hwet hap ac urut pain na wapit ca xumu urut ma'.
Jeju co Iri' Capam' ca mi' nain ca e' cara wa pain pawin
22Xec pin iri na ne, i'ina ac ne na ximicocon oro wari' co to wet nana pa'ao' ma', pain cacarain com ma'. Mon Jeju quem nana. Taxi' paxi' nana pain ca ma' xica' pe ne wijimain mam' horoho wa cara ne. Taxi' nanaparut pain ca taxipa' urut con quem, taxi' nanaparut pain ca mama' xica' to urut pain ca mam' pan horoho mama' urut pain pain xijein cacarain cain. Taxi' nonon Jeju pain ca om hwet caparut quem. 23Ma' ac ne na oro wirain mam' horoho wa ca maqui' nain Tiberíades ma' quem. Piri' to xin i ma' ta ac caca na oro wari' nein, piri' to ja' pan ac cacain na ca cao' to cacain capam' oro wari' cara ne, ca tomi' pe qui' con Iri' Jam pain ca tomi' querec te urut pum pain capam' ca' quem Te qui' ca pane. 24Om ara xi' na Jeju cocon co taxipa' ca ma' ac caca na. Om caca ma' ira ac xucucun na. Maji pain Cafarnaum cain e', pirao' xuxun pain i cain ta ac caca na, pan horoho mama' ac caca na.
25Mam' pe ac cocon na pain xijein cacarain cain. Main ca pe ca xina pain ca maqui' nem quem taramaxicon co ca' na taxipa' capijacon Iri' Jam ac cocon na.
26Om na, pirao' paxi' mahu', xi cao' ara hwein capam' pata' ta ac tococwa na. Pirao' paxi' mahu', xi ma'am ara hwein ta. Om ca pirao' mahu' pain ca querec pin' hwein ca an hwet mi' xuhu' pain ca hwara' opa ne ca', pain ca mi' xim xuhu' pain ca e' cara wa pain pawin cain. Tomi' iri'o' inuhu' ta. 27Je ca tomi' xuhu' ca' ac tococwa na. Ta taramaja mi' hwein capam' ca om awi cara ma' me ta. Taramaja mi' jein capam' ca om pi' ra ha' ma', ca mi' nain ca e' cara wa pain pawin ma'. Mi' pan xuhu' pain, wata' pain ca Iri' Wari' ta' ca', mi' pan xuhu' pain. Tomi' ara xi' napa' pain Te Iri' Jam ta. Mi' roron pain ta napa' pahu' ta ac tococwa na.
28Tomi' querec ac cocon na: Cain' cain' xuxut quem? Ma' carawa ca ara je caparut Iri' Jam quem? Tomi' ha' xuxuxun na urut con ta na ca tomi' cocon ma'.
29Om na, howa xine pain ca hwet roron oro wari' ta capa' Te pahu'. Je ca ara je cuhu' ma' ac tococwa na.
30An hwet mi' xut pain ca hwara' opa nem ma' e' ac cocon na. Ara rain ca om ara taxi' ne ca wari' wa ta. Ma' carawa ca ara ta' ma ma' quem? Ara rain ta. Ma' ta querec xut pain pum, ma' ta howa xut pum pain ca maqui' mon Iri' Jam ta. 31Xi cao' ara cacain capam' hwanana nexi' co ja' ja' nonon Moisés pain cara pane ta. Cao' to nanain mahweri pane. Win ne ca xirao' pe xine capijacon Iri' Jam ca': Ara ma'am tata pain capam' ca camara' qui' nain pawin pane, ac i ma' na ca xirao' pe xine capijacon Iri' Jam ca'. Na nem pain ca an hwet pe ac i ma' main ca hwara' opa nem quem na ca tomi' cocon ma'.
32Om na, je ca tomi' xuhu' ca', tomi' iri'o' inuhu' ta ac tococwa na. Om ca Moisés ca co mi' nuhu' pain capam' ca camara' qui' nain pawin. Wirico Te co mi' nuhu' pain pane. Wirico Te co mi' nuhu' pain Iri' Capam' ca maqui' pawin pain xocori ca' quem. 33Je ca tomi' xuhu' ca' ac tococwa na. Iri' Capam' nucun Iri' Jam ma', ca mi' ca ma', maqui' nain pawin. Mi' nonon pain ca e' cara wa oro wari' pain macan' ca' ac tococwa na.
34Mi' cara xut pain capam' ca tomi' ma ma' taramaxicon ac cocon na.
35Om na, wata' co Iri' Capam' ca mi' nain ca e' cara wa ta. Win ne ca to' e' cuhu' capam' pain ca cao' hwein ma', ac i ma' ina pain ca to' e' cara xuhu' ca' quem ac tococwa na. Wari' co hwet napa' ma', wari' co howa napa' ma', om ta jain jain mami' cain oro caramaji macan' ca to' e' non ma'. Ac ca om cao' xita' na mami' ca tara, ac ca om toc xita' na mami' ca tara pain ca mi' pan ton pain carawa ca to' hohot non con Te ta. 36Wara tomi' inuhu' pane: Querec paxi' mahu' pain ca an hwet mi' xuhu' pain ca hwara' opa ne ca', pain ca ara tain ca om ara taxi' ne ca wari' wa ca'. Ane om howa mahu' ne, ac i ma' na ca wara tomi' xuhu' pane. 37Mi' xim iri tarapa' cocon oro wari' Te ne, howa howa pi' pin ac cacapa' tara. Om ta tomi' in pin camain' toton co howa xim nanapa' ma'. 38Pain ca quiji' qui' tain pawin pane, om ca maqui' ta' pain ca ara tain ca param pan ne ta', om na. Ara tain ca param nucun Te co hwet roron oro wari' ta napa', je ca ara ta' ta' pain ca quiji' qui' tain pawin pane. 39Ca' na ca param nucun Te co hwet roron oro wari' ta napa': Noc inonon pain ca mama' cacain cote ne xe oro wari' co mi' xim cwa' napa'. Param napa' pain ca to' e' mami' to' e' mami' xam' toton pain xec nein ca pi' pin ta' ne macan' ca' quem. 40Je ara xi' na ca param pan ca Te ma': Oro wari' co querec pin' nanapa' pain ca panxita' capa' ca', oro wari' co howa nanapa' cwa' quem, param tata pain ca e' cara caca pain pawin. Maqui' pin iri tara xec nein ca pi' pin ta' ne macan' ca' ne, to' e' mami' ac toton tara quem na ca tomi' tococwa ma'.
41Tomi' em' ac cocon na oro taramaxicon nuxut pain ca judeu urut ca'. Xi om ne ca tomi' ara cain i ca' ta, pain ca Wata' co Iri' Capam' co quiji' qui' nain pawin ta ca ma'.
42Cain' cain' xira co cwa' ne ta ac caca na. Om ca Jeju panxica José ca ron? Querec pin' urut con cote ca cam jicon quem. Para tomi' cain i ma', pain ca quiji' qui' inain pawin ta ca ma' ne? Om ca na ne pain ca tomi' ac i ma' ca ta! Ac i ma' na ca tomi' caca ma'.
43Tomi' ximama' maho' xine e' ac tococwa na. 44Te ma', co hwet roron oro wari' ta napa' pane, wirico co tomi' tomi' na nonon oro wari' pain ca howa jun Panxita' cocon ma'. Mo ta om tomi' tomi' na cocon pata', om ta howa cacapa'. Om om tatara oro wari' co howa nanapa' pain ca om howa jun Panxita' tococwa ma'. Co howa xim nanapa' ma', to' e' mami' ac toton tara pain xec nein ca pi' pin ta' ne macan' ta. 45Je ca xirao' pe ca profeta pane, pain ca wirico Iri' Jam co tomi' tomi' na nonon oro wari' pain ca howa jun Panxita' ca pata'. Ca' na ca xirao' pe ca pane: Tomi' xo' tomi' xo' pi' pin totoron oro wari' Iri' Jam ta na ca xirao' pe ca profeta pane. Oro wari' co taraju nonon Te ma', co taraju pa' pin nanain ca tomi' xo' cocon ma', howa ac cacapa' tara. 46Taraju pa' hwe? Wari' co taraju non Te ma', taraju e' non. Om ca querec con. Xi ma' ca wari' co querec non Te cwain. Xica' pe ina pain ca maqui' tain ca pe pan ca Te cwain, wara querec inon ta. 47Je ca tomi' xuhu' ca', tomi' iri'o' inuhu' ta ac tococwa na. Oro wari' co howa nanapa' ma', ma' nonon ca e' cara wa pain pawin ta. 48Wata' co Iri' Capam' ca mi' nain ca e' cara wa pain pawin ta. 49Noro jujun oro hwanana pain mahweri pane. Cao' paxi' nanain capam' ca maná caca pane, je i ma' wixinain cocon pane. Cao' paxi' nanain pane, ane cono' pin caca ne. 50Iri' Capam' ca quiji' qui' pawin ca' iri na ne, wari' co cao' nain, om ta mi' ra ha' ca. 51Wata' co Iri' Capam' ca mi' nain ca e' cara wa pain pawin. Quiji' qui' inain pawin ta. Wari' co cao' napa' pain ca Iri' Capam' ta' ca', e' cara ac ca tara pain pawin. Capam' ca mi' ta' ta' ca', je cwere ca'. Mi' tain cwere. Ma' ta e' caca oro wari' ta ina na ca tomi' tococwa ma'.
52Teretem ac caca na oro taramaxicon nuxut pain ca judeu urut ca'. Teretem nana pain ca taraju cacain ca tomi' nucun. Mija na ca mana' caca. Ma' na ca cao' jein ta ac capari' pain curucun ra? Om ca na camain' ne ta! Ac i ma' na ca tomi' caca ma'.
53Om na, je ca tomi' xuhu' ca', tomi' iri'o' inuhu' ta ac tococwa na. Mo ta om cao' hwein cwere ca', pain ca Iri' Wari' ta' ca'. Mo ta om toc hwein cocu ca' quem. Om ta e' cara hwe pain pawin ta#6.53 Om ca tomi' mi' cain ca cao' iri'o' xine curucun. Om ca tomi' mi' cain ca toc iri'o' xine quicon quem. Tomi' mi' nain ca howa tocwa. Pain ca howa xun ca', howa urun pain ca mi' pin caho' capari'. Howa urun pain ca om narain ho' capari' pain curucun je quicon pain ca mi' pin pe cain pana pane. Howa iri urun ne, ac ca cao' xin na curucun. Ac ca toc xin na quicon quem.. 54Wari' co cao' nain cwere ca' iri tara ne, wari' co toc nain cocu ca' iri tara quem ne, pe ho' cara toron Te pain pawin, to' e' mami' ton pain xec nein ca to' e' mami' toton ta' oro wari' co wara cono' nana quem. 55Xi iri' carawa ca cao' wa ara ne cwere ca'. Iri' ca toc wa na cocu ca' quem. 56Wari' co cao' nain cwere ca', wari' co toc nain cocu ca' quem, win cwere ac capa' na, win cwere ac ton na quem. 57Hwet roron oro wari' napa' Te co mi' nain ca e' cara wa pain pawin ma'. Je ca e' ta' ca' quem. To' e' cara napa'. Ac i ma' inonon oro wari' cwa' quem. Oro wari' co cao' nanapa', to' e' cara ac toton na. 58Je ca tomi' xuhu' ca': Tomi' hwet inuhu' pain Iri' Capam' ca quiji' qui' nain pawin. Om ca an xiho' nein capam' ca cao' caca hwanana nexi' pane. Cao' paxi' nanain pane, ane cono' pin caca ne. Wari' co cao' nain Iri' Capam' ma' iri na ne, e' cara ac ca tara pain pawin ta na ca tomi' tococwa pane.
59Ac i ma' na ca ca' na cain capijacon Iri' Jam Jeju pane, pain ca ca' na pe cain xirim ca cut in to xucucun oro win judeu urut pain Cafarnaum pane.
Ca mija caca co an to pin nonon Jeju
60Taraju iri nanain ca tomi' nucun Jeju oro wari' co ja' ja' paxi' nonon ma' ne, ma' mija ac caca na co noc nanain ma'. I'ina a xira ca tomi' nucun co cwa' ta. Ma' tara ca howa ac tocwa ra na ca tomi' ximama' caca ma'.
61Om paxi' na ca taraju tococwa pain ca tomi' caca ma', ane taxi' pan cocon Jeju ne. Taxi' nonon pain ca tomi' ximama' nucucun pain ca noc cacain ca tomi' nucun. Je ca tomi' querec cocon ma': I'ina na xumuhu' pain ca tomi' ne ca' ne ra? 62Cain' cain' xi' hwe pain ca aram aram querec xim mahu' pain ca piri' in mao tain pawin quem? Wata' pain ca Iri' Wari' ta' ca', main in mao tain pawin ca wara pe ta' pane. Cain' cain' xim mahu' quem? 63Je Tamataracon Iri' Jam ca mi' nain ca e' cara wa. Wari' ma' iri na ne, om ca e' pan ac ca. Je ca tomi' xuhu' ca': Oro ca tomi' ne ca tomi' xuhu' ca', maqui' nain Tamataracon Iri' Jam. To' e' cara nonon oro wari' ta ac tococwa na. 64Je i ma' ira ac tococwa na. Taxi' inuhu' quem. Ma' nunuhu' co om howa nanapa' ma' na ca tomi' tococwa ma'.
Tomi' ac i ma' na Jeju, xi wara taxi' ara tococwa pain cara pane, pain ca om taxipa' querec xine qui' tococwa pane. Wara taxi' tata co om howa xun nonon, wara taxi' non co quep xiho' toton nonon oro taramaxicon pain ca quep xun cocon ma' quem.
65Je ca tomi' xuhu' ne ac tococwa na. Oro wari' co howa xim nanapa' ma', mo ta om mi' cocon pain ca howa wa Te Iri' Jam ma', om ta howa ac cacapa' ta ac tococwa na.
66Je ca ma' mija caca co noc pin nonon Jeju. Ja' ja' ja' ja' om pin nonon. 67Tomi' querec ac caparut na pain ca taxipa' urut con ca', pain ca 12 urut ca'. Paca' xim mahu' quem ra naparut.
68Om na ta Taramaxicon ne ac con na Simão Pedro. Ma' wari' xi ja' ja' urut quem? Wum co tomi' hwet naparut pain capijam ca mi' nain ca e' cara wa pain pawin ta. 69Howa urut pum. Querec pin' urut pum quem. Wum co Iri' Wari' co wara tora' ca Iri' Jam pane! Iri' Panxica ma ta! Ac i ma' na ca tomi' ca ma'.
70Wata' paxi' na co tora' pi' pin nuhu' pain ca 12 hwe ma' ac caparut na. Ane ma' ca win ma' nuhu' co tomi' ha' non Caxicon Jam ma' ne na ca tomi' caparut ma'.
71Tomi' mi' non Judas, panxica Simão Iscariotes. To' 12 paxi' naparut Judas Iscariotes. Ane quep xiho' toton cocon oro taramaxicon co quep xun nonon Jeju ne. Ame hwe e'.
Actualmente seleccionado:
João 6: TBPN
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Copyright 2023 Missão Novos Tribos do Brasil
João 6
6
Ca tomi' hwara' pin cain capam' con hwam Jeju
Mateus 14.13-21; Marcos 6.30-44; Lucas 9.10-17
1Om ca pain homa ne, maji ta ac caparut na Jeju, pan horoho mama' ac urut pain na xijein cacarain com ma', Galileia ma'. Ma' na xijein wixinain quem. Tiberíades nanain quem. 2Mija nana wari' co ja' ja' nanaparut. Om ca paric camain' caca. Xi om ne ca querec ara cocon Jeju pain ca an hwet pe cain ca hwara' opa nucun pain ca quep xio pin cocon oro wari' co caxi nana pane. 3Piri' xi' e' ac caparut na, piri' mama' ac urut pain na ca tamaja pan ne macan'. Xao to ac urut na. Wirico Jeju ma', warut pain ca taxipa' urut con ca', xao to ac urut na. 4Wixicam pin na xec nein Páscoa ma', je i ma' xec nein ca tomi' querec te wi urut pain ca judeu urut ca'.
5Noro noro ac ca na Jeju. Querec ac tococwa na oro wari' co hwet xun nonon ma'. Mija nana wari' ta. Om ca paric camain' caca. Tomi' querec ac con na Filipe Jeju: Main xi cut to xin carawa ca cao' xi' caca oro wari' cwa' quem non. 6Tomi' querec e' non. Xi taxi' pan ara xucun pain ca ara ta' ca ma'.
7Mo xi ma' 200 capari' denário#6.7 Denário na wixinain dinheiro nucucun oro romano pain cara pane. Wari' co taramaja mi' non xucun wari' ma', pain ca taramaja qui' cain iri' xo' xec, taramaja taramaja irawin pa' ac con na pain ca taramaja nucun ma', an xica' pe ac cain na denário pain ca taramaja nucun. ca mam' cut xin capam' iri', iri' cote ne dinheiro paxi' xira, om xi xam' cocon. An an wijimain e' xirarain, om om xiroron. Om xi xam' cocon ta! Ac i ma' na ca tomi' ca Filipe.
8Tomi' ac ca na win ma' nuxut ma', André coxa' ca Pedro ma': 9Ma' paxi' na pije' cwa' Jeju. Ma' non wijimain carawa ca cao' wa. Ma' 5 non wijimain capam', ma' 2 non wixicon hwam quem. Om xi ma'am camain' caca pain wijimain caramaxicon ta. Xi mija ara caca ta na ca tomi' ca André ma'.
10Xao to je ta jujun oro wari' cwa' ta ac caparut na Jeju. Mija nain i ma' tononoin. Je ca xao to to caca ma', xao to xao to pi' pin nana. Mija nana wari'. Ac ca ma' 5.000 caca na ca tarama' nucucun co to nanain i ma'#6.10 Ma' paxi' nana oro narima' cacam oro hwijima' quem. Ane om tomi' tacacama ne.. 11Cut ac cain na capam' Jeju. Tomi' ac con na Iri' Jam: Tomi' querec te urut pum pain ca mi' maparut pain capam' ca' quem Te non, maxiram' mi' ac tococwa pain na co xao to nanain i ma'. Ac i ma' na con hwam quem. Cao' cao' ma'am ac caca na.
12Ma'am pin iri nana ne, tomi' ac caparut na pain ca taxipa' urut con ca': Om ta waraju xin oro pawirinain ma'. Pan cut jein ta naparut.
13Pan cut ac urut pain na, cut ho' cut ho' ac urut pain na pain coco quem. Moin' 12 na cotain parut. Je i ma' pawirinain capam' ca ma' 5 ma' ira. Cao' cao' ma'am ca' ara xi' nanain.
14Querec iri nanain i ma' oro wari' ne, pain ca an hwet pe cain ca hwara' opa nucun ma', pain ca tomi' hwara' pin cain capam' con hwam ma', tomi' ac caca na: Wirico co cwa' xin profeta co xirao' pe caca pain cara pane, co main maqui' tarain macan' ca' caca pane. Wirico ma' ira nana.
15Jeju ma', taxi' nonon oro wari' pain ca quep xat xun cocon pain ca taramaxicon pe ho' xut ta cocon ma' quem. Je ca paca' mami' cocon ma'. Piri' mao xica' pe ac cain na pacun.
Ca xut cain quimain com Jeju
Mateus 14.22-33; Marcos 6.45-56
16Xo' um pin iri na ne, quiji' mama' ac urut pain na com. 17Wara xim pin na, om ca hwet querec caparut Jeju. Piton to ac urut pain na mam' horoho wa ma'. Pan horoho mama' xin xijein cacarain cain ta ac urut na, pan horoho mama' ac urut na. Xumu urut pain Cafarnaum ma'. 18Nuru mip ac ne na hotowa ma' quem. Nocom nocom ac ne na com. 19Pan horoho pan horoho, to pira ca' ac urut pain na cacarain ma'. Am 5 ne tara quilômetro nein ca pan horoho urut ma', am 6 ne tara quilômetro ca pan horoho mama' urut ma'. Querec ac urut con na Jeju ma', pain ca xut cain quimain com ma'. Xut hwet naparut pain mam' horoho nuxut. Jin' tamana ac urut na.
20Om na, wata' ta. Ta jin' mahu' me ta ac caparut na.
21Tomi' querec te urut con. Piri' pe rain mam' horoho wa ca' ac urut con na, ane ane hwet hap ac urut pain na wapit ca xumu urut ma'.
Jeju co Iri' Capam' ca mi' nain ca e' cara wa pain pawin
22Xec pin iri na ne, i'ina ac ne na ximicocon oro wari' co to wet nana pa'ao' ma', pain cacarain com ma'. Mon Jeju quem nana. Taxi' paxi' nana pain ca ma' xica' pe ne wijimain mam' horoho wa cara ne. Taxi' nanaparut pain ca taxipa' urut con quem, taxi' nanaparut pain ca mama' xica' to urut pain ca mam' pan horoho mama' urut pain pain xijein cacarain cain. Taxi' nonon Jeju pain ca om hwet caparut quem. 23Ma' ac ne na oro wirain mam' horoho wa ca maqui' nain Tiberíades ma' quem. Piri' to xin i ma' ta ac caca na oro wari' nein, piri' to ja' pan ac cacain na ca cao' to cacain capam' oro wari' cara ne, ca tomi' pe qui' con Iri' Jam pain ca tomi' querec te urut pum pain capam' ca' quem Te qui' ca pane. 24Om ara xi' na Jeju cocon co taxipa' ca ma' ac caca na. Om caca ma' ira ac xucucun na. Maji pain Cafarnaum cain e', pirao' xuxun pain i cain ta ac caca na, pan horoho mama' ac caca na.
25Mam' pe ac cocon na pain xijein cacarain cain. Main ca pe ca xina pain ca maqui' nem quem taramaxicon co ca' na taxipa' capijacon Iri' Jam ac cocon na.
26Om na, pirao' paxi' mahu', xi cao' ara hwein capam' pata' ta ac tococwa na. Pirao' paxi' mahu', xi ma'am ara hwein ta. Om ca pirao' mahu' pain ca querec pin' hwein ca an hwet mi' xuhu' pain ca hwara' opa ne ca', pain ca mi' xim xuhu' pain ca e' cara wa pain pawin cain. Tomi' iri'o' inuhu' ta. 27Je ca tomi' xuhu' ca' ac tococwa na. Ta taramaja mi' hwein capam' ca om awi cara ma' me ta. Taramaja mi' jein capam' ca om pi' ra ha' ma', ca mi' nain ca e' cara wa pain pawin ma'. Mi' pan xuhu' pain, wata' pain ca Iri' Wari' ta' ca', mi' pan xuhu' pain. Tomi' ara xi' napa' pain Te Iri' Jam ta. Mi' roron pain ta napa' pahu' ta ac tococwa na.
28Tomi' querec ac cocon na: Cain' cain' xuxut quem? Ma' carawa ca ara je caparut Iri' Jam quem? Tomi' ha' xuxuxun na urut con ta na ca tomi' cocon ma'.
29Om na, howa xine pain ca hwet roron oro wari' ta capa' Te pahu'. Je ca ara je cuhu' ma' ac tococwa na.
30An hwet mi' xut pain ca hwara' opa nem ma' e' ac cocon na. Ara rain ca om ara taxi' ne ca wari' wa ta. Ma' carawa ca ara ta' ma ma' quem? Ara rain ta. Ma' ta querec xut pain pum, ma' ta howa xut pum pain ca maqui' mon Iri' Jam ta. 31Xi cao' ara cacain capam' hwanana nexi' co ja' ja' nonon Moisés pain cara pane ta. Cao' to nanain mahweri pane. Win ne ca xirao' pe xine capijacon Iri' Jam ca': Ara ma'am tata pain capam' ca camara' qui' nain pawin pane, ac i ma' na ca xirao' pe xine capijacon Iri' Jam ca'. Na nem pain ca an hwet pe ac i ma' main ca hwara' opa nem quem na ca tomi' cocon ma'.
32Om na, je ca tomi' xuhu' ca', tomi' iri'o' inuhu' ta ac tococwa na. Om ca Moisés ca co mi' nuhu' pain capam' ca camara' qui' nain pawin. Wirico Te co mi' nuhu' pain pane. Wirico Te co mi' nuhu' pain Iri' Capam' ca maqui' pawin pain xocori ca' quem. 33Je ca tomi' xuhu' ca' ac tococwa na. Iri' Capam' nucun Iri' Jam ma', ca mi' ca ma', maqui' nain pawin. Mi' nonon pain ca e' cara wa oro wari' pain macan' ca' ac tococwa na.
34Mi' cara xut pain capam' ca tomi' ma ma' taramaxicon ac cocon na.
35Om na, wata' co Iri' Capam' ca mi' nain ca e' cara wa ta. Win ne ca to' e' cuhu' capam' pain ca cao' hwein ma', ac i ma' ina pain ca to' e' cara xuhu' ca' quem ac tococwa na. Wari' co hwet napa' ma', wari' co howa napa' ma', om ta jain jain mami' cain oro caramaji macan' ca to' e' non ma'. Ac ca om cao' xita' na mami' ca tara, ac ca om toc xita' na mami' ca tara pain ca mi' pan ton pain carawa ca to' hohot non con Te ta. 36Wara tomi' inuhu' pane: Querec paxi' mahu' pain ca an hwet mi' xuhu' pain ca hwara' opa ne ca', pain ca ara tain ca om ara taxi' ne ca wari' wa ca'. Ane om howa mahu' ne, ac i ma' na ca wara tomi' xuhu' pane. 37Mi' xim iri tarapa' cocon oro wari' Te ne, howa howa pi' pin ac cacapa' tara. Om ta tomi' in pin camain' toton co howa xim nanapa' ma'. 38Pain ca quiji' qui' tain pawin pane, om ca maqui' ta' pain ca ara tain ca param pan ne ta', om na. Ara tain ca param nucun Te co hwet roron oro wari' ta napa', je ca ara ta' ta' pain ca quiji' qui' tain pawin pane. 39Ca' na ca param nucun Te co hwet roron oro wari' ta napa': Noc inonon pain ca mama' cacain cote ne xe oro wari' co mi' xim cwa' napa'. Param napa' pain ca to' e' mami' to' e' mami' xam' toton pain xec nein ca pi' pin ta' ne macan' ca' quem. 40Je ara xi' na ca param pan ca Te ma': Oro wari' co querec pin' nanapa' pain ca panxita' capa' ca', oro wari' co howa nanapa' cwa' quem, param tata pain ca e' cara caca pain pawin. Maqui' pin iri tara xec nein ca pi' pin ta' ne macan' ca' ne, to' e' mami' ac toton tara quem na ca tomi' tococwa ma'.
41Tomi' em' ac cocon na oro taramaxicon nuxut pain ca judeu urut ca'. Xi om ne ca tomi' ara cain i ca' ta, pain ca Wata' co Iri' Capam' co quiji' qui' nain pawin ta ca ma'.
42Cain' cain' xira co cwa' ne ta ac caca na. Om ca Jeju panxica José ca ron? Querec pin' urut con cote ca cam jicon quem. Para tomi' cain i ma', pain ca quiji' qui' inain pawin ta ca ma' ne? Om ca na ne pain ca tomi' ac i ma' ca ta! Ac i ma' na ca tomi' caca ma'.
43Tomi' ximama' maho' xine e' ac tococwa na. 44Te ma', co hwet roron oro wari' ta napa' pane, wirico co tomi' tomi' na nonon oro wari' pain ca howa jun Panxita' cocon ma'. Mo ta om tomi' tomi' na cocon pata', om ta howa cacapa'. Om om tatara oro wari' co howa nanapa' pain ca om howa jun Panxita' tococwa ma'. Co howa xim nanapa' ma', to' e' mami' ac toton tara pain xec nein ca pi' pin ta' ne macan' ta. 45Je ca xirao' pe ca profeta pane, pain ca wirico Iri' Jam co tomi' tomi' na nonon oro wari' pain ca howa jun Panxita' ca pata'. Ca' na ca xirao' pe ca pane: Tomi' xo' tomi' xo' pi' pin totoron oro wari' Iri' Jam ta na ca xirao' pe ca profeta pane. Oro wari' co taraju nonon Te ma', co taraju pa' pin nanain ca tomi' xo' cocon ma', howa ac cacapa' tara. 46Taraju pa' hwe? Wari' co taraju non Te ma', taraju e' non. Om ca querec con. Xi ma' ca wari' co querec non Te cwain. Xica' pe ina pain ca maqui' tain ca pe pan ca Te cwain, wara querec inon ta. 47Je ca tomi' xuhu' ca', tomi' iri'o' inuhu' ta ac tococwa na. Oro wari' co howa nanapa' ma', ma' nonon ca e' cara wa pain pawin ta. 48Wata' co Iri' Capam' ca mi' nain ca e' cara wa pain pawin ta. 49Noro jujun oro hwanana pain mahweri pane. Cao' paxi' nanain capam' ca maná caca pane, je i ma' wixinain cocon pane. Cao' paxi' nanain pane, ane cono' pin caca ne. 50Iri' Capam' ca quiji' qui' pawin ca' iri na ne, wari' co cao' nain, om ta mi' ra ha' ca. 51Wata' co Iri' Capam' ca mi' nain ca e' cara wa pain pawin. Quiji' qui' inain pawin ta. Wari' co cao' napa' pain ca Iri' Capam' ta' ca', e' cara ac ca tara pain pawin. Capam' ca mi' ta' ta' ca', je cwere ca'. Mi' tain cwere. Ma' ta e' caca oro wari' ta ina na ca tomi' tococwa ma'.
52Teretem ac caca na oro taramaxicon nuxut pain ca judeu urut ca'. Teretem nana pain ca taraju cacain ca tomi' nucun. Mija na ca mana' caca. Ma' na ca cao' jein ta ac capari' pain curucun ra? Om ca na camain' ne ta! Ac i ma' na ca tomi' caca ma'.
53Om na, je ca tomi' xuhu' ca', tomi' iri'o' inuhu' ta ac tococwa na. Mo ta om cao' hwein cwere ca', pain ca Iri' Wari' ta' ca'. Mo ta om toc hwein cocu ca' quem. Om ta e' cara hwe pain pawin ta#6.53 Om ca tomi' mi' cain ca cao' iri'o' xine curucun. Om ca tomi' mi' cain ca toc iri'o' xine quicon quem. Tomi' mi' nain ca howa tocwa. Pain ca howa xun ca', howa urun pain ca mi' pin caho' capari'. Howa urun pain ca om narain ho' capari' pain curucun je quicon pain ca mi' pin pe cain pana pane. Howa iri urun ne, ac ca cao' xin na curucun. Ac ca toc xin na quicon quem.. 54Wari' co cao' nain cwere ca' iri tara ne, wari' co toc nain cocu ca' iri tara quem ne, pe ho' cara toron Te pain pawin, to' e' mami' ton pain xec nein ca to' e' mami' toton ta' oro wari' co wara cono' nana quem. 55Xi iri' carawa ca cao' wa ara ne cwere ca'. Iri' ca toc wa na cocu ca' quem. 56Wari' co cao' nain cwere ca', wari' co toc nain cocu ca' quem, win cwere ac capa' na, win cwere ac ton na quem. 57Hwet roron oro wari' napa' Te co mi' nain ca e' cara wa pain pawin ma'. Je ca e' ta' ca' quem. To' e' cara napa'. Ac i ma' inonon oro wari' cwa' quem. Oro wari' co cao' nanapa', to' e' cara ac toton na. 58Je ca tomi' xuhu' ca': Tomi' hwet inuhu' pain Iri' Capam' ca quiji' qui' nain pawin. Om ca an xiho' nein capam' ca cao' caca hwanana nexi' pane. Cao' paxi' nanain pane, ane cono' pin caca ne. Wari' co cao' nain Iri' Capam' ma' iri na ne, e' cara ac ca tara pain pawin ta na ca tomi' tococwa pane.
59Ac i ma' na ca ca' na cain capijacon Iri' Jam Jeju pane, pain ca ca' na pe cain xirim ca cut in to xucucun oro win judeu urut pain Cafarnaum pane.
Ca mija caca co an to pin nonon Jeju
60Taraju iri nanain ca tomi' nucun Jeju oro wari' co ja' ja' paxi' nonon ma' ne, ma' mija ac caca na co noc nanain ma'. I'ina a xira ca tomi' nucun co cwa' ta. Ma' tara ca howa ac tocwa ra na ca tomi' ximama' caca ma'.
61Om paxi' na ca taraju tococwa pain ca tomi' caca ma', ane taxi' pan cocon Jeju ne. Taxi' nonon pain ca tomi' ximama' nucucun pain ca noc cacain ca tomi' nucun. Je ca tomi' querec cocon ma': I'ina na xumuhu' pain ca tomi' ne ca' ne ra? 62Cain' cain' xi' hwe pain ca aram aram querec xim mahu' pain ca piri' in mao tain pawin quem? Wata' pain ca Iri' Wari' ta' ca', main in mao tain pawin ca wara pe ta' pane. Cain' cain' xim mahu' quem? 63Je Tamataracon Iri' Jam ca mi' nain ca e' cara wa. Wari' ma' iri na ne, om ca e' pan ac ca. Je ca tomi' xuhu' ca': Oro ca tomi' ne ca tomi' xuhu' ca', maqui' nain Tamataracon Iri' Jam. To' e' cara nonon oro wari' ta ac tococwa na. 64Je i ma' ira ac tococwa na. Taxi' inuhu' quem. Ma' nunuhu' co om howa nanapa' ma' na ca tomi' tococwa ma'.
Tomi' ac i ma' na Jeju, xi wara taxi' ara tococwa pain cara pane, pain ca om taxipa' querec xine qui' tococwa pane. Wara taxi' tata co om howa xun nonon, wara taxi' non co quep xiho' toton nonon oro taramaxicon pain ca quep xun cocon ma' quem.
65Je ca tomi' xuhu' ne ac tococwa na. Oro wari' co howa xim nanapa' ma', mo ta om mi' cocon pain ca howa wa Te Iri' Jam ma', om ta howa ac cacapa' ta ac tococwa na.
66Je ca ma' mija caca co noc pin nonon Jeju. Ja' ja' ja' ja' om pin nonon. 67Tomi' querec ac caparut na pain ca taxipa' urut con ca', pain ca 12 urut ca'. Paca' xim mahu' quem ra naparut.
68Om na ta Taramaxicon ne ac con na Simão Pedro. Ma' wari' xi ja' ja' urut quem? Wum co tomi' hwet naparut pain capijam ca mi' nain ca e' cara wa pain pawin ta. 69Howa urut pum. Querec pin' urut pum quem. Wum co Iri' Wari' co wara tora' ca Iri' Jam pane! Iri' Panxica ma ta! Ac i ma' na ca tomi' ca ma'.
70Wata' paxi' na co tora' pi' pin nuhu' pain ca 12 hwe ma' ac caparut na. Ane ma' ca win ma' nuhu' co tomi' ha' non Caxicon Jam ma' ne na ca tomi' caparut ma'.
71Tomi' mi' non Judas, panxica Simão Iscariotes. To' 12 paxi' naparut Judas Iscariotes. Ane quep xiho' toton cocon oro taramaxicon co quep xun nonon Jeju ne. Ame hwe e'.
Actualmente seleccionado:
:
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Copyright 2023 Missão Novos Tribos do Brasil