Lucas 18
18
Ca na e' ne pain ca tomi' ho' tomi' ho' xun Iri' Jam
1Pijim' ac tococwa na co taxipa' ca ma'. Pijim' joc mam' mi' tata cam narima' co tomi' ho' tomi' ho' non juiz pain carawa ca param cama ma'. Pijim' joc mam' mi' tata cam, ma' ta taraju pa' hwe pain ca na e' ne pain ca tomi' ho' tomi' ho' hun Iri' Jam ta tata. Ta naro camain' hwe pain ca tomi' ho' tomi' ho' hun me tata. 2Ca' na ca pijim' tococwa ma': Ma' na wari' co juiz pe ho' nonon oro win ma' ca pain cidade nucucun. Om ca jin' camain' con Iri' Jam, om ca xiram pa' camain' tococwa oro wari' quem. 3Ma' na narima' co pe nain cidade nucucun ma'. Wara mi' pin ca' nam taxicam. Tama' hwet ho' hwet ho' non juiz ma'. Jain jain na pain ca tomi' con. Quep xiho' ne con wari' co mixein napa' ma' me. Tomi' xo' ron, nain ho' ne con me na ca tomi' con ma'.
4-5Tama' tomi' ho' tomi' ho' paxi' non, ane om ha' cam ne. Om ca quep xiho' ram ha' ca. Aram aram tomi' pan ac xucun na: Mija a xira narima' cwa'! Om paxi' na ca jin' ton Iri' Jam. Om paxi' na ca xiram pa' toton oro wari' ma' quem. Miri'om e' inonon co xiram pa' xut nanapa' ma' quem. Ane to' i'ina capa' pain ca tama' tomi' ho' tomi' ho' capa' cam cwa' ne. Quep xiho' tam ta. Tomi' querec xo' ton, am iri'o' ne pain ca mixein cam ma'. Mo ta querec pin' ton pain ca em' nucun pain ca mixein cam ma', tomi' mi' ac ton tara pain ca wap wa ta na, ac i ma' na ca pijim' tococwa cam narima' con juiz ma'.
6Tomi' tomi' tiquin' ac ca na Taramaxicon nexi': Noro jein ca tomi' nucun juiz co mixein ma'. 7Quep xiho' tam ta na. Om ta ac i ma' ca Iri' Jam quem ra? Om ta quep xiho' cocon oro wari' nucun co wara tora' ca ma', co tama' quep xiho' xut cocon oro wari' co mixein nanaparut cwa' nonon pain xec je pain xim quem ra? Miri'om cara totoron ra? Om ta miri'om cara cocon ta. 8Je ca tomi' xuhu' ca' ac tococwa na. Quep xiho' hap totoron oro wari' co wara tora' ca ma'. Tomi' mi' hap totoron pain ca wap wa oro wari' co mixein nonon quem. Ac i ma' ton paxi' nonon. Ane tomi' querec pan xije ca' ne. Wata' pain ca Iri' Wari' ta' ca', tomi' querec pan xije: Ma' ma' wet tatara oro wari' co howa nonon Iri' Jam pain ca aram aram in qui' tain macan' ra? Howa howa wet totoron pain ca quep xiho' taxipa' ton nonon ra na ca tomi' tococwa ma'.
Ca om na ne pain ca xec xec iri' pain ca tomi' xun Iri' Jam
9To nanain i ma' oro wari' co coromicat ca' xucucun: Awi urut, tama' ara xo' urut, hohot urut con Iri' Jam xi' ma nana, ac i ma' na ca coromicat nucucun. Tomi' napat nonon oro xucucun wari' ma' quem. Je ca pijim' cocon Jeju ma', pijim' joc mam' mi' tata con fariseu con wari' co taramaja mi' nonon oro taramaxicon pain ca cut in taxipa' cain oro imposto nucucun oro wari'. Ca' na ca pijim' nucun: 10Ma' 2 nana wari' co mama' nanain cote ne xiricon Iri' Jam. Tomi' xun Iri' Jam ta nana. Fariseu na xucun. Xucun ma' iri na ne, cut in taxipa' nain oro imposto. 11Corom mama' iri nanain ca tao' caho' nein cote ne xiricon Iri' Jam ne, xat pe ac cain i ma' na fariseu ma'. Tomi' ton Iri' Jam ta ac ca na. Om ca hwet ne ca tomi' nucun, tomi' pan xucun pain ca coromicat nucun. Ca' na ca tomi' con ma': Iri' Jam ac ca na. Tomi' querec te inem pain ca om an xiho' toton oro caracat ma': Co param ximama' nanain caramaxicocon oro win ma' caca ma', co om ximicocon ma', co quep nanam manacocon oro win ma' caca ma' quem, tomi' querec te inem pain ca om an xiho' toton ta. Tomi' querec te inem pain ca om an xiho' ton caxicon wari' cwa' quem, co cut in taxipa' nain imposto cwa'. 12An pe taxipa' inain ca cao' wa pain ca tomi' xim xim quem Iri' Jam. Ma' 2 taxipa' napa' xec pain oro semana pain ca an pe tain ca cao' wa pum. Mi' taxipa' inem pain dízimo nein oro carawa ca cut ta' quem, ac i ma' ina pain ca xut xo' ta' ca' na ca tomi' ca fariseu pain ca tomi' con Iri' Jam.
13Co ma' co cut in taxipa' imposto ma' iri na ne, mo mo pe na. Om ca noro piri' ca, noro quiji' nain macan', xi wixipa' ara ca ta. Wap nain quimacon pain ca querec pin' xucun pain ca pan tem nucun. Xiram pa' ne ta Iri' Jam. Caracat ara xi' ina ta na. Ac i ma' na ca pijim' nucun Jeju ma'.
14Je ca tomi' xuhu' ca' ac tococwa na. In mama' iri nanain xiricocon ne, querec hohot pan inem ta non Iri' Jam co ma' co cut in taxipa' imposto ma'. Fariseu ma' iri na ne, om ca querec hohot pan inem ta con Iri' Jam. Je ca tomi' xuhu' ca': Wari' co xec xec ma', pain ca hwara' opa ina xi' ma ca ma', to' wixipa' ac tocwa tara. Wari' co om xec xec ma' iri na ne, pain ca om ca hwara' opa ta' ta pan xucun ma', to' hwara' opa pin ac tocwa tara quem na ca tomi' tococwa ma'.
Ca na e' ne pain ca an xiho' xuxun oro hwijima' pain ca om xec xec querec nucucun
Mateus 19.13-15; Marcos 10.13-16
15Ma' ac cacama na co o qui' nanam humaxicacam. O mi' nanam con Jeju. Ma' ta quep mamam pain winacacam pain ca tomi' mi' mamam con Iri' Jam ta nonon. Querec iri nanam co taxipa' ca ma' ne, pain ca o qui' cacam humaxicacam ma', tomi' in pin ac cacam na. Ta o mi' hun cacam humajuhu' me ta nanam.
16Ane tomi' in pin cocon Jeju ne. Harahap je ta ac tacacama na hwijima' ma', tomi' ac tococwa na co taxipa' ca ma' quem: Ta narain ho' hwehwem pain ca hwet cacapa' hwijima' cwa' me ta. Ta tomi' in pin hwehwem me ta. Oro wari' co an xiho' nanam pain ca om xec xec nequequem ma', pain ca howa cacapa' ma', wiricoco tatara co taramaxicon pe ho' ca Iri' Jam ta. 17Je ca tomi' xuhu' ca', tomi' iri'o' inuhu': Mo ta om an xiho' hwehwem hwijima' pain ca tomi' querec te cocon Iri' Jam pain ca taramaxicon pe ho' xuhu' ta cocon ma', om ta hwet camain' hun pain ca taramaxicon pe ca pain pawin cain ta na ca tomi' tococwa ma'.
Ca to' i'ina capari' oro caramajixi' pain ca xin ne xun Iri' Jam pain ca taramaxicon pe ho' xim capari'
Mateus 19.16-30; Marcos 10.17-31
18Ma' ac ca na wari' co hwara' opa ma'. Tomi' querec ac con na Jeju: Taramaxicon co awi, co ca' na taxipa' capijacon Iri' Jam ac con na. Cain' cain' xita' quem? Param inain ca e' cara pe ho' ton Iri' Jam ta non.
19Para awi ma mapa' quem ac con na. Om na wari' co awi. Xica' pe na Iri' Jam co awi. 20Taxi' ara xi' main oro capijacon Iri' Jam ca tomi' ha' je capari' pane. Ca' na con: Ta quep mam manacon win ma' ma me ta. Ta to' pa' mon wari' me ta. Ta an noc xa ma me ta. Ta tomi' mixein mi' mon pain ca em' wa win ma' ma me ta. Tomi' ha' ron cote ma cam jim ta, ac i ma' na ca tomi' ha' je capari' ta na ca tomi' xo' con ma'.
21Om na, tama' tomi' ha' tomi' ha' pi' pin inain i ma' ta. Tomi' ha' qui' inain pain ca pije' ne pane ac con na.
22Taraju iri non Jeju ne, pain ca tomi' ac i ma' ca ma', tomi' ac con na: Ma' ma' wet na carawa ca om ara querec ma ma' non. Vender vender pi' pin rain oro caramajum. Cut iri rain dinheiro nein ne, cut mi' ac momon pain tara co om nonon carawa. Caramaju pe ac main tara pawin cain. Cut mi' cut mi' pi' pin iri roron pain dinheiro nem ne, in hwet ac mapa' tara, ja' ja' ac mapa' tara ta na ca tomi' con ma'.
23Taraju iri nain i ma' ne, tomi' xaxa' ac ca na, xi caramaju tamana ara ca ta. 24Querec iri non Jeju ne, pain ca tomi' xaxa' tamana nucun ma', tomi' ac ca na: Oro wari' co caramaju nana ma', i'ina tamana nonon pain ca xin ne cocon Iri' Jam pain ca taramaxicon pe ho' toton cocon ta. 25Win ne camelo ma'. Cote ne carawa na camelo. Ha' xirain pain ca corom nein wijimain manain ca mam' oc tocwa wom ra? Om xi ha' nein. I'ina xirain, om xi corom ac nein. Ac i ma' na con wari' co caramaju ma' quem. I'ina tamana non pain ca xin ne con Iri' Jam pain ca taramaxicon pe ho' ton con ta. Tomi' iri'o' inuhu' ta na ca tomi' tococwa ma'.
26Oro wari' co taraju nonon pain ca tomi' ac i ma' ca ma', tomi' querec ac cocon na: Cain' cain' xira quem? Cain' xi witan ac wa quem nonon.
27Om na, oro wari' ma', om ca to' witan pan ac xucucun. Iri' Jam ma' iri na ne, ha' non pain ca to' witan cocon oro wari' na ca tomi' tococwa ma'.
28Tomi' ac con na Pedro. Win urut ca'. An to an to pi' pin urut pain oro caramajuxut ta. Ma' ta ja' ja' xim urut pum ta non.
29Om na, je ca tomi' xuhu' ca', tomi' iri'o' inuhu' ta ac tococwa na. Wari' co paca' nain xiricon cam manacon cocon xurucun con cote ca cocon mana panxica ma', wari' co ara ac i ma' ma', pain ca taramaja mi' xim capa' pain ca pijim' hwet cocon oro wari' pain ca to' witan ton cocon Iri' Jam ma', 30wara cut tamana tarain carawa ca awi pain xocori ca'. Mija tara carawa ca awi ca cut ta' ca ma', mija tiquin' ca' tarain carawa ca paca' ca. Aram aram mi' ac tocwa tara pain ca om pi' ra ha' ne ca e' wa quem na ca tomi' tococwa ma'.
Ca tomi' pe mami' cain ca mi' pin ta' nucun je pain ca e' mami' ta' nucun quem
Mateus 20.17-19; Marcos 10.32-34
31Harahap je, xuruxut ni ca' xuxun oro wari' cwa' ac tococwa na co taxipa' ca ma', co ma' 12 nana ma', tomi' ac tococwa na: Taraju wet xine e'. Mama' xin irin Jerusalém ta. Tan' mama' iri xi' ne, hwerehwet hwerehwet pi' pin ac ne tara oro ca xirao' nucucun oro profeta cara pane, pain ca xirao' to cacain oro carawa ca ara ton napa' pain ca Iri' Wari' ta' ca'. 32Tan' mama' iri xi' ne, quep ac cacapa' tara co noc nanapa' ma'. O mi' ac cacapa' tara cocon oro taramaxicon nucucun co om judeu nana ma' quem. Tatam' tatarapa', tomi' xirac ac cacapa' tara. Tomi' napat tatarapa', cupa' mi' tatarapa', wap ac cacapa' tara, to' pa' pin ac cacapa' tara quem. 33Ma' 3 pin iri tara xec pain ca mi' pin ne ne, e' mami' ac ta' tara ta na ca tomi' tococwa ma'.
34Co taxipa' ca ma', om ca taraju pa' camain' cacain ca tomi' nucun Jeju. Ac ca joc xim tococwa pain na ca tomi' mao nein con.
Ca quep ma' pin cain tocon wari' Jeju
Mateus 20.29-34; Marcos 10.46-52
35Wixicam pin ac cain na Jericó Jeju cocon co taxipa' ca ma'. Xao pe pe nain cacarain wana wari' co om tocon ma' quem. Mi' ne taxipa' nonon pain dinheiro oro wari'. 36Taraju iri tata oro wari' co xuruxut tiquin' ca' nonon ma', tomi' querec ac ca na: Ma' carawa pahu'? Para mija hwe pain ca xuruxut tiquin' ca' mahu' ma' na ca tomi' querec tococwa ma'.
37Om na, maqui' na Jeju ma', co wari' nein Nazaré ma' ac cocon na.
38Merem pan ac ca na: Jeju. Winacon Davi#18.38 Taraju pa' je e'. Ac i ma' na ca tomi' taxipa' caca oro judeu pane, pain ca tomi' mi' cocon Cristo co wara tomi' pe ca Iri' Jam pane, pain ca main maqui' tara wari' ne co to' witan toton nonon oro wari' ta tococwa pane. Cristo nonon, Winacon Davi nonon, je je ari na ca tomi' mao nein cocon. Pain ca Winacon Davi con Jeju wari' ma', querec pin' non pain ca Cristo ca ma', pain ca to' witan toton cocon oro wari' ma'. . Xiram pa' ne ta Jeju na ca merem nucun.
39Oro wari' co o nana ma', tomi' in pin ac cocon na. Merem maho' ra ta paxi' nonon, ane om ha' ca ne. Merem merem tiquin' na, merem mip na: Winacon Davi. Xiram pa' ne ta Winacon Davi na ca merem nucun.
40Xat ac ca na Jeju. O mi' xine con ta ac tococwa na. Wixicam pin iri non ne, tomi' querec pan ac con na Jeju: 41Ma' carawa ca ara mi' ne mapa' ma' quem non.
Om na, querec mami' xita' na ina ta Taramaxicon ac con na.
42Tomi' ac con na Jeju: Querec mami' ra ta. Xio pin ma, xi om ne ca howa ara mapa' ta na ca tomi' con ma'. 43Querec mami' hap ac ca na, ja' ja' ac con na Jeju. Awi na Iri' Jam awi na Iri' Jam ta na quem. Oro wari' ma' quem, querec iri nana pain ca quep ma' mami' xine tocon ne, awi na Iri' Jam awi na Iri' Jam ta nana quem.
Actualmente seleccionado:
Lucas 18: TBPN
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Copyright 2023 Missão Novos Tribos do Brasil
Lucas 18
18
Ca na e' ne pain ca tomi' ho' tomi' ho' xun Iri' Jam
1Pijim' ac tococwa na co taxipa' ca ma'. Pijim' joc mam' mi' tata cam narima' co tomi' ho' tomi' ho' non juiz pain carawa ca param cama ma'. Pijim' joc mam' mi' tata cam, ma' ta taraju pa' hwe pain ca na e' ne pain ca tomi' ho' tomi' ho' hun Iri' Jam ta tata. Ta naro camain' hwe pain ca tomi' ho' tomi' ho' hun me tata. 2Ca' na ca pijim' tococwa ma': Ma' na wari' co juiz pe ho' nonon oro win ma' ca pain cidade nucucun. Om ca jin' camain' con Iri' Jam, om ca xiram pa' camain' tococwa oro wari' quem. 3Ma' na narima' co pe nain cidade nucucun ma'. Wara mi' pin ca' nam taxicam. Tama' hwet ho' hwet ho' non juiz ma'. Jain jain na pain ca tomi' con. Quep xiho' ne con wari' co mixein napa' ma' me. Tomi' xo' ron, nain ho' ne con me na ca tomi' con ma'.
4-5Tama' tomi' ho' tomi' ho' paxi' non, ane om ha' cam ne. Om ca quep xiho' ram ha' ca. Aram aram tomi' pan ac xucun na: Mija a xira narima' cwa'! Om paxi' na ca jin' ton Iri' Jam. Om paxi' na ca xiram pa' toton oro wari' ma' quem. Miri'om e' inonon co xiram pa' xut nanapa' ma' quem. Ane to' i'ina capa' pain ca tama' tomi' ho' tomi' ho' capa' cam cwa' ne. Quep xiho' tam ta. Tomi' querec xo' ton, am iri'o' ne pain ca mixein cam ma'. Mo ta querec pin' ton pain ca em' nucun pain ca mixein cam ma', tomi' mi' ac ton tara pain ca wap wa ta na, ac i ma' na ca pijim' tococwa cam narima' con juiz ma'.
6Tomi' tomi' tiquin' ac ca na Taramaxicon nexi': Noro jein ca tomi' nucun juiz co mixein ma'. 7Quep xiho' tam ta na. Om ta ac i ma' ca Iri' Jam quem ra? Om ta quep xiho' cocon oro wari' nucun co wara tora' ca ma', co tama' quep xiho' xut cocon oro wari' co mixein nanaparut cwa' nonon pain xec je pain xim quem ra? Miri'om cara totoron ra? Om ta miri'om cara cocon ta. 8Je ca tomi' xuhu' ca' ac tococwa na. Quep xiho' hap totoron oro wari' co wara tora' ca ma'. Tomi' mi' hap totoron pain ca wap wa oro wari' co mixein nonon quem. Ac i ma' ton paxi' nonon. Ane tomi' querec pan xije ca' ne. Wata' pain ca Iri' Wari' ta' ca', tomi' querec pan xije: Ma' ma' wet tatara oro wari' co howa nonon Iri' Jam pain ca aram aram in qui' tain macan' ra? Howa howa wet totoron pain ca quep xiho' taxipa' ton nonon ra na ca tomi' tococwa ma'.
Ca om na ne pain ca xec xec iri' pain ca tomi' xun Iri' Jam
9To nanain i ma' oro wari' co coromicat ca' xucucun: Awi urut, tama' ara xo' urut, hohot urut con Iri' Jam xi' ma nana, ac i ma' na ca coromicat nucucun. Tomi' napat nonon oro xucucun wari' ma' quem. Je ca pijim' cocon Jeju ma', pijim' joc mam' mi' tata con fariseu con wari' co taramaja mi' nonon oro taramaxicon pain ca cut in taxipa' cain oro imposto nucucun oro wari'. Ca' na ca pijim' nucun: 10Ma' 2 nana wari' co mama' nanain cote ne xiricon Iri' Jam. Tomi' xun Iri' Jam ta nana. Fariseu na xucun. Xucun ma' iri na ne, cut in taxipa' nain oro imposto. 11Corom mama' iri nanain ca tao' caho' nein cote ne xiricon Iri' Jam ne, xat pe ac cain i ma' na fariseu ma'. Tomi' ton Iri' Jam ta ac ca na. Om ca hwet ne ca tomi' nucun, tomi' pan xucun pain ca coromicat nucun. Ca' na ca tomi' con ma': Iri' Jam ac ca na. Tomi' querec te inem pain ca om an xiho' toton oro caracat ma': Co param ximama' nanain caramaxicocon oro win ma' caca ma', co om ximicocon ma', co quep nanam manacocon oro win ma' caca ma' quem, tomi' querec te inem pain ca om an xiho' toton ta. Tomi' querec te inem pain ca om an xiho' ton caxicon wari' cwa' quem, co cut in taxipa' nain imposto cwa'. 12An pe taxipa' inain ca cao' wa pain ca tomi' xim xim quem Iri' Jam. Ma' 2 taxipa' napa' xec pain oro semana pain ca an pe tain ca cao' wa pum. Mi' taxipa' inem pain dízimo nein oro carawa ca cut ta' quem, ac i ma' ina pain ca xut xo' ta' ca' na ca tomi' ca fariseu pain ca tomi' con Iri' Jam.
13Co ma' co cut in taxipa' imposto ma' iri na ne, mo mo pe na. Om ca noro piri' ca, noro quiji' nain macan', xi wixipa' ara ca ta. Wap nain quimacon pain ca querec pin' xucun pain ca pan tem nucun. Xiram pa' ne ta Iri' Jam. Caracat ara xi' ina ta na. Ac i ma' na ca pijim' nucun Jeju ma'.
14Je ca tomi' xuhu' ca' ac tococwa na. In mama' iri nanain xiricocon ne, querec hohot pan inem ta non Iri' Jam co ma' co cut in taxipa' imposto ma'. Fariseu ma' iri na ne, om ca querec hohot pan inem ta con Iri' Jam. Je ca tomi' xuhu' ca': Wari' co xec xec ma', pain ca hwara' opa ina xi' ma ca ma', to' wixipa' ac tocwa tara. Wari' co om xec xec ma' iri na ne, pain ca om ca hwara' opa ta' ta pan xucun ma', to' hwara' opa pin ac tocwa tara quem na ca tomi' tococwa ma'.
Ca na e' ne pain ca an xiho' xuxun oro hwijima' pain ca om xec xec querec nucucun
Mateus 19.13-15; Marcos 10.13-16
15Ma' ac cacama na co o qui' nanam humaxicacam. O mi' nanam con Jeju. Ma' ta quep mamam pain winacacam pain ca tomi' mi' mamam con Iri' Jam ta nonon. Querec iri nanam co taxipa' ca ma' ne, pain ca o qui' cacam humaxicacam ma', tomi' in pin ac cacam na. Ta o mi' hun cacam humajuhu' me ta nanam.
16Ane tomi' in pin cocon Jeju ne. Harahap je ta ac tacacama na hwijima' ma', tomi' ac tococwa na co taxipa' ca ma' quem: Ta narain ho' hwehwem pain ca hwet cacapa' hwijima' cwa' me ta. Ta tomi' in pin hwehwem me ta. Oro wari' co an xiho' nanam pain ca om xec xec nequequem ma', pain ca howa cacapa' ma', wiricoco tatara co taramaxicon pe ho' ca Iri' Jam ta. 17Je ca tomi' xuhu' ca', tomi' iri'o' inuhu': Mo ta om an xiho' hwehwem hwijima' pain ca tomi' querec te cocon Iri' Jam pain ca taramaxicon pe ho' xuhu' ta cocon ma', om ta hwet camain' hun pain ca taramaxicon pe ca pain pawin cain ta na ca tomi' tococwa ma'.
Ca to' i'ina capari' oro caramajixi' pain ca xin ne xun Iri' Jam pain ca taramaxicon pe ho' xim capari'
Mateus 19.16-30; Marcos 10.17-31
18Ma' ac ca na wari' co hwara' opa ma'. Tomi' querec ac con na Jeju: Taramaxicon co awi, co ca' na taxipa' capijacon Iri' Jam ac con na. Cain' cain' xita' quem? Param inain ca e' cara pe ho' ton Iri' Jam ta non.
19Para awi ma mapa' quem ac con na. Om na wari' co awi. Xica' pe na Iri' Jam co awi. 20Taxi' ara xi' main oro capijacon Iri' Jam ca tomi' ha' je capari' pane. Ca' na con: Ta quep mam manacon win ma' ma me ta. Ta to' pa' mon wari' me ta. Ta an noc xa ma me ta. Ta tomi' mixein mi' mon pain ca em' wa win ma' ma me ta. Tomi' ha' ron cote ma cam jim ta, ac i ma' na ca tomi' ha' je capari' ta na ca tomi' xo' con ma'.
21Om na, tama' tomi' ha' tomi' ha' pi' pin inain i ma' ta. Tomi' ha' qui' inain pain ca pije' ne pane ac con na.
22Taraju iri non Jeju ne, pain ca tomi' ac i ma' ca ma', tomi' ac con na: Ma' ma' wet na carawa ca om ara querec ma ma' non. Vender vender pi' pin rain oro caramajum. Cut iri rain dinheiro nein ne, cut mi' ac momon pain tara co om nonon carawa. Caramaju pe ac main tara pawin cain. Cut mi' cut mi' pi' pin iri roron pain dinheiro nem ne, in hwet ac mapa' tara, ja' ja' ac mapa' tara ta na ca tomi' con ma'.
23Taraju iri nain i ma' ne, tomi' xaxa' ac ca na, xi caramaju tamana ara ca ta. 24Querec iri non Jeju ne, pain ca tomi' xaxa' tamana nucun ma', tomi' ac ca na: Oro wari' co caramaju nana ma', i'ina tamana nonon pain ca xin ne cocon Iri' Jam pain ca taramaxicon pe ho' toton cocon ta. 25Win ne camelo ma'. Cote ne carawa na camelo. Ha' xirain pain ca corom nein wijimain manain ca mam' oc tocwa wom ra? Om xi ha' nein. I'ina xirain, om xi corom ac nein. Ac i ma' na con wari' co caramaju ma' quem. I'ina tamana non pain ca xin ne con Iri' Jam pain ca taramaxicon pe ho' ton con ta. Tomi' iri'o' inuhu' ta na ca tomi' tococwa ma'.
26Oro wari' co taraju nonon pain ca tomi' ac i ma' ca ma', tomi' querec ac cocon na: Cain' cain' xira quem? Cain' xi witan ac wa quem nonon.
27Om na, oro wari' ma', om ca to' witan pan ac xucucun. Iri' Jam ma' iri na ne, ha' non pain ca to' witan cocon oro wari' na ca tomi' tococwa ma'.
28Tomi' ac con na Pedro. Win urut ca'. An to an to pi' pin urut pain oro caramajuxut ta. Ma' ta ja' ja' xim urut pum ta non.
29Om na, je ca tomi' xuhu' ca', tomi' iri'o' inuhu' ta ac tococwa na. Wari' co paca' nain xiricon cam manacon cocon xurucun con cote ca cocon mana panxica ma', wari' co ara ac i ma' ma', pain ca taramaja mi' xim capa' pain ca pijim' hwet cocon oro wari' pain ca to' witan ton cocon Iri' Jam ma', 30wara cut tamana tarain carawa ca awi pain xocori ca'. Mija tara carawa ca awi ca cut ta' ca ma', mija tiquin' ca' tarain carawa ca paca' ca. Aram aram mi' ac tocwa tara pain ca om pi' ra ha' ne ca e' wa quem na ca tomi' tococwa ma'.
Ca tomi' pe mami' cain ca mi' pin ta' nucun je pain ca e' mami' ta' nucun quem
Mateus 20.17-19; Marcos 10.32-34
31Harahap je, xuruxut ni ca' xuxun oro wari' cwa' ac tococwa na co taxipa' ca ma', co ma' 12 nana ma', tomi' ac tococwa na: Taraju wet xine e'. Mama' xin irin Jerusalém ta. Tan' mama' iri xi' ne, hwerehwet hwerehwet pi' pin ac ne tara oro ca xirao' nucucun oro profeta cara pane, pain ca xirao' to cacain oro carawa ca ara ton napa' pain ca Iri' Wari' ta' ca'. 32Tan' mama' iri xi' ne, quep ac cacapa' tara co noc nanapa' ma'. O mi' ac cacapa' tara cocon oro taramaxicon nucucun co om judeu nana ma' quem. Tatam' tatarapa', tomi' xirac ac cacapa' tara. Tomi' napat tatarapa', cupa' mi' tatarapa', wap ac cacapa' tara, to' pa' pin ac cacapa' tara quem. 33Ma' 3 pin iri tara xec pain ca mi' pin ne ne, e' mami' ac ta' tara ta na ca tomi' tococwa ma'.
34Co taxipa' ca ma', om ca taraju pa' camain' cacain ca tomi' nucun Jeju. Ac ca joc xim tococwa pain na ca tomi' mao nein con.
Ca quep ma' pin cain tocon wari' Jeju
Mateus 20.29-34; Marcos 10.46-52
35Wixicam pin ac cain na Jericó Jeju cocon co taxipa' ca ma'. Xao pe pe nain cacarain wana wari' co om tocon ma' quem. Mi' ne taxipa' nonon pain dinheiro oro wari'. 36Taraju iri tata oro wari' co xuruxut tiquin' ca' nonon ma', tomi' querec ac ca na: Ma' carawa pahu'? Para mija hwe pain ca xuruxut tiquin' ca' mahu' ma' na ca tomi' querec tococwa ma'.
37Om na, maqui' na Jeju ma', co wari' nein Nazaré ma' ac cocon na.
38Merem pan ac ca na: Jeju. Winacon Davi#18.38 Taraju pa' je e'. Ac i ma' na ca tomi' taxipa' caca oro judeu pane, pain ca tomi' mi' cocon Cristo co wara tomi' pe ca Iri' Jam pane, pain ca main maqui' tara wari' ne co to' witan toton nonon oro wari' ta tococwa pane. Cristo nonon, Winacon Davi nonon, je je ari na ca tomi' mao nein cocon. Pain ca Winacon Davi con Jeju wari' ma', querec pin' non pain ca Cristo ca ma', pain ca to' witan toton cocon oro wari' ma'. . Xiram pa' ne ta Jeju na ca merem nucun.
39Oro wari' co o nana ma', tomi' in pin ac cocon na. Merem maho' ra ta paxi' nonon, ane om ha' ca ne. Merem merem tiquin' na, merem mip na: Winacon Davi. Xiram pa' ne ta Winacon Davi na ca merem nucun.
40Xat ac ca na Jeju. O mi' xine con ta ac tococwa na. Wixicam pin iri non ne, tomi' querec pan ac con na Jeju: 41Ma' carawa ca ara mi' ne mapa' ma' quem non.
Om na, querec mami' xita' na ina ta Taramaxicon ac con na.
42Tomi' ac con na Jeju: Querec mami' ra ta. Xio pin ma, xi om ne ca howa ara mapa' ta na ca tomi' con ma'. 43Querec mami' hap ac ca na, ja' ja' ac con na Jeju. Awi na Iri' Jam awi na Iri' Jam ta na quem. Oro wari' ma' quem, querec iri nana pain ca quep ma' mami' xine tocon ne, awi na Iri' Jam awi na Iri' Jam ta nana quem.
Actualmente seleccionado:
:
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Copyright 2023 Missão Novos Tribos do Brasil